ಮಲ್ಲಾನ್‌ಪುರ: ವೆಸ್ಟ್ ಇಂಡೀಸ್ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ (IND vs WI) ಭಾರತದ ವಿಕೆಟ್‌ಕೀಪರ್-ಬ್ಯಾಟರ್ ಕೆಎಲ್ ರಾಹುಲ್ (KL Rahul) ಭರ್ಜರಿ ಶತಕ ಸಿಡಿಸಿದ್ದಾರೆ. ಕೇವಲ 80 ಎಸೆತಗಳಲ್ಲಿ ತಮ್ಮ 9ನೇ ಏಕದಿನ ಅಂತಾರಾಷ್ಟ್ರೀಯ ಶತಕ ಪೂರ್ಣಗೊಳಿಸಿದ ರಾಹುಲ್, ಅಂತಿಮವಾಗಿ 87 ಎಸೆತಗಳಲ್ಲಿ ಅಜೇಯ 129 ರನ್ ಗಳಿಸಿದರು. ಇವರ ಶತಕದ ಇನಿಂಗ್ಸ್‌ ನೆರವಿನಿಂದ ಭಾರತ ತಂಡ, ತನ್ನ ಪಾಲಿನ 50 ಓವರ್‌ಗಳಿಗೆ 7 ವಿಕೆಟ್‌ಗಳ ನಷ್ಟಕ್ಕೆ 351 ರನ್‌ಗಳನ್ನು ಕಲೆ ಹಾಕಿತು.
ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಭಾರತದ ಅಗ್ರ ಕ್ರಮಾಂಕದ ಬ್ಯಾಟರ್‌ಗಳು ಉತ್ತಮ ಪ್ರದರ್ಶನ ನೀಡಿದ್ದರಿಂದ ರಾಹುಲ್‌ಗೆ ಬ್ಯಾಟ್ ಮಾಡುವ ಅವಕಾಶ ಸಿಕ್ಕಿರಲಿಲ್ಲ. ಆದರೆ ಮೂರನೇ ಪಂದ್ಯದ ಆರಂಭದಲ್ಲೇ ಭಾರತ ಎರಡು ವಿಕೆಟ್ ಕಳೆದುಕೊಂಡಿತು. ನಂತರ ರೋಹಿತ್ ಶರ್ಮಾ 92 ರನ್‌ಗಳಿಗೆ ಔಟ್‌ ಆದ ಬಳಿಕ ಕ್ರೀಸ್‌ಗೆ ಬಂದ ರಾಹುಲ್, ಜವಾಬ್ದಾರಿಯುತ ಬ್ಯಾಟಿಂಗ್ ಮೂಲಕ ತಂಡದ ಇನಿಂಗ್ಸ್‌ಗೆ ಆಸರೆಯಾದರು.
IND vs WI 3rd ODI: 7 ವರ್ಷಗಳ ಗೋಲ್ಡನ್‌ ಡಕ್‌ಔಟ್‌ ಆದ ಕಿಂಗ್‌ ವಿರಾಟ್ ಕೊಹ್ಲಿ!
80 ಎಸೆತಗಳಲ್ಲಿ ಭರ್ಜರಿ ಶತಕ
ಕೆಎಲ್ ರಾಹುಲ್ ಆರಂಭದಲ್ಲಿ ಎಚ್ಚರಿಕೆಯಿಂದ ಬ್ಯಾಟ್ ಮಾಡಿದರು. ನಂತರ ನಿಧಾನವಾಗಿ ವೇಗ ಹೆಚ್ಚಿಸಿಕೊಂಡ ಅವರು 41 ಎಸೆತಗಳಲ್ಲಿ ಅರ್ಧಶತಕ ಪೂರ್ಣಗೊಳಿಸಿದರು. ಶತಕದ ಗಡಿ ತಲುಪಲು ತಮ್ಮ ಇನಿಂಗ್ಸ್‌ನ ಮೂರನೇ ಸಿಕ್ಸರ್‌ ಬಾರಿಸಿದರು. ಒಟ್ಟು 9 ಬೌಂಡರಿ ಮತ್ತು 3 ಸಿಕ್ಸರ್‌ಗಳ ನೆರವಿನಿಂದ ಶತಕ ದಾಖಲಿಸಿದರು. ಶತಕದ ಬಳಿಕ ರಾಹುಲ್ ಇನ್ನಷ್ಟು ಆಕ್ರಮಣಕಾರಿ ಆಟಕ್ಕೆ ಮುಂದಾದರು. ಅಂತಿಮ ಹಂತದಲ್ಲಿ ಬೌಂಡರಿ ಹಾಗೂ ಸಿಕ್ಸರ್‌ಗಳ ಮೂಲಕ ವೇಗವಾಗಿ ರನ್ ಗಳಿಸಿ 87 ಎಸೆತಗಳಲ್ಲಿ 129 ರನ್‌ಗಳೊಂದಿಗೆ ಅಜೇಯರಾಗಿ ಉಳಿದರು. ಇದು ಏಕದಿನ ಕ್ರಿಕೆಟ್‌ನಲ್ಲಿ ರಾಹುಲ್ ಅವರ ಅತ್ಯಧಿಕ ವೈಯಕ್ತಿಕ ಸ್ಕೋರ್ ಆಗಿದೆ.
ಸಂಕಷ್ಟದಲ್ಲಿ ಭಾರತಕ್ಕೆ ಆಸರೆಯಾದ ರಾಹುಲ್
ಭಾರತದ ಆರಂಭಿಕ ಹಂತ ಉತ್ತಮವಾಗಿರಲಿಲ್ಲ. ಶುಭಮನ್ ಗಿಲ್ ಕೇವಲ ಒಂದು ರನ್‌ಗೆ ಮತ್ತು ವಿರಾಟ್ ಕೊಹ್ಲಿ ಶೂನ್ಯಕ್ಕೆ ಔಟಾದರು. ಈ ವೇಳೆ ಮಾಜಿ ನಾಯಕ ರೋಹಿತ್ ಶರ್ಮಾ ಮತ್ತು ಋತುರಾಜ್ ಗಾಯಕ್ವಾಡ್ ಭಾರತದ ಇನಿಂಗ್ಸ್‌ ಕಟ್ಟಿದರು. ರೋಹಿತ್ 85 ಎಸೆತಗಳಲ್ಲಿ 92 ರನ್ ಗಳಿಸಿದರೆ, ಋತುರಾಜ್ 57 ರನ್ ಬಾರಿಸಿದರು. ಇಬ್ಬರೂ ಸೇರಿ 132 ಎಸೆತಗಳಲ್ಲಿ 137 ರನ್‌ಗಳ ಜೊತೆಯಾಟ ನಡೆಸಿದರು. ನಂತರ ರಾಹುಲ್ ಇನಿಂಗ್ಸ್‌ಗೆ ಮತ್ತಷ್ಟು ಬಲ ತುಂಬಿದರು.
ಕೆಳ ಕ್ರಮಾಂಕದ ಆಟಗಾರರೊಂದಿಗೆ ಕೂಡ ರಾಹುಲ್ ಪರಿಣಾಮಕಾರಿ ಜೊತೆಯಾಟಗಳನ್ನು ಆಡಿದರು. ಗುರ್ನೂರ್ ಬ್ರಾರ್ ಅವರೊಂದಿಗೆ ಕೊನೆಯ ಹಂತದ ಜೊತೆಯಾಟದಲ್ಲಿ ಕೇವಲ 26 ಎಸೆತಗಳಲ್ಲಿ 61 ರನ್‌ಗಳು ಬಂದವು. ಈ ಜೊತೆಯಾಟದಲ್ಲಿ ಬ್ರಾರ್ 8 ರನ್ ಗಳಿಸಿದರೆ, ರಾಹುಲ್ ಆಕ್ರಮಣಕಾರಿ ಬ್ಯಾಟಿಂಗ್ ಮೂಲಕ ಭಾರತದ ಮೊತ್ತವನ್ನು ವೇಗವಾಗಿ ಹೆಚ್ಚಿಸಿದರು.
ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 10,000 ರನ್‌ಗಳ ಮೈಲುಗಲ್ಲು ತಲುಪಿದ ಕೆಎಲ್ ರಾಹುಲ್!
ಭಾರತದ ನಂ.5 ಬ್ಯಾಟರ್‌ಗಳ ಪೈಕಿ ಮೂರನೇ ಗರಿಷ್ಠ ಸ್ಕೋರ್
129* ರನ್‌ಗಳೊಂದಿಗೆ ರಾಹುಲ್ ಭಾರತದ ಪರ ಏಕದಿನ ಕ್ರಿಕೆಟ್‌ನಲ್ಲಿ ನಂ.5 ಕ್ರಮಾಂಕದಲ್ಲಿ ಮೂರನೇ ಗರಿಷ್ಠ ವೈಯಕ್ತಿಕ ಸ್ಕೋರ್ ದಾಖಲಿಸಿದ್ದಾರೆ.
ಯುವರಾಜ್ ಸಿಂಗ್ – 139, ಆಸ್ಟ್ರೇಲಿಯಾ ವಿರುದ್ಧ, 2004
ಎಂ.ಎಸ್. ಧೋನಿ – 134, ಇಂಗ್ಲೆಂಡ್ ವಿರುದ್ಧ, 2017
ಕೆಎಲ್ ರಾಹುಲ್ – 129*, ವೆಸ್ಟ್ ಇಂಡೀಸ್ ವಿರುದ್ಧ, 2026
10,000 ಅಂತಾರಾಷ್ಟ್ರೀಯ ರನ್‌ಗಳ ಮೈಲುಗಲ್ಲು
ಈ ಇನ್ನಿಂಗ್ಸ್‌ನ ಮತ್ತೊಂದು ವಿಶೇಷವೆಂದರೆ ರಾಹುಲ್ 10,000 ಅಂತಾರಾಷ್ಟ್ರೀಯ ರನ್‌ಗಳ ಗಡಿ ದಾಟಿದರು. ಈ ಸಾಧನೆಯೊಂದಿಗೆ ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 10,000 ರನ್ ಪೂರೈಸಿದ 15ನೇ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಒಟ್ಟಿನಲ್ಲಿ 4 ಕ್ಕೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದ ಸ್ಥಿತಿಯಿಂದ ಭಾರತವನ್ನು 351/7ರ ಬೃಹತ್ ಮೊತ್ತದತ್ತ ಕೊಂಡೊಯ್ಯುವಲ್ಲಿ ರಾಹುಲ್ ಅವರ ಅಜೇಯ 129 ರನ್‌ಗಳು ಪ್ರಮುಖ ಪಾತ್ರ ವಹಿಸಿದವು.