ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ನ ಮೌನ ಲಕ್ಷಣಗಳನ್ನು ನಿರ್ಲಕ್ಷಿಸಬೇಡಿ: ಆರಂಭಿಕ ಲಕ್ಷಣಗಳನ್ನು ಸಮಯಕ್ಕೆ ಗುರುತಿಸಿದರೆ ಚಿಕಿತ್ಸೆಯಲ್ಲಿ ಯಶಸ್ಸಿನ ಸಾಧ್ಯತೆ ಹೆಚ್ಚು

ಡಾ.ಶಾಂತಲಿಂಗ ನಿಗ್ಗುಡಗಿ, ಮೆಡಿಕಲ್ ಹೆಡ್ (ಎಸ್‌ಆರ್), ಕನ್ಸಲ್ಟೆಂಟ್ ರೇಡಿಯೇಷನ್ ಆಂಕಾಲಜಿಸ್ಟ್ ಹಾಗೂ ಕ್ಲಿನಿಕಲ್ ಆಂಕಾಲಜಿಸ್ಟ್, ಎಚ್‌ಸಿಜಿ ಕ್ಯಾನ್ಸರ್ ಆಸ್ಪತ್ರೆ, ಕಲಬುರಗಿ

ಕಲಬುರಗಿ: ತಲೆ ಮತ್ತು ಕುತ್ತಿಗೆ ಭಾಗದಲ್ಲಿ ಕಾಣಿಸಿಕೊಳ್ಳುವ ಕ್ಯಾನ್ಸರ್‌ಗಳು ಬಹುತೇಕ ಸಂದರ್ಭ ಗಳಲ್ಲಿ ಮುಂದುವರಿದ ಹಂತದಲ್ಲಿಯೇ ಪತ್ತೆಯಾಗುತ್ತವೆ. ಆರಂಭಿಕ ಹಂತದಲ್ಲಿ ಕಾಣಿಸಿಕೊಳ್ಳುವ ಲಕ್ಷಣಗಳು ಸಾಮಾನ್ಯವಾಗಿ ಸೂಕ್ಷ್ಮವಾಗಿದ್ದು, ನೋವಿಲ್ಲದೆ ಕಾಣಿಸಿಕೊಳ್ಳುವುದರಿಂದ ಜನರು ಅವುಗಳನ್ನು ಅಲರ್ಜಿ, ಸೋಂಕು, ಒತ್ತಡ ಅಥವಾ ಸಾಮಾನ್ಯ ದಂತ ಸಮಸ್ಯೆಗಳೆಂದು ಭಾವಿಸಿ ನಿರ್ಲಕ್ಷಿಸುತ್ತಾರೆ. ಈ ನಿರ್ಲಕ್ಷ್ಯವೇ ರೋಗ ಪತ್ತೆಯಲ್ಲಿ ವಿಳಂಬಕ್ಕೆ ಕಾರಣವಾಗುತ್ತಿದ್ದು, ಚಿಕಿತ್ಸೆ ಹೆಚ್ಚು ಸಂಕೀರ್ಣವಾಗುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ.

ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ಎಂಬುದು ಬಾಯಿ, ಗಂಟಲು, ಧ್ವನಿಪೆಟ್ಟಿಗೆ (Voice Box), ಮೂಗಿನ ಒಳಭಾಗ, ಸೈನಸ್, ಲಾಲಾರಸ ಗ್ರಂಥಿಗಳು ಹಾಗೂ ತಲೆ ಮತ್ತು ಕುತ್ತಿಗೆ ಭಾಗದ ಇತರ ಅಂಗಾಂಶ ಗಳಲ್ಲಿ ಉಂಟಾಗುವ ವಿವಿಧ ಕ್ಯಾನ್ಸರ್‌ಗಳನ್ನು ಒಳಗೊಂಡಿರುವ ವಿಶಾಲ ಪದವಾಗಿದೆ. ಈ ಕ್ಯಾನ್ಸರ್‌ಗಳಲ್ಲಿ ಬಹುತೇಕವು ಆರಂಭಿಕ ಹಂತದಲ್ಲಿಯೇ ಪತ್ತೆಯಾದರೆ ಯಶಸ್ವಿಯಾಗಿ ಚಿಕಿತ್ಸೆ ನೀಡಲು ಸಾಧ್ಯವಾಗುತ್ತದೆ. ಆದ್ದರಿಂದ ಲಕ್ಷಣಗಳನ್ನು ಬೇಗ ಗುರುತಿಸಿ ವೈದ್ಯಕೀಯ ಪರೀಕ್ಷೆಗೆ ಒಳಗಾಗುವುದು ಅತ್ಯಂತ ಮುಖ್ಯ.

ಆರಂಭಿಕ ಲಕ್ಷಣಗಳು ಏಕೆ ಗಮನಕ್ಕೆ ಬರುವುದಿಲ್ಲ?

ಹಲವು ಕಾಯಿಲೆಗಳು ತೀವ್ರ ನೋವು ಅಥವಾ ಅಸ್ವಸ್ಥತೆಯ ಮೂಲಕ ಗಮನ ಸೆಳೆಯುತ್ತವೆ. ಆದರೆ ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗಳು ಆರಂಭಿಕ ಹಂತದಲ್ಲಿ ಯಾವುದೇ ಗಮನಾರ್ಹ ತೊಂದರೆಯನ್ನು ಉಂಟುಮಾಡದೇ ನಿಧಾನವಾಗಿ ಬೆಳೆಯಬಹುದು. ಕೆಲವೊಮ್ಮೆ ಲಕ್ಷಣಗಳು ತುಂಬಾ ಸೌಮ್ಯ ವಾಗಿರಬಹುದು ಅಥವಾ ಸಂಪೂರ್ಣವಾಗಿ ಕಾಣಿಸದೇ ಇರಬಹುದು. ಹೀಗಾಗಿ ರೋಗಿಗಳು ಅವುಗಳನ್ನು ಸಾಮಾನ್ಯ ಆರೋಗ್ಯ ಸಮಸ್ಯೆಗಳೆಂದು ಭಾವಿಸಿ ಕಡೆಗಣಿಸುತ್ತಾರೆ. ಆರಂಭದಲ್ಲಿ ಆರೋಗ್ಯ ತಜ್ಞರೂ ಸಹ ಸಾಮಾನ್ಯ ಸೋಂಕು ಅಥವಾ ಇತರ ಕಾಯಿಲೆಗಳ ಸಾಧ್ಯತೆ ಪರಿಶೀಲಿಸುವ ಕಾರಣ ಕ್ಯಾನ್ಸರ್ ಪತ್ತೆಯಾಗಲು ಸಮಯ ಹಿಡಿಯಬಹುದು.

ಇದನ್ನೂ ಓದಿ: Monsoon Health Tips: ಮಳೆಗಾಲದಲ್ಲಿ ಆರೋಗ್ಯ ಕಾಪಾಡಿಕೊಳ್ಳುವುದು ಹೇಗೆ? ಇಲ್ಲಿವೆ ಪ್ರಮುಖ ಸಲಹೆ

ಯಾವುದೇ ಲಕ್ಷಣ ಎರಡು ಅಥವಾ ಮೂರು ವಾರಗಳಿಗಿಂತ ಹೆಚ್ಚು ಕಾಲ ಮುಂದುವರಿದರೆ ಅಥವಾ ದಿನದಿಂದ ದಿನಕ್ಕೆ ಉಲ್ಬಣವಾಗುತ್ತಿದ್ದರೆ ಅದನ್ನು ನಿರ್ಲಕ್ಷಿಸಬಾರದು. ಸಾಮಾನ್ಯ ಗಂಟಲು ನೋವು, ಬಾಯಿಯ ಹುಣ್ಣು ಅಥವಾ ಧ್ವನಿಯ ಬದಲಾವಣೆ ಹೆಚ್ಚಿನ ಸಂದರ್ಭಗಳಲ್ಲಿ ಅಪಾಯಕಾರಿಯಾಗಿರುವುದಿಲ್ಲ. ಆದರೆ ಅವು ದೀರ್ಘಕಾಲ ಮುಂದುವರಿದರೆ ವೈದ್ಯಕೀಯ ಪರೀಕ್ಷೆ ಮಾಡಿಸಿಕೊಳ್ಳುವುದು ಅತ್ಯಗತ್ಯ.

ನಿರ್ಲಕ್ಷಿಸಬಾರದ ಎಚ್ಚರಿಕೆಯ ಲಕ್ಷಣಗಳು

ಬಾಯಿಯಲ್ಲಿ ಕಾಣಿಸಿಕೊಳ್ಳುವ ಬದಲಾವಣೆಗಳು

ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ನ ಆರಂಭಿಕ ಲಕ್ಷಣಗಳು ಮೊದಲು ಬಾಯಿಯಲ್ಲೇ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚು.

* ಎರಡು ಅಥವಾ ಮೂರು ವಾರಗಳಾದರೂ ಗುಣವಾಗದ ಬಾಯಿಯ ಹುಣ್ಣು ಅಥವಾ ಗಾಯ.

* ನಾಲಿಗೆ, ಒಸಡು ಅಥವಾ ಬಾಯಿಯ ತಳಭಾಗದಲ್ಲಿ ನಿರಂತರವಾಗಿ ಕಾಣಿಸಿಕೊಳ್ಳುವ ಕೆಂಪು, ಬಿಳಿ ಅಥವಾ ಕೆಂಪು-ಬಿಳಿ ಮಿಶ್ರ ಬಣ್ಣದ ಕಲೆಗಳು.

* ಯಾವುದೇ ಸ್ಪಷ್ಟ ಹಲ್ಲಿನ ಸಮಸ್ಯೆಯಿಲ್ಲದಿದ್ದರೂ ಹಲ್ಲುಗಳು ಅಲುಗಾಡುವುದು ಅಥವಾ ಕೃತಕ ಹಲ್ಲುಗಳು (Dentures) ಇದ್ದಕ್ಕಿದ್ದಂತೆ ಸರಿಯಾಗಿ ಹೊಂದಿಕೊಳ್ಳದಿರುವುದು.

* ನಾಲಿಗೆ ಅಥವಾ ಬಾಯಿಯ ಯಾವುದೇ ಭಾಗದಲ್ಲಿ ಕಾರಣವಿಲ್ಲದೆ ಮರಗಟ್ಟಿದ ಅನುಭವ ಅಥವಾ ಸ್ಪರ್ಶಜ್ಞಾನ ಕಡಿಮೆಯಾಗುವುದು.

ಗಂಟಲು ಮತ್ತು ಧ್ವನಿಗೆ ಸಂಬಂಧಿಸಿದ ಲಕ್ಷಣಗಳು

ಗಂಟಲು ಮತ್ತು ಧ್ವನಿಯಲ್ಲಿ ಉಂಟಾಗುವ ಬದಲಾವಣೆಗಳನ್ನು ಸಾಮಾನ್ಯವಾಗಿ ಶೀತ ಅಥವಾ ಸೋಂಕಿನ ಪರಿಣಾಮವೆಂದು ಭಾವಿಸಲಾಗುತ್ತದೆ. ಆದರೆ ಈ ಕೆಳಗಿನ ಲಕ್ಷಣಗಳು ದೀರ್ಘಕಾಲ ಮುಂದುವರಿದರೆ ವೈದ್ಯರನ್ನು ಸಂಪರ್ಕಿಸಬೇಕು.

* ಒಂದು ಬದಿಯಲ್ಲಿ ನಿರಂತರವಾಗಿ ಗಂಟಲು ನೋವು ಕಾಣಿಸಿಕೊಳ್ಳುವುದು.

* ಶೀತ ಅಥವಾ ಉಸಿರಾಟದ ಸೋಂಕಿಲ್ಲದಿದ್ದರೂ ಎರಡರಿಂದ ನಾಲ್ಕು ವಾರಗಳಿಗಿಂತ ಹೆಚ್ಚು ಕಾಲ ಧ್ವನಿ ಗಟ್ಟಿಯಾಗಿರುವುದು ಅಥವಾ ಧ್ವನಿಯಲ್ಲಿ ಬದಲಾವಣೆ ಕಂಡುಬರುವುದು.

* ಆಹಾರ ನುಂಗಲು ಕಷ್ಟವಾಗುವುದು ಅಥವಾ ನುಂಗುವಾಗ ನೋವು ಕಾಣಿಸಿಕೊಳ್ಳುವುದು.

* ಆಹಾರ ಗಂಟಲಿನಲ್ಲಿ ಸಿಲುಕಿದ ಅನುಭವವಾಗುವುದು.

* ಕಿವಿಯಲ್ಲಿ ಯಾವುದೇ ಸೋಂಕಿಲ್ಲದಿದ್ದರೂ ವಿಶೇಷವಾಗಿ ಒಂದೇ ಬದಿಯಲ್ಲಿ ನಿರಂತರ ನೋವು ಕಾಣಿಸಿಕೊಳ್ಳುವುದು.

ಕುತ್ತಿಗೆ ಮತ್ತು ಮುಖದಲ್ಲಿ ಕಾಣಿಸಿಕೊಳ್ಳುವ ಬದಲಾವಣೆಗಳು

ಕುತ್ತಿಗೆಯಲ್ಲಿ ಕಾಣಿಸಿಕೊಳ್ಳುವ ಸಣ್ಣ ಗಡ್ಡೆಯೂ ಕೆಲವೊಮ್ಮೆ ಕ್ಯಾನ್ಸರ್‌ನ ಮೊದಲ ಸೂಚನೆಯಾಗಿರಬಹುದು.

* ಕುತ್ತಿಗೆಯಲ್ಲಿ ನೋವಿಲ್ಲದ ಗಡ್ಡೆ ಅಥವಾ ಊತ.

* ಮುಖದಲ್ಲಿ ಮರಗಟ್ಟಿದ ಅನುಭವ, ಜುಮ್ಮೆನಿಸುವಿಕೆ ಅಥವಾ ದುರ್ಬಲತೆ.

* ಮುಖದ ಯಾವುದೇ ಭಾಗವನ್ನು ಸರಿಯಾಗಿ ಚಲಿಸಲು ಸಾಧ್ಯವಾಗದಿರುವುದು.

ಮೂಗು ಮತ್ತು ಸೈನಸ್‌ಗೆ ಸಂಬಂಧಿಸಿದ ಲಕ್ಷಣಗಳು

ಮೂಗು ಅಥವಾ ಸೈನಸ್‌ಗೆ ಸಂಬಂಧಿಸಿದ ಕೆಲವು ಸಮಸ್ಯೆಗಳು ದೀರ್ಘಕಾಲ ಮುಂದುವರಿದರೆ ಅವುಗಳ ಬಗ್ಗೆ ನಿರ್ಲಕ್ಷ್ಯ ಸಲ್ಲದು.

* ವಿಶೇಷವಾಗಿ ಒಂದೇ ಬದಿಯಲ್ಲಿ ನಿರಂತರ ಮೂಗು ಕಟ್ಟಿಕೊಳ್ಳುವುದು.

* ಆಗಾಗ ಮೂಗಿನಿಂದ ರಕ್ತಸ್ರಾವವಾಗುವುದು ಅಥವಾ ಕಫದಲ್ಲಿ ರಕ್ತದ ಅಂಶ ಕಾಣಿಸಿಕೊಳ್ಳುವುದು.

* ವಾಸನೆ ಗ್ರಹಿಸುವ ಸಾಮರ್ಥ್ಯ ಕಡಿಮೆಯಾಗುವುದು.

* ಮುಖದಲ್ಲಿ ನಿರಂತರ ನೋವು ಅಥವಾ ಹಲ್ಲಿನಲ್ಲಿ ಕಾರಣವಿಲ್ಲದ ನೋವು ಕಾಣಿಸಿಕೊಳ್ಳುವುದು.

* ಯಾವುದೇ ಸ್ಪಷ್ಟ ಕಾರಣವಿಲ್ಲದೆ ಹಲ್ಲುಗಳು ಅಲುಗಾಡುವುದು.

* ಚಿಕಿತ್ಸೆ ಪಡೆದರೂ ಮರುಮರು ಸೈನಸ್ ಸೋಂಕು ಕಾಣಿಸಿಕೊಳ್ಳುವುದು.

ಸಾಮಾನ್ಯವಾಗಿ ಕಡೆಗಣಿಸಲ್ಪಡುವ ಇತರ ಲಕ್ಷಣಗಳು

ಕೆಲವು ಲಕ್ಷಣಗಳು ಕ್ಯಾನ್ಸರ್‌ಗೆ ನೇರವಾಗಿ ಸಂಬಂಧಿಸಿದಂತಿಲ್ಲವೆಂದು ಭಾಸವಾದರೂ ಅವುಗಳನ್ನೂ ಗಂಭೀರವಾಗಿ ಪರಿಗಣಿಸಬೇಕು.

* ಬಾಯಿಯಿಂದ ನಿರಂತರ ದುರ್ವಾಸನೆ ಬರುವುದು.

* ಯಾವುದೇ ಕಾರಣವಿಲ್ಲದೆ ತೂಕ ಕಡಿಮೆಯಾಗುವುದು.

* ದೀರ್ಘಕಾಲದ ಆಯಾಸ.

* ಎರಡು ಚಿತ್ರಗಳು ಕಾಣಿಸುವುದು (Double Vision).

* ಕಣ್ಣಿನಲ್ಲಿ ಅತಿಯಾಗಿ ನೀರು ಬರುವುದು ಅಥವಾ ಕಣ್ಣು ಉಬ್ಬಿರುವಂತೆ ಕಾಣಿಸಿಕೊಳ್ಳುವುದು.

* ಆಗಾಗ ತಲೆನೋವು.

* ಕಿವಿಯಲ್ಲಿ ನಿರಂತರ ಶಬ್ದ ಕೇಳಿಸುವುದು (Ringing in the Ear).

* ಶ್ರವಣ ಸಾಮರ್ಥ್ಯದಲ್ಲಿ ಬದಲಾವಣೆ ಕಾಣಿಸಿಕೊಳ್ಳುವುದು.

ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ನ ಆರಂಭಿಕ ಹಂತದಲ್ಲಿ ಹೆಚ್ಚಿನವರಿಗೆ ನೋವು ಕಾಣಿಸಿಕೊಳ್ಳುವುದಿಲ್ಲ. ಇದೇ ಕಾರಣದಿಂದ ಅನೇಕರು ಈ ಲಕ್ಷಣಗಳನ್ನು ನಿರ್ಲಕ್ಷಿಸುತ್ತಾರೆ ಮತ್ತು ರೋಗ ಮುಂದುವರಿದ ಹಂತದಲ್ಲಿ ಮಾತ್ರ ಪತ್ತೆಯಾಗುತ್ತದೆ.

ಯಾರಿಗೆ ಅಪಾಯ ಹೆಚ್ಚು?

ತಂಬಾಕು ಸೇವನೆ ಮತ್ತು ಅತಿಯಾದ ಮದ್ಯಪಾನ ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್‌ಗೆ ಪ್ರಮುಖ ಅಪಾಯಕಾರಕ ಅಂಶಗಳಾಗಿವೆ. ಆದರೆ ಇತ್ತೀಚಿನ ವರ್ಷಗಳಲ್ಲಿ ಈ ಕ್ಯಾನ್ಸರ್‌ನ ಸ್ವರೂಪದಲ್ಲಿ ಗಮನಾರ್ಹ ಬದಲಾವಣೆ ಕಂಡುಬರುತ್ತಿದೆ.

ಪ್ರಸ್ತುತ ಮಾನವ ಪ್ಯಾಪಿಲೋಮಾ ವೈರಸ್ (HPV) ಸೋಂಕು ಗಂಟಲಿನ ಕ್ಯಾನ್ಸರ್ ಪ್ರಕರಣಗಳಿಗೆ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ವಿಶೇಷವಾಗಿ ಎಂದಿಗೂ ಧೂಮಪಾನ ಮಾಡದ ಯುವಜನರಲ್ಲಿಯೂ HPV ಸಂಬಂಧಿತ ಗಂಟಲು ಕ್ಯಾನ್ಸರ್ ಪ್ರಕರಣಗಳು ಹೆಚ್ಚುತ್ತಿವೆ.

ಇದರ ಜೊತೆಗೆ ಈ ಕೆಳಗಿನ ಅಂಶಗಳೂ ಅಪಾಯವನ್ನು ಹೆಚ್ಚಿಸುತ್ತವೆ.

* ಎಪ್ಸ್ಟೀನ್-ಬಾರ್ ವೈರಸ್ (EBV) ಸೋಂಕು.

* ರೋಗನಿರೋಧಕ ಶಕ್ತಿ ದುರ್ಬಲವಾಗಿರುವುದು.

* ಕೆಲವು ಅನುವಂಶಿಕ ಕಾಯಿಲೆಗಳು.

* ಬಾಯಿಯ ಸ್ವಚ್ಛತೆಯ ಕೊರತೆ.

* ಮರದ ಧೂಳು ಅಥವಾ ಅಸ್ಬೆಸ್ಟಾಸ್‌ನಂತಹ ವಸ್ತುಗಳ ಸಂಪರ್ಕದಲ್ಲಿರುವ ಉದ್ಯೋಗ.

ಆರಂಭಿಕ ಪತ್ತೆ ಜೀವ ಉಳಿಸಬಹುದು

ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ಆರಂಭಿಕ ಹಂತದಲ್ಲೇ ಪತ್ತೆಯಾದರೆ ಚಿಕಿತ್ಸೆಯ ಯಶಸ್ಸಿನ ಪ್ರಮಾಣ ಗಮನಾರ್ಹವಾಗಿ ಹೆಚ್ಚಾಗುತ್ತದೆ. ಆರಂಭಿಕ ಹಂತದ ಕ್ಯಾನ್ಸರ್‌ಗೆ ಕಡಿಮೆ ತೀವ್ರತೆಯ ಚಿಕಿತ್ಸೆಯೇ ಸಾಕಾಗುವ ಸಾಧ್ಯತೆ ಇರುವುದರಿಂದ ಮಾತನಾಡುವ ಸಾಮರ್ಥ್ಯ, ಆಹಾರ ನುಂಗುವ ಸಾಮರ್ಥ್ಯ ಹಾಗೂ ಜೀವನದ ಗುಣಮಟ್ಟವನ್ನು ಉತ್ತಮವಾಗಿ ಕಾಪಾಡಿಕೊಳ್ಳಬಹುದು.

ಆದರೆ ಅನೇಕ ರೋಗಿಗಳಲ್ಲಿ ಕ್ಯಾನ್ಸರ್ ಸ್ಥಳೀಯವಾಗಿ ಅಥವಾ ಸಮೀಪದ ಲಿಂಫ್ ನೋಡ್‌ಗಳಿಗೆ ಹರಡಿದ ನಂತರವೇ ಪತ್ತೆಯಾಗುವುದರಿಂದ ಚಿಕಿತ್ಸೆ ಹೆಚ್ಚು ಸಂಕೀರ್ಣವಾಗುತ್ತದೆ.

ಈ ಹಿನ್ನೆಲೆಯಲ್ಲಿ ದಂತ ವೈದ್ಯರ ಪಾತ್ರವೂ ಅತ್ಯಂತ ಮಹತ್ವದ್ದಾಗಿದೆ. ನಿಯಮಿತ ದಂತ ತಪಾ ಸಣೆಯ ವೇಳೆ ಬಾಯಿ ಹಾಗೂ ಕುತ್ತಿಗೆಯಲ್ಲಿ ಕಾಣಿಸಿಕೊಳ್ಳುವ ಅನುಮಾನಾಸ್ಪದ ಬದಲಾವಣೆ ಗಳನ್ನು ಆರಂಭಿಕ ಹಂತದಲ್ಲಿಯೇ ಗುರುತಿಸಲು ಸಾಧ್ಯವಾಗುತ್ತದೆ.

ನೀವು ಮಾಡಬೇಕಾದದ್ದು

* ಯಾವುದೇ ಲಕ್ಷಣ ಎರಡು ವಾರಗಳಿಗಿಂತ ಹೆಚ್ಚು ಕಾಲ ಮುಂದುವರಿದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.

* ಅಗತ್ಯವಿದ್ದರೆ ಇಎನ್‌ಟಿ (ENT) ತಜ್ಞರು ಅಥವಾ ಓರಲ್ ಸರ್ಜನ್ ಅವರಿಂದ ಪರೀಕ್ಷೆ ಮಾಡಿಸಿಕೊಳ್ಳಿ.

* ನಿಯಮಿತವಾಗಿ ಬಾಯಿ ಮತ್ತು ಕುತ್ತಿಗೆಯನ್ನು ಸ್ವತಃ ಪರಿಶೀಲಿಸಿಕೊಳ್ಳುವ ಅಭ್ಯಾಸ ಬೆಳೆಸಿಕೊಳ್ಳಿ.

* ಬಾಯಿ ಅಥವಾ ಕುತ್ತಿಗೆಯಲ್ಲಿ ಅಸಹಜ ಕಲೆ, ಗುಣವಾಗದ ಗಾಯ ಅಥವಾ ಗಡ್ಡೆ ಕಂಡುಬಂದರೆ ವಿಳಂಬ ಮಾಡದೆ ವೈದ್ಯಕೀಯ ಸಲಹೆ ಪಡೆಯಿರಿ.

* ತಂಬಾಕು ಸೇವನೆ ಸಂಪೂರ್ಣವಾಗಿ ತ್ಯಜಿಸಿ.

* ಮದ್ಯಪಾನ ಮಿತಿಗೊಳಿಸಿ.

* ಬಾಯಿಯ ಸ್ವಚ್ಛತೆಯನ್ನು ಕಾಪಾಡಿಕೊಳ್ಳಿ.

* ವೈದ್ಯರ ಸಲಹೆಯಂತೆ HPV ಲಸಿಕೆ ಪಡೆಯಿರಿ .

ತಲೆ ಮತ್ತು ಕುತ್ತಿಗೆ ಕ್ಯಾನ್ಸರ್ ಸಾಮಾನ್ಯವಾಗಿ ತೀವ್ರವಾದ ಲಕ್ಷಣಗಳೊಂದಿಗೆ ಆರಂಭವಾಗುವು ದಿಲ್ಲ. ದೀರ್ಘಕಾಲ ಗುಣವಾಗದ ಸಣ್ಣ ಗಾಯ, ಧ್ವನಿಯಲ್ಲಿನ ನಿರಂತರ ಬದಲಾವಣೆ ಅಥವಾ ನೋವಿಲ್ಲದ ಸಣ್ಣ ಗಡ್ಡೆಯಂತಹ ಸೂಕ್ಷ್ಮ ಲಕ್ಷಣಗಳ ಮೂಲಕ ಅದು ತನ್ನ ಇರುವಿಕೆಯನ್ನು ಸೂಚಿಸುತ್ತದೆ. ಇಂತಹ ಎಚ್ಚರಿಕೆಗಳನ್ನು ನಿರ್ಲಕ್ಷಿಸದೆ ಕೆಲವೇ ವಾರಗಳಲ್ಲಿ ವೈದ್ಯರನ್ನು ಸಂಪರ್ಕಿಸುವುದು ಆರಂಭಿಕ ಪತ್ತೆ ಮತ್ತು ಯಶಸ್ವಿ ಚಿಕಿತ್ಸೆಗೆ ಅತ್ಯಂತ ಪ್ರಮುಖವಾಗಿದೆ. ಸಮಯಕ್ಕೆ ತೆಗೆದುಕೊಳ್ಳುವ ಒಂದು ಸರಳ ನಿರ್ಧಾರವೇ ಜೀವ ಉಳಿಸುವ ಅವಕಾಶವನ್ನು ಹೆಚ್ಚಿಸಬಹುದು.