ನಿಂತಿಲ್ಲ ಯುದ್ಧ: ಉಕ್ರೇನ್‌ನ 5 ಹಳ್ಳಿಗಳನ್ನು ವಶಪಡಿಸಿಕೊಂಡಿರುವುದಾಗಿ ಘೋಷಿಸಿದ ರಷ್ಯಾ ಸೇನೆ

ಮಾಸ್ಕೋ, ಜು.5: ತಮ್ಮ ಸೈನಿಕರು ಪೂರ್ವ ಉಕ್ರೇನಿಯನ್‌ನ ಐದು ಹಳ್ಳಿಗಳ ಮೇಲೆ ಹಿಡಿತ ಸಾಧಿಸಿದ್ದಾರೆ ಎಂದು ರಷ್ಯಾದ ರಕ್ಷಣಾ ಸಚಿವಾಲಯವು ಘೋಷಿಸಿದೆ. ನೆಲಮಟ್ಟದಲ್ಲಿ ಸಂಘರ್ಷಗಳ ವರದಿಗಳ ನಡುವೆಯೂ, ರಷ್ಯಾ (Russia) ತನ್ನ ಮುಂಚೂಣಿ ಕಾರ್ಯಾಚರಣೆಗಳನ್ನು ಮತ್ತಷ್ಟು ವಿಸ್ತರಿಸಿದೆ ಎಂದು ತಿಳಿಸಿದೆ. ರಷ್ಯಾ–ಉಕ್ರೇನ್ ಯುದ್ಧ (Russia-Ukraine War) ಮತ್ತಷ್ಟು ತೀವ್ರಗೊಳ್ಳುತ್ತಿರುವ ನಡುವೆಯೇ, ತಮ್ಮ ಸೇನೆ ಮುನ್ನಡೆ ಸಾಧಿಸಿರುವುದಾಗಿ ರಷ್ಯಾ ಹೇಳಿದೆ.

ವಶಪಡಿಸಿಕೊಂಡ ಹಳ್ಳಿಗಳೆಂದರೆ, ಶೈಕಿವ್ಕಾ (ಖಾರ್ಕಿವ್ ಪ್ರದೇಶ), ನೋವಿ ಮೈರ್ (ಖಾರ್ಕಿವ್ ಪ್ರದೇಶ), ಚೆರ್ನೆಶ್ಚಿನಾ (ಖಾರ್ಕಿವ್ ಪ್ರದೇಶ), ಡ್ರುಜೆಲ್ಯುಬಿವ್ಕಾ (ಖಾರ್ಕಿವ್ ಪ್ರದೇಶ), ವಾಸಿಲಿವ್ಕಾ (ಡೊನೆಟ್ಸ್ಕ್ ಪ್ರದೇಶ). ಇದು ಪೊಕ್ರೊವ್ಸ್ಕ್ ಕೇಂದ್ರದಿಂದ ಸುಮಾರು 13 ಕಿಲೋಮೀಟರ್ ವಾಯುವ್ಯದಲ್ಲಿದೆ.

ಈ ಗ್ರಾಮಗಳನ್ನು ವಶಪಡಿಸಿಕೊಳ್ಳುವುದರಿಂದ ಮುಂಚೂಣಿ ಪ್ರದೇಶದಲ್ಲಿ ತನ್ನ ಸೇನೆಗೆ ಮೇಲುಗೈ ಸಿಕ್ಕಿದೆ ಎಂದು ರಷ್ಯಾ ಹೇಳಿಕೊಂಡಿದೆ. ಆದರೆ, ಶೈಕಿವ್ಕಾ ಸೇರಿದಂತೆ ಇದೇ ಪ್ರದೇಶಗಳಲ್ಲಿ ರಷ್ಯಾದ ಹಲವು ದಾಳಿಗಳನ್ನು ಯಶಸ್ವಿಯಾಗಿ ಹಿಮ್ಮೆಟ್ಟಿಸಿದ್ದೇವೆ ಎಂದು ಉಕ್ರೇನ್‌ ತಿಳಿಸಿತ್ತು. ಡೊನೆಟ್ಸ್ಕ್ ಪ್ರದೇಶದ ಮೇಲೆ ರಷ್ಯಾ ಸಂಪೂರ್ಣ ನಿಯಂತ್ರಣವನ್ನು ಘೋಷಿಸಿದರೂ, ಉಕ್ರೇನಿಯನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಈ ವರದಿಯನ್ನು ಬಲವಾಗಿ ನಿರಾಕರಿಸಿದರು. ಇದೊಂದು ಕಟ್ಟುಕಥೆ ಎಂದು ಕರೆದರು.

ಶಾಂತಿ ಮಾತುಕತೆಗಾಗಿ ಉಕ್ರೇನ್ ಅಧ್ಯಕ್ಷರನ್ನು ಮಾಸ್ಕೋಗೆ ಆಹ್ವಾನಿಸಿದ ರಷ್ಯಾ

ಈ ಗ್ರಾಮಗಳನ್ನು ವಶಪಡಿಸಿಕೊಳ್ಳುವ ಮೂಲಕ ಒಂದೇ ಬಾರಿ ನಿರ್ಣಾಯಕ ಮುನ್ನಡೆ ಸಾಧಿಸುವುದಕ್ಕಿಂತ, ಉಕ್ರೇನ್‌ನ ಪ್ರಮುಖ ರಕ್ಷಣಾ ನೆಲೆಗಳನ್ನು ಸುತ್ತುವರಿದು ಪ್ರತ್ಯೇಕಿಸುವ ಕಾರ್ಯತಂತ್ರವನ್ನು ರಷ್ಯಾ ಅನುಸರಿಸುತ್ತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ರಷ್ಯಾ ಇತ್ತೀಚೆಗೆ ಕೋಸ್ಟಿಯಾಂಟಿನಿವ್ಕಾದ ಸಂಪೂರ್ಣ ನಿಯಂತ್ರಣವನ್ನು ಪಡೆದುಕೊಂಡಿದೆ. ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಮತ್ತು ಉಕ್ರೇನಿಯನ್ ಜನರಲ್ ಸ್ಟಾಫ್ ಇದನ್ನು ತೀವ್ರವಾಗಿ ನಿರಾಕರಿಸಿದ್ದಾರೆ.

ಡೊನೆಟ್ಸ್ಕ್‌ನಲ್ಲಿ ಉಳಿದಿರುವ ಎತ್ತರದ ಪ್ರದೇಶಗಳ ಮೇಲಿನ ತನ್ನ ಹಿಡಿತವನ್ನು ಉಕ್ರೇನ್ ಕಾಯ್ದುಕೊಳ್ಳುವ ಸಾಮರ್ಥ್ಯವು ಪಾಶ್ಚಾತ್ಯ ರಾಷ್ಟ್ರಗಳಿಂದ ಸಿಗುವ ಸೇನಾ ನೆರವು ಎಷ್ಟು ವೇಗವಾಗಿ ತಲುಪುತ್ತದೆ ಎಂಬುದರ ಮೇಲೆ ಅವಲಂಬಿತವಾಗಿದೆ. ಜೊತೆಗೆ, ಮುಂಚೂಣಿ ಯುದ್ಧಭೂಮಿಯ ಹಿಂದಿನ ಭಾಗಗಳಲ್ಲಿ ರಷ್ಯಾದ ಸರಬರಾಜು ಜಾಲಗಳನ್ನು ದುರ್ಬಲಗೊಳಿಸುವಲ್ಲಿ ಉಕ್ರೇನ್ ಎಷ್ಟರ ಮಟ್ಟಿಗೆ ಯಶಸ್ವಿಯಾಗುತ್ತದೆ ಎಂಬುದೂ ಯುದ್ಧದ ಮುಂದಿನ ಹಂತವನ್ನು ನಿರ್ಧರಿಸುವ ಪ್ರಮುಖ ಅಂಶವಾಗಿದೆ.