ಇರಾನ್‌ ಯುದ್ಧಕ್ಕೆ ಉತ್ತರ ಕೊರಿಯಾ ಎಂಟ್ರಿ ಫಿಕ್ಸ್‌? ಪುತ್ರಿಯೊಂದಿಗೆ ಕ್ರೂಸ್ ಕ್ಷಿಪಣಿ ಪರೀಕ್ಷೆ ವೀಕ್ಷಿಸಿದ ಕಿಮ್ ಜಾಂಗ್ ಉನ್

ಪ್ಯೊಂಗ್ಯಾಂಗ್, ಮಾ.11: ಅಮೆರಿಕ-ದಕ್ಷಿಣ ಕೊರಿಯಾ (US-South Korea) ಮಿಲಿಟರಿ ಕವಾಯತುಗಳಿಗೆ ತೀಕ್ಷ್ಣವಾಗಿ ಪ್ರತಿಕ್ರಿಯೆ ನೀಡುವುದಾಗಿ ಈ ಹಿಂದೆ ಉತ್ತರ ಕೊರಿಯಾ ಬೆದರಿಕೆ ಹಾಕಿತ್ತು. ಈ ನಡುವೆ ಉತ್ತರ ಕೊರಿಯಾದ (North Korea) ನಾಯಕ ಕಿಮ್ ಜಾಂಗ್ ಉನ್ (Kim Jong Un) ಮತ್ತು ಅವರ ಹದಿಹರೆಯದ ಪುತ್ರಿಯು ಯುದ್ಧನೌಕೆಯಿಂದ ಹಾರಿಸಲಾದ ಕ್ರೂಸ್ ಕ್ಷಿಪಣಿಗಳ ಪರೀಕ್ಷೆಗಳನ್ನು (North Korea missile test) ವೀಕ್ಷಿಸಿದರು.

ಕೊರಿಯನ್ ಸೆಂಟ್ರಲ್ ನ್ಯೂಸ್ ಏಜೆನ್ಸಿ ಬಿಡುಗಡೆ ಮಾಡಿದ ಚಿತ್ರದಲ್ಲಿ, ಒಂದು ವರ್ಷ ಹಳೆಯ ನೌಕಾಪಡೆ ಡಿಸ್ಟ್ರಾಯರ್ ಚೋಯೆ ಹ್ಯೋನ್‍ನಿಂದ ಶಸ್ತ್ರಾಸ್ತ್ರಗಳನ್ನು ಹಾರಿಸಲಾಗುತ್ತಿರುವ ದೃಶ್ಯಗಳನ್ನು ತೋರಿಸುವ ಪರದೆಯನ್ನು ಇಬ್ಬರೂ ವೀಕ್ಷಿಸುತ್ತಿರುವುದನ್ನು ಕಾಣಬಹುದು.

ಮಂಗಳವಾರ (ಮಾರ್ಚ್‌ 10) ಕಿಮ್ ಜಾಂಗ್ ಉನ್ ವಿಡಿಯೊ ಮೂಲಕ ಕ್ಷಿಪಣಿ ಉಡಾವಣೆಗಳನ್ನು ವೀಕ್ಷಿಸಿದರು. ಶಕ್ತಿಶಾಲಿ ಹಾಗೂ ವಿಶ್ವಾಸಾರ್ಹ ಅಣು ಯುದ್ಧ ತಡೆ ಸಾಮರ್ಥ್ಯವನ್ನು ಕಾಯ್ದುಕೊಳ್ಳಬೇಕಾಗಿದೆ ಎಂಬುದನ್ನು ಅವರು ಒತ್ತಿಹೇಳಿದರು. ಈ ವರದಿಯಲ್ಲಿ ಅವರ ಪುತ್ರಿಯ ಕುರಿತು ಯಾವುದೇ ಉಲ್ಲೇಖ ಮಾಡಲಾಗಿಲ್ಲ.

ಇಲ್ಲಿದೆ ವಿಡಿಯೊ:

ಕಿಮ್ ಜಾಂಗ್ ಉನ್ ಅವರ ಪುತ್ರಿ ಸುಮಾರು 13 ವರ್ಷದ ಕಿಮ್ ಜು ಏ 2022ರ ಅಂತ್ಯದ ನಂತರ ತನ್ನ ತಂದೆಯೊಂದಿಗೆ ಹಲವು ಪ್ರಮುಖ ಕಾರ್ಯಕ್ರಮಗಳಲ್ಲಿ, ಸೇನಾ ಪೆರೇಡ್‌ಗಳು ಹಾಗೂ ಶಸ್ತ್ರಾಸ್ತ್ರ ಉಡಾವಣೆ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾಳೆ. ದಕ್ಷಿಣ ಕೊರಿಯಾದ ಬೇಹುಗಾರಿಕೆ ಸಂಸ್ಥೆಯು, ಕಳೆದ ತಿಂಗಳು ಕಿಮ್ ಜಾಂಗ್ ಉನ್ ಉತ್ತರಾಧಿಕಾರಿಯಾಗಿ ಮಗಳನ್ನು ನೇಮಿಸುವ ಸಾಧ್ಯತೆ ಇದೆ ಎಂದು ತಿಳಿಸಿದೆ.

ಕುವೈತ್‌ನಲ್ಲಿರುವ ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ಇರಾನ್ ಬ್ಯಾಲಿಸ್ಟಿಕ್ ಕ್ಷಿಪಣಿ ದಾಳಿ

ಕ್ಷಿಪಣಿಗಳು ಉತ್ತರ ಕೊರಿಯಾದ ಪಶ್ಚಿಮ ಕರಾವಳಿಯ ಸಮೀಪದಲ್ಲಿರುವ ದ್ವೀಪಗಳನ್ನು ಹೊಡೆದಿವೆ ಎಂದು ಕೊರಿಯನ್ ಸೆಂಟ್ರಲ್ ನ್ಯೂಸ್ ಏಜೆನ್ಸಿ ತಿಳಿಸಿದೆ. ಈ ಉಡಾವಣೆಗಳು ನೌಕಾಪಡೆಯ ತಂತ್ರಾತ್ಮಕ ದಾಳಿಯ ಸಾಮರ್ಥ್ಯವನ್ನು ಪ್ರದರ್ಶಿಸಲು ಹಾಗೂ ಸೈನಿಕರಿಗೆ ಶಸ್ತ್ರಾಸ್ತ್ರ ಉಡಾವಣೆಗಳಲ್ಲಿ ಅನುಭವ ನೀಡಲು ಉದ್ದೇಶಿತವಾಗಿದ್ದವು ಎಂದು ಕಿಮ್ ಹೇಳಿದ್ದಾರೆ ಎಂದು ವರದಿ ಉಲ್ಲೇಖಿಸಿದೆ.

ಕಳೆದ ವಾರ ಚೋ ಹ್ಯೋನ್‌ನಿಂದ ಇದೇ ರೀತಿಯ ಕ್ರೂಸ್ ಕ್ಷಿಪಣಿ ಉಡಾವಣೆಗಳನ್ನು ಕಿಮ್ ಜಾಂಗ್ ಉನ್ ಸ್ವತಃ ವೀಕ್ಷಿಸಿದ್ದರು. ಆದರೆ ಆ ಸಂದರ್ಭದಲ್ಲಿ ಅವರ ಮಗಳು ಕಾಣಿಸಿಕೊಂಡಿರಲಿಲ್ಲ. ಮಂಗಳವಾರ ನಡೆದ ಕ್ಷಿಪಣಿ ಉಡಾವಣೆಗಳು, ಅಮೆರಿಕ ಮತ್ತು ದಕ್ಷಿಣ ಕೊರಿಯಾ ನಡುವಿನ ವಸಂತಕಾಲದ ಸಂಯುಕ್ತ ಸೈನಿಕ ಅಭ್ಯಾಸಗಳು ಆರಂಭವಾದ ಬಳಿಕ ನಡೆದವು. ಈ ಅಭ್ಯಾಸಗಳನ್ನು ಉತ್ತರ ಕೊರಿಯಾ ತನ್ನ ಮೇಲೆ ದಾಳಿ ನಡೆಸುವ ಪೂರ್ವಾಭ್ಯಾಸ ಎಂದು ಪರಿಗಣಿಸುತ್ತದೆ.