Mohan Vishwa Column: ಪಾಕಿಸ್ತಾನದ ಭ್ರಷ್ಟ ಪ್ರಧಾನಮಂತ್ರಿಗಳು
ಪಾಕಿಸ್ತಾನದಲ್ಲಿ, ಅದರ ಹುಟ್ಟಿನಿಂದಲೂ ರಾಜಕೀಯದ ಅಸ್ಥಿರತೆ ಕಾಡುತ್ತಿದೆ. ಅಲ್ಲಿನ ಮಿಲಿಟರಿ ಅಧಿಕಾರಿಗಳು ಚುನಾಯಿತ ಪ್ರತಿನಿಧಿಗಳನ್ನು ಆಡಳಿತ ನಡೆಸಲು ಬಿಟ್ಟಿಲ್ಲ. ಅಧಿಕಾರಕ್ಕೆ ಬಂದ ಪ್ರಧಾನ ಮಂತ್ರಿಗಳು ಭ್ರಷ್ಟಾಚಾರದಲ್ಲಿ ಮಿಂದೆದ್ದು ಸಾವಿರಾರು ಕೋಟಿ ಹಣವನ್ನು ಲೂಟಿ ಮಾಡಿರುವ ಆರೋಪಗಳಿವೆ. ಅಧಿಕಾರಕ್ಕೆ ಬಂದ ನಂತರ ಭ್ರಷ್ಟಾಚಾರದಲ್ಲಿ ತೊಡಗಿ ವಿದೇಶಗಳಲ್ಲಿ ಆಸ್ತಿ ಮಾಡಿ ರುವ ಆರೋಪಗಳಿವೆ.
ಮೋಹನ್‌ ವಿಶ್ವ
May 24, 2025 6:46 AM
ವೀಕೆಂಡ್‌ ವಿತ್‌ ಮೋಹನ್‌
camohanbn@gmail.com
ಪಾಕಿಸ್ತಾನದ ಇತಿಹಾಸದಲ್ಲಿ ಒಬ್ಬ ಪ್ರಧಾನ ಮಂತ್ರಿಯೂ ಐದು ವರ್ಷಗಳ ಸುದೀರ್ಘ ಆಡಳಿತ ಅವಧಿಯನ್ನು ಪೂರ್ಣಗೊಳಿಸಿದ ಉದಾಹರಣೆ ಇಲ್ಲ. ಏಕೆಂದರೆ, ಚುನಾಯಿತರಾದ ಸರಕಾರದ ಮುಖ್ಯಸ್ಥರನ್ನು ಭ್ರಷ್ಟಾಚಾರದ ಆರೋಪದ ಕಾರಣದಿಂದ ವಜಾಗೊಳಿಸಲಾಗಿದೆ. ಪಾಕಿಸ್ತಾನದ ಮಾಜಿ ಪ್ರಧಾನಮಂತ್ರಿ ನವಾಜ್ ಷರೀಫ್ ನಡೆಸಿದ ಭ್ರಷ್ಟಾಚಾರದ ಇತಿಹಾಸವು ಪನಾಮ ಪೇಪರ್ಸ್ ಹಗರಣವು ಬೆಳಕಿಗೆ ಬರುವ ಮುನ್ನವೇ ಪ್ರಾರಂಭವಾಗಿತ್ತು. ಷರೀಫ್ ಪಾಕಿಸ್ತಾನ ಮುಸ್ಲಿಂ ಲೀಗ್ (ಎನ್) ಪಕ್ಷದ ಅಧ್ಯಕ್ಷರಾಗಿ, ಉಕ್ಕಿನ ಗಿರಣಿ ಸಮೂಹ ಸಂಸ್ಥೆ ಗಳ ಮಾಲೀಕರಾಗಿ, ಶ್ರೀಮಂತ ಕೈಗಾರಿ ಕೋದ್ಯಮಿಗಳಲ್ಲಿ ಒಬ್ಬರಾಗಿದ್ದರು. 1977ರಿಂದ 1988ರವರೆಗೆ ಅಧಿಕಾರದಲ್ಲಿದ್ದ ಮಿಲಿಟರಿ ನಾಯಕ ಜಿಯಾ ಉಲ್ ಹಕ್‌ನ ಅಡಿಯಲ್ಲಿ ಆಶ್ರಯ ಪಡೆದು, ಮೊದಲ ಬಾರಿಗೆ ಹಣಕಾಸು ಸಚಿವರಾಗಿ ನೇಮಕವಾದರು.
ಅಸ್ಥಿರವಾದ ಸಂಪ್ರದಾಯವಾದಿಗಳ ಒಕ್ಕೂಟದಿಂದ ಪ್ರೋತ್ಸಾಹಿಸಲ್ಪಟ್ಟು 1985ರಲ್ಲಿ ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಮುಖ್ಯಮಂತ್ರಿಯಾಗಿ ಆಯ್ಕೆಯಾಗಿದ್ದರು. ನಂತರ 1988ರಲ್ಲಿ ಮರು ಆಯ್ಕೆ ಯಾಗಿ ಮತ್ತು ಅಂತಿಮವಾಗಿ 1990ರಲ್ಲಿ ರಾಷ್ಟ್ರದ ಪ್ರಧಾನ ಮಂತ್ರಿಯಾಗುವಲ್ಲಿ ಯಶಸ್ವಿಯಾಗಿ ದ್ದರು. ತದನಂತರ ಇವರ ಮೇಲೆ, ಚುನಾವಣೆಯನ್ನು ದುರ್ಬಳಕೆ ಮಾಡಿಕೊಂಡ ಆರೋಪ ಬಂದಿತ್ತು.
ಪಾಕಿಸ್ತಾನಿ ಗುಪ್ತಚರ ಸಂಸ್ಥೆ ಐಎಸ್‌ಐ, ಇವರ ಚುನಾವಣಾ ಪ್ರಚಾರಕ್ಕೆ ಹಣದ ಹೊಳೆಯನ್ನು ಹರಿಸಿತ್ತು. 2016ರಲ್ಲಿ ಸೋರಿಕೆಯಾದ ’ಪನಾಮಾ ಪೇಪರ್ಸ್’, ನವಾಜ್ ಷರೀಫ್ ಅವರ ಭ್ರಷ್ಟ ಚಟುವಟಿಕೆಗಳನ್ನು ಬೆಳಕಿಗೆ ತಂದಿತ್ತು. ಸೆಂಟ್ರಲ್ ಲಂಡನ್‌ನಲ್ಲಿರುವ ಅವರ ಕುಟುಂಬದ ಆಸ್ತಿಯ ಮಾಲೀಕತ್ವಕ್ಕೆ ಸಂಬಂಧಿಸಿದ ಆರೋಪಗಳು ಅಕ್ರಮ ಹಣದ ಜಾಡಿನ ಹಿನ್ನೆಲೆಯನ್ನು ಹೊಂದಿ ದ್ದವು. ಇವರ ಅಕ್ರಮ ಆಸ್ತಿ ಗಳಿಕೆ ಯನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸಲಾಯಿತು.
ಜುಲೈ 28, 2017ರಂದು ಪ್ರಧಾನಮಂತ್ರಿಯಾಗಿ ಸೇವೆ ಸಲ್ಲಿಸಲು ಸರ್ವೋಚ್ಚ ನ್ಯಾಯಾಲಯವು ಅನುಮತಿ ನೀಡಿತ್ತು. ನವಾಜ್ ಷರೀಫ್ ಆರಂಭದಲ್ಲಿ ತಾವು ಮಾಡಿದ ಅಕ್ರಮಗಳನ್ನು ನಿರಾಕರಿಸಿ ದರೂ, ತೀರ್ಪಿನ ಸ್ವಲ್ಪ ಸಮಯದ ನಂತರ ಔಪಚಾರಿಕವಾಗಿ ರಾಜೀನಾಮೆ ನೀಡಬೇಕಾಯಿತು.
ಇದನ್ನೂ ಓದಿ: Mohan Vishwa Column: ಹಿಂದೂ ಹಬ್ಬಗಳ ಆರ್ಥಿಕತೆ
ಪಾಕಿಸ್ತಾನದ ಮಾಜಿ ಪ್ರಧಾನಿ ಮತ್ತು ಅಧ್ಯಕ್ಷ ಜುಲ್ಫಿಕರ್ ಅಲಿ ಭುಟ್ಟೋ ಮಗಳು, ಆಕ್ಸ್ ಫರ್ಡ್ ಮತ್ತು ಹಾರ್ವರ್ಡ್ ಪದವೀಧರೆಯಾದ ಬೆನಜೀರ್ ಭುಟ್ಟೋ ಸಕ್ರಿಯ ರಾಜಕಾರಣಕ್ಕೆ ಕಾಲಿಡುವ ಮೊದಲು, ವಂಚಿತ ಮತ್ತು ಹಿಂದುಳಿದ ವರ್ಗದವರ ರಕ್ಷಕಿ ಮತ್ತು ಪ್ರಜಾಪ್ರಭುತ್ವದ ಸ್ವಾತಂತ್ರ್ಯದ ಪ್ರವರ್ತಕರಾಗಿ ತಮ್ಮನ್ನು ತಾವು ತೋರಿಸಿಕೊಂಡಿದ್ದರು.
ಹಾರ್ವರ್ಡ್ ವಿಶ್ವವಿದ್ಯಾಲಯದ ಆರಂಭದ ಭಾಷಣದಲ್ಲಿ, ರಾಜಕಾರಣಿಗಳ ದುರಾಸೆಯು ಅಭಿವೃದ್ಧಿ ಹೊಂದುತ್ತಿರುವ ದೇಶಗಳ ಸಂಪನ್ಮೂಲಗಳನ್ನು ಹೇಗೆ ಲೂಟಿ ಮಾಡುತ್ತದೆ, ಸಾಮಾನ್ಯ ಜನರನ್ನು ಹೇಗೆ ತಮ್ಮ ಸ್ವಾರ್ಥಕ್ಕಾಗಿ ಬಳಸಿಕೊಳ್ಳಲಾಗುತ್ತದೆ, ಜನರಿಗೆ ಹೇಗೆ ದ್ರೋಹ ಮಾಡಿzರೆ ಮತ್ತು ಅವರ ಸಾಮಾಜಿಕ-ಆರ್ಥಿಕ ಸಮಸ್ಯೆಗಳನ್ನು ಪರಿಹರಿಸಲು ಅಗತ್ಯವಾದ ವಿಧಾನಗಳಿಂದ ಅವರನ್ನು ಹೇಗೆ ತೆಗೆದು ಹಾಕಿದ್ದಾರೆ ಎಂಬ ದೊಡ್ಡ ದೊಡ್ಡ ಮಾತುಗಳನ್ನಾಡಿದ್ದರು.
ಇಷ್ಟೆ ಭಾಷಣ ಮಾಡಿದ್ದ ಬೆನಜೀರ್ ಭುಟ್ಟೋ ಪಾಕಿಸ್ತಾನದ ಪ್ರಧಾನಮಂತ್ರಿಯಾಗಿ ತಮ್ಮ ಎರಡು ಅವಧಿಯ ಅಧಿಕಾರದಲ್ಲಿ, ಮುಸ್ಲಿಂ ರಾಷ್ಟ್ರದ ಮೊದಲ ಮುಖ್ಯಸ್ಥಳಾಗಿ, ನೂರಾರು ಮಿಲಿಯನ್ ಡಾಲರ್ ಮೌಲ್ಯದ ಸಂಪತ್ತನ್ನು ಸಂಪಾದಿಸಿದ್ದರು. ಆಕೆಯ ಮೊದಲ ಸರಕಾರವನ್ನು ಆಗ 6 1990 ರಂದು ಅಂದಿನ ಅಧ್ಯಕ್ಷ ಗುಲಾಮ್ ಇಶಾಕ್ ಖಾನ್ ಭ್ರಷ್ಟಾಚಾರದ ಆರೋಪದಡಿ ವಜಾ ಗೊಳಿಸಿ ದ್ದರು.
ಪಾಕಿಸ್ತಾನಿ ಸೇನಾ ಮುಖ್ಯಸ್ಥ ಪರ್ವೇಜ್ ಮುಷರಫ್ ಆಡಳಿತದ ಸಮಯದಲ್ಲಿ ಬೆನಜೀರ್ ಭುಟ್ಟೋ ಅವರ ಭ್ರಷ್ಟಾಚಾರದ ಗತಕಾಲದ ಇತಿಹಾಸದ ಅನಾವರಣವಾಯಿತು. ಆಕೆಯ ಸ್ವಿಸ್ ವಕೀಲ ಮತ್ತು ಕುಟುಂಬದ ನಿಕಟ ಸ್ನೇಹಿತ ಜೆನ್ಸ್ ಶ್ಲೆಗೆಲ್ಮಿಚ್‌ನಿಂದ ಪಡೆದ ದಾಖಲೆಗಳು ಸೋರಿಕೆಯಾಗಿ ದ್ದವು. ಒಂದು ವ್ಯವಹಾರದಲ್ಲಿ ಮಾರಾಟಗಾರನು ಹೇಳಿದ ಮೂಲ ಬೆಲೆ 10 ಮಿಲಿಯನ್ ಡಾಲರ್ ಆಗಿತ್ತು, ಆದರೆ ಅಂತಿಮವಾಗಿ ವ್ಯವಹಾರವನ್ನು 1 ಮಿಲಿಯನ್ ಡಾಲರ್ ನಗದು ರೂಪದಲ್ಲಿ ಮುಗಿಸಲು ತೀರ್ಮಾನಿಸಲಾಗಿತ್ತು.
ಸೋರಿಕೆಯಾದ ಪೇಪರ್ ಗಳು ದುಬೈ ಮತ್ತು ಜಿನೀವಾದಲ್ಲಿನ ವಿವಿಧ ಖಾತೆಗಳಿಂದ ಬ್ಯಾಂಕ್ ಕಡತಗಳನ್ನು ಒಳಗೊಂಡಿದ್ದವು. ಹಣ ಪಾವತಿಗಳ ವಿವರಗಳೊಂದಿಗೆ, ಪಾವತಿಸುವ ಭರವಸೆ ನೀಡುವ ಹಿರಿಯ ಅಧಿಕಾರಿಗಳ ಪತ್ರಗಳು, ಕಮಿಷನ್‌ಗಳು ಮತ್ತು ಸಂಭಾವನೆಗಳು ಸಮ್ಮತಿಸಲ್ಪಟ್ಟ ಸಭೆಗಳನ್ನು ವಿವರಿಸುವ ಪತ್ರಗಳು, ಕಡಲಾಚೆಯ ಕಂಪನಿಗಳನ್ನು ಒಳಗೊಂಡ ಪ್ರಮಾಣಪತ್ರಗಳು, ಬ್ರಿಟಿಷ್ ವರ್ಜಿನ್ ಐಲ್ಯಾಂಡ್‌ಗಳಲ್ಲಿ ನೋಂದಾಯಿಸಿ ಹಣ ವರ್ಗಾವಣೆ ಮಾಡಿದ್ದಂಥ ಕಂಪನಿಗಳ ದಾಖಲೆಗಳು ಸಿಕ್ಕಿದ್ದವು.
1987ರಲ್ಲಿ, ಬೆನಜೀರ್ ಭುಟ್ಟೋ ಅವರು ಆಸಿಫ್ ಅಲಿ ಜರ್ದಾರಿಯನ್ನು ವಿವಾಹವಾದರು. ಇವರಿಬ್ಬರ ಮದುವೆಯ ನಂತರ ಪಾಕಿಸ್ತಾನದ ಸಾರ್ವಜನಿಕ ವಲಯದಲ್ಲಿ ಗಂಡ ಮತ್ತು ಹೆಂಡತಿ ಯ ನಡುವಿನ ಸಾಮಾಜಿಕ-ಆರ್ಥಿಕ ಸ್ಥಿತಿಯ ವ್ಯತ್ಯಾಸಗಳ ಬಗ್ಗೆ ಬಹಳಷ್ಟು ಚರ್ಚೆ‌ಗಳಾಗಿದ್ದವು.
1988ರಲ್ಲಿ, ಜಿಯಾ-ಉಲ್-ಹಕ್ ವಿಮಾನ ಅಪಘಾತದಲ್ಲಿ ಸಾವನ್ನಪ್ಪಿದ ನಂತರ, ಬೆನಜೀರ್ ಭುಟ್ಟೋ ಪಾಕಿಸ್ತಾನದ ಮೊದಲ ಮಹಿಳಾ ಪ್ರಧಾನ ಮಂತ್ರಿಯಾದರು. ಎರಡು ವರ್ಷದೊಳಗೆ, ಭ್ರಷ್ಟಾಚಾರ ಮತ್ತು ದುರಾಡಳಿತದ ಆಧಾರದ ಮೇಲೆ ಪಾಕಿಸ್ತಾನದ ಅಧ್ಯಕ್ಷರು ಬೆನಜೀರ್ ಭುಟ್ಟೋ ಅವರನ್ನು ವಜಾಗೊಳಿಸಿದರು. ನಂತರ ಅಧಿಕಾರಕ್ಕೆ ಬಂದ ನವಾಜ್ ಷರೀಫ್ ಸರಕಾರವು, ಬೆನ ಜೀರ್ ಭುಟ್ಟೋ ಅಥವಾ ಅವರ ಪತಿ ವಿರುದ್ಧ ಯಾವುದೇ ದೋಷಾರೋಪಣೆಯನ್ನು ಸಲ್ಲಿಸಲು ಸಾಧ್ಯವಾಗಲಿಲ್ಲ.
ಸ್ವತಃ ನವಾಜ್ ಷರೀಫ್, ಭ್ರಷ್ಟಾಚಾರ ಮತ್ತು ದುರಾಡಳಿತಕ್ಕಾಗಿ ಅಧಿಕಾರದಿಂದ ಹೊರ ಹಾಕಲ್ಪ ಟ್ಟರು. 1993ರಲ್ಲಿ ಬೆನಜೀರ್ ಭುಟ್ಟೊ ಮತ್ತೊಮ್ಮೆ ಅಧಿಕಾರಕ್ಕೆ ಮರಳಿದಾಗ, ಅವಳಿ ಹುದ್ದೆಗಳನ್ನು ಅಲಂಕರಿಸಿದರು. ಪ್ರಧಾನಮಂತ್ರಿ ಮತ್ತು ಹಣಕಾಸು ಮಂತ್ರಿಯಾಗಿ, ಪಾಕಿಸ್ತಾನದ ಆದಾಯದ ಮೇಲೆ ಮುಕ್ತ ನಿಯಂತ್ರಣವನ್ನು ಪಡೆದುಕೊಂಡರು. ಅವರ ಜತೆಗೆ 1996ರಲ್ಲಿ ತಮ್ಮ ಪತಿಯನ್ನು ಹೂಡಿಕೆ ಮಂತ್ರಿಯಾಗಿ ನೇಮಿಸಿಕೊಂಡರು. ಇದು ವಾಸ್ತವಿಕವಾಗಿ ಅವರನ್ನು ಭುಟ್ಟೋ ಅವರ ಬಲಗೈ ಬಂಟನನ್ನಾಗಿ ಮಾಡಿತ್ತು.
ಮತ್ತೊಂದು ದೊಡ್ಡ ಪ್ರಮಾಣದ ಹಣಕಾಸು ಯೋಜನೆಯಲ್ಲಿ, ಮಧ್ಯಪ್ರಾಚ್ಯದ ಚಿನ್ನದ ಗಟ್ಟಿ ವ್ಯಾಪಾರಿ ಅಬ್ದುಲ್ ರಜಾಕ್ ಯಾಕೂಬ್‌ನಿಗೆ ಭುಟ್ಟೋ ಸರಕಾರ ನೀಡಿದ ವ್ಯವಹಾರವನ್ನು, ದುಬೈ ನಲ್ಲಿ ಆಕೆಯ ಪತಿ ಆಸೀಫ್ ಅಲಿ ಜರ್ದಾರಿ ನಿರ್ವಹಿಸುತ್ತಿದ್ದ. ಈ ವ್ಯವಹಾರದಲ್ಲಿ ಯುನೈ ಟೆಡ್ ಅರಬ್ ಎಮಿರೇಟ್ಸ್‌ನ ಸಿಟಿಬ್ಯಾಂಕ್ ಖಾತೆಗೆ ಕನಿಷ್ಠ 10 ಮಿಲಿಯನ್ ಡಾಲರ್ ಹಣ ಠೇವಣಿ ಮಾಡ ಲಾಗಿತ್ತೆಂದು ಆರೋಪಿಸಲಾಗಿತ್ತು.
ಪಾಕಿಸ್ತಾನದ ಅರಬ್ಬೀ ಸಮುದ್ರ ತೀರ ಹಿಂದಿನಿಂದಲೂ ಚಿನ್ನದ ಕಳ್ಳಸಾಗಣೆದಾರರಿಗೆ ಸ್ವರ್ಗವಾಗಿದೆ. ಭುಟ್ಟೋ ಅವರ ಎರಡನೇ ಅವಧಿಯವರೆಗೆ, ವರ್ಷಕ್ಕೆ ನೂರಾರು ಮಿಲಿಯನ್ ಡಾಲರ್ ಮೌಲ್ಯದ ವ್ಯಾಪಾರ ಯಾವುದೇ ಮೇಲ್ವಿಚಾರಣೆ ಮತ್ತು ನಿಯಂತ್ರಣದಲ್ಲಿ ಇರಲಿಲ್ಲ, ದೊಡ್ಡ ಪ್ರಮಾಣದ ಚಿನ್ನದ ಗಟ್ಟಿಗಳನ್ನು, ಪರ್ಷಿಯನ್ ಗಲ್ಫ್ ಮತ್ತು ಅಸುರಕ್ಷಿತ ಪಾಕಿಸ್ತಾನಿ ಕರಾವಳಿಯ ನಡುವೆ ಪ್ರಯಾಣಿಸುವ ವಿಮಾನಗಳು ಮತ್ತು ದೋಣಿಗಳಲ್ಲಿ ಸಾಗಿಸಲಾಗುತ್ತಿತ್ತೆಂದು ಹೇಳಲಾಗುತ್ತದೆ.
ಪಾಕಿಸ್ತಾನದ ಕಸ್ಟಮ್ಸ ಆದಾಯವನ್ನು ಹೆಚ್ಚಿಸುವ ಮೂಲಕ ಭುಟ್ಟೋ ದಂಪತಿಗಳು ಪ್ರಭಾವಶಾಲಿ ಲಾಭವನ್ನು ಗಳಿಸಿದರು. ಕೆಲವೇ ಕೆಲವು ಪಾಕಿಸ್ತಾನಿಗಳು ಆದಾಯ ತೆರಿಗೆಯನ್ನು ಪಾವತಿಸುತ್ತಾರೆ ಎಂಬುದನ್ನು ಗಣನೆಗೆ ತೆಗೆದುಕೊಂಡು, ಕಸ್ಟಮ್ಸ ಆದಾಯ ದೇಶದಲ್ಲಿ ದೊಡ್ಡ ಮಟ್ಟದ ಆದಾಯ ವನ್ನು ನೀಡುತ್ತದೆಯೆಂದು ಹೇಳಲಾಗಿತ್ತು. ಆದರೆ ಭುಟ್ಟೋ ದಂಪತಿಗಳು ಶುರುಮಾಡಿದ್ದ ವ್ಯವಸ್ಥೆ ಹಲವು ವರ್ಷಗಳಿಂದ ಭ್ರಷ್ಟಗೊಂಡಿತ್ತು. ವ್ಯವಹಾರಗಳ ಸರಕಾರಿ ಬಾಧ್ಯತೆಗಳಿಂದ ತಪ್ಪಿಸಿ ಕೊಳ್ಳಲು ಲಂಚವನ್ನು ನೀಡುವ ಪ್ರಸಂಗ ಪಾಕಿಸ್ತಾನದಲ್ಲಿ ಸಾಮಾನ್ಯವಾಗಿಬಿಟ್ಟಿದೆ.
ಬೆನಜೀರ್ ಭುಟ್ಟೋ ಅವರ ಎರಡು ಅಧಿಕಾರಾವಧಿಗಳಲ್ಲಿನ ಹಗರಣಗಳ ವಿಚಾರಣೆಯು, ಅವರ ಪತಿ ಮತ್ತು ಇತರ ಕುಟುಂಬ ಸದಸ್ಯರ ಹೆಸರಿನಲ್ಲಿರುವ ಐಷಾರಾಮಿ ಸಾಗರೋತ್ತರ ಆಸ್ತಿಗಳ ದೊಡ್ಡದೊಂದು ಪಟ್ಟಿಯನ್ನೇ ಬಿಚ್ಚಿಟ್ಟಿದೆ. ಲಂಡನ್‌ನಲ್ಲಿರುವ ವಿವಿಧ ಅತಿರಂಜಿತ ರಾಕ್‌ವುಡ್ ಅಪಾರ್ಟ್ಮೆಂಟ್, 355-ಎಕರೆ ಎಸ್ಟೇಟ್ ಮತ್ತು ನಾರ್ಮಂಡಿಯಲ್ಲಿ 2.5 ಮಿಲಿಯನ್ ಡಾಲರ್ ಮೌಲ್ಯ ದ ದೊಡ್ಡ ಬಂಗಲೆ (ಇದನ್ನು ಹೌಸ್ ಆಫ್ ದಿ ವೈಟ್ ಕ್ವೀನ್ ಎಂದು ಕರೆಯಲಾಗುತ್ತದೆ) ಹೀಗೆ ಸಾಗುತ್ತದೆ ಪಟ್ಟಿ.
1990ರ ದಶಕದಲ್ಲಿ ಜರ್ದಾರಿ ಅವರ ಅಂಗಸಂಸ್ಥೆಗಳು ಖರೀದಿಸಿದ ಸುಮಾರು 4 ಮಿಲಿಯನ್ ಡಾಲರ್ ಮೌಲ್ಯದ, ಫ್ಲೋರಿಡಾದ ಪಾಮ್ ಬೀಚ್‌ನಲ್ಲಿರುವ ಕಂಟ್ರಿ ಕ್ಲಬ್ ಮತ್ತು ಪೋಲೋ ರಾಂಚ್ ಸೇರಿದಂತೆ ಇತರ ಸಾಗರೋತ್ತರ ಬ್ಯಾಂಕ್ ಖಾತೆಗಳು ಮತ್ತು ಆಸ್ತಿಗಳನ್ನು ತನಿಖೆ ಮಾಡಲು ಇಸ್ಲಾಮಾಬಾದ್ ಅಮೆರಿಕ ನ್ಯಾಯಾಂಗ ಇಲಾಖೆಗೆ ವಿನಂತಿಸಿತ್ತು. 1996ರಲ್ಲಿ ಭ್ರಷ್ಟಾಚಾರದ ಆರೋಪದಡಿಯಲ್ಲಿ ಬೆನಜೀರ್ ಭುಟ್ಟೊ ಅವರನ್ನು ಕಚೇರಿಯಿಂದ ಹೊರಹಾಕಿದ ನಂತರ, ಆಕೆಯ ಪತಿಯೊಂದಿಗೆ ಇಬ್ಬರಿಗೂ ಐದು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸಲಾಯಿತು.
ಸೈಯದ್ ಯೂಸಫ್ ರಾಜಾ ಗಿಲಾನಿ 2008ರ ಮಾರ್ಚ್ 25ರಿಂದ ಪಾಕಿಸ್ತಾನದ ಪ್ರಧಾನಮಂತ್ರಿ ಯಾಗಿ ಸೇವೆ ಸಲ್ಲಿಸಿದರು. ನಂತರ 2012ರ ಏಪ್ರಿಲ್ 26ರಂದು ಪಾಕಿಸ್ತಾನದ ಸರ್ವೋಚ್ಚ ನ್ಯಾಯಾಲಯ ಅವರನ್ನು ಪದವಿಯಿಂದ ವಜಾಗೊಳಿಸಿತ್ತು. 1993ರಿಂದ 1997ರವರೆಗೆ ರಾಷ್ಟ್ರೀಯ ಅಸೆಂಬ್ಲಿಯ ಸ್ಪೀಕರ್ ಆಗಿದ್ದಾಗ ಅವರು ತಮ್ಮ ಅಧಿಕಾರದ ಸ್ಥಾನವನ್ನು ದುರುಪಯೋಗಪಡಿಸಿ ಕೊಂಡರು ಎಂಬ ಆರೋಪದ ಮೇಲೆ ಮಿಲಿಟರಿ ನಿಯಂತ್ರಿತ ರಾಷ್ಟ್ರೀಯ ಹೊಣೆಗಾರಿಕೆ ಬ್ಯೂರೋ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಮಿಲಿಟರಿ ಪೋಲೀಸರು ಫೆಬ್ರವರಿ 11, 2001ರಂದು ಅವರನ್ನು ಬಂಧಿಸಿದ್ದರು.
600 ಜನರನ್ನು ತನ್ನ ಘಟಕಗಳಿಂದ ನೇಮಿಸಿಕೊಂಡ ಮತ್ತು ಅವರನ್ನು ಸರಕಾರಿ ವೇತನದಾರರ ಪಟ್ಟಿಗೆ ಸೇರಿಸಿದ್ದ ಆರೋಪ ಅವರ ಮೇಲಿತ್ತು. ಅಧಿಕೃತ ಸಾರಿಗೆ, ಅಧಿಕೃತ ದೂರವಾಣಿಗಳ ದುರ್ಬಳಕೆ, ಲಾಹೋರ್ ಮತ್ತು ಮುಲ್ತಾನ್‌ನಲ್ಲಿ ಕ್ಯಾಂಪ್ ಕಚೇರಿಗಳನ್ನು ಸ್ಥಾಪಿಸಿ, ಮಾರುಕಟ್ಟೆ ಬೆಲೆಗಿಂತ ಹೆಚ್ಚಿನ ಬೆಲೆಗೆ ಐಷಾರಾಮಿ ವಾಹನ ಗಳನ್ನು ಖರೀದಿಸುವ ಮೂಲಕ ಲಕ್ಷಾಂತರ ರುಪಾಯಿಗಳನ್ನು ಲೂಟಿ ಮಾಡಿzರೆಂದು ಆರೋಪಿಸಲಾಗಿತ್ತು.
ಗಿಲಾನಿ ಅಕ್ರಮಗಳಿಂದಾಗಿ ಪಾಕಿಸ್ತಾನದ ಖಜಾನೆಯು ವಾರ್ಷಿಕವಾಗಿ 30 ಮಿಲಿಯನ್ ರುಪಾಯಿ ಗಳಿಗಿಂತ ಹೆಚ್ಚು ನಷ್ಟವನ್ನು ಅನುಭವಿಸಿದೆ ಎಂದು ಎನ್‌ಎಬಿ ಹೇಳಿಕೊಂಡಿದೆ. ಉತ್ತರದಾಯಿತ್ವ ನ್ಯಾಯಾಲಯವು ಅವರಿಗೆ ಐದು ವರ್ಷಗಳ ಕಠಿಣ ಜೈಲುಶಿಕ್ಷೆ ಮತ್ತು 1 ಮಿಲಿಯನ್ ರುಪಾಯಿಗಳ ದಂಡವನ್ನು ವಿಧಿಸಿತ್ತು. 10 ವರ್ಷಗಳ ಅವಧಿಗೆ ಯಾವುದೇ ಹಣಕಾಸಿನ ಸಂಸ್ಥೆಗಳಿಂದ ಸಾರ್ವ ಜನಿಕ ಕಚೇರಿಯನ್ನು ಹೊಂದಲು ಅಥವಾ ಯಾವುದೇ ಹಣಕಾಸಿನ ಲಾಭವನ್ನು ಪಡೆಯದಂತೆ ನ್ಯಾಯಾಲಯವು ಗಿಲಾನಿಯನ್ನು ನಿರ್ಬಂಧಿಸಿತ್ತು.
ಪಾಕಿಸ್ತಾನದಲ್ಲಿ, ಅದರ ಹುಟ್ಟಿನಿಂದಲೂ ರಾಜಕೀಯದ ಅಸ್ಥಿರತೆ ಕಾಡುತ್ತಿದೆ. ಅಲ್ಲಿನ ಮಿಲಿಟರಿ ಅಧಿಕಾರಿಗಳು ಚುನಾಯಿತ ಪ್ರತಿನಿಧಿಗಳನ್ನು ಆಡಳಿತ ನಡೆಸಲು ಬಿಟ್ಟಿಲ್ಲ. ಅಧಿಕಾರಕ್ಕೆ ಬಂದ ಪ್ರಧಾನಮಂತ್ರಿಗಳು ಭ್ರಷ್ಟಾಚಾರದಲ್ಲಿ ಮಿಂದೆದ್ದು ಸಾವಿರಾರು ಕೋಟಿ ಹಣವನ್ನು ಲೂಟಿ ಮಾಡಿರುವ ಆರೋಪಗಳಿವೆ. ಅಧಿಕಾರಕ್ಕೆ ಬಂದ ನಂತರ ಭ್ರಷ್ಟಾಚಾರದಲ್ಲಿ ತೊಡಗಿ ವಿದೇಶಗಳಲ್ಲಿ ಆಸ್ತಿ ಮಾಡಿರುವ ಆರೋಪಗಳಿವೆ. ಪಾಕಿಸ್ತಾನದ ಇತಿಹಾಸ ಗಮನಿಸಿದರೆ ಅಲ್ಲಿನ ಪ್ರಧಾನ ಮಂತ್ರಿ ಗಳ ಮೇಲಿನ ಆರೋಪಗಳನ್ನು ಗಮನಿಸಿದರೆ ಅಲ್ಲಿ ಎಂದಿಗೂ ರಾಜಕೀಯ ಅಸ್ಥಿರತೆ ಬರುವುದು ಸಾಧ್ಯವಿಲ್ಲ.
