Health Tips: ದೇಹದ ತೂಕ ಇಳಿಸಲು ಚಿಂತೆ ಬೇಡ; ಈ ಐದು ಪಾನೀಯ ನಿತ್ಯ ಸೇವಿಸಿದರೆ ಸಾಕು
ದೇಹದ ತೂಕ ಇಳಿಸಲು ಏನೆಲ್ಲಾ ಪ್ರಯೋಗ ಮಾಡಿ ನೋಡಿದರೂ ಪ್ರಯೋಜನವಾಗಲಿಲ್ಲ ಎನ್ನುವ ಚಿಂತೆಯೇ ಹಾಗಿದ್ದರೆ ಈ ಐದು ಪಾನೀಯಗಳನ್ನೊಮ್ಮೆ (weight loss drinks) ನಿತ್ಯ ಕುಡಿದು ನೋಡಿ. ಇದು ಅತ್ಯಂತ ವೇಗವಾಗಿ ನಿಮ್ಮ ದೇಹದ ತೂಕವನ್ನು ಇಳಿಸುತ್ತದೆ. ಹೊಟ್ಟೆಯ ಕೊಬ್ಬನ್ನು ಕಡಿಮೆ ಮಾಡುವ ಈ ಪಾನೀಯಗಳು ಚಯಾಪಚಯ ಕ್ರಿಯೆಯನ್ನು ಹೆಚ್ಚಿಸುತ್ತದೆ. ಇದಕ್ಕಾಗಿ ನಿತ್ಯದ ದಿನಚರಿಯಲ್ಲಿ ಈ ಐದು ಪಾನೀಯಗಳನ್ನು ಸೇವಿಸಿದರೆ ಸಾಕು.
ವಿದ್ಯಾ ಇರ್ವತ್ತೂರು
Jun 25, 2025 6:00 AM
ಗೂಗಲ್ ನಲ್ಲಿ ಅತೀ ಹೆಚ್ಚು ಹುಡುಕಲ್ಪಟ್ಟ ಕೀವರ್ಡ್ ನಲ್ಲಿ ಹೊಟ್ಟೆಯ ಕೊಬ್ಬನ್ನು ಕಡಿಮೆ ಮಾಡುವುದು ಹೇಗೆ ಎನ್ನುವ ಪ್ರಶ್ನೆ ಕೂಡ ಸೇರಿದೆ. ನೀವು ದೇಹದ ತೂಕ ಇಳಿಸಿಕೊಳ್ಳಲು ಯೋಚಿಸುತ್ತಿದ್ದರೆ ಈ ಗ್ಯಾಲರಿ ಖಂಡಿತಾ ನಿಮಗೆ ಸಹಾಯ ಮಾಡುವುದು. ಯಾಕೆಂದರೆ ಇಲ್ಲಿ ಚಯಾಪಚಯ ಕ್ರಿಯೆಯನ್ನು ಹೆಚ್ಚಿಸಿ ದೇಹದ ತೂಕ ಇಳಿಸುವ ಐದು ಪಾನೀಯಗಳ ಬಗ್ಗೆ ಮಾಹಿತಿ ಇದೆ.
ಈ ಪಾನೀಯಗಳನ್ನು ಸುಲಭವಾಗಿ ಮನೆಯಲ್ಲೇ ತಯಾರಿಸಬಹುದು. ಇದಕ್ಕಾಗಿ ಹೆಚ್ಚು ಸಮಯ,ಪರಿಶ್ರಮ ಕೂಡ ಬೇಕಾಗಿಲ್ಲ. ನಿತ್ಯದ ವ್ಯಾಯಾಮದೊಂದಿಗೆ ಸಮತೋಲಿತ ಆಹಾರ ಪಾಲನೆ ಮಾಡುತ್ತಿರುವಾಗ ಈ ಐದು ಪಾನೀಯಗಳನ್ನು ಕೂಡ ನಿಮ್ಮ ದಿನಚರಿಯಲ್ಲಿ ಅಳವಡಿಸಿದರೆ ಬಹುಬೇಗನೆ ಹೊಟ್ಟೆಯ ಕೊಬ್ಬನ್ನು ಕಡಿಮೆ ಮಾಡಿಕೊಳ್ಳುವಲ್ಲಿ ಯಶಸ್ಸು ಕಾಣಬಹುದು.
ಜೀರಿಗೆ ಅತ್ಯಂತ ಬಲವಾದ ಮತ್ತು ಉಪಯುಕ್ತವಾದ ತೂಕ ಇಳಿಸುವ ಸಾಧನವಾಗಿದೆ. ಜೀರಿಗೆ ನೀರನ್ನು ತಯಾರಿಸುವುದು ಬಹಳ ಸುಲಭ. ಒಂದು ಲೋಟ ನೀರಿನಲ್ಲಿ ಸ್ವಲ್ಪ ಜೀರಿಗೆ ಹಾಕಿ ಕುದಿಸಿ ಅದನ್ನು ಬೆಚ್ಚಗೆ ಕುಡಿಯುವುದರಿಂದ ಬಹುಬೇಗನೆ ದೇಹದ ತೂಕ ನಷ್ಟವಾಗುತ್ತದೆ. ಇದು ಅತ್ಯಂತ ಬಲವಾದ ಉತ್ಕರ್ಷಣ ನಿರೋಧಕ ಗುಣಗಳನ್ನು ಹೊಂದಿದೆ. ಜೀರ್ಣಕ್ರಿಯೆಯನ್ನು ಹೆಚ್ಚಿಸುವ ಮತ್ತು ಚಯಾಪಚಯವನ್ನು ಹೆಚ್ಚಿಸುವ ಸಾಮರ್ಥ್ಯವನ್ನು ಒಳಗೊಂಡಿದೆ.
ಭಾರತದಲ್ಲಿ ಸಾಂಪ್ರದಾಯಿಕ ಮಜ್ಜಿಗೆ ಬಾಯಾರಿಕೆಯನ್ನು ನೀಗಿಸುವ ಅತ್ಯುತ್ತಮ ಪಾನೀಯ. ತೂಕ ಇಳಿಸಿಕೊಳ್ಳಲು ಸಹಾಯ ಮಾಡುವ ಇದರಲ್ಲಿರುವ ಪ್ರೋಬಯಾಟಿಕ್‌ಗಳು ಜೀರ್ಣಕ್ರಿಯೆಯನ್ನು ಸುಗಮಗೊಳಿಸುತ್ತದೆ. ಇದರಲ್ಲಿರುವ ವಿಟಮಿನ್ ಬಿ12 ಪೋಷಕಾಂಶಗಳು ದೇಹದ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ. ಮನೆಯಲ್ಲಿ ಮಜ್ಜಿಗೆ ಮಾಡಲು ಒಂದು ಕಪ್ ಮೊಸರಿಗೆ ಒಂದು ಕಪ್ ನೀರು ಸೇರಿಸಿ ರುಚಿಗೆ ಸುಮಾರು ಒಂದೂವರೆ ಚಮಚ ಹುರಿದ ಜೀರಿಗೆ ಪುಡಿ, ಉಪ್ಪು ಮತ್ತು ಮೆಣಸನ್ನು ಸೇರಿಸಿದರೆ ಸಾಕು.
ನಿಂಬೆ ನೀರು ತೂಕ ಇಳಿಸಲು ಹೆಚ್ಚು ಬಳಕೆಯಲ್ಲಿರುವ ಪಾನೀಯವಾಗಿದೆ. ನಿಂಬೆಹಣ್ಣುಗಳು ಚಯಾಪಚಯವನ್ನು ಹೆಚ್ಚಿಸಿ ದೇಹದ ಕೊಬ್ಬನ್ನು ಸುಡಲು ಸಹಾಯ ಮಾಡುತ್ತದೆ. ನಿಂಬೆ ನೀರು ರುಚಿಯಲ್ಲಿ ಸ್ವಲ್ಪ ಹೆಚ್ಚು ಹುಳಿಯಾಗಿ ಇದ್ದರೆ ಅದಕ್ಕೆ ಜೇನುತುಪ್ಪ ಬೆರೆಸಿ ಸೇವಿಸಬಹುದು. ಇದು ತೂಕ ಇಳಿಸಲು ಸಹಾಯ ಮಾಡುತ್ತದೆ. ಒಂದು ಕಪ್ ಬೆಚ್ಚಗಿನ ನೀರಿಗೆ ಒಂದು ಚಮಚ ನಿಂಬೆ ರಸ ಮತ್ತು ಅರ್ಧ ಚಮಚ ಜೇನುತುಪ್ಪ ಹಾಕಿ ದಿನಕ್ಕೆ ಎರಡು ಬಾರಿ ಸೇವಿಸಿದರೆ ಇದು ಪ್ರಯೋಜನ ಕೊಡುವುದು.
ಕೊಬ್ಬನ್ನು ಸುಡುವ ಗುಣಗಳಿಗೆ ಹೆಸರುವಾಸಿಯಾದ ಹಸಿರು ಚಹಾವು ಅನೇಕ ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ಇದು ಪೋಷಕಾಂಶಗಳು ಮತ್ತು ಆರೋಗ್ಯಕರ ಉತ್ಕರ್ಷಣ ನಿರೋಧಕಗಳ ಪ್ರಬಲ ಮೂಲವಾಗಿದೆ. ಹಸಿರು ಚಹಾವನ್ನು ಊಟದ ಬಳಿಕ ಸೇವಿಸುವುದು ಒಳ್ಳೆಯದು. ಇದು ದೇಹದಲ್ಲಿರುವ ಕ್ಯಾಲೊರಿಗಳನ್ನು ಹೊರಹಾಕಲು ಪರಿಪೂರ್ಣ ಪಾನೀಯವಾಗಿದೆ. ಚಯಾಪಚಯವನ್ನು ವೇಗಗೊಳಿಸಿ ಕೊಬ್ಬು ಕಡಿಮೆ ಮಾಡಲು ಸಹಾಯ ಮಾಡುವ ಹಸಿರು ಚಹಾ ಉತ್ಕರ್ಷಣ ನಿರೋಧಕವಾಗಿದೆ.
ದಾಲ್ಚಿನಿ ಚಹಾ ಕೂಡ ದೇಹದ ಕೊಬ್ಬನ್ನು ಕಡಿಮೆ ಮಾಡುವ ಪಾನೀಯವಾಗಿದೆ. ಸಂಜೆ ದಾಲ್ಚಿನ್ನಿ ಚಹಾವನ್ನು ಕುಡಿಯುವುದರಿಂದ ಅದು ಚಯಾಪಚಯ ಕ್ರಿಯೆ ಹೆಚ್ಚಾಗುವುದು. ದಾಲ್ಚಿನ್ನಿಯಲ್ಲಿ ಹಲವಾರು ಉತ್ಕರ್ಷಣ ನಿರೋಧಕ ಮತ್ತು ಬ್ಯಾಕ್ಟೀರಿಯಾ ವಿರೋಧಿ ಗುಣಗಳಿದ್ದು, ಇದು ಸಾಕಷ್ಟು ಪ್ರಯೋಜನಕಾರಿಯಾಗಿದೆ. ಇದನ್ನು ರುಚಿಕರವಾಗಿಸಲು ಸ್ವಲ್ಪ ಜೇನುತುಪ್ಪ ಸೇರಿಸಿ ಇದನ್ನು ಕುಡಿಯಬಹುದು.