Prakash Shesharaghavachar Column: ಬದಲಾದ ಬಿಹಾರ, ಬದಲಾಗದ ನಿತೀಶ್‌ ಸರಕಾರ

ಪ್ರಕಾಶಪಥ

ಪ್ರಕಾಶ್‌ ಶೇಷರಾಘವಾಚಾರ್

2024ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಯ ಹಿನ್ನಡೆಯು ಅನಿರೀಕ್ಷಿತ ಬೆಳವಣಿಗೆಯಾಗಿತ್ತು. 400 ಸ್ಥಾನ ದಾಟುವ ಗುರಿಯಿಟ್ಟುಕೊಂಡಿದ್ದರೂ, 240 ಸ್ಥಾನ ದಾಟಲಾಗಲಿಲ್ಲ. 2004ರ ಪರಿಸ್ಥಿತಿ‌ ಯು ಮರುಕಳಿಸುವುದಾ ಎಂಬ ಆತಂಕ ಕಾಡದಿರಲಿಲ್ಲ.

ಸುದೈವ, ಎನ್‌ಡಿಎ ಮೈತ್ರಿಕೂಟಕ್ಕೆ ಬಹುಮತ ದೊರೆತು ಬಿಜೆಪಿ ಮೂರನೆಯ ಬಾರಿಗೆ ಅಧಿಕಾರಕ್ಕೆ ಬರಲು ಸಾಧ್ಯವಾಯಿತು. ಗೆಲ್ಲುತ್ತೇನೆಂಬ ಆತ್ಮವಿಶ್ವಾಸದ ಕುದುರೆಯ ಮೇಲೆ ಉತ್ಸಾಹದಿಂದ ಓಡುತ್ತಿತ್ತು ಬಿಜೆಪಿ, ಆದರೆ ಫಲಿತಾಂಶ ಬಂದಾಗ ಅದು ಕಾಲು ಮುರಿದ ಕುದುರೆಯಾಗಿತ್ತು. ಬಿಜೆಪಿಯ ಕಾರ್ಯಕರ್ತರಿಗೆ 2024ರ ಈ ಫಲಿತಾಂಶ ಬಹುದೊಡ್ಡ ಆಘಾತವಾಯಿತು.

ಚುನಾವಣಾ ತಂತ್ರಗಾರಿಕೆಯಲ್ಲಿ ಎಡವಟ್ಟಾದರೆ ಫಲಿತಾಂಶ ಹೇಗೆ ಕೈಕೊಡುತ್ತದೆ ಎಂಬುದಕ್ಕೆ ಇದು ಸಾಕ್ಷಿಯಾಯಿತು. ಆದರೆ, ಚುನಾವಣೆಯಲ್ಲಿನ ಹಿನ್ನಡೆಯಿಂದ ಬಿಜೆಪಿಯ ನಾಯಕರು ಕುಗ್ಗಲಿಲ್ಲ; ಬದಲಿಗೆ ತಮ್ಮ ತಂತ್ರಗಾರಿಕೆಯನ್ನು ಬದಲಿಸಿದರು. ಹೊಸ ಹುಮ್ಮಸ್ಸಿನಿಂದ ಚುನಾ ವಣಾ ಕಣಕ್ಕೆ ಧುಮುಕಿ ಹರಿಯಾಣ, ಮಹಾರಾಷ್ಟ್ರ ಮತ್ತು ದೆಹಲಿ ಚುನಾವಣೆಯಲ್ಲಿ ಅದ್ಭುತ ಜಯ ಸಾಧಿಸಿದರು.

ಮೋದಿಯವರ ಮೋಡಿ ಮುಗಿಯಿತು ಎಂದು ಸಂಭ್ರಮಿಸುತ್ತಿದ್ದವರಿಗೆ ಪಾಪ! ಬಹು ದೊಡ್ಡ ಶಾಕ್ ಆಯಿತು. ಬಿಹಾರದಲ್ಲಿ ಮಹಾರಾಷ್ಟ್ರದ ಹಾಗೆ ಮೈತ್ರಿಕೂಟದ ರಾಜಕಾರಣವೇ ಆಧಾರ. ಮೈತ್ರಿ ಧರ್ಮದ ಪಾಲನೆ ಅತ್ಯವಶ್ಯಕ. 2020ರಲ್ಲಿ ಬಿಜೆಪಿ, ಜೆಡಿಯುಗಿಂತ ಹೆಚ್ಚು ಸೀಟು ಜಯಿಸಿದ್ದರೂ ನಿತೀಶ್ ಕುಮಾರ್‌ರವರನ್ನೇ ಪುನಃ ಮುಖ್ಯಮಂತ್ರಿಯಾಗಿ ಆಯ್ಕೆ ಮಾಡಿತು, ದೊಡ್ಡಣ್ಣನ ವರ್ತನೆ ತೋರದೆ ಮಿತ್ರಪಕ್ಷವನ್ನು ಜತೆಜತೆಗೆ ಕರೆದೊಯ್ಯುವ ಪ್ರಬುದ್ಧತೆಯನ್ನು ಪ್ರದರ್ಶಿಸಿತು.

ಇದನ್ನೂ ಓದಿ: Prakash Shesharaghavachar Column: ಆತ್ಮಾವಲೋಕನ ಮಾಡಿಕೊಳ್ಳಿ, ಆತ್ಮವಂಚನೆಯನ್ನಲ್ಲ

ಬಿಹಾರದಲ್ಲಿ ನಿತೀಶ್ ಕುಮಾರ್ ಮುಖ್ಯಮಂತ್ರಿಯಾಗಿ ಇಪ್ಪತ್ತು ವರ್ಷವಾಗಿತ್ತು. 2025ರ ಚುನಾವಣೆಯಲ್ಲಿ ಅವರು ಆಡಳಿತ ವಿರೋಧಿ ಅಲೆ ಎದುರಿಸಬಹುದು ಎಂಬ ಕಾರಣದಿಂದ ಈ ಬಾರಿಯ ಚುನಾವಣೆಯುಲ್ಲಿ ಅವರು ಮತ್ತೆ ಅಧಿಕಾರಕ್ಕೆ ಬರುವುದು ಬಹುದೊಡ್ಡ ಸವಾಲು ಎಂದು ವಾಖ್ಯಾನಿಸಲಾಗುತ್ತಿತ್ತು.

ಬಿಜೆಪಿಗೆ, ಬಿಹಾರದ ಚುನಾವಣೆಯಲ್ಲಿನ ಗೆಲುವು ಅನಿವಾರ್ಯವಾಗಿತ್ತು. ಇಲ್ಲಿನ ಫಲಿತಾಂಶವು ಕೇಂದ್ರ ಸರಕಾರದ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯನ್ನು ತಳ್ಳಿ ಹಾಕುವ ಹಾಗಿರಲಿಲ್ಲ. ಹೀಗಾಗಿ ಬಿಜೆಪಿಯ ಪಾಲಿಗೆ ಇದು ಮಹತ್ವದ ಚುನಾವಣಾ ಹೋರಾಟವಾಗಿತ್ತು. ಚುನಾವಣೆಯನ್ನು ಯಾವುದೋ ಒಂದು ವಿಷಯದ ಆಧಾರದ ಮೇಲೆ ಗೆಲ್ಲಲು ಸಾಧ್ಯವಿಲ್ಲ.

ಅದರಲ್ಲೂ ಇಪ್ಪತ್ತು ವರ್ಷ ಅಧಿಕಾರದಲ್ಲಿದ್ದ ಸರಕಾರವು ಮತ್ತೆ ಜನತೆಯ ಒಲವು ಗಳಿಸುವುದು ಸಾಮಾನ್ಯ ವಿಚಾರವಾಗದು. ಈ ಕುರಿತು ವಿಧಾನ ಪರಿಷತ್ ಸದಸ್ಯ ಕೇಶವ ಪ್ರಸಾದ್, “ಬಿಹಾರದಲ್ಲಿ ರಾಜ್ಯ ಮತ್ತು ಕೇಂದ್ರ ಸರಕಾರದ ಯೋಜನೆಗಳು ಫಲಾನುಭವಿಗಳಿಗೆ ತಲುಪಿ ಅವರ ಬದುಕಿನಲ್ಲಿ ಬದಲಾವಣೆ ತಂದಿವೆ. ರಾಜ್ಯದಲ್ಲಿ ರಸ್ತೆಗಳ ಪರಿಸ್ಥಿತಿಯು ಬಹುತೇಕ ಸುಧಾರಣೆಯಾಗಿದೆ, ಜನರಲ್ಲಿ ಸುರಕ್ಷತಾ ಭಾವವಿದೆ. ಜನರು ನಿತೀಶ್ ಕುಮಾರ್‌ರವರನ್ನು ‘ಸುಶಾಸನ ಬಾಬು’ ಎಂದು ಕರೆಯು ತ್ತಿದ್ದರು" ಎನ್ನುತ್ತಾರೆ.

ಚುನಾವಣೆಗೆ ಮುನ್ನ ೧.೪ ಕೋಟಿ ಮಹಿಳೆಯರಿಗೆ ಹತ್ತು ಸಾವಿರ ರುಪಾಯಿ ನೀಡಿದ ಕಾರಣಕ್ಕೆ ಮಹಿಳೆಯರು ಅತಿ ಹೆಚ್ಚು ಸಂಖ್ಯೆಯಲ್ಲಿ ಮತಗಟ್ಟೆಗೆ ಬಂದು ನಿತೀಶರ ಸರಕಾರವನ್ನು ಬೆಂಬಲಿಸಿ ದರು ಎಂದು ಅನೇಕ ವಿಶ್ಲೇಷಕರು ಅಭಿಪ್ರಾಯಪಟ್ಟರು. ವಾಸ್ತವವಾಗಿ ಎರಡು ದಶಕದಲ್ಲಿ ಬದಲಾಗಿರುವ ಬಿಹಾರವೇ ಗೆಲುವಿನಲ್ಲಿ ಮಹತ್ವದ ಪಾತ್ರ ನಿರ್ವಹಿಸಿದ್ದು.

2006ರ ನಂತರ ಬಿಹಾರದಲ್ಲಿ ಮಹಿಳಾ ಸಬಲೀಕರಣ ಬಹುದೊಡ್ಡ ಪಾತ್ರವಹಿಸಿದೆ. ಶಾಲೆಗೆ ಹೋಗುವ ಹೆಣ್ಣು ಮಕ್ಕಳಿಗೆ ಸೈಕಲ್ ನೀಡಲಾಗಿದೆ. ಮಹಿಳೆಯರಲ್ಲಿ ಸುರಕ್ಷತೆಯ ಭಾವ ಬೆಳೆದು ಅವರು ನಿರ್ಭೀತಿಯಿಂದ ಏಕಾಂಗಿಯಾಗಿ ಸಂಚರಿಸಲು ಸಾಧ್ಯವಾಗಿದೆ. ಇದಲ್ಲದೆ ೧.೧ ಕೋಟಿ ಯಷ್ಟು ಹಿರಿಯ ನಾಗರಿಕರ, ವಿಧವೆಯರ ಮತ್ತು ದಿವ್ಯಾಂಗರ ಪಿಂಚಣಿಯನ್ನು 400 ರುಪಾಯಿ ಯಿಂದ 1100 ರುಪಾಯಿಗೆ ಹೆಚ್ಚಳ ಮಾಡಲಾಯಿತು.

ಬಿಹಾರಿಗಳ ಬದುಕು ಕಳೆದ ಎರಡು ದಶಕದಲ್ಲಿ ಬದಲಾಗಿದೆ. ಶೇಕಡಾ ೫೦ರಷ್ಟು ಕುಟುಂಬಗಳು ವಲಸಿಗರ ಆದಾಯದ ಮೇಲೆ ನಿಂತಿವೆ. ನಿಮಗೆ ಆಶ್ಚರ್ಯವಾಗಬಹುದು, ಪ್ರತಿ ವರ್ಷ ವಲಸಿಗರು 25 ಸಾವಿರ ಕೋಟಿ ರು. ಹಣವನ್ನು ರಾಜ್ಯಕ್ಕೆ ಕಳುಹಿಸುತ್ತಾರೆ. ಇದರಿಂದ ವಲಸಿಗರ ಕುಟುಂಬದಲ್ಲಿ ಆರ್ಥಿಕ ಸ್ಥಿತಿಯು ಸುಧಾರಿಸಿದೆ. ಉದ್ಯೋಗ ಅರಸಿ ಇತರ ರಾಜ್ಯಗಳಿಗೆ ವಲಸೆ ಹೋಗುವುದು ಬಿಹಾರದ ನಿರುದ್ಯೋಗ ಸಮಸ್ಯೆಯ ಗುರುತಲ್ಲ, ಬದಲಿಗೆ ಅವರ ಆರ್ಥಿಕ ಶಕ್ತಿಯ ಸೂಚಕವಾಗಿದೆ.

ಕೈಗಾರಿಕೆಗಳ ಸ್ಥಾಪನೆಯು 2020ರಿಂದ 2154 ಕಾರ್ಖಾನೆಗಳಿಗೆ ಏರಿದೆ, ಹೂಡಿಕೆಯು 90,503 ಕೋಟಿ ರು.ಗೆ ಏರಿದೆ. ಒಟ್ಟಾರೆ ಶೇ. 434.5ರಷ್ಟು ಹೆಚ್ಚಳವಾಗಿದೆ. ಬಿಹಾರದ ರಫ್ತು ಕೇವಲ ಎರಡು ವರ್ಷ ದಲ್ಲಿ ದ್ವಿಗುಣಗೊಂಡಿದೆ; 2020-21ರಲ್ಲಿ 11191 ಕೋಟಿ ರು.ನಷ್ಟು ಇದ್ದುದು 2022-23ರಲ್ಲಿ 20895 ಕೋಟಿ ರು.ಗೆ ತಲುಪಿದೆ. ಎರಡು ದಶಕಗಳ ಬೆಳವಣಿಗೆಯ ಸರಾಸರಿ ಶೇ.೧೦.೨ರಷ್ಟಿದ್ದು, ಗುಜರಾತ್ ನಂತರದ ಎರಡನೇ ಸ್ಥಾನದಲ್ಲಿದೆ ಬಿಹಾರ.

ಕಳೆದ ಮೂರು ವರ್ಷಗಳಲ್ಲಿ, ಬಿಹಾರದ ಅಭಿವೃದ್ಧಿ ಸೂಚ್ಯಂಕವು ರಾಷ್ಟ್ರೀಯ ಸರಾಸರಿಯನ್ನು ಶೇ.೯.೨ರಷ್ಟು ಮೀರಿಸಿದೆ, ‘ಬಿಮಾರು ರಾಜ್ಯ’ ಎಂಬ ಹಣೆಪಟ್ಟಿಯನ್ನು ಕಳಚಿಕೊಂಡಿದೆ. 2005ರಲ್ಲಿ ಕತ್ತಲಲ್ಲಿ ಇದ್ದ ಬಿಹಾರದಲ್ಲಿ ಈಗ ದಿನದ ೨೪ ಗಂಟೆಯೂ ವಿದ್ಯುತ್ ಲಭ್ಯತೆಯಿದೆ.

ಇಂದು ಪ್ರತಿ ಹಳ್ಳಿಯನ್ನೂ ವಿದ್ಯುತ್ ತಲುಪಿದೆ. ಹೊಸ ಹೊಸ ವಿದ್ಯುತ್ ಉತ್ಪಾದನಾ ಘಟಕಗಳು ತಲೆಯೆತ್ತುತ್ತಿವೆ. ರಾಜಕೀಯವಾಗಿ, ಬಿಜೆಪಿಯು ಆರು ತಿಂಗಳ ಮುನ್ನ ಎಲ್ಲಾ 243 ಕ್ಷೇತ್ರಗಳಲ್ಲಿಯೂ ಸರಕಾರದ ಯೋಜನೆಯ ಫಲಾನುಭವಿಗಳ ಸಭೆಯನ್ನುಆರಂಭಿಸಿತು.

ಬಡವರಿಗೆ ಮನೆ, ಎಲ್‌ಪಿಜಿ ಸಿಲಿಂಡರ್, ವಿದ್ಯುತ್ ಸಂಪರ್ಕ, ಕೊಳಾಯಿ ಮೂಲಕ ಕುಡಿಯುವ ನೀರು, ಐದು ಕೆಜಿ ಅಕ್ಕಿ ಮತ್ತು ಜನಧನ್ ಖಾತೆ ಈ ಯೋಜನೆಗಳು ಫಲಾನುಭವಿಗಳನ್ನು ತಲುಪಿತು. ಹೀಗೆ ಪಡೆದ ಪ್ರಯೋಜನವನ್ನು ಆ ಫಲಾನುಭವಿಗಳಿಗೆ ನೆನಪಿಸುವ ಕೆಲಸ ನಡೆಯಿತು. ಸಮಾಜದ ಗಣ್ಯರ ಮತ್ತು ಅಭಿಪ್ರಾಯ ರೂಪಿಸುವವರ ನೂರಾರು ತಂಡಗಳ ಸಭೆಯನ್ನು ಧರ್ಮೇಂದರ್ ಪ್ರಧಾನ್ ಹಾಗೂ ರಾಷ್ಟ್ರೀಯ ಸ್ತರದ ಇತರ ಪದಾಧಿಕಾರಿಗಳು ನಡೆಸಿದರು.

ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲಿ ಒಬ್ಬೊಬ್ಬ ಪೂರ್ಣಾವಧಿ ಕಾರ್ಯಕರ್ತರೂ ಆರು ತಿಂಗಳಿನಿಂದ ಕೆಲಸ ಮಾಡುತ್ತಿದ್ದರು. ದಿನ ಬೆಳಗಾದರೆ ಕ್ಷೇತ್ರದ ಕಾರ್ಯಕರ್ತರೊಡನೆ ಒಡನಾಟ ಮತ್ತು ಪ್ರಮುಖ ವ್ಯಕ್ತಿಗಳ ಭೇಟಿ ಹಾಗೂ ಬೂತ್ ಮಟ್ಟದಲ್ಲಿ ಶಕ್ತಿವರ್ಧನೆಯ ಕೆಲಸದಲ್ಲಿ ಅವರು ತೊಡಗಿದ್ದರು. ಎನ್‌ಡಿಎ ಈ ಬಾರಿ ಐದು ಪಕ್ಷಗಳ ಮಿತ್ರಕೂಟವಾಗಿತ್ತು. ಕಳೆದ ಬಾರಿ ಚಿರಾಗ್ ಪಾಸ್ವಾನ್ ಅವರ ‘ಎಲ್‌ಜೆಪಿ’ ಪಕ್ಷವು ಸ್ವತಂತ್ರವಾಗಿ ಸ್ಪರ್ಧಿಸಿ, ಜೆಡಿಯು ಪಕ್ಷದ ಅಭ್ಯರ್ಥಿಗಳ ಗೆಲುವಿಗೆ ಅಡ್ಡಗಾಲಾ ಗಿತ್ತು.

ಆ ಪಕ್ಷವು ಈ ಬಾರಿ ಎನ್‌ಡಿಎ ಘಟಕವಾಗಿ ೨೮ ಸ್ಥಾನಗಳಲ್ಲಿ ಸ್ಪರ್ಧಿಸಿ ೧೯ರಲ್ಲಿ ಗೆಲುವು ಸಾಧಿಸಿತು. ಇನ್ನೂ ಹೆಚ್ಚಿನ ಸ್ಥಾನಗಳಲ್ಲಿ ಸ್ಪಽಸುವ ಸಾಮರ್ಥ್ಯವಿದ್ದರೂ ಬಿಜೆಪಿಯು ಕೇವಲ 101 ಸ್ಥಾನಗಳಲ್ಲಿ ಸ್ಪರ್ಧಿಸಿತು.

ಜೆಡಿಯು ಕೂಡ 101 ಸ್ಥಾನಗಳಲ್ಲಿ ಸ್ಪರ್ಧಿಸಿತು. ಬಿಜೆಪಿಗೆ ಮಿತ್ರಪಕ್ಷಗಳನ್ನು ಜತೆಗೆ ಕರೆದುಕೊಂಡು ಹೋಗುವುದು ಮುಖ್ಯವಿತ್ತು. ಹೀಗಾಗಿ ಎಲ್ಲಿಯೂ ದೊಡ್ಡಣ್ಣನ ಹಾಗೆ ವರ್ತಿಸದಿರುವ ಹಾಗೆ ಬಿಜೆಪಿ ಎಚ್ಚರವಹಿಸಿತ್ತು. ಟಿಕೆಟ್ ಘೋಷಣೆಯ ನಂತರ ಬಿಜೆಪಿಯ ನೂರಾರು ನಾಯಕರು ಅಸಮಾಧಾನ ಗೊಂಡಿದ್ದರು. ಅವರಲ್ಲಿ ಹಲವರು ಬಂಡಾಯ ಅಭ್ಯರ್ಥಿಗಳಾಗಿ ನಾಮಪತ್ರ ಸಲ್ಲಿಸಿದ್ದರು.

ಗೃಹ ಸಚಿವ ಅಮಿತ್ ಶಾ ಅವರು ೩ ದಿನಗಳ ಕಾಲ ಪಟನಾದಲ್ಲಿ ಠಿಕಾಣಿ ಹೂಡಿ ಪ್ರತಿಯೊಬ್ಬ ರನ್ನೂ ವೈಯಕ್ತಿಕವಾಗಿ ಕರೆದು, ಅವರ ಮನವೊಲಿಸಿ ಒಂದೂ ಬಂಡಾಯವಿಲ್ಲದ ಹಾಗೆ ನಿರ್ವಹಣೆ ಮಾಡಿದರು. ಮೈತ್ರಿಕೂಟದ ನಾಯಕರು ಯಾವುದೇ ಅನುಮಾನಕ್ಕೆ ಆಸ್ಪದ ನೀಡದೆ, ನಿತೀಶ್‌ರವರೇ ಮುಖ್ಯಮಂತ್ರಿ ಅಭ್ಯರ್ಥಿ ಎಂದು ಘೋಷಿಸಿದರು.

‘ಇಂಡಿಯ’ ಮೈತ್ರಿಕೂಟ ಗೆದ್ದರೆ ಜಂಗಲ್‌ರಾಜ್ ಮತ್ತೆ ವಾಪಸ್ ಬರುತ್ತದೆ ಎಂದು ಪರಿಣಾಮ ಕಾರಿಯಾಗಿ ಪ್ರಚಾರ ಮಾಡಲಾಯಿತು. ಆರ್‌ಜೆಡಿ ಪಕ್ಷದ ಹಿಂದಿನ ದುರಾಡಳಿತದ ಕುರಿತಾದ ಸಣ್ಣ ಸಣ್ಣ ವಿಡಿಯೋ ಕ್ಲಿಪ್‌ಗಳನ್ನು ಲಕ್ಷಾಂತರ ಮತದಾರರೊಂದಿಗೆ ಹಂಚಿಕೊಳ್ಳಲಾಯಿತು. ಇದು ಎನ್ ಡಿಎ ಒಕ್ಕೂಟದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿತು.

ಚುನಾವಣಾ ಸಂದರ್ಭದಲ್ಲಿ ಬಂದ ಬಿಹಾರದ ಅತ್ಯಂತ ಪ್ರಮುಖ ಹಬ್ಬವಾದ ‘ಛತ್ ಪೂಜೆ’ಯು ಸರಕಾರಕ್ಕೆ ಛತ್ ಮಾತೆಯೇ ನೀಡಿದ ವರವೆನ್ನಬಹುದು. ಬಿಜೆಪಿಯ ಆಳ್ವಿಕೆಯ ರಾಜ್ಯಗಳಲ್ಲಿ ಛತ್ ಪೂಜೆಗೆ ಸಕಲ ಸೌಲಭ್ಯ, ಅನುಕೂಲಗಳನ್ನು ಕಲ್ಪಿಸಲಾಯಿತು. ವಿಶೇಷವಾಗಿ ದೆಹಲಿಯಲ್ಲಿ ದಶಕಗಳ ನಂತರ ಯಮುನಾ ನದಿಯ ತಟದಲ್ಲಿ ಛತ್ ಪೂಜೆಗೆ ವಿಶೇಷ ವ್ಯವಸ್ಥೆ ಮಾಡಲಾಗಿತ್ತು.

ವಿವಿಧ ರಾಜ್ಯಗಳಿಂದ ಬಿಹಾರ ತಲುಪಲು ನೂರಾರು ವಿಶೇಷ ರೈಲುಗಳನ್ನು ಓಡಿಸಲಾಯಿತು. ಲಕ್ಷಾಂತರ ಬಿಹಾರಿಗಳು ತಮ್ಮ ಕುಟುಂಬದೊಂದಿಗೆ ಸಂಭ್ರಮದಿಂದ ಪೂಜೆಯಲ್ಲಿ ಭಾಗಿಯಾದರು. ಬಿಜೆಪಿ ರಾಜ್ಯಗಳ ಮುಖ್ಯಮಂತ್ರಿಗಳು, ವಿಶೇಷವಾಗಿ ಯೋಗಿ ಆದಿತ್ಯನಾಥ್‌ರವರು ಹದಿನೈದಕ್ಕೂ ಹೆಚ್ಚು ಸಭೆಯಲ್ಲಿ ಭಾಗವಹಿಸಿದ್ದರು. ದೇವೇಂದ್ರ ಫಡ್ನವಿಸ್, ಮೋಹನ್ ಯಾದವ್ ಮತ್ತು ರೇಖಾ ಗುಪ್ತಾರವರನ್ನು ಪ್ರಚಾರ ಕಾರ್ಯದಲ್ಲಿ ಬಳಸಿಕೊಳ್ಳಲಾಗಿತ್ತು. ಇವರೆ, ಸಾರ್ವಜನಿಕ ಸಭೆಯಲ್ಲದೆ ಮನೆ ಮನೆಗಳಿಗೆ ಹೋಗಿ ವೋಟು ಕೇಳಿದರು.

ಸಾವಿರಾರು ಕಾರ್ಯಕರ್ತರು ಒಂದು ವರ್ಷ ಅಥವಾ ಆರು ತಿಂಗಳು ತಮ್ಮ ಪೂರ್ಣ ಸಮಯ ವನ್ನು ಚುನಾವಣಾ ಕೆಲಸಕ್ಕೆ ನೀಡಿ ಬೂತ್ ಮಟ್ಟದಲ್ಲಿ ತೊಡಗಿಸಿಕೊಂಡು ಜನರನ್ನು ತಲುಪಿ ದರು. ಸಂಘ ಪರಿವಾರದ ಅಡಿಯಲ್ಲಿರುವ ವಿವಿಧ ಸಂಘಟನೆಗಳ ಕಾರ್ಯಕರ್ತರು ಈ ಕೆಲಸದಲ್ಲಿ ಕೈಜೋಡಿಸಿ ಬಿಹಾರದ ಮೂಲೆ ಮೂಲೆಯನ್ನು ತಲುಪಿ ಜನಾಭಿಪ್ರಾಯವನ್ನು ರೂಪಿಸಿದರು.

ಬಿಜೆಪಿಯು ಹೀಗೆ ಬೂತ್ ಮಟ್ಟದಲ್ಲಿ ಬೆವರು ಸುರಿಸಿ ಚುನಾವಣೆಯನ್ನು ಗೆದ್ದಿತು. ಪಶ್ಚಿಮ ಬಂಗಾಳದಲ್ಲಿ ಇನ್ನೇನು ಆರು ತಿಂಗಳಲ್ಲಿ ಚುನಾವಣೆ ನಡೆಯಲಿದ್ದು ಇದಕ್ಕಾಗಿ ಈಗಾಗಲೇ ತಯಾರಿ ಆರಂಭವಾಗಿದೆ. ಉಸ್ತುವಾರಿಗಳ ನೇಮಕವಾಗಿ ಮುಂದಿನ ಆರು ತಿಂಗಳು ಕಾಲ ಈ ಎಲ್ಲಾ ನಾಯಕರು ಪಶ್ಚಿಮ ಬಂಗಾಳದಲ್ಲಿಯೇ ತಳವೂರಲಿದ್ದಾರೆ.

‘ವೋಟು ಚೋರಿ’ ಅಪಪ್ರಚಾರದ ಅಜೆಂಡಾ ವಿಫಲವಾಗಿದ್ದರೂ ಅದಕ್ಕೇ ಜೋತು ಬೀಳುವ ಮತ್ತು ಚುನಾವಣೆಯಲ್ಲಿ ಗೆಲ್ಲುವ ಸಾಮರ್ಥ್ಯವಿಲ್ಲದೆ ಚುನಾವಣಾ ಆಯೋಗವನ್ನು ಟೀಕೆ ಮಾಡುತ್ತಾ ಕಾಲಹರಣ ಮಾಡುವ ಕಾಂಗ್ರೆಸ್ ಪಾರ್ಟಿಯು, ಬಿಜೆಪಿಯ ಚುನಾವಣಾ ಕಾರ್ಯ ವೈಖರಿಗೆ ಸರಿಸಾಟಿ ಯಾಗುವ ನಾಯಕತ್ವ ಮತ್ತು ತಂತ್ರಗಾರಿಕೆಗಳು ತನ್ನ ಬಳಿ ಇಲ್ಲ ಎಂಬ ಕಟುಸತ್ಯವನ್ನು ಅರಿತುಕೊಳ್ಳಬೇಕು!

(ಲೇಖಕರು ಬಿಜೆಪಿಯ ವಕ್ತಾರರು)