Asia Cup 2025: ಭಾರತ-ದಕ್ಷಿಣ ಕೊರಿಯಾ ನಡುವಣ ಸೂಪರ್‌-4ರ ಪಂದ್ಯ ಡ್ರಾ!

ರಾಜ್‌ಗಿರ್: ಏಷ್ಯಾ ಕಪ್‌ (Asia Cup 2025) ಹಾಕಿ ಟೂರ್ನಿಯ ಸೂಪರ್ 4ರ ತನ್ನ ಮೊದಲ ಪಂದ್ಯದಲ್ಲಿ ಆತಿಥೇಯ ಭಾರತ ತಂಡ (India Hockey), ಹಾಲಿ ಚಾಂಪಿಯನ್ ಕೊರಿಯಾ ವಿರುದ್ಧ 2-2 ಗೋಲುಗಳಿಂದ ಡ್ರಾ ಸಾಧಿಸುವ ಮೂಲಕ ತನ್ನ ಅಜೇಯ ಅಭಿಯಾನವನ್ನು ಮುಂದುವರಿಸಿದೆ. ಹಾರ್ದಿಕ್ ಸಿಂಗ್ (8ನೇ ನಿಮಿಷ) ಭಾರತಕ್ಕೆ ಆರಂಭಿಕ ಮುನ್ನಡೆ ಒದಗಿಸಿದರು, ನಂತರ ಯಾಂಗ್ ಜಿಹುನ್ (12 ನೇ ನಿಮಿಷ) ಮತ್ತು ಹ್ಯೊನ್‌ಹಾಂಗ್ ಕಿಮ್ (14 ನೇ ನಿಮಿಷ) ಸತತ ಗೋಲುಗಳನ್ನು ಗಳಿಸಿ ಕೊರಿಯಾವನ್ನು ಮುನ್ನಡೆಸಿದರು. ಕೊನೆಯ ಕ್ವಾರ್ಟರ್‌ನಲ್ಲಿ ಮಂದೀಪ್ ಸಿಂಗ್ (52 ನೇ ನಿಮಿಷ) ಸಮಬಲ ಸಾಧಿಸಿ ಭಾರತಕ್ಕೆ ಒಂದು ಪಾಯಿಂಟ್ ಗಳಿಸಿಕೊಟ್ಟರು. ಭಾರತ ತಂಡ, ಪೂಲ್ ಎ ನ ಎಲ್ಲಾ ಪಂದ್ಯಗಳನ್ನು ಗೆದ್ದು, ಚೀನಾವನ್ನು 4-3, ಜಪಾನ್ ಅನ್ನು 3-2 ಮತ್ತು ನಂತರ ಕಜಕಿಸ್ತಾನ್ ಅನ್ನು 15-0 ಅಂತರದಿಂದ ಸೋಲಿಸಿತ್ತು.

ಇದಾದ ನಂತರ ಪಂದ್ಯದ ಎರಡನೇ ಕ್ವಾರ್ಟರ್‌ನಲ್ಲಿ ಭಾರತ ಮತ್ತು ದಕ್ಷಿಣ ಕೊರಿಯಾ ನಡುವೆ ಕಠಿಣ ಹೋರಾಟ ನಡೆದಿತ್ತು ಹಾಗೂ ಈ ವೇಳೆ ಎರಡೂ ತಂಡಗಳಿಂದ ಒಂದೇ ಒಂದು ಗೋಲು ಕೂಡ ಮೂಡಿಬರಲಿಲ್ಲ. ನಂತರ ಮೂರನೇ ಕ್ವಾರ್ಟರ್ ಕೂಡ ಗೋಲು ರಹಿತವಾಗಿ ಮುಗಿಯಿತು. ಆದಾಗ್ಯೂ, ಮೂರನೇ ಕ್ವಾರ್ಟರ್‌ನ ಕೊನೆಯ ನಿಮಿಷದಲ್ಲಿ ಭಾರತ ತಂಡಕ್ಕೆ ಸಮಬಲ ಸಾಧಿಸಲು ಉತ್ತಮ ಅವಕಾಶ ಸಿಕ್ಕಿತು, ಆದರೆ ಪೆನಾಲ್ಟಿ ಕಾರ್ನರ್ ಅನ್ನು ಗೋಲಾಗಿ ಪರಿವರ್ತಿಸಲು ಸಾಧ್ಯವಾಗಲಿಲ್ಲ.

Hockey Asia Cup: ಹರ್ಮನ್‌ಪ್ರೀತ್ ಹ್ಯಾಟ್ರಿಕ್‌ ಗೋಲು; ಏಷ್ಯಾ ಕಪ್‌ನಲ್ಲಿ ಭಾರತ ಶುಭಾರಂಭ

ಎರಡನೇ ಮತ್ತು ಮೂರನೇ ಕ್ವಾರ್ಟರ್‌ಗಳಲ್ಲಿ ಅವಕಾಶವನ್ನು ಕಳೆದುಕೊಂಡ ನಂತರ, ಕೊನೆಯ ಕ್ವಾರ್ಟರ್‌ನ ಅರ್ಧಾವಧಿಯಲ್ಲಿ ಭಾರತ ತಂಡ, ಬಲವಾಗಿ ಕಮ್‌ಬ್ಯಾಕ್‌ ಮಾಡಿತು. ಸುಖ್‌ಜೀತ್ ನೀಡಿದ ಪಾಸ್ ಅನ್ನು ಮಂದೀಪ್ ಚೆನ್ನಾಗಿ ಬಳಸಿಕೊಳ್ಳುತ್ತಾ ಚೆಂಡನ್ನು ಗೋಲ್ ಪೋಸ್ಟ್‌ಗೆ ಇರಿಸಿ ಸ್ಕೋರ್ ಅನ್ನು 2-2ಕ್ಕೆ ಸಮಗೊಳಿಸಿದರು. ಈ ಗೋಲಿನ ನಂತರ, ಟೀಮ್ ಇಂಡಿಯಾ ಆಟಗಾರರು ತುಂಬಾ ಉತ್ಸಾಹಭರಿತರಾದರು ಮತ್ತು ಸಮಬಲದ ನಂತರ, ಮುಂದಿನ ನಿಮಿಷದಲ್ಲಿ ಮತ್ತೊಂದು ಪೆನಾಲ್ಟಿ ಕಾರ್ನರ್ ಪಡೆದರು, ಆದರೆ ಅದೃಷ್ಟ ಅವರಿಗೆ ಅನುಕೂಲಕರವಾಗಲಿಲ್ಲ.

ಭಾರತ ಈ ಅವಕಾಶವನ್ನು ಗೋಲಾಗಿ ಪರಿವರ್ತಿಸಲು ಸಾಧ್ಯವಾಗಲಿಲ್ಲ. ಆದಾಗ್ಯೂ, ಕೊರಿಯಾ ತಂಡವು ಸಹ ತೀವ್ರವಾಗಿ ಪ್ರಯತ್ನಿಸಿತು, ಆದರೆ ಅದು ಭಾರತ ತಂಡದ ರಕ್ಷಣಾ ಕೋಟೆಯನ್ನು ಭೇದಿಸಲು ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಪಂದ್ಯ 2-2 ಅಂತರದಲ್ಲಿ ಡ್ರಾನಲ್ಲಿ ಅಂತ್ಯ ಕಂಡಿತು.