IND v SA: ಮೂರನೇ ವೇಗದ ಶತಕ ಸಿಡಿಸಿ ಎಲೈಟ್‌ ಲಿಸ್ಟ್‌ ಸೇರಿದ ಜೆಮಿಮಾ ರೊಡ್ರಿಗಸ್!
ಕೊಲಂಬೊದಲ್ಲಿ ಜೆಮಿಮಾ ರೊಡ್ರಿಗಸ್ ಅದ್ಭುತ ಶತಕ ಗಳಿಸಿದರು. ಅವರು 123 ರನ್‌ಗಳ ಬಿರುಗಾಳಿಯ ಇನಿಂಗ್ಸ್ ಆಡಿದರು. ದೀಪ್ತಿ ಶರ್ಮಾ ಕೂಡ 93 ರನ್ ಗಳಿಸಿದರು. ಭಾರತ ಮಹಿಳಾ ತಂಡ ತನ್ನ ಪಾಲಿನ 50 ಓವರ್‌ಗಳಲ್ಲಿ 337 ರನ್ ಕಲೆ ಹಾಕಿತು. ಜೆಮಿಮಾ ರೊಡ್ರಿಗಸ್ ಅವರ ಶತಕವು ಭಾರತೀಯ ಮಹಿಳಾ ಕ್ರಿಕೆಟ್‌ನಲ್ಲಿ ಮೂರನೇ ವೇಗದ ಶತಕವಾಗಿದೆ.
ಜೆಮಿಮಾ ರೊಡ್ರಿಗಸ್ ಶತಕ
Ramesh Kote
May 7, 2025 4:53 PM
ಕೊಲಂಬೊ: ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ (Indian women Team) ಭರವಸೆಯ ಆಲ್‌ರೌಂಡರ್ ಜೆಮಿಮಾ ರೊಡ್ರಿಗಸ್ ( Jemimah Rodrigues) ತ್ರಿಕೋನ ಸರಣಿಯ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾದ (South Africa) ಬೌಲರ್‌ಗಳ ವಿರುದ್ಧ ಸ್ಪೋಟಕ ಬ್ಯಾಟ್‌ ಮಾಡಿದರು. ಅವರು 101 ಎಸೆತಗಳಲ್ಲಿ 15 ಬೌಂಡರಿ ಮತ್ತು ಒಂದು ಸಿಕ್ಸರ್ ನೆರವಿನಿಂದ 123 ರನ್ ಗಳಿಸಿ ವಿನಾಶಕಾರಿ ಇನಿಂಗ್ಸ್ ಆಡಿದರು. ಇವರಲ್ಲದೆ, ಮತ್ತೊಬ್ಬ ಆಲ್‌ರೌಂಡರ್ ದೀಪ್ತಿ ಶರ್ಮಾ 84 ಎಸೆತಗಳಲ್ಲಿ 10 ಬೌಂಡರಿ ಮತ್ತು 2 ಸಿಕ್ಸರ್‌ಗಳ ಸಹಾಯದಿಂದ 93 ರನ್ ಗಳಿಸಿದರು. ಆದರೆ ಜೆಮಿಮಾ ರೊಡ್ರಿಗಸ್ ಅವರ ಶತಕದ ಬಲದಿಂದ ಭಾರತ ಮಹಿಳಾ ತಂಡ, ನಿಗದಿತ 50 ಓವರ್‌ಗಳಲ್ಲಿ 9 ವಿಕೆಟ್‌ಗಳ ನಷ್ಟಕ್ಕೆ 337 ರನ್‌ಗಳ ಬೃಹತ್ ಸ್ಕೋರ್ ಗಳಿಸಿತು.
ತಮ್ಮ ಇನಿಂಗ್ಸ್‌ನಲ್ಲಿ ಜೆಮಿಮಾ ಕೇವಲ 89 ಎಸೆತಗಳಲ್ಲಿ ಶತಕ ಪೂರೈಸಿದರು. ಇದು ಭಾರತೀಯ ಮಹಿಳಾ ಕ್ರಿಕೆಟ್‌ನಲ್ಲಿ ದಾಖಲಾದ ಮೂರನೇ ಅತಿ ವೇಗದ ಏಕದಿನ ಶತಕವಾಗಿದೆ. ಇದಕ್ಕೂ ಮೊದಲು ಟೀಮ್ ಇಂಡಿಯಾದ ಉಪನಾಯಕಿ ಸ್ಮೃತಿ ಮಂಧಾನಾ 70 ಎಸೆತಗಳಲ್ಲಿ ಶತಕ ಸಿಡಿಸಿದ್ದರು. ಈ ವರ್ಷ ಅವರು ಐರ್ಲೆಂಡ್ ವಿರುದ್ಧ ಈ ಇನಿಂಗ್ಸ್ ಅನ್ನು ಆಡಿದ್ದರು. ಆದರೆ ಟೀಮ್ ಇಂಡಿಯಾದ ಪ್ರಸ್ತುತ ನಾಯಕಿ ಹರ್ಮನ್ಪ್ರೀತ್ ಕೌರ್ ಎರಡನೇ ಸ್ಥಾನದಲ್ಲಿದ್ದಾರೆ. 2024 ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 87 ಎಸೆತಗಳಲ್ಲಿ ಅವರು ಈ ಶತಕ ಬಾರಿಸಿದ್ದರು.
IPL 2025: ಭಾರತ ತಂಡದಿಂದ ಹೊರಬಿದ್ದ ಬೆನ್ನಲ್ಲೇ ಐಪಿಎಲ್ಗೆ ಎಂಟ್ರಿ ಕೊಟ್ಟ ಅಭಿಷೇಕ್ ನಾಯರ್
ಈ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್‌ ಮಾಡುವಂತಾದ ಮಹಿಳಾ ತಂಡಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. ದಕ್ಷಿಣ ಆಫ್ರಿಕಾ, ಪ್ರತೀಕಾ ರಾವಲ್ ಅವರನ್ನು ಕೇವಲ ಒಂದು ರನ್‌ಗೆ ಮತ್ತು ಹರ್ಲೀನ್ ಡಿಯೋಲ್ ಅವರನ್ನು 4 ರನ್‌ಗೆ ಔಟ್ ಮಾಡಿತು. ಇದಾದ ನಂತರ, ನಾಯಕಿ ಹರ್ಮನ್ಪ್ರೀತ್ ಕೌರ್ 28 ರನ್ ಗಳಿಸಿ ಔಟಾದರೆ, ಸ್ಮೃತಿ ಮಂಧಾನಾ 51 ರನ್ ಗಳಿಸಿ ಔಟಾದರು. ಇದಾದ ನಂತರ, ಜೆಮಿಮಾ ಜವಾಬ್ದಾರಿ ವಹಿಸಿಕೊಂಡು ದಕ್ಷಿಣ ಆಫ್ರಿಕಾದ ಬೌಲರ್‌ಗಳನ್ನು ಬಲವಾಗಿ ಎದುರಿಸಿದರು. ದೀಪ್ತಿ ಶರ್ಮಾ ಜೊತೆಗೂಡಿ ತಂಡವನ್ನು ದೊಡ್ಡ ಸ್ಕೋರ್‌ಗೆ ಕೊಂಡೊಯ್ದರು. ರಿಚಾ ಘೋಷ್ 12 ಎಸೆತಗಳಲ್ಲಿ 2 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ 20 ರನ್ ಗಳಿಸಿದರು. ಮತ್ತೊಂದೆಡೆ, ದಕ್ಷಿಣ ಆಫ್ರಿಕಾ ಪರ ಮಸಾಬಟಾ ಕ್ಲಾಸ್, ನಡಿನ್ ಡಿ ಕ್ಲರ್ಕ್ ಮತ್ತು ನಾನ್ಕುಲುಲೆಕೊ ಮ್ಲಾಬಾ 2-2 ವಿಕೆಟ್ ಪಡೆದರು.
An impeccable knock by Jemimah Rodrigues as she brings up her second ODI century 🙌#SAvIND 📝: https://t.co/Qymb9EDNrv pic.twitter.com/lFt5ntUEZe
— ICC (@ICC) May 7, 2025
201 ರನ್‌ಗಳನ್ನು ಕಲೆ ಹಾಕಿರುವ ರೊಡ್ರಿಗಸ್
ಪ್ರಸ್ತುತ ನಡೆಯುತ್ತಿರುವ ಮಹಿಳಾ ತ್ರಿಕೋನ ಏಕದಿನ ಸರಣಿಯಲ್ಲಿ ಭಾರತ ಜೆಮಿಮಾ ರೊಡ್ರಿಗಸ್ ಉತ್ತಮ ಬ್ಯಾಟಿಂಗ್‌ ಪ್ರದರ್ಶನವನ್ನು ತೋರುತ್ತಿದ್ದಾರೆ. ಅವರು ಆಡಿದ ಮೂರು ಇನಿಂಗ್ಸ್‌ಗಳಿಂದ 67.00ರ ಸರಾಸರಿಯಲ್ಲಿ 201 ರನ್‌ಗಳನ್ನು ಬಾರಿಸಿದ್ದಾರೆ. ಆ ಮೂಲಕ ಅತಿ ಹೆಚ್ಚು ರನ್ ಗಳಿಸಿದ ಬ್ಯಾಟರ್‌ಗಳ ಪಟ್ಟಿಯಲ್ಲಿ ಅಗ್ರ ಸ್ಥಾನವನ್ನು ಅಲಂಕರಿಸಿದ್ದಾರೆ.