Viral Video: ವರ್ಲ್ಡ್ ಟೂರ್‌ನಲ್ಲಿದ್ದ ಭಾರತೀಯನಿಗೆ ಕಾದಿತ್ತು ಬಿಗ್‌ ಶಾಕ್‌! ಬೈಕ್ ಕಳೆದುಕೊಂಡ ಈತನ ಪಾಡು ಕೇಳೋರಿಲ್ಲ
Indian Biker's Motorcycle Stolen: ನಾಲ್ಕು ತಿಂಗಳ ಹಿಂದೆ ಭಾರತದಿಂದ ವಿಶ್ವಪರ್ಯಟನೆ ಮಾಡುವ ಸಲುವಾಗಿ ಹೊರಟಿದ್ದ ಬೈಕ್ ಸವಾರನೊಬ್ಬನ ಮೋಟಾರ್ ಸೈಕಲ್ ಯುಕೆಯಲ್ಲಿ ಕಳವಾಗಿದೆ. ಮುಂಬೈನ ಯೋಗೇಶ್ ಅಲೇಕಾರಿ ಎಂಬುವವರ ಬೈಕ್ ಅನ್ನು ವಿದೇಶಿ ಕಳ್ಳರ ಗ್ಯಾಂಗ್ ಎಗರಿಸಿದ್ದಾರೆ.
-
Priyanka P
Sep 2, 2025 2:03 PM
ಯುನೈಟೆಡ್ ಕಿಂಗ್‌ಡಮ್: ವಿಶ್ವ ಪ್ರವಾಸ (World Tour) ಕೈಗೊಂಡಿದ್ದ ಮುಂಬೈನ ಬೈಕರ್ ಯೋಗೇಶ್ ಅಲೇಕಾರಿ (Yogesh Alekari) ಎಂಬುವವರ ಮೋಟಾರ್ ಸೈಕಲ್ ಯುಕೆನಲ್ಲಿ ಕಳುವಾಗಿದೆ. ಸಹಾಯಕ್ಕಾಗಿ ಪೊಲೀಸರ ಮೊರೆ ಹೋಗಿದ್ದು, ತನ್ನ ಮೋಟಾರ್ ಸೈಕಲ್ ಹುಡುಕಿ ಕೊಡುವಂತೆ ಮನವಿ ಮಾಡಿದ್ದಾರೆ. 4 ತಿಂಗಳ ಹಿಂದೆ ಬೈಕ್‍ನಲ್ಲಿ ವಿಶ್ವಪರ್ಯಟನೆ ಕೈಗೊಂಡಿದ್ದ ಯೋಗೇಶ್ ಇದೀಗ ಕಂಗಾಲಾಗಿದ್ದಾರೆ.
ಯೋಗೇಶ್ ಅಲೇಕಾರಿ, ಮೇ 1, 2025 ರಂದು ಮುಂಬೈನಿಂದ ತಮ್ಮ ಕೆಟಿಎಂ ಮೋಟಾರ್‌ಸೈಕಲ್‌ನಲ್ಲಿ ಮಹತ್ವಾಕಾಂಕ್ಷೆಯ ವಿಶ್ವ ಪ್ರವಾಸವನ್ನು ಕೈಗೊಂಡರು. ಮುಂದಿನ 118 ದಿನಗಳಲ್ಲಿ, ಅವರು 17 ದೇಶಗಳಲ್ಲಿ 24,000 ಕಿಲೋಮೀಟರ್‌ಗಳಿಗೂ ಹೆಚ್ಚು ದೂರ ಕ್ರಮಿಸಿದರು. ಅವರ ಪ್ರವಾಸದ ಮಾರ್ಗವು ವೈವಿಧ್ಯಮಯ ಭೂಪ್ರದೇಶಗಳು ಮತ್ತು ಸಂಸ್ಕೃತಿಗಳನ್ನು ಅವರು ದಾಟಿದರು. ವಿಶ್ವಪರ್ಯಟನೆ ವೇಳೆ ಯುಕೆಗೆ ಬಂದಿದ್ದ ಅವರು ಮುಂದೆ ಆಫ್ರಿಕಾಗೆ ಹೋಗುವ ಯೋಜನೆಯೂ ಇತ್ತು. ಆದರೆ, ಅವರ ಯೋಜನೆ ಇದೀಗ ತಲೆಕೆಳಗಾಗಿದೆ.
ಇಂಗ್ಲೆಂಡ್ನ ನಾಟಿಂಗ್‌ಹ್ಯಾಮ್‌ನಲ್ಲಿ ಅವರ ದ್ವಿಚಕ್ರ ವಾಹನವನ್ನು ಯಾರೋ ಕಳ್ಳರು ಕದ್ದಿದ್ದಾರೆ. ಇದರಿಂದ ಯುನೈಟೆಡ್ ಕಿಂಗ್‌ಡಂನಲ್ಲಿ ಅವರ ಪ್ರಯಾಣವು ಹಠಾತ್ತನೆ ಸ್ಥಗಿತಗೊಂಡಿದೆ. ಆಗಸ್ಟ್ 31 ರಂದು ಅಲೆಕಾರಿ, ಇಂಗ್ಲೆಂಡ್ನ ನಾಟಿಂಗ್‌ಹ್ಯಾಮ್‌ನಲ್ಲಿ ತಮ್ಮ ಸ್ನೇಹಿತನನ್ನು ಭೇಟಿಯಾಗಲು ಯೋಜಿಸಿದ್ದರು. ಹೀಗಾಗಿ ಪೂರ್ಣ ಲೋಡ್ ಮಾಡಲಾದ ಕೆಟಿಎಂ ಬೈಕನ್ನು ಸ್ವಲ್ಪ ಸಮಯದವರೆಗೆ ಗಮನಿಸಲಿಲ್ಲ. ಆದರೆ, ಹಾಡಹಗಲಿನಲ್ಲೇ ನಾಲ್ವರು ಕಳ್ಳರ ಗುಂಪು, ಯೋಗೇಶ್ ಅಲೇಕಾರಿಯ ಬೈಕ್ ಅನ್ನು ಹೊತ್ತೊಯ್ದಿದ್ದಾರೆ. ಅದರಲ್ಲಿ ಅವರ ಪಾಸ್‌ಪೋರ್ಟ್, ಹಣ, ದಾಖಲೆಗಳು ಮತ್ತು ಎಲ್ಲಾ ವಿದ್ಯುತ್ ಉಪಕರಣಗಳು ಇದ್ದವು.
ವಿಡಿಯೊ ವೀಕ್ಷಿಸಿ:
ಕಳ್ಳರು ಉದ್ಯಾನವನದಿಂದ ತಮ್ಮ ಮೋಟಾರ್‌ಸೈಕಲ್ ಅನ್ನು ಹಾಡಹಗಲೇ ಕಳ್ಳತನ ಮಾಡಿರುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಇದನ್ನು ಅವರು ಸಾಮಾಜಿಕ ಮಾಧ್ಯದಲ್ಲಿ ಹಂಚಿಕೊಂಡಿದ್ದಾರೆ. ಕಳ್ಳರು ಸುತ್ತಿಗೆಯನ್ನು ಬಳಸಿ ಬೀಗವನ್ನು ಮುರಿದು ಹ್ಯಾಂಡಲ್‌ಗೆ ಹಾನಿ ಮಾಡಿ ಬೈಕ್‌ನೊಂದಿಗೆ ಪರಾರಿಯಾಗುವುದನ್ನು ವಿಡಿಯೊ ಸೆರೆಹಿಡಿದಿದೆ. ಇದೀಗ ಸಿಸಿಟಿವಿ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ (Viral Video) ಆಗಿದೆ.
ಬೈಕ್ ಹಾಗೂ ತನ್ನ ದಾಖಲೆಗಳ ಕಳ್ಳತನದಿಂದ ಕಂಗಾಲಾಗಿರುವ ಬೈಕ್ ಸವಾರ ಯೋಗೇಶ್, ತನ್ನ ಫಾಲೋವರ್ಸ್ ಬಳಿ ಸಹಾಯಕ್ಕಾಗಿ ಮನವಿ ಮಾಡಿದ್ದಾರೆ. ಕಳ್ಳತನದ ವಿಡಿಯೊ ಹಂಚಿಕೊಳ್ಳುವಂತೆ ಮನವಿ ಮಾಡಿದ್ದಾರೆ. ಇದರಿಂದ ಅಧಿಕಾರಿಗಳು ಶೀಘ್ರ ಕ್ರಮ ಕೈಗೊಳ್ಳಲು ಸಾಧ್ಯವಾಗಬಹುದು ಎಂಬುದು ಅವರ ನಂಬಿಕೆಯಾಗಿದೆ. ದಾಖಲೆ ಸಹಿತ ತಮ್ಮ ಬೈಕ್ ಅನ್ನು ಮರಳಿ ಪಡೆದು, ಪ್ರಯಾಣವನ್ನು ಪುನರಾರಂಭಿಸುವುದು ಅವರ ಗುರಿಯಾಗಿದೆ. ಹಾಗೂ ಸುರಕ್ಷಿತವಾಗಿ ಭಾರತಕ್ಕೆ ಮರಳಬೇಕೆಂದು ಆಶಯ ಪಡುತ್ತಿದ್ದಾರೆ. ಪಾಸ್‌ಪೋರ್ಟ್ ಇಲ್ಲದೆ ಭಾರತಕ್ಕೆ ಮರಳುವುದು ಬಹಳ ಕಷ್ಟವಾಗುತ್ತದೆ, ಯೋಗೇಶ್ ಹಲವು ಅಡೆತಡೆಗಳನ್ನು ಎದುರಿಸಬೇಕಾಗುತ್ತದೆ.
ಇನ್ನು ಈ ಸಂಬಂಧ ನಾಟಿಂಗ್‌ಹ್ಯಾಮ್ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆದರೆ ಇನ್ನೂ ಯಾರನ್ನೂ ಬಂಧಿಸಲಾಗಿಲ್ಲ. ಸದ್ಯ, ಯುಕೆನಲ್ಲಿ ನಡೆದ ಕಳ್ಳತನ ದೃಶ್ಯ ಸಾಮಾಜಿಕ ಮಾಧ್ಯಮದಲ್ಲಿ ಹೊಸ ಚರ್ಚೆಯನ್ನು ಹುಟ್ಟುಹಾಕಿದೆ. ಸಾಮಾಜಿಕ ಮಾಧ್ಯಮ ಬಳಕೆದಾರರು ಯೋಗೇಶ್ ಅವರಿಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ. ಭಾರತೀಯ ಬೈಕರ್‌ಗಳು ಮತ್ತು ಬಳಕೆದಾರರು ತುರ್ತು ದಾಖಲೆ ಬದಲಾವಣೆಗಾಗಿ ಲಂಡನ್‌ನಲ್ಲಿರುವ ಭಾರತೀಯ ಹೈಕಮಿಷನ್ ಅನ್ನು ಸಂಪರ್ಕಿಸಲು ಸಲಹೆ ನೀಡಿದ್ದಾರೆ.
ಯುಕೆಯಲ್ಲಿ ವಿದೇಶಿ ಪ್ರಯಾಣಿಕರ ಮೋಟಾರ್ ಸೈಕಲ್ ಕಳ್ಳತನವಾಗುತ್ತಿರುವುದು ಇದೇ ಮೊದಲಲ್ಲ. ಕೆಲವು ತಿಂಗಳ ಹಿಂದೆ, ವೇಲ್ಸ್‌ನ ಸ್ವಾನ್ಸೀಯಲ್ಲಿ ಪ್ರಸಿದ್ಧ ಯೂಟ್ಯೂಬರ್ ಮತ್ತು ಬೈಕರ್ ಇಚಿ ಬೂಟ್ಸ್ ಅವರ ಬೈಕ್ ಕೂಡ ಇದೇ ರೀತಿ ಕಳ್ಳತನವಾಗಿತ್ತು.
ಇದನ್ನೂ ಓದಿ: Viral Video: ವಿಮಾನದ ರನ್‌ವೇ ಬಳಿ ಮೂತ್ರ ವಿಸರ್ಜಿಸಿದ ವೃದ್ಧ; ಕಾಕ್‍ಪಿಟ್‍ನಲ್ಲಿ ಕುಳಿತು ದೃಶ್ಯ ಚಿತ್ರೀಕರಿಸಿದ ಪೈಲಟ್
