ಏಷ್ಯನ್‌ ಗೇಮ್ಸ್‌ಗೆ ತೆರಳಿದ ಟೀಮ್‌ ಇಂಡಿಯಾ ಕ್ರಿಕೆಟಿಗನ ವಿರುದ್ಧ ಲೈಂಗಿಕ ದೌರ್ಜನ್ಯದ ಆರೋಪ!

ನವದೆಹಲಿ, ಸೆ.22: ಕ್ರಿಕೆಟಿಗ ವಿಪ್ರಜ್ ನಿಗಮ್ ಅವರ ವಿರುದ್ಧ, ಜುಲೈ 2025ರಲ್ಲಿ ನೋಯ್ಡಾದ ಹೋಟೆಲ್ ಒಂದರಲ್ಲಿ ಮದುವೆಯ ನೆಪದಲ್ಲಿ ಲೈಂಗಿಕ ದೌರ್ಜನ್ಯ ಮತ್ತು ದೈಹಿಕ ಹಲ್ಲೆ ನಡೆಸಿದ ಗಂಭೀರ ಆರೋಪಗಳು ಕೇಳಿಬಂದಿವೆ. ಮದುವೆಯಾಗುವುದಾಗಿ ನಂಬಿಸಿ ವಂಚಿಸಲಾಗಿದೆ ಎಂದು ಆರೋಪಿಸಿರುವ ಯುವತಿಯೊಬ್ಬರು, ನ್ಯಾಯಕ್ಕಾಗಿ ವಿಪ್ರಜ್‌ ಅವರ ನೋಯ್ಡಾ ನಿವಾಸದ ಹೊರಗೆ ಭೇಟಿಗಾಗಿ ಕಾಯುತ್ತಿದ್ದಾರೆ. ಈ ಪ್ರಕರಣದ ಸಂತ್ರಸ್ತೆ ಎಂದು ಹೇಳಲಾದ ಮಹಿಳೆ ಹೈದರಾಬಾದ್ ಮೂಲದವರು.

ವರದಿಯ ಪ್ರಕಾರ, ಕ್ರಿಕೆಟಿಗನ ತಂದೆ ಆ ಮಹಿಳೆಯೊಂದಿಗೆ ದೂರವಾಣಿಯಲ್ಲಿ ಮಾತನಾಡಿ, ಒಂದು ವಾರದ ನಂತರ ಈ ಬಗ್ಗೆ ಚರ್ಚಿಸುವುದಾಗಿ ಭರವಸೆ ನೀಡಿದರು. ಗಾಯಗೊಂಡ ಸ್ಪಿನ್ನರ್ ವರುಣ್ ಚಕ್ರವರ್ತಿ ಅವರ ಬದಲಿಗೆ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿರುವ ಹಾಗೂ 2026ರ ಏಷ್ಯನ್ ಗೇಮ್ಸ್ ತಂಡದಲ್ಲೂ ಸ್ಥಾನ ಪಡೆದಿರುವ ನಿಗಮ್ ಅವರೊಂದಿಗೆ ಮಾತ್ರ ಮಾತನಾಡಲು ಬಯಸಿದ್ದಾಗಿ ಮತ್ತು ಯಾವುದೇ 'ವಿವಾದ'ವನ್ನು ಸೃಷ್ಟಿಸಲು ತಾನು ಇಚ್ಛಿಸುವುದಿಲ್ಲ ಎಂದು ಆ ಮಹಿಳೆ ದಿನಪತ್ರಿಕೆಯೊಂದಕ್ಕೆ ತಿಳಿಸಿದರು.

ನಿಗಮ್ ಮತ್ತು ಆ ಮಹಿಳೆ ಪರಸ್ಪರರ ವಿರುದ್ಧ ಪ್ರಕರಣಗಳನ್ನು ದಾಖಲಿಸಿದ್ದಾರೆ. ನವೆಂಬರ್ 8, 2025 ರಂದು, ಆ ಮಹಿಳೆಯು ವಿವಿಧ ಮೊಬೈಲ್ ಸಂಖ್ಯೆಗಳಿಂದ ಕರೆ ಮಾಡಿ, ಸುಳ್ಳು ಪ್ರಕರಣವೊಂದರಲ್ಲಿ ತನ್ನನ್ನು ಸಿಲುಕಿಸುವುದಾಗಿ ಬೆದರಿಕೆ ಹಾಕುತ್ತಿದ್ದಾಳೆ ಎಂದು ಆರೋಪಿಸಿ ನಿಗಮ್ ಬಾರಾಬಂಕಿ ಕೊತ್ವಾಲಿಯಲ್ಲಿ ದೂರು ದಾಖಲಿಸಿದರು.

ಏಷ್ಯನ್ ಗೇಮ್ಸ್; ರೋಚಕ ಪಂದ್ಯದಲ್ಲಿ ಥಾಯ್ಲೆಂಡ್ ಮಣಿಸಿ ಕ್ವಾರ್ಟರ್ ಫೈನಲ್‌ ತಲುಪಿದ ಭಾರತ ಮಹಿಳಾ ಟಿಟಿ ತಂಡ

ನಂತರ ಆ ಮಹಿಳೆ ಗೌತಮ್ ಬುದ್ಧ ನಗರದ ಎಕ್ಸ್‌ಪ್ರೆಸ್‌ವೇ ಪೊಲೀಸ್ ಠಾಣೆಯಲ್ಲಿ ನಿಗಮ್ ವಿರುದ್ಧ ಲೈಂಗಿಕ ಶೋಷಣೆಯ ಆರೋಪ ಹೊರಿಸಿ ದೂರು ದಾಖಲಿಸಿದರು. ಮೇ 2025ರಲ್ಲಿ ಸಾಮಾಜಿಕ ಜಾಲತಾಣದ ಮೂಲಕ ತಾವು ಪರಿಚಯವಾದೆವು ಮತ್ತು ಮದುವೆಯ ಭರವಸೆ ನೀಡಿ ನಿಗಮ್ ತನ್ನನ್ನು ಆಮಿಷವೊಡ್ಡಿ ಕರೆದೊಯ್ದರು ಎಂದು ಅವರು ಆರೋಪಿಸಿದರು.

ಮಹಿಳೆ ದೂರಿನ ಪ್ರಕಾರ, ಜುಲೈ 29, 2025 ರಂದು ವಿಪ್ರಜ್‌ ನೋಯ್ಡಾದ ಹೋಟೆಲ್‌ವೊಂದಕ್ಕೆ ಕರೆದೊಯ್ದು, ಅಲ್ಲಿ ಅತ್ಯಾಚಾರ ಮತ್ತು ಹಲ್ಲೆ ನಡೆಸಿದ್ದಾನೆ ಎಂದು ಆರೋಪಿಸಲಾಗಿದೆ. ಈ ಪ್ರಕರಣವು ಡಿಸೆಂಬರ್ 16, 2025 ರಂದು ದಾಖಲಾಗಿದೆ.

ನಿಗಮ್ ಸ್ಪಿನ್ ಬೌಲಿಂಗ್ ಮಾಡುತ್ತಾರೆ ಮತ್ತು ಕೆಳ-ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುತ್ತಾರೆ. 22 ವರ್ಷದ ಇವರು ಉತ್ತರ ಪ್ರದೇಶ ಪರ ಆರು ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿದ್ದಾರೆ ಹಾಗೂ ಐಪಿಎಲ್‌ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದ ಪರ ನಿಯಮಿತವಾಗಿ ಆಡುತ್ತಾ, 19 ಪಂದ್ಯಗಳಲ್ಲಿ 36.07ರ ಸರಾಸರಿಯಲ್ಲಿ 13 ವಿಕೆಟ್‌ಗಳನ್ನು ಪಡೆದಿದ್ದಾರೆ.