Viral Video: ಸ್ಟ್ರೀಟ್‌ ಫುಡ್‌ ಪ್ರಿಯರೇ ಎಚ್ಚರ...ಎಚ್ಚರ! ಈ ವಿಡಿಯೊ ನೋಡಿದ್ರೆ ಶಾಕ್‌ ಆಗ್ತೀರಾ

ಮುಂಬೈ: ಬೀದಿ ವ್ಯಾಪಾರಿಯೊಬ್ಬರು ಸೌತೆಕಾಯಿಗಳನ್ನು (Cucumbers) ಮಾರಾಟ ಮಾಡುವ ಮೊದಲು ಅದನ್ನು ಬಾಯಿಯಲ್ಲಿ ಕಚ್ಚಿ ತಾಜಾವಾಗಿ ಕಾಣುವಂತೆ ಮಾಡುತ್ತಿರುವ ಆಘಾತಕಾರಿ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ (Viral Video) ಆಗಿದೆ. ಈ ದೃಶ್ಯಗಳು ಬೀದಿ ವ್ಯಾಪಾರಿಗಳಲ್ಲಿ ಸ್ವಚ್ಛತೆ ಮತ್ತು ಆಹಾರ ಸುರಕ್ಷತಾ ಪದ್ಧತಿಗಳ ಬಗ್ಗೆ ಗಂಭೀರ ಕಳವಳವನ್ನು ಹುಟ್ಟುಹಾಕಿದ್ದು, ಸ್ಥಳೀಯ ನಿವಾಸಿಗಳು ಮತ್ತು ಗ್ರಾಹಕರಿಂದ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ.

ಬೀದಿಗಳಲ್ಲಿ ಮಾರಾಟವಾಗುವ ಆಹಾರವು ಸಾರ್ವಜನಿಕ ಆರೋಗ್ಯಕ್ಕೆ ಧಕ್ಕೆ ತರದಂತೆ ಖಚಿತಪಡಿಸಿಕೊಳ್ಳಲು ಕಠಿಣ ನಿಯಮಗಳನ್ನು ಕೈಗೊಳ್ಳಬೇಕು ಎಂದು ಜನರು ಒತ್ತಾಯಿಸುತ್ತಿದ್ದಾರೆ. ಅಧಿಕಾರಿಗಳು ಈ ಘಟನೆಯ ಬಗ್ಗೆ ಇನ್ನೂ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಆದರೆ ಈ ವಿಡಿಯೊ ಬೀದಿ ಆಹಾರದ ನೈರ್ಮಲ್ಯ ಮಾನದಂಡಗಳ ಬಗ್ಗೆ ಹೊಸ ಚರ್ಚೆಗಳನ್ನು ಹುಟ್ಟುಹಾಕಿದೆ.

ಈ ವಿಡಿಯೊ, ಕಡಲತೀರದಲ್ಲಿ ಸೌತೆಕಾಯಿಗಳನ್ನು ಮಾರುತ್ತಿರುವ ಇಬ್ಬರು ಯುವಕರೊಂದಿಗೆ ಪ್ರಾರಂಭವಾಗುತ್ತದೆ. ಒಬ್ಬ ಯುವಕ ಸ್ಟೂಲ್ ಮೇಲೆ ಕುಳಿತಿದ್ದರೆ, ಇನ್ನೊಬ್ಬ ಹತ್ತಿರದಲ್ಲಿ ನಿಂತಿದ್ದಾನೆ. ನಿಂತಿರುವ ಯುವಕ ಸೌತೆಕಾಯಿಯನ್ನು ಬಾಯಿಯಲ್ಲಿ ಇಟ್ಟು, ಅದನ್ನು ಸ್ವಲ್ಪ ಹೊತ್ತು ಹೀರುತ್ತಾ, ನಂತರ ತನ್ನ ಕೈಗಳಿಗೆ ಲಾಲಾರಸವನ್ನು ಉಜ್ಜುತ್ತಾ, ನಂತರ ಸೌತೆಕಾಯಿಗಳನ್ನು ಬುಟ್ಟಿಯಲ್ಲಿ ಅಚ್ಚುಕಟ್ಟಾಗಿ ಜೋಡಿಸುವುದನ್ನು ಕಾಣಬಹುದು.

ವಿಡಿಯೊ ವೀಕ್ಷಿಸಿ:

ಶೀಘ್ರದಲ್ಲೇ, ಅವನು ಬುಟ್ಟಿಯಿಂದ ಮತ್ತೊಂದು ಸೌತೆಕಾಯಿಯನ್ನು ಕತ್ತರಿಸಲು ಪ್ರಾರಂಭಿಸುತ್ತಾನೆ. ಈ ಘಟನೆಯ ನಿಖರವಾದ ಸ್ಥಳ ಮತ್ತು ಸಮಯ ತಿಳಿದಿಲ್ಲ. ಅಕ್ಟೋಬರ್ 10 ರಂದು ಹಂಚಿಕೊಳ್ಳಲಾದ ಈ ವಿಡಿಯೊ ಈಗಾಗಲೇ 6 ಲಕ್ಷ ವೀಕ್ಷಣೆಗಳನ್ನು ದಾಟಿದೆ. ಜನರು ಈ ಅನೈರ್ಮಲ್ಯದ ಅಭ್ಯಾಸವನ್ನು ತೀವ್ರವಾಗಿ ಟೀಕಿಸಿದ್ದಾರೆ. ಬಳಕೆದಾರರೊಬ್ಬರು, ಇದಕ್ಕಾಗಿಯೇ ತರಕಾರಿಗಳನ್ನು ಖರೀದಿಸಿದ ನಂತರ ಚೆನ್ನಾಗಿ ತೊಳೆಯುವುದು ಬಹಳ ಮುಖ್ಯ ಎಂದು ಬರೆದಿದ್ದಾರೆ.

ಇದನ್ನೂ ಓದಿ: Viral Video: ಮೆಹಂದಿ ಹಚ್ಚುವಾಗಲೇ ಧಮ್‌ ಮಾರೋ ಧಮ್‌; ಮಾರ್ಡನ್‌ ಮಹಿಳೆಯರ ಕರ್ವಾ ಚೌತ್‍ ವಿಡಿಯೋ ವೈರಲ್‌

ಕೆಲವು ಸಾಮಾಜಿಕ ಮಾಧ್ಯಮ ಬಳಕೆದಾರರು ವಿಡಿಯೊವನ್ನು ಆಧರಿಸಿ ವೈಯಕ್ತಿಕ ನಿರ್ಧಾರಗಳನ್ನು ವ್ಯಕ್ತಪಡಿಸಿದರು. ಒಬ್ಬ ವ್ಯಕ್ತಿ, ಇದಕ್ಕಾಗಿಯೇ ನಾನು ಹೊರಗಿನ ಆಹಾರ ತಿನ್ನೋದಿಲ್ಲ ಎಂದು ಹೇಳಿದರೆ, ಇನ್ನೊಬ್ಬರು, ಅವನು ಸ್ವಚ್ಛಗೊಳಿಸುತ್ತಿಲ್ಲ. ಅವನು ಸೌತೆಕಾಯಿಯ ಚರ್ಮಕ್ಕೆ ಲಾಲಾರಸದಿಂದ ಹೊಳಪನ್ನು ನೀಡುತ್ತಿದ್ದಾನೆ ಎಂದು ತಮಾಷೆ ಮಾಡಿದರು. ಆ ವಿಡಿಯೊ ಹಳೆಯದಾಗಿರಬಹುದು, ಆದರೆ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದ್ದಂತೆ ಅನೇಕರನ್ನು ಬೆಚ್ಚಿಬೀಳಿಸಿದೆ. ಹಾಗೆಯೇ ಇದು ಆಹಾರ ಸುರಕ್ಷತೆಯ ಕುರಿತು ಸಂಭಾಷಣೆಗಳನ್ನು ಮತ್ತೆ ಹುಟ್ಟುಹಾಕಿದೆ.

ಕೆಲವು ದಿನಗಳ ಹಿಂದೆ, ಉತ್ತರಾಖಂಡದ ಡೆಹ್ರಾಡೂನ್‌ನಲ್ಲಿ ನಡೆದ ಆಘಾತಕಾರಿ ವಿಡಿಯೊವೊಂದು ವೀಕ್ಷಕರನ್ನು ದಿಗ್ಭ್ರಮೆಗೊಳಿಸಿತು. ಈ ವಿಡಿಯೊದಲ್ಲಿ ಸ್ಥಳೀಯ ಜ್ಯೂಸ್ ಮಾರಾಟಗಾರನೊಬ್ಬ ತನ್ನ ಬಂಡಿಯ ಪಕ್ಕದಲ್ಲಿಯೇ ಅನೈರ್ಮಲ್ಯದಿಂದ ವರ್ತಿಸುತ್ತಿರುವ ವಿಡಿಯೊ ವೈರಲ್ ಆಗಿತ್ತು. ಇದು ರಸ್ತೆಬದಿಯ ಅಂಗಡಿಗಳಲ್ಲಿ ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯದ ಬಗ್ಗೆ ಗಂಭೀರ ಕಳವಳ ವ್ಯಕ್ತವಾಗಿದೆ.

ಮಾರಾಟಗಾರನು ತನ್ನ ಖಾಸಗಿ ಭಾಗವನ್ನು ಸ್ವಚ್ಛಗೊಳಿಸಿಕೊಳ್ಳಲು ಬಳಸಿದ ಬಟ್ಟೆಯನ್ನೇ ಹಣ್ಣಿನ ರಸ ತಯಾರಿಸಲು ಬಳಸಲಾಗಿದ್ದ ಪಾತ್ರೆಗಳನ್ನು ಒರೆಸುತ್ತಿದ್ದ. ಈ ಕೃತ್ಯವನ್ನು ಪ್ರತ್ಯಕ್ಷದರ್ಶಿಯಾಗಿದ್ದ ಮಹಿಳೆಯೊಬ್ಬರು ಕ್ಯಾಮರಾದಲ್ಲಿ ದೃಶ್ಯಗಳನ್ನು ಸೆರೆಹಿಡಿದು, ನಂತರ ಪೊಲೀಸರಿಗೆ ದೂರು ನೀಡಿದ್ದರು.