ನೆಚ್ಚಿನ ಭಾರತ, ಪಾಕಿಸ್ತಾನ ವ್ಯಕ್ತಿಯನ್ನು ಹೆಸರಿಸಿದ ಅಮೆರಿಕ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್; ಪಟ್ಟಿಯಲ್ಲಿ ಯಾರಿದ್ದಾರೆ?

ಬರ್ನ್‌, ಜೂ. 22: ಅಮೆರಿಕ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್(US Vice President JD Vance) ಸ್ವಿಟ್ಜರ್ಲ್ಯಾಂಡ್‌ನ ಬರ್ಗೆನ್‌ಸ್ಟಾಕ್ ರೆಸಾರ್ಟ್‌ನಲ್ಲಿ (Burgenstock Resort) ನಡೆದ ಮಹತ್ವದ ಅಮೆರಿಕ-ಇರಾನ್ ಮಾತುಕತೆಯ(US-Iran Talks) ವೇಳೆ ತಮ್ಮ ಜೀವನದಲ್ಲಿನ ಇಬ್ಬರು ಪ್ರಮುಖ ವ್ಯಕ್ತಿಗಳ ಬಗ್ಗೆ ಮಾತನಾಡಿ ಎಲ್ಲರ ಗಮನ ಸೆಳೆದಿದ್ದಾರೆ. ಲೇಕ್ ಲೂಸೆರ್ನ್‌ನ ಐಷಾರಾಮಿ ರೆಸಾರ್ಟ್‌ನಲ್ಲಿ ನಡೆದ ಸಭೆಯಲ್ಲಿ ಮಾತನಾಡಿದ ವ್ಯಾನ್ಸ್, "ಪಾಕಿಸ್ತಾನ ಪ್ರವಾಸದ ವೇಳೆ ಫೀಲ್ಡ್ ಮಾರ್ಷಲ್ ಅಸಿಂ ಮುನೀರ್ ಹಾಗೂ ಪ್ರಧಾನಿ ನಮಗೆ ಸ್ವಾಗತ ಕೋರಿದ ನಂತರ ನಾನು ತಮಾಷೆಯಾಗಿ ಹೇಳುತ್ತಿದ್ದೇನೆ. ನನ್ನ ಜೀವನದಲ್ಲಿ ಇಬ್ಬರು ಅತ್ಯಂತ ಪ್ರಮುಖ ವ್ಯಕ್ತಿಗಳಿದ್ದಾರೆ. ಒಬ್ಬರು ಭಾರತೀಯ ಮೂಲದ ನನ್ನ ಪತ್ನಿ ಉಷಾ ವ್ಯಾನ್ಸ್, ಮತ್ತೊಬ್ಬರು ಪಾಕಿಸ್ತಾನದ ಫೀಲ್ಡ್ ಮಾರ್ಷಲ್ ಅಸಿಂ ಮುನೀರ್" ಎಂದು ಹೇಳಿದರು.

ಕಳೆದ ಮೂರು ತಿಂಗಳಲ್ಲಿ ತಾನು ಯಾರಿಗಿಂತಲೂ ಹೆಚ್ಚು ಬಾರಿ ಅಸಿಂ ಮುನೀರ್ ಅವರೊಂದಿಗೆ ಮಾತನಾಡಿದ್ದೇನೆ ಎಂದು ವ್ಯಾನ್ಸ್ ಬಹಿರಂಗಪಡಿಸಿದರು. "ಅವರ ರಾಜತಾಂತ್ರಿಕತೆ ಇಲ್ಲದಿದ್ದರೆ ನಾನು ಇಂದು ಇಲ್ಲಿ ಇರಲು ಸಾಧ್ಯವಾಗುತ್ತಿರಲಿಲ್ಲ. ಅವರು ಕೇವಲ ಒಬ್ಬ ಶ್ರೇಷ್ಠ ಸೇನಾ ನಾಯಕ ಮಾತ್ರವಲ್ಲ, ಅತ್ಯುತ್ತಮ ರಾಜತಾಂತ್ರಿಕ ಹಾಗೂ ಅಸಾಧಾರಣ ನಾಯಕತ್ವ ಹೊಂದಿರುವ ವ್ಯಕ್ತಿ" ಎಂದು ವ್ಯಾನ್ಸ್ ಮೆಚ್ಚುಗೆ ವ್ಯಕ್ತಪಡಿಸಿದರು.

ಅಮೆರಿಕ-ಇರಾನ್ ಮಾತುಕತೆ ಐತಿಹಾಸಿಕ

ಅಮೆರಿಕ ಮತ್ತು ಇರಾನ್ ನಡುವಿನ ದೀರ್ಘಕಾಲದ ಉದ್ವಿಗ್ನತೆಯ ಬಳಿಕ ಮೊದಲ ಬಾರಿಗೆ ಉನ್ನತ ಮಟ್ಟದ ನೇರ ಮಾತುಕತೆ ಆರಂಭವಾಗಿರುವುದನ್ನು ವ್ಯಾನ್ಸ್ ʼಐತಿಹಾಸಿಕ ಕ್ಷಣʼ ಎಂದು ಬಣ್ಣಿಸಿದರು.

"ಇರಾನ್ ಜನರೊಂದಿಗೆ ನಮ್ಮ ಸಂಬಂಧವನ್ನು ಹೊಸ ಹಂತಕ್ಕೆ ಕೊಂಡೊಯ್ಯಲು ಹಾಗೂ ಸ್ನೇಹದ ಹಸ್ತ ಚಾಚಲು ನಾವು ಬಯಸುತ್ತೇವೆ. ಮಧ್ಯ ಪ್ರಾಚ್ಯದಲ್ಲಿ ಶಾಶ್ವತ ಶಾಂತಿ ಮತ್ತು ಸ್ಥಿರತೆ ತರಲು ಈ ಸಭೆ ಮಹತ್ವದ ಹೆಜ್ಜೆ" ಎಂದು ಹೇಳಿದರು.

ಮಧ್ಯ ಪ್ರಾಚ್ಯದಲ್ಲಿ ಶಾಂತಿಯ ಹೊಸ ಅಧ್ಯಾಯ?

"ನಾವು ಒಟ್ಟಾಗಿ ಇನ್ನಷ್ಟು ಏನು ಸಾಧಿಸಬಹುದು ಎಂಬುದೇ ಈಗಿನ ಪ್ರಶ್ನೆ. ಹೊಸ ಅಧ್ಯಾಯವನ್ನು ಆರಂಭಿಸಬಹುದೇ? ಮಧ್ಯಪ್ರಾಚ್ಯದ ಸಂಬಂಧಗಳನ್ನು ಶಾಶ್ವತವಾಗಿ ಬದಲಾಯಿಸಬಹುದೇ? ಅಥವಾ ಮತ್ತೆ ಹಳೆಯ ಸಂಘರ್ಷಗಳತ್ತ ಮರಳಬೇಕಾಗುತ್ತದೆಯೇ? ಎಂಬುದು ಮುಂದಿನ ಬೆಳವಣಿಗೆಗಳ ಮೇಲೆ ಅವಲಂಬಿತವಾಗಿದೆ" ಎಂದು ವ್ಯಾನ್ಸ್ ಅಭಿಪ್ರಾಯಪಟ್ಟರು.

ಇರಾನ್‌ ದಾಳಿ ನಡೆಸಿದ್ದ ಕತಾರ್‌ನ ನೈಸರ್ಗಿಕ ಅನಿಲ ಕೇಂದ್ರದಲ್ಲಿ ಸ್ಫೋಟ: 54 ಮಂದಿಗೆ ಗಾಯ, 18 ಮಂದಿ ನಾಪತ್ತೆ

ಯಾರೆಲ್ಲ ಭಾಗವಹಿಸಿದರು?

ಈ ಮಹತ್ವದ ಸಭೆಯಲ್ಲಿ ಅಮೆರಿಕದ ಪರವಾಗಿ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್, ವಿಶೇಷ ದೂತ ಸ್ಟೀವ್ ವಿಟ್‌ಕಾಫ್ ಹಾಗೂ ಜಾರೆಡ್ ಕುಶ್ನರ್ ಭಾಗವಹಿಸಿದರು. ಇರಾನ್ ಪರವಾಗಿ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ ಮತ್ತು ಮುಖ್ಯ ಸಂಧಾನಕಾರ ಮೊಹಮ್ಮದ್ ಬಘೇರ್ ಘಾಲಿಬಾಫ್ ನೇತೃತ್ವ ವಹಿಸಿದ್ದರು. ಇದಲ್ಲದೆ ಪಾಕಿಸ್ತಾನ ಹಾಗೂ ಕತಾರ್ ದೇಶಗಳ ಪ್ರತಿನಿಧಿಗಳು ಮಧ್ಯವರ್ತಿಗಳಾಗಿ ಸಭೆಯಲ್ಲಿ ಪಾಲ್ಗೊಂಡಿದ್ದರು.

ಪ್ರಮುಖ ಗುರಿಗಳೇನು?

• ಇರಾನ್ ಅಣು ಕಾರ್ಯಕ್ರಮದ ಕುರಿತು ಹೊಸ ಒಪ್ಪಂದ ರೂಪಿಸುವುದು.
• ಮಧ್ಯ ಪ್ರಾಚ್ಯದಲ್ಲಿ ಉದ್ವಿಗ್ನತೆ ಕಡಿಮೆ ಮಾಡುವುದು.
• ಹೊರ್ಮುಜ್ ಜಲಸಂಧಿಯಲ್ಲಿ ತೈಲ ಸಾಗಾಟಕ್ಕೆ ಅಡ್ಡಿಯಾಗದಂತೆ ನೋಡಿಕೊಳ್ಳುವುದು.
• ಅಮೆರಿಕ-ಇರಾನ್ ಸಂಬಂಧಗಳನ್ನು ಸುಧಾರಿಸುವುದು.
• ಪ್ರಾದೇಶಿಕ ಶಾಂತಿ ಮತ್ತು ಆರ್ಥಿಕ ಸ್ಥಿರತೆ ಹೆಚ್ಚಿಸುವುದು.

ಈ ಸಭೆಯ ಫಲಿತಾಂಶವು ಮಧ್ಯಪ್ರಾಚ್ಯದ ಭವಿಷ್ಯದ ರಾಜಕೀಯ ಮತ್ತು ಜಾಗತಿಕ ಇಂಧನ ಮಾರುಕಟ್ಟೆಯ ಮೇಲೆ ಮಹತ್ವದ ಪರಿಣಾಮ ಬೀರುವ ಸಾಧ್ಯತೆ ಇದೆ.