"ಥ್ಯಾಂಕ್‌ ಯೂ ಇಂಡಿಯಾ"; ಕ್ಷಿಪಣಿ ಮೇಲೆ ಭಾರತದ ಹೆಸರು ಹಾಕಿ ಇಸ್ರೇಲ್‌ ಮೇಲೆ ದಾಳಿ ಮಾಡಿದ ಇರಾನ್‌!

ಟೆಹರಾನ್, ಮಾ.27: ಮಧ್ಯಪ್ರಾಚ್ಯದ ಸಂಘರ್ಷದ (Middle East conflict) ನಡುವೆ ಇರಾನ್ ಭಾರತಕ್ಕೆ ಧನ್ಯವಾದ ತಿಳಿಸಿದೆ. ಇಸ್ರೇಲ್ ಮೇಲೆ ದಾಳಿ ನಡೆಸುತ್ತಿರುವ ಕ್ಷಿಪಣಿಗಳ ಮೇಲೆ ಧನ್ಯವಾದ ಭಾರತ ಎಂದು ಬರೆಯಲಾಗಿದೆ. ಇರಾನ್‌ಗೆ (Iran War) ಒಗ್ಗಟ್ಟನ್ನು ತೋರಿಸಿದ ದೇಶಗಳಿಗೆ ಧನ್ಯವಾದ ಹೇಳುವ ಸಂದೇಶಗಳನ್ನು ಹೊತ್ತ ಕ್ಷಿಪಣಿಗಳನ್ನು ಇಸ್ರೇಲ್‌ ಕಡೆಗೆ ಹಾರಿಸಿತು. ಈ ಕ್ಷಿಪಣಿಯಲ್ಲಿ ಭಾರತದ ಜನರಿಗೆ ಧನ್ಯವಾದಗಳು ಎಂಬ ಸಂದೇಶವನ್ನು ಬರೆಯಲಾಗಿದೆ.

ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡ ದೃಶ್ಯಗಳ ಪ್ರಕಾರ, ಸ್ಪೇನ್, ಪಾಕಿಸ್ತಾನ ಮತ್ತು ಜರ್ಮನಿಯ ಜನರನ್ನು ಉದ್ದೇಶಿಸಿ ಇದೇ ರೀತಿಯ ಸಂದೇಶವನ್ನು ಬರೆಯಲಾಗಿದೆ. ಇರಾನ್‌ನ ಏರೋಸ್ಪೇಸ್ ಫೋರ್ಸ್‌ನ ಸಿಬ್ಬಂದಿ ಉಡಾವಣೆ ಮಾಡುವ ಮೊದಲು ಕ್ಷಿಪಣಿಗಳ ಮೇಲೆ ಈ ಸಂದೇಶಗಳನ್ನು ಬರೆಯುವುದನ್ನು ವಿಡಿಯೊ ದೃಶ್ಯಾವಳಿಗಳು ತೋರಿಸಿವೆ.

ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಶುಕ್ರವಾರ (ಮಾ.27) 83ನೇ ಹಂತದ ದಾಳಿ ನಡೆಸಿದೆ ಎಂದು ತಿಳಿಸಿದೆ. ದೀರ್ಘ ಮತ್ತು ಮಧ್ಯಮ ವ್ಯಾಪ್ತಿಯ ಕ್ಷಿಪಣಿಗಳು ಮತ್ತು ಡ್ರೋನ್‌ಗಳು ಇಸ್ರೇಲ್‌ನಲ್ಲಿರುವ ಸ್ಥಳಗಳನ್ನು ಹಾಗೂ ಅಮೆರಿಕದ ಪಡೆಗಳು ಬಳಸುವ ತಾಣಗಳು ಸೇರಿದಂತೆ ಕೊಲ್ಲಿಯಾದ್ಯಂತದ ಮಿಲಿಟರಿ ಸೌಲಭ್ಯಗಳನ್ನು ಗುರಿಯಾಗಿಸಿಕೊಂಡಿವೆ.

ಇಲ್ಲಿದೆ ಪೋಸ್ಟ್:

ಬಹ್ರೇನ್‌ನಲ್ಲಿರುವ ಯುಎಸ್ ಪೇಟ್ರಿಯಾಟ್ ವಾಯು ರಕ್ಷಣಾ ವ್ಯವಸ್ಥೆಯ ನಿರ್ವಹಣಾ ಸೌಲಭ್ಯವು ದಾಳಿಗೊಳಗಾದ ಗುರಿಗಳಲ್ಲಿ ಒಂದಾಗಿದೆ ಎಂದು ಇರಾನಿನ ಸಂಸ್ಥೆಗಳು ವರದಿ ಮಾಡಿವೆ. ಟೆಹರಾನ್ ಮತ್ತು ಇಸ್ರೇಲ್ ನಡುವಿನ ಉದ್ವಿಗ್ನತೆಯ ಮಧ್ಯೆ ಈ ದಾಳಿಗಳು ನಡೆದಿವೆ. ಮಧ್ಯಪ್ರಾಚ್ಯದಲ್ಲಿನ ಸಂಘರ್ಷದ ಸಮಯದಲ್ಲಿ ಇರಾನ್‌ನ ಪ್ರತೀಕಾರದ ಪ್ರತಿಕ್ರಿಯೆಯ ಭಾಗವಾಗಿ ಇಸ್ರೇಲಿ ಪ್ರದೇಶದ ಕಡೆಗೆ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಪದೇ ಪದೇ ಉಡಾಯಿಸಲಾಗಿದೆ.

ಸಂಘರ್ಷದ ಹೊರತಾಗಿಯೂ, ಭಾರತ ಸೇರಿದಂತೆ ಸ್ನೇಹಪರ ರಾಷ್ಟ್ರಗಳಿಗೆ ಹೊರ್ಮುಜ್ ಜಲಸಂಧಿಯ ಮೂಲಕ ಸಾಗಣೆಗೆ ಅವಕಾಶ ನೀಡಿರುವುದಾಗಿ ಇರಾನ್ ಹೇಳಿದೆ.

ಹೊರ್ಮುಜ್ ಬಿಕ್ಕಟ್ಟು: ತೈಲದಿಂದ ದಿನಕ್ಕೆ ಇರಾನ್ ಗಳಿಸುತ್ತಿರುವ ಆದಾಯ ಎಷ್ಟು ಗೊತ್ತೇ?

ಇರಾನ್‌ಗೆ ಕಾಶ್ಮೀರಿಗಳಿಂದ ಬೆಂಬಲ

ಜಮ್ಮು ಮತ್ತು ಕಾಶ್ಮೀರದ ಶಿಯಾ ಸಮುದಾಯದ ಹೆಚ್ಚಿನ ಸಂಖ್ಯೆಯ ಜನರು ಇರಾನ್‌ಗೆ ಬೆಂಬಲ ವ್ಯಕ್ತಪಡಿಸಿದರು. ರಾಂಬನ್ ಜಿಲ್ಲೆಯ ಚಂದರ್‌ಕೋಟ್ ಪ್ರದೇಶದಲ್ಲಿ, ನೂರಾರು ಜನರು ಸ್ಥಳೀಯ ಇಮಾಂಬರಾದಲ್ಲಿ ಒಟ್ಟುಗೂಡಿದರು. ನಗದು, ಗೃಹೋಪಯೋಗಿ ವಸ್ತುಗಳು, ಚಿನ್ನ ಮತ್ತು ಬೆಳ್ಳಿ ಆಭರಣಗಳನ್ನು ದಾನ ಮಾಡಿದರು. ಮಕ್ಕಳು ತಮ್ಮ ಪಿಗ್ಗಿ ಬ್ಯಾಂಕ್‌ಗಳಲ್ಲಿ ಸಂಗ್ರಹಿಸಿದ್ದ ಹಣವನ್ನು ಕೊಡುವ ಮೂಲಕವೂ ಕೊಡುಗೆ ನೀಡಿದರು. ಪರಿಹಾರ ಕಾರ್ಯದ ಭಾಗವಾಗಿ ಕೆಲವರು ಕುರಿಗಳು ಸೇರಿದಂತೆ ಜಾನುವಾರುಗಳನ್ನು ಸಹ ದಾನ ಮಾಡಿದರು.

ಯುದ್ಧದ ಬಿಕ್ಕಟ್ಟಿನಿಂದ ಇರಾನಿಯನ್ನರೊಂದಿಗೆ ಒಗ್ಗಟ್ಟನ್ನು ವ್ಯಕ್ತಪಡಿಸಲು ಬಡ್ಗಾಮ್‌ನಲ್ಲಿ, ನಿವಾಸಿಗಳು ಆಭರಣ ಮತ್ತು ಹಣವನ್ನು ಸಹ ಕೊಡುಗೆಯಾಗಿ ನೀಡಿದರು. ವಿಧವೆಯೊಬ್ಬರು ತಮ್ಮ ಪತಿಯ ನೆನಪಿಗಾಗಿ ಇಟ್ಟುಕೊಂಡಿದ್ದ ಚಿನ್ನವನ್ನು ದಾನ ಮಾಡಿದ್ದ ಹೃದಯಸ್ಪರ್ಶಿ ಘಟನೆಯೂ ನಡೆದಿದೆ.