ಡಿಜಿಟಲ್ ಹಣಕಾಸಿನಲ್ಲಿ ವಿಶ್ವಾಸ ನಿರ್ಮಾಣ: ಭದ್ರತೆ ಎಲ್ಲರ ಹೊಣೆ

ಅಬಿ ಜಾರ್ಜ್ ಈಪನ್,

ಗ್ರೂಪ್ ರಿಸ್ಕ್ ವಿಭಾಗದ ಮುಖ್ಯಸ್ಥರು, ನವಿ

ಭಾರತದ ಡಿಜಿಟಲ್ ಹಣಕಾಸು ವ್ಯವಸ್ಥೆಯ ಬೆಳವಣಿಗೆ ಜಾಗತಿಕ ಮಟ್ಟದಲ್ಲೇ ಗಮನಾರ್ಹವಾಗಿದೆ. ಪ್ರತೀ ತಿಂಗಳು 16 ಬಿಲಿಯನ್‌ಗೂ ಹೆಚ್ಚು ಯುಪಿಐ ವಹಿವಾಟುಗಳು ನಡೆಯುತ್ತಿದ್ದು, ₹29 ಲಕ್ಷ ಕೋಟಿಗೂ ಅಧಿಕ ಮೌಲ್ಯದ ವಹಿವಾಟುಗಳು ನಡೆಯುತ್ತಿವೆ. ಸಾಲದ ಅನುಮೋದನೆ ಮತ್ತು ಹಣದ ವಿತರಣೆಯೂ ಕೆಲವೇ ನಿಮಿಷಗಳಲ್ಲಿ ಸಾಧ್ಯವಾಗುತ್ತಿದೆ. ಬ್ಯಾಂಕ್ ಶಾಖೆಗಳ ಸುಲಭ ಪ್ರವೇಶವಿಲ್ಲದ ಜನರೂ ಇಂದು ತಮ್ಮ ಸ್ಮಾರ್ಟ್‌ಫೋನ್‌ಗಳ ಮೂಲಕ ಉಳಿತಾಯ, ಸಾಲ ಮತ್ತು ಹೂಡಿಕೆ ಸೇವೆಗಳನ್ನು ಬಳಸುತ್ತಿದ್ದಾರೆ.

ವ್ಯಕ್ತಿಯಿಂದ ವ್ಯಕ್ತಿಗೆ ನಡೆಯುವ ಯುಪಿಐ ವಹಿವಾಟುಗಳು ಉಚಿತವಾಗಿಯೇ ಮುಂದುವರಿಯ ಲಿವೆ ಎಂಬ ಸರ್ಕಾರದ ಇತ್ತೀಚಿನ ಸ್ಪಷ್ಟೀಕರಣವೂ ಡಿಜಿಟಲ್ ಪಾವತಿಗಳ ವ್ಯಾಪಕ ಬಳಕೆಗೆ ಮತ್ತಷ್ಟು ಉತ್ತೇಜನ ನೀಡಿದೆ. ಡಿಜಿಟಲ್ ಪಾವತಿಗಳು ಸುಲಭವಾಗಿ ಮತ್ತು ಕೈಗೆಟುಕುವ ರೀತಿಯಲ್ಲಿ ಲಭ್ಯವಾಗಿರುವುದು ಭಾರತದ ಡಿಜಿಟಲ್ ಹಣಕಾಸು ವ್ಯವಸ್ಥೆಯ ಮುಂದಿನ ಹಂತದ ಬೆಳವಣಿಗೆಗೆ ಸಹಕಾರಿಯಾಗಲಿದೆ.

ಇದನ್ನೂ ಓದಿ: Digital Payment: ಡಿಜಿಟಲ್‌ ಪಾವತಿಯಲ್ಲಿ ಕರ್ನಾಟಕ ಮುಂಚೂಣಿ

ಆದರೆ ಡಿಜಿಟಲ್ ಹಣಕಾಸಿನ ವೇಗದ ಬೆಳವಣಿಗೆಯೊಂದಿಗೆ ವಂಚನೆಯ ಅಪಾಯಗಳೂ ಹೆಚ್ಚುತ್ತಿವೆ. ಇಂದು ಹಣಕಾಸು ವಂಚನೆಗಳು ಕೇವಲ ಅನುಮಾನಾಸ್ಪದ ಕರೆಗಳು ಅಥವಾ ತಪ್ಪು ಕೊಂಡಿಗಳ ರೂಪದಲ್ಲೇ ಇರುವುದಿಲ್ಲ. ಅವು ಹೆಚ್ಚು ಸೂಕ್ಷ್ಮ ಮತ್ತು ಗಮನಕ್ಕೆ ಬಾರದ ರೀತಿಯಲ್ಲಿ ನಡೆಯುತ್ತಿವೆ.

ಆಧುನಿಕ ವಂಚನೆಯ ಹೊಸ ರೂಪ

ಟ್ರಾಫಿಕ್ ದಂಡದ ಮಾಹಿತಿ, ಪಾರ್ಸೆಲ್ ಟ್ರ್ಯಾಕಿಂಗ್ ಅಥವಾ ವಿದ್ಯುತ್ ಬಿಲ್ ಕುರಿತ ಸಂದೇಶದ ನೆಪದಲ್ಲಿ ದುರುದ್ದೇಶಪೂರಿತ ಅಪ್ಲಿಕೇಶನ್‌ಗಳನ್ನು ಡೌನ್‌ಲೋಡ್ ಮಾಡಿಸುವುದು ಸಾಮಾನ್ಯ ವಂಚನಾ ವಿಧಾನವಾಗಿದೆ. ಇಂತಹ ಅಪ್ಲಿಕೇಶನ್‌ಗಳು ಮೊಬೈಲ್‌ನ ಪರದೆಯ ಮಾಹಿತಿಯನ್ನು ಸಂಗ್ರಹಿಸುವುದು, ಒಟಿಪಿಯನ್ನು ಕದಿಯುವುದು ಅಥವಾ ಕೆಲ ಸಂದರ್ಭಗಳಲ್ಲಿ ಸಾಧನದ ಮೇಲಿನ ನಿಯಂತ್ರಣ ಪಡೆಯುವುದಕ್ಕೂ ಕಾರಣವಾಗಬಹುದು.

ವಂಚನೆ ನಡೆದಿರುವುದು ಬಳಕೆದಾರರ ಗಮನಕ್ಕೆ ಬರುವಷ್ಟರಲ್ಲಿ ಹಣವನ್ನು ಹಲವು ಖಾತೆಗಳ ಮೂಲಕ ವರ್ಗಾಯಿಸಿ ಹಿಂಪಡೆಯುವ ಸಾಧ್ಯತೆ ಇರುತ್ತದೆ. ಇತ್ತೀಚಿನ ಉದ್ಯಮದ ಅಂಕಿಅಂಶಗಳು ವಂಚನೆಯ ಪ್ರಯತ್ನಗಳ ಸ್ವರೂಪ ಬದಲಾಗುತ್ತಿರುವುದನ್ನು ಸೂಚಿಸುತ್ತವೆ. ವಂಚನೆಯ ವಹಿವಾಟುಗಳ ಮೌಲ್ಯವೂ ಹೆಚ್ಚಾಗುತ್ತಿದ್ದು, ಎಸ್‌ಎಂಎಸ್ ಆಧಾರಿತ ಬ್ಯಾಂಕಿಂಗ್ ವಂಚನೆಗಳ ಪ್ರಮಾಣವೂ ಏರಿಕೆಯಾಗಿದೆ.

ಭದ್ರತೆ ವೇದಿಕೆಗಳ ಜವಾಬ್ದಾರಿಯೂ ಹೌದು

ಹಣಕಾಸು ವಂಚನೆ ತಡೆಯುವ ಸಂಪೂರ್ಣ ಹೊಣೆಯನ್ನು ಗ್ರಾಹಕರ ಮೇಲೆಯೇ ಹಾಕಲು ಸಾಧ್ಯವಿಲ್ಲ. ಡಿಜಿಟಲ್ ಹಣಕಾಸು ವೇದಿಕೆಗಳು ಸೇವೆಗಳ ವಿನ್ಯಾಸದ ಆರಂಭಿಕ ಹಂತದಿಂದಲೇ ಭದ್ರತೆಯನ್ನು ಅಳವಡಿಸಿಕೊಳ್ಳಬೇಕು.

ಒಂದು ಹಂತದ ಪರಿಶೀಲನೆಯ ಬದಲು ಹಲವು ಹಂತಗಳ ಗುರುತು ಪರಿಶೀಲನೆ ಅಗತ್ಯವಾಗಿದೆ. ನೈಜ ಸಮಯದ ವೀಡಿಯೊ ಆಧಾರಿತ ಪರಿಶೀಲನೆಯಂತಹ ಕ್ರಮಗಳು ನಕಲಿ ಗುರುತುಗಳನ್ನು ಪತ್ತೆಹಚ್ಚಲು ಸಹಕಾರಿಯಾಗಬಹುದು. ಜೊತೆಗೆ, ಭದ್ರತಾ ವ್ಯವಸ್ಥೆಗಳನ್ನು ನಿರಂತರವಾಗಿ ಪರೀಕ್ಷಿಸಿ, ಹೊಸ ದೌರ್ಬಲ್ಯಗಳನ್ನು ವಂಚಕರು ಬಳಸಿಕೊಳ್ಳುವ ಮೊದಲು ಗುರುತಿಸುವುದು ಅಗತ್ಯ.

ವಂಚನೆ ಪತ್ತೆಯಾದಾಗ ವೇದಿಕೆಗಳು ತಕ್ಷಣವೇ ಅನುಮಾನಾಸ್ಪದ ಚಟುವಟಿಕೆಗಳನ್ನು ತಡೆದು, ಬಳಕೆದಾರರಿಗೆ ಎಚ್ಚರಿಕೆ ನೀಡಬೇಕು. ಖಾತೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸುವುದು ಮತ್ತು ಹಣ ಮರುಪಡೆಯಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಸುಲಭ ಮಾರ್ಗವನ್ನೂ ಒದಗಿಸಬೇಕು.

ಗ್ರಾಹಕರು ಕೈಗೊಳ್ಳಬೇಕಾದ ಮುನ್ನೆಚ್ಚರಿಕೆಗಳು

ಬಳಕೆದಾರರೂ ಕೆಲವು ಸರಳ ಕ್ರಮಗಳನ್ನು ಅನುಸರಿಸುವ ಮೂಲಕ ಅಪಾಯವನ್ನು ಕಡಿಮೆ ಮಾಡಬಹುದು.

ಅಪರಿಚಿತ ಕೊಂಡಿಗಳಿಂದ ಅಪ್ಲಿಕೇಶನ್‌ ಡೌನ್‌ಲೋಡ್ ಮಾಡಬೇಡಿ: ಎಸ್‌ಎಂಎಸ್ ಅಥವಾ ಮೆಸೇಜಿಂಗ್ ಆ್ಯಪ್‌ಗಳ ಮೂಲಕ ಬರುವ ನೇರ ಕೊಂಡಿಗಳ ಬದಲು ಅಧಿಕೃತ ಗೂಗಲ್ ಪ್ಲೇ ಸ್ಟೋರ್ ಅಥವಾ ಆ್ಯಪಲ್ ಆ್ಯಪ್ ಸ್ಟೋರ್‌ನಿಂದ ಮಾತ್ರ ಅಪ್ಲಿಕೇಶನ್‌ಗಳನ್ನು ಪಡೆಯಬೇಕು.

ವಹಿವಾಟಿನ ವೇಳೆ ಎಚ್ಚರಿಕೆ ವಹಿಸಿ: ಹಣಕಾಸು ವಹಿವಾಟು ನಡೆಯುತ್ತಿರುವಾಗ ಅಪರಿಚಿತ ಕರೆ ಬಂದರೆ ತಕ್ಷಣ ಪ್ರತಿಕ್ರಿಯಿಸುವ ಬದಲು ಕರೆ ಸ್ಥಗಿತಗೊಳಿಸಿ, ಅಧಿಕೃತ ಗ್ರಾಹಕ ಸೇವಾ ಸಂಖ್ಯೆಯ ಮೂಲಕ ಸಂಪರ್ಕಿಸುವುದು ಉತ್ತಮ.

ಒಟಿಪಿ, ಪಿನ್ ಮತ್ತು ಪಾಸ್‌ವರ್ಡ್ ಹಂಚಿಕೊಳ್ಳಬೇಡಿ: ಬ್ಯಾಂಕ್‌ಗಳು ಅಥವಾ ಪಾವತಿ ಸೇವಾ ಸಂಸ್ಥೆಗಳು ಇಂತಹ ಗೌಪ್ಯ ಮಾಹಿತಿಯನ್ನು ಕೇಳುವುದಿಲ್ಲ. ಯಾರಾದರೂ ಕೇಳಿದರೆ ಅದು ವಂಚನೆಯ ಪ್ರಯತ್ನವಾಗಿರಬಹುದು.

ವಹಿವಾಟುಗಳನ್ನು ನಿಯಮಿತವಾಗಿ ಪರಿಶೀಲಿಸಿ: ಬ್ಯಾಂಕ್ ಸ್ಟೇಟ್‌ಮೆಂಟ್‌ ಮತ್ತು ವಹಿವಾಟು ಗಳ ವಿವರಗಳನ್ನು ನಿಯಮಿತವಾಗಿ ಪರಿಶೀಲಿಸುವುದರಿಂದ ಅನುಮಾನಾಸ್ಪದ ಚಟುವಟಿಕೆ ಗಳನ್ನು ಆರಂಭದಲ್ಲೇ ಗುರುತಿಸಬಹುದು.

ವಂಚನೆ ನಡೆದರೆ ತಕ್ಷಣ ದೂರು ನೀಡಿ: ಬ್ಯಾಂಕ್ ಅಥವಾ ಸಂಬಂಧಿತ ಹಣಕಾಸು ಸಂಸ್ಥೆಗೆ ಕೂಡಲೇ ಮಾಹಿತಿ ನೀಡುವುದರ ಜೊತೆಗೆ 1930 ಸಹಾಯವಾಣಿ ಅಥವಾ cybercrime.gov.in ಮೂಲಕ ದೂರು ದಾಖಲಿಸಬೇಕು. ಹಣ ಮರುಪಡೆಯುವಲ್ಲಿ ತ್ವರಿತ ಕ್ರಮ ಅತ್ಯಂತ ಮುಖ್ಯ.

ವಿಶ್ವಾಸ ಎಲ್ಲರ ಜವಾಬ್ದಾರಿ

ಭಾರತದ ಡಿಜಿಟಲ್ ಹಣಕಾಸು ವ್ಯವಸ್ಥೆಯ ಮೂಲಾಧಾರವೇ ವಿಶ್ವಾಸ. ವಹಿವಾಟುಗಳು ಸುರಕ್ಷಿತವಾಗಿ ನಡೆಯುತ್ತವೆ, ಸಾಲಗಳು ನ್ಯಾಯಯುತವಾಗಿ ದೊರೆಯುತ್ತವೆ ಮತ್ತು ಬಳಕೆದಾರರ ಮಾಹಿತಿ ರಕ್ಷಿತವಾಗಿರುತ್ತದೆ ಎಂಬ ವಿಶ್ವಾಸವನ್ನು ಉಳಿಸಿಕೊಳ್ಳುವುದು ವೇದಿಕೆಗಳು ಮತ್ತು ಬಳಕೆದಾರರಿಬ್ಬರ ಜವಾಬ್ದಾರಿಯಾಗಿದೆ.

ಭದ್ರತೆಯನ್ನು ಉತ್ಪನ್ನ ವಿನ್ಯಾಸದ ಭಾಗವಾಗಿಸುವುದು ವೇದಿಕೆಗಳ ಕರ್ತವ್ಯವಾದರೆ, ಡಿಜಿಟಲ್ ವ್ಯವಹಾರಗಳಲ್ಲಿ ಜಾಗರೂಕತೆ ವಹಿಸುವುದು ಬಳಕೆದಾರರ ಜವಾಬ್ದಾರಿಯಾಗಿದೆ. ಭಾರತ ನಿರ್ಮಿಸಿ ರುವ ಬಲಿಷ್ಠ ಡಿಜಿಟಲ್ ಮೂಲಸೌಕರ್ಯದ ವಿಶ್ವಾಸಾರ್ಹತೆಯನ್ನು ಕಾಪಾಡಲು ಎರಡೂ ಕಡೆಯಿಂದ ಸಮಾನ ಜಾಗರೂಕತೆ ಅಗತ್ಯ.