IND vs SA: 'ವಿಂಟೇಜ್' ವಿರಾಟ್‌ ಸೆಂಚುರಿ; ಬೃಹತ್‌ ಮೊತ್ತ ಪೇರಿಸಿದ ಭಾರತ
ರಿಷಭ್‌ ಪಂತ್‌ ಬದಲು ಅವಕಾಶ ಪಡೆದ ಋತುರಾಜ್‌ ಗಾಯಕ್ವಾಡ್‌(8) ತಮ್ಮ ಆಯ್ಕೆಯನ್ನು ಸಮರ್ಥಿಸಿಕೊಳ್ಳುವಲ್ಲಿ ವಿಫಲರಾದರು. ಬ್ಯಾಟಿಂಗ್‌ ಬಡ್ತಿ ಪಡೆದು ಬಂದ ವಾಷಿಂಗ್ಟನ್‌ ಸುಂದರ್‌ ಒಂದು ಸಿಕ್ಸರ್‌ಗೆ ಸೀಮಿತವಾಗಿ 13 ರನ್‌ ಗಳಿಸಿದರು. ದಕ್ಷಿಣ ಆಫ್ರಿಕಾ ಪರ ಒಟ್ನೀಲ್ ಬಾರ್ಟ್‌ಮನ್, ನಾಂದ್ರೆ ಬರ್ಗರ್, ಕಾರ್ಬಿನ್ ಬಾಷ್ ಮತ್ತು ಮಾರ್ಕೊ ಜಾನ್ಸೆನ್‌ ತಲಾ ತಲಾ ಎರಡು ವಿಕೆಟ್‌ ಕಿತ್ತರು.
ವಿರಾಟ್‌ ಕೊಹ್ಲಿ -
ರಾಂಚಿ, ನ.30: ವಿಂಟೇಜ್ ವಿರಾಟ್‌ ಕೊಹ್ಲಿ(Virat Kohli) ಬಾರಿಸಿದ 52 ನೇ ಏಕದಿನ ಶತಕದ ನೆರವಿನಿಂದ ರಾಂಚಿಯಲ್ಲಿ ನಡೆಯುತ್ತಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ 8 ವಿಕೆಟ್‌ಗೆ 349 ಬೃಹತ್‌ ರನ್‌ ಕಲೆಹಾಕಿ ಸವಾಲೊಡ್ಡಿದೆ. ತವರಿನ ಅಭಿಮಾನಿಗಳಿಗೆ ಬರಪೂರ ಬ್ಯಾಟಿಂಗ್‌ ಮನರಂಜನೆ ಒದಗಿಸಿದ ಕೊಹ್ಲಿ135 ರನ್‌ ಬಾರಿಸಿ ಮೆರೆದಾಡಿದರು. ಇದು ಕೊಹ್ಲಿ ರಾಂಚಿಯಲ್ಲಿ ಸಿಡಿಸಿದ ಮೂರನೇ ಶತಕ.
ಸತತ 19ನೇ ಏಕದಿನ ಪಂದ್ಯದಲ್ಲಿ ಟಾಸ್‌ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಭಾರತಕ್ಕೆ ಆರಂಭಿಕರಾದ ಜೈಸ್ವಾಲ್‌ ಮತ್ತು ರೋಹಿತ್‌ ಉತ್ತಮ ಆರಂಭ ಒದಗಿಸಿದರು. ಆದರೆ ಬೀಸಾಟಕ್ಕೆ ಮುಂದಾಗಿ ಜೈಸ್ವಾಲ್‌ 18ರನ್‌ಗೆ ವಿಕೆಟ್‌ ಕಳೆದುಕೊಂಡರು. ಆ ಬಳಿಕ ಜತೆಯಾದ ವಿರಾಟ್‌ ಮತ್ತು ರೋಹಿತ್‌ ಜಿದ್ದಿಗೆ ಬಿದ್ದವರಂತೆ ಬ್ಯಾಟ್‌ ಬೀಸಿ ಹರಿಣ ಪಡೆಗಳ ಮೇಲೆ ಸವಾರಿ ನಡೆಸಿದರು. 2 ರನ್‌ ಗಳಿಸಿದ್ದ ವೇಳೆ ಜೀವದಾನ ಪಡೆದ ರೋಹಿತ್‌ ಇದರ ಸಂಪೂರ್ಣ ಲಾಭವೆತ್ತಿ ಅರ್ಧಶತಕ ಸಿಡಿಸಿದರು. ಕೊಹ್ಲಿ ಜತೆ 2ನೇ ವಿಕೆಟ್‌ಗೆ 136ರನ್‌ಗಳ ಜತೆಯಾಟ ನಡೆಸಿದರು.
ಬಿರುಸಿನ ಬ್ಯಾಟಿಂಗ್‌ ನಡೆಸಿದ ರೋಹಿತ್‌ 51 ಎಸೆತಗಳಿಂದ 57 ರನ್‌ ಬಾರಿಸಿದರು. ಇದು ಅವರ 60ನೇ ಅರ್ಧಶತಕ. 3 ಸಿಕ್ಸರ್‌ ಬಾರಿಸಿದ ರೋಹಿತ್‌ ಏಕದಿನ ಕ್ರಿಕೆಟ್‌ನಲ್ಲಿ ಅತ್ಯಧಿಕ ಸಿಕ್ಸರ್‌ ಸಿಡಿಸಿದ ವಿಶ್ವದ ಮೊದಲ ಬ್ಯಾಟರ್‌ ಎನಿಸಿಕೊಂಡರು. ಈ ಹಾದಿಯಲ್ಲಿ ಅವರು ಪಾಕಿಸ್ತಾನ ಮಾಜಿ ಬ್ಯಾಟರ್‌ ಶಾಹಿದ್ ಅಫ್ರಿದಿ(351) ದಾಖಲೆ ಹಿಂದಿಕ್ಕಿದರು. ರೋಹಿತ್‌ ಶರ್ಮ ಸದ್ಯ 352* ಸಿಕ್ಸರ್‌ ಸಿಡಿಸಿ ಅಗ್ರಸ್ಥಾನದಲ್ಲಿದ್ದಾರೆ.
52ನೇ ಶತಕ ಬಾರಿಸಿದ ಕೊಹ್ಲಿ
ಕಳೆದ ಆಸೀಸ್‌ ಪ್ರವಾಸದ ಆರಂಭಿಕ ಎರಡು ಪಂದ್ಯಗಳಲ್ಲಿ ಶೂನ್ಯ ಸುತ್ತಿ ಅಂತಿಮ ಪಂದ್ಯದಲ್ಲಿ ಅರ್ಧಶತಕ ಬಾರಿಸಿದ್ದ ಕೊಹ್ಲಿ ಈ ಪಂದ್ಯದಲ್ಲಿ ಅಮೋಘ ಶತಕ ಬಾರಿಸಿ ತಮ್ಮ ಹಳೆಯ ಬ್ಯಾಟಿಂಗ್‌ ಫಾರ್ಮ್‌ಗೆ ಮರಳಿದರು. ಜತೆಗೆ ತಮ್ಮ ಫಿಟ್‌ನೆಸ್‌ ಬಗ್ಗೆ ಚರ್ಚೆ ಮಾಡುತ್ತಿದ್ದವರಿಗೆ ಸಿಕ್ಸರ್‌ ಮತ್ತು ಬೌಂಡರಿಗಳ ಮೂಲಕವೇ ಉತ್ತರಿಸಿದರು. ಬೌಂಡರಿ ಮೂಲಕವೇ ಇನಿಂಗ್ಸ್‌ ಆರಂಭಿಸಿದ ಕೊಹ್ಲಿ, ಬೌಂಡರಿ ಮೂಲಕವೇ ಶತಕ ಪೂರ್ತಿಗೊಳಿಸಿದರು. ಬರೋಬ್ಬರಿ 7 ಸಿಕ್ಸರ್‌ ಮತ್ತು 11 ಬೌಂಡರಿ ಸಿಡಿಸಿದ ಕೊಹ್ಲಿ 135ರನ್‌ ಬಾರಿಸಿ ರಿಕಲ್ಟನ್ ಹಿಡಿದ ಡೈವಿಂಗ್‌ ಕ್ಯಾಚ್‌ಗೆ ವಿಕೆಟ್‌ ಕಳೆದುಕೊಂಡರು. ಕೊಹ್ಲಿ ಶತಕ ಪೂರ್ತಿಗೊಳಿಸುತ್ತಿದ್ದಂತೆ ಅಭಿಮಾನಿಯೊಬ್ಬ ಸಿಬ್ಬಂದಿಗಳ ಕಣ್ಣು ತಪ್ಪಿಸಿ ಮೈದಾನಕ್ಕೆ ನುಗ್ಗಿ ಕಾಲಿಗೆ ಬಿದ್ದ ಪ್ರಸಂಗವೂ ನಡೆಯಿತು.
A leap of joy ❤️💯
— BCCI (@BCCI) November 30, 2025
A thoroughly entertaining innings from Virat Kohli 🍿
Updates ▶️ https://t.co/MdXtGgRkPo#TeamIndia | #INDvSA | @IDFCFIRSTBank | @imVkohli pic.twitter.com/llLByyGHe5
ಇದನ್ನೂ ಓದಿ IND vs SA: ಸಚಿನ್‌-ದ್ರಾವಿಡ್‌ ದಾಖಲೆ ಮುರಿದ ಕೊಹ್ಲಿ-ರೋಹಿತ್‌
ನಿಧಾನಗತಿಯ ಬ್ಯಾಟಿಂಗ್‌ ನಡೆಸುತ್ತಿದ್ದ ಹಂಗಾಮಿ ನಾಯಕ ಕೆ.ಎಲ್‌ ರಾಹುಲ್‌ ಅವರು ವಿರಾಟ್‌ ಕೊಹ್ಲಿ ವಿಕೆಟ್‌ ಪತನದ ಬಳಿಕ ಚುರುಕಿನ ಬ್ಯಾಟಿಂಗ್‌ಗೆ ಒಗ್ಗಿಕೊಂಡು ಅರ್ಧಶತಕ ಬಾರಿಸಿದರು. ಅವರಿಗೆ ರವೀಂದ್ರ ಜಡೇಜಾ ಉತ್ತಮ ಸಾಥ್‌ ನೀಡಿದರು. 56 ಎಸೆತ ಎದುರಿಸಿದ ರಾಹುಲ್‌ 60(2 ಬೌಂಡರಿ, 3 ಸಿಕ್ಸರ್‌) ರನ್‌ ಬಾರಿಸಿದರು. ಅಂತಿಮ ಒಂದು ಓವರ್‌ ಬಾಕಿ ಇರುವಾಗ ರಿವರ್ಸ್‌ ಸ್ವೀಫ್‌ ಯತ್ನದಲ್ಲಿ ಕೀಪರ್‌ ಡಿ ಕಾಕ್‌ಗೆ ಕ್ಯಾಚ್‌ ನೀಡಿ ವಿಕೆಟ್‌ ಕಳೆದುಕೊಂಡರು. ಜಡೇಜಾ 20 ಎಸೆತಗಳಿಂದ 32 ರನ್‌ ಗಳಿಸಿದರು.
ರಿಷಭ್‌ ಪಂತ್‌ ಬದಲು ಅವಕಾಶ ಪಡೆದ ಋತುರಾಜ್‌ ಗಾಯಕ್ವಾಡ್‌(8) ತಮ್ಮ ಆಯ್ಕೆಯನ್ನು ಸಮರ್ಥಿಸಿಕೊಳ್ಳುವಲ್ಲಿ ವಿಫಲರಾದರು. ಬ್ಯಾಟಿಂಗ್‌ ಬಡ್ತಿ ಪಡೆದು ಬಂದ ವಾಷಿಂಗ್ಟನ್‌ ಸುಂದರ್‌ ಒಂದು ಸಿಕ್ಸರ್‌ಗೆ ಸೀಮಿತವಾಗಿ 13 ರನ್‌ ಗಳಿಸಿದರು. ದಕ್ಷಿಣ ಆಫ್ರಿಕಾ ಪರ ಒಟ್ನೀಲ್ ಬಾರ್ಟ್‌ಮನ್, ನಾಂದ್ರೆ ಬರ್ಗರ್, ಕಾರ್ಬಿನ್ ಬಾಷ್ ಮತ್ತು ಮಾರ್ಕೊ ಜಾನ್ಸೆನ್‌ ತಲಾ ತಲಾ ಎರಡು ವಿಕೆಟ್‌ ಕಿತ್ತರು.
