Contact Lens: ಹೆಚ್ಚಿನ ಕಾಂಟ್ಯಾಕ್ಟ್ ಲೆನ್ಸ್ ಬಳಕೆದಾರರಿಗೆ ಈ ನಿಯಮ. ಏನದು ?

ಡಾ.ಮೋಹನ್‌ರಾಜ್, ಕನ್ಸಲ್ಟೆಂಟ್ – ವಿಟ್ರಿಯೋರೆಟಿನಲ್ ಸರ್ಜನ್, ಡಾ. ಅಗರ್ವಾಲ್ಸ್ ಕಣ್ಣಿನ ಆಸ್ಪತ್ರೆ, ಬನ್ನೇರ್‌ಘಟ್ಟ

ನನ್ನ ಕ್ಲಿನಿಕ್‌ನಲ್ಲಿ ರೋಗಿಗಳು 20-20-20 ನಿಯಮದ ಬಗ್ಗೆ ಮಾತನಾಡುವುದನ್ನು ನಾನು ಆಗಾಗ್ಗೆ ಕೇಳುತ್ತೇನೆ. ಹೆಚ್ಚು ನೀರು ಕುಡಿಯುವ ಅಭ್ಯಾಸದ ಬಗ್ಗೆ ಮಾತನಾಡುವಂತೆಯೇ ಇದನ್ನೂ ಹೇಳುತ್ತಾರೆ. ಇದು ಒಳ್ಳೆಯ ಅಭ್ಯಾಸ ಎಂಬುದು ಎಲ್ಲರಿಗೂ ತಿಳಿದಿದೆ, ಆದರೆ ಇದು ಏಕೆ ಪರಿಣಾಮ ಕಾರಿಯಾಗಿದೆ ಎಂಬುದರ ಬಗ್ಗೆ ಹೆಚ್ಚಿನವರು ಯೋಚಿಸುವುದಿಲ್ಲ.

ಪ್ರತಿ 20 ನಿಮಿಷಗಳಿಗೊಮ್ಮೆ, 20 ಅಡಿ ದೂರದಲ್ಲಿರುವ ವಸ್ತುವನ್ನು 20 ಸೆಕೆಂಡುಗಳ ಕಾಲ ನೋಡಿ. ಹೆಚ್ಚಿನ ಕಾಂಟ್ಯಾಕ್ಟ್ ಲೆನ್ಸ್ ಬಳಕೆದಾರರಿಗೆ ಈ ನಿಯಮವನ್ನು ನಿರ್ದಿಷ್ಟ ಸಮಸ್ಯೆಯನ್ನು ಗಮನದಲ್ಲಿಟ್ಟುಕೊಂಡು ರೂಪಿಸಲಾಗಿದೆ ಎಂಬುದು ತಿಳಿದಿರುವುದಿಲ್ಲ. ಮತ್ತು ಆ ಸಮಸ್ಯೆ ಕನ್ನಡಕ ಅಥವಾ ಯಾವುದೇ ದೃಷ್ಟಿ ತಿದ್ದುಪಡಿ ಸಾಧನವನ್ನು ಬಳಸದವರಿಗಿಂತ ಕಾಂಟ್ಯಾಕ್ಟ್ ಲೆನ್ಸ್ ಧರಿಸುವವರ ಮೇಲೆ ಹೆಚ್ಚು ಪರಿಣಾಮ ಬೀರುತ್ತದೆ.

ಆ ಸಮಸ್ಯೆ ಸರಳವಾಗಿದೆ: ನಾವು ಸ್ಕ್ರೀನ್‌ಗಳನ್ನು ನೋಡುತ್ತಾ ಹೆಚ್ಚು ಸಮಯ ಕಳೆಯುವಾಗ, ಅಗತ್ಯವಿರುವಷ್ಟು ಬಾರಿ ಕಣ್ಣು ಮಿಟುಕಿಸುವುದಿಲ್ಲ.

ಸಾಮಾನ್ಯ ಪರಿಸ್ಥಿತಿಯಲ್ಲಿ, ಉದಾಹರಣೆಗೆ ಪುಸ್ತಕ ಓದುವಾಗ ಅಥವಾ ಯಾರೊಂದಿಗಾದರೂ ಮಾತನಾಡುವಾಗ, ನಾವು ನಿಮಿಷಕ್ಕೆ ಸುಮಾರು 15ರಿಂದ 20 ಬಾರಿ ಕಣ್ಣು ಮಿಟುಕಿಸುತ್ತೇವೆ. ಆದರೆ ಸ್ಕ್ರೀನ್ ಮುಂದೆ ಕುಳಿತಾಗ ಈ ಸಂಖ್ಯೆ ನಿಮಿಷಕ್ಕೆ 5ರಿಂದ 7 ಬಾರಿ ಮಾತ್ರವಾಗಬಹುದು. ಅಂದರೆ ಕಣ್ಣು ಮಿಟುಕಿಸುವ ಪ್ರಮಾಣವು 60% ಅಥವಾ ಅದಕ್ಕಿಂತ ಹೆಚ್ಚು ಕಡಿಮೆಯಾಗಬಹುದು.

ಪ್ರತಿ ಬಾರಿ ಕಣ್ಣು ಮಿಟುಕಿಸಿದಾಗ ಕಣ್ಣಿನ ಮೇಲೆ ಮತ್ತು ಕಾಂಟ್ಯಾಕ್ಟ್ ಲೆನ್ಸ್‌ನ ಮೇಲ್ಮೈ ಮೇಲೆ ಕಣ್ಣೀರಿನ ಹೊಸ ಪದರ ಹರಡುತ್ತದೆ. ನಾವು ಕಡಿಮೆ ಬಾರಿ ಕಣ್ಣು ಮಿಟುಕಿಸಿದಾಗ, ಈ ತೇವಾಂಶದ ನವೀಕರಣದ ನಡುವೆ ಕಣ್ಣು ಹೆಚ್ಚು ಸಮಯ ಕಳೆಯುತ್ತದೆ.

ಇದನ್ನೂ ಓದಿ: Eye care: ಭಾರತದಲ್ಲಿ ಶಾಲಾ ಮಕ್ಕಳಲ್ಲಿ ಹೆಚ್ಚಿದ ಸಮೀಪದೃಷ್ಟಿ ಸಮಸ್ಯೆ; ವೈದ್ಯರಿಂದ ಸ್ಕ್ರೀನ್ ಟೈಮ್ಗೆ ನಿರ್ವಹಣೆ ಮತ್ತು ಆರಂಭಿಕ ಸಲಹೆಗಳು

ಸಾಮಾನ್ಯವಾಗಿ ಕಣ್ಣಿನ ಮೇಲ್ಮೈಯಲ್ಲಿರುವ ಟಿಯರ್ ಫಿಲ್ಮ್ (ಕಣ್ಣೀರಿನ ಪದರ) 10ರಿಂದ 15 ಸೆಕೆಂಡುಗಳವರೆಗೆ ಸ್ಥಿರವಾಗಿರುತ್ತದೆ. ಆದರೆ ದೀರ್ಘಕಾಲ ಸ್ಕ್ರೀನ್ ನೋಡುವ ಸಂದರ್ಭದಲ್ಲಿ ಇದು 5 ಸೆಕೆಂಡುಗಳಿಗಿಂತಲೂ ಕಡಿಮೆ ಅವಧಿಯಲ್ಲಿ ಒಣಗಲು ಅಥವಾ ಒಡೆದುಹೋಗಲು ಪ್ರಾರಂಭಿಸ ಬಹುದು.

ಕಾಂಟ್ಯಾಕ್ಟ್ ಲೆನ್ಸ್ ಇಲ್ಲದ ಕಣ್ಣಿನಲ್ಲಿ ಇದರಿಂದ ಸಾಮಾನ್ಯವಾಗಿ ಒಣತನ ಉಂಟಾಗುತ್ತದೆ. ಆದರೆ ಕಾಂಟ್ಯಾಕ್ಟ್ ಲೆನ್ಸ್ ಧರಿಸಿರುವಾಗ ಪರಿಣಾಮ ಇನ್ನಷ್ಟು ಹೆಚ್ಚಾಗಬಹುದು.

ಸಾಫ್ಟ್ ಕಾಂಟ್ಯಾಕ್ಟ್ ಲೆನ್ಸ್‌ಗಳು ಸಾಮಾನ್ಯವಾಗಿ ಅವುಗಳ ವಸ್ತುವಿನ ಆಧಾರದ ಮೇಲೆ 38%ರಿಂದ 74%ವರೆಗೆ ನೀರನ್ನು ಹೊಂದಿರುತ್ತವೆ ಮತ್ತು ತೇವಾಂಶವನ್ನು ಕಾಪಾಡಿಕೊಳ್ಳಲು ನಿರಂತರವಾಗಿ ಕಣ್ಣೀರಿನ ಪೂರೈಕೆಯನ್ನು ಅವಲಂಬಿಸಿರುತ್ತವೆ. ನಾವು 60% ಕಡಿಮೆ ಬಾರಿ ಕಣ್ಣು ಮಿಟುಕಿಸಿದರೆ, ಲೆನ್ಸ್‌ಗೆ ದೊರೆಯುವ ತೇವಾಂಶವೂ ಗಮನಾರ್ಹವಾಗಿ ಕಡಿಮೆಯಾಗುತ್ತದೆ.

ಒಂದು ಹಂತದಲ್ಲಿ, ಲೆನ್ಸ್ ಕೇವಲ ಒಣಗಿದ ಕಣ್ಣಿನ ಮೇಲೆ ಇರುವುದಷ್ಟೇ ಅಲ್ಲದೆ, ತನ್ನ ತೇವಾಂಶ ವನ್ನು ಕಾಪಾಡಿಕೊಳ್ಳಲು ಟಿಯರ್ ಫಿಲ್ಮ್‌ನಿಂದ ನೀರನ್ನು ಹೀರಿಕೊಳ್ಳಲು ಪ್ರಾರಂಭಿಸ ಬಹುದು. ಕಾಂಟ್ಯಾಕ್ಟ್ ಲೆನ್ಸ್ ಬಳಸುವವರಲ್ಲಿ ಸುಮಾರು ಅರ್ಧದಷ್ಟು ಜನರು ಕಣ್ಣಿನ ಒಣತನದ ಲಕ್ಷಣ ಗಳನ್ನು ಅನುಭವಿಸುವುದಕ್ಕೆ ಇದು ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಸ್ಕ್ರೀನ್‌ಗಳನ್ನು ಹೆಚ್ಚು ಬಳಸುವ ಉದ್ಯೋಗಗಳಲ್ಲಿ ಇರುವವರು ಕಡಿಮೆ ಸ್ಕ್ರೀನ್ ಸಮಯ ಹೊಂದಿರುವವರಿಗಿಂತ ಹೆಚ್ಚು ಒಣ ಕಣ್ಣಿನ ಸಮಸ್ಯೆಗಳನ್ನು ಅನುಭವಿಸುವ ಸಾಧ್ಯತೆಯೂ ಇದೆ.

20 ಸೆಕೆಂಡುಗಳ ವಿರಾಮ ಏಕೆ ಮುಖ್ಯ?

ಕಣ್ಣು ಮಿಟುಕಿಸಿದ ತಕ್ಷಣ ಟಿಯರ್ ಫಿಲ್ಮ್ ಸಂಪೂರ್ಣವಾಗಿ ಚೇತರಿಸಿಕೊಳ್ಳುವುದಿಲ್ಲ. ಹೆಚ್ಚಿನ ಚೇತರಿಕೆ ಮೊದಲ 3ರಿಂದ 5 ಸೆಕೆಂಡುಗಳಲ್ಲಿ ನಡೆಯುತ್ತದೆ. ಆದರೆ ಕಣ್ಣೀರಿನ ಆವಿಯಾಗುವಿಕೆ ಯನ್ನು ತಡೆಯುವ ಹೊರಪದರವು ಸಾಮಾನ್ಯ ಕಣ್ಣು ಮಿಟುಕಿಸುವಿಕೆಯೊಂದಿಗೆ ಸಂಪೂರ್ಣ ವಾಗಿ ಸ್ಥಿರವಾಗಲು 15ರಿಂದ 20 ಸೆಕೆಂಡುಗಳು ಬೇಕಾಗಬಹುದು.

ಆದ್ದರಿಂದ ಕೇವಲ ಎರಡು ಸೆಕೆಂಡುಗಳ ಕಾಲ ಫೋನ್‌ನಿಂದ ಅಥವಾ ಕಂಪ್ಯೂಟರ್‌ನಿಂದ ದೃಷ್ಟಿಯನ್ನು ಬೇರೆಡೆಗೆ ತಿರುಗಿಸುವುದು ಕಣ್ಣಿಗೆ ಸಾಕಷ್ಟು ವಿಶ್ರಾಂತಿ ನೀಡುವುದಿಲ್ಲ.

20-20-20 ನಿಯಮವನ್ನು ಅನುಸರಿಸುತ್ತಿದ್ದರೂ 20 ಸೆಕೆಂಡುಗಳ ವಿರಾಮವನ್ನು ಆತುರದಲ್ಲಿ ಮುಗಿಸುವ ರೋಗಿಗಳನ್ನು ನಾನು ಆಗಾಗ್ಗೆ ನೋಡುತ್ತೇನೆ. ನಂತರ ಮಧ್ಯಾಹ್ನದ ವೇಳೆಗೆ ಕಣ್ಣುಗಳು ಇನ್ನೂ ಒಣವಾಗಿರುವುದೇಕೆ ಎಂದು ಅವರಿಗೆ ಅರ್ಥವಾಗುವುದಿಲ್ಲ.

ಕಾಂಟ್ಯಾಕ್ಟ್ ಲೆನ್ಸ್ ಬಳಸುವವರು ಇನ್ನೇನು ಮಾಡಬಹುದು?

ಕಾಂಟ್ಯಾಕ್ಟ್ ಲೆನ್ಸ್ ಬಳಸುವವರಿಗೆ ನಾನು ಸಾಮಾನ್ಯವಾಗಿ ಕೆಲವು ಹೆಚ್ಚುವರಿ ಸಲಹೆಗಳನ್ನು ನೀಡುತ್ತೇನೆ. ಮೊದಲನೆಯದಾಗಿ, ವಿರಾಮವನ್ನು ಕೇವಲ ದೃಷ್ಟಿಯನ್ನು ಬೇರೆಡೆಗೆ ತಿರುಗಿಸುವ ಸಮಯ ವನ್ನಾಗಿ ಮಾಡಬೇಡಿ. ಪೂರ್ಣವಾಗಿ ಮತ್ತು ಉದ್ದೇಶಪೂರ್ವಕವಾಗಿ ಕಣ್ಣು ಮಿಟುಕಿಸಿ. ಸ್ಕ್ರೀನ್‌ ಮೇಲೆ ಗಮನ ಕೇಂದ್ರೀಕರಿಸಿದಾಗ ನಮ್ಮ ಕಣ್ಣು ಮಿಟುಕಿಸುವಿಕೆ ಸಾಮಾನ್ಯವಾಗಿ ಅಪೂರ್ಣ ವಾಗಿರುತ್ತದೆ ಮತ್ತು ಲೆನ್ಸ್‌ನ ಸಂಪೂರ್ಣ ಮೇಲ್ಮೈ ಮೇಲೆ ತೇವಾಂಶ ಹರಡುವುದಿಲ್ಲ. ಆದ್ದರಿಂದ 20 ಸೆಕೆಂಡುಗಳ ವಿರಾಮದ ಸಮಯದಲ್ಲಿ ಕಣ್ಣುಗಳನ್ನು ಸಂಪೂರ್ಣವಾಗಿ ಒಮ್ಮೆ ಅಥವಾ ಎರಡು ಬಾರಿ ಮುಚ್ಚಿ.

ಎರಡನೆಯದಾಗಿ, ಸಮಯದ ಜೊತೆಗೆ ನಿಮ್ಮ ಸುತ್ತಮುತ್ತಲಿನ *ಆರ್ದ್ರತೆ (humidity)ಯನ್ನೂ ಗಮನಿಸಿ. ಆರ್ದ್ರತೆ ಸುಮಾರು 40%ಕ್ಕಿಂತ ಕಡಿಮೆಯಿದ್ದರೆ, ನೀವು ಎಷ್ಟು ಬಾರಿ ಕಣ್ಣು ಮಿಟುಕಿಸಿ ದರೂ ಕಣ್ಣೀರು ವೇಗವಾಗಿ ಆವಿಯಾಗುತ್ತದೆ. ಏರ್‌ಕಂಡೀಷನರ್ ಇರುವ ಹೆಚ್ಚಿನ ಕಚೇರಿಗಳಲ್ಲಿ ಆರ್ದ್ರತೆ ಸಾಮಾನ್ಯವಾಗಿ **20ರಿಂದ 30%*ರಷ್ಟಿರಬಹುದು. ಸರಳವಾದ ಡೆಸ್ಕ್‌ಟಾಪ್ ಹ್ಯೂಮಿಡಿಫೈಯರ್ ಬಳಸುವುದರಿಂದ ನಿರೀಕ್ಷೆಗಿಂತ ಹೆಚ್ಚಿನ ವ್ಯತ್ಯಾಸ ಕಂಡುಬರಬಹುದು.

ಮೂರನೆಯದಾಗಿ, 20-20-20 ನಿಯಮವನ್ನು ಸರಿಯಾಗಿ ಅನುಸರಿಸಿದರೂ ನಿಮ್ಮ ಕಣ್ಣುಗಳು ಒಣವಾಗಿಯೇ ಇದ್ದರೆ, ನಿಮ್ಮ ಕಾಂಟ್ಯಾಕ್ಟ್ ಲೆನ್ಸ್‌ನ ವಸ್ತುವನ್ನು ಬದಲಾಯಿಸುವ ಬಗ್ಗೆ ಕಣ್ಣಿನ ವೈದ್ಯರೊಂದಿಗೆ ಮಾತನಾಡುವುದು ಸೂಕ್ತವಾಗಬಹುದು. ಹೊಸ ತಲೆಮಾರಿನ ವಾಟರ್-ಗ್ರೇಡಿ ಯಂಟ್ ಮತ್ತು ಸಿಲಿಕೋನ್ ಹೈಡ್ರೋಜೆಲ್ ಲೆನ್ಸ್‌ಗಳು, ಹಳೆಯ ಹೈಡ್ರೋಜೆಲ್ ಲೆನ್ಸ್‌ಗಳಿಗಿಂತ ಪೂರ್ಣ ಕೆಲಸದ ಅವಧಿಯಲ್ಲಿ ತೇವಾಂಶವನ್ನು ಉತ್ತಮವಾಗಿ ಕಾಪಾಡಿಕೊಳ್ಳಲು ಸಹಾಯ ಮಾಡಬಹುದು.

ಕೊನೆಯದಾಗಿ

20-20-20 ನಿಯಮವು ದಿನವಿಡೀ ಸ್ಕ್ರೀನ್ ಮುಂದೆ ಕೆಲಸ ಮಾಡುವ ಎಲ್ಲರಿಗೂ ಸಹಾಯಕವಾಗಿದೆ. ಆದರೆ ಕಾಂಟ್ಯಾಕ್ಟ್ ಲೆನ್ಸ್ ಬಳಸುವವರಿಗೆ, ಕಣ್ಣಿನ ಸ್ನಾಯುಗಳಿಗೆ ವಿಶ್ರಾಂತಿ ನೀಡುವುದು ಮಾತ್ರ ಇದರ ಉದ್ದೇಶವಲ್ಲ.

ಆ ವಿರಾಮದ ನಿಜವಾದ ಉದ್ದೇಶವೆಂದರೆ, ಕಣ್ಣಿನ ಮೇಲಿರುವ ತೆಳುವಾದ ನೀರು ಆಧಾರಿತ ಕಾಂಟ್ಯಾಕ್ಟ್ ಲೆನ್ಸ್ ಸಾಕಷ್ಟು ತೇವಾಂಶವನ್ನು ಹೊಂದಿಕೊಂಡು ಆರಾಮದಾಯಕವಾಗಿರುವಂತೆ ನೋಡಿಕೊಳ್ಳುವುದು.