ಮದುವೆಯಲ್ಲಿ ವರನ ಶೂ ಕದಿಯಲು ಮುಂದಾದ ಮಹಿಳೆಯರು; ಬಾಯಲ್ಲಿ ಕಚ್ಚಿ ಹಿಡಿದ ವ್ಯಕ್ತಿಯ ವಿಡಿಯೊ ವೈರಲ್

ನವದೆಹಲಿ: ಭಾರತದಲ್ಲಿ ಚಳಿಗಾಲದ ಆಗಮನ ಎಂದರೆ ಮದುವೆ (Wedding) ಋತುವಿನ ಆರಂಭ. ಮದುವೆಗಳಿಗೆ ಭರದಿಂದ ಸಿದ್ಧತೆಗಳು ಸಾಗುತ್ತಿರುವುದರಿಂದ, ಸಾಮಾಜಿಕ ಮಾಧ್ಯಮವು ಅದ್ಧೂರಿ ಆಚರಣೆಗಳಿಂದ ಹಿಡಿದು ಸರಳ ಆಚರಣೆಗಳವರೆಗೆ ಎಲ್ಲವನ್ನೂ ಸೆರೆಹಿಡಿಯುವ ಕ್ಷಣಗಳಿಂದ ತುಂಬಿದೆ. ಸಾಮಾನ್ಯವಾಗಿ ಮದುವೆಯು ಮೋಜು, ಸಂತೋಷ, ಸಂಭ್ರಮದಿಂದ ಕೂಡಿರುತ್ತದೆ. ಈಗ ಇನ್‌ಸ್ಟಾಗ್ರಾಮ್‌ನಲ್ಲಿ ಸದ್ದು ಮಾಡುತ್ತಿರುವ ಅಂತಹ ಒಂದು ವಿಡಿಯೊ, ಮೋಜಿನಿಂದ ಕೂಡಿದ ಆಚರಣೆಯನ್ನು ಎತ್ತಿ ತೋರಿಸುತ್ತದೆ. ಈ ವಿಡಿಯೊ ಭಾರಿ ವೈರಲ್ (Viral Video) ಆಗಿದೆ.

ಈ ಪದ್ಧತಿಯಡಿ ವಧುವಿನ ಸಹೋದರಿ ಮತ್ತು ಮಹಿಳಾ ಸಂಬಂಧಿಕರು ವರನು ಮಂಟಪಕ್ಕೆ ಹೋಗುವಾಗ ಶೂಗಳನ್ನು ತೆಗೆದ ತಕ್ಷಣ ಅವುಗಳನ್ನು ಕದಿಯಲು ಪ್ರಯತ್ನಿಸುತ್ತಾರೆ. ಶೂಗಳನ್ನು ಮರೆಮಾಡುವುದು ಮತ್ತು ಅವುಗಳನ್ನು ಹಿಂದಿರುಗಿಸಲು ವರನಿಂದ ಭಾರಿ ಹಣವನ್ನು ಕೇಳುವುದು ಅವರ ಏಕೈಕ ಉದ್ದೇಶ. ಈ ಮಧ್ಯೆ, ವರನ ಕಡೆಯವರು ರಕ್ಷಕರ ಪಾತ್ರವನ್ನು ವಹಿಸಿಕೊಂಡು, ಮಹಿಳೆಯರಿಂದ ಶೂ ರಕ್ಷಿಸಲು ಪ್ರಯತ್ನಿಸುತ್ತಾರೆ.

ರಣರಂಗವಾದ ಸಾಮೂಹಿಕ ವಿವಾಹ ಸಮಾರಂಭ- ಚಿಪ್ಸ್‌ ಪ್ಯಾಕೇಟ್‌ಗಾಗಿ ಕಿತ್ತಾಟ!

ಈ ವೈರಲ್ ವಿಡಿಯೊದಲ್ಲಿ, ಕುಟುಂಬಗಳು ಸಂಪ್ರದಾಯವನ್ನು ಹೊಸ ಮಟ್ಟಕ್ಕೆ ಕೊಂಡೊಯ್ದಿರುವುದು ಕಂಡು ಬಂದಿದೆ. ನೆಲದ ಮೇಲೆ ಮಲಗಿರುವ ವ್ಯಕ್ತಿಯೊಬ್ಬರು ವರನ ಶೂ ಅನ್ನು ಬಾಯಿಯಲ್ಲಿ ಬಿಗಿಯಾಗಿ ಹಿಡಿದುಕೊಂಡಿರುವುದನ್ನು ಮತ್ತು ಮಹಿಳೆಯರ ಗುಂಪೊಂದು ಅದನ್ನು ಅವನಿಂದ ಕಸಿದುಕೊಳ್ಳಲು ಪ್ರಯತ್ನಿಸುತ್ತಿರುವುದನ್ನು ನೋಡಬಹುದು. ಈ ವಿಡಿಯೊ ನೋಡಲು ತಮಾಷೆಯಾಗಿದೆ. ನಂತರ ಈ ತಮಾಷೆಯ ಕ್ರಿಯೆ ಹೇಗೆ ಶುರುವಾಯಿತು ಎಂಬುದನ್ನು ತೋರಿಸಲು ವಿಡಿಯೊವನ್ನು ರಿವೈಂಡ್ ಮಾಡಲಾಯಿತು. ವಿಡಿಯೊದಲ್ಲಿ ಕಂಡುಬರುವಂತೆ, ಮಹಿಳೆಯರು ಮೊದಲು ತಮ್ಮ ಮಾವ, ವರನೊಂದಿಗೆ ಮಾತುಕತೆ ನಡೆಸಲು ಪ್ರಯತ್ನಿಸಿದ್ದಾರೆ.

ವಿಡಿಯೊ ವೀಕ್ಷಿಸಿ:

ಕಣ್ಣು ಮಿಟುಕಿಸುವಷ್ಟರಲ್ಲಿ, ಒಬ್ಬ ವ್ಯಕ್ತಿ ತನ್ನ ಎಲ್ಲ ಶಕ್ತಿಯಿಂದ ಚಪ್ಪಲಿಯನ್ನು ತೆಗೆದುಕೊಂಡು, ಬಾಯಿಯಲ್ಲಿ ಹಿಡಿದುಕೊಂಡು ನೆಲದ ಮೇಲೆ ಹೊರಳಾಡುವ ರೀತಿಯಲ್ಲಿ ಕಾಣಿಸಿಕೊಂಡರು. ದೀರ್ಘ ಹೋರಾಟದ ನಂತರ, ಯಾರೋ ಕೊನೆಗೂ ಅವರ ಬಾಯಿಯಿಂದ ಚಪ್ಪಲಿಯನ್ನು ಕಸಿದುಕೊಳ್ಳುವಲ್ಲಿ ಯಶಸ್ವಿಯಾದರು. ಅವರ ತಮಾಷೆಯ ಜಗಳ ಮುಂದುವರಿದಂತೆ, ನವವಿವಾಹಿತರು, ಇತರ ಕುಟುಂಬ ಸದಸ್ಯರೊಂದಿಗೆ, ದೃಶ್ಯವನ್ನು ವೀಕ್ಷಿಸುತ್ತ, ಏನಾಗುತ್ತಿದೆ ಎಂದು ನಗುತ್ತಿದ್ದರು.

ನವ ಜೋಡಿಗಳಿಗೆ ಶುಭ ಹಾರೈಸುತ್ತಿದ್ದಾಗಲೇ ದಿಢೀರ್ ಆಗಿ ಕುಸಿದ ವೇದಿಕೆ

ಇದುವರೆಗಿನ ಅತ್ಯುತ್ತಮ ಚಪ್ಪಲಿ ಕಳ್ಳತನ ಎಂಬ ಶೀರ್ಷಿಕೆಯೊಂದಿಗೆ ಈ ವಿಡಿಯೊವನ್ನು ಹಂಚಿಕೊಳ್ಳಲಾಯಿತು. ಸಲ್ಮಾನ್ ಖಾನ್ ಮತ್ತು ಮಾಧುರಿ ದೀಕ್ಷಿತ್ ಅವರ ಕ್ಲಾಸಿಕ್ ಹಿಟ್ ʼಹಮ್ ಆಪ್ಕೆ ಹೈ ಕೌನ್‍ʼ ಚಿತ್ರದ ʼಜೂಟಾ ದೆ ದೋ ಪೈಸೆ ಲೆ ಲೋʼ ಎಂಬ ಹಾಡನ್ನು ಸೇರಿಸಿ ಪೋಸ್ಟ್ ಮಾಡಲಾಯಿತು.

ಈ ವಿಡಿಯೊ 2 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆಗಳನ್ನು ಗಳಿಸಿದ್ದು, ಸಾಮಾಜಿಕ ಮಾಧ್ಯಮದ ಬಳಕೆದಾರರನ್ನು ರಂಜಿಸುವಲ್ಲಿ ಯಶಸ್ವಿಯಾಗಿದೆ. ಯಾವ ಟೂತ್‍ಪೇಸ್ಟ್ ಬಳಸುತ್ತೀಯಾ ಎಂದು ಬಳಕೆದಾರರೊಬ್ಬರು ಪ್ರಶ್ನಿಸಿದ್ದಾರೆ. ಪಿಟ್‌ಬುಲ್ ಮೂಲೆಯಲ್ಲಿ ಅಳುತ್ತಿದೆ ಎಂದು ಮತ್ತೊಬ್ಬ ಬಳಕೆದಾರರು ತಮಾಷೆಯಾಗಿ ಕಮೆಂಟ್ ಮಾಡಿದ್ದಾರೆ.