Deadly Virus: ಜೈವಿಕ ಪ್ರಯೋಗಾಲಯದಿಂದ ಕೋವಿಡ್-19ಕ್ಕಿಂತ 100 ಪಟ್ಟು ಹೆಚ್ಚು ಮಾರಕ ವೈರಸ್‌ಗಳು ನಾಪತ್ತೆ!
Deadly Virus: ಆಸ್ಟ್ರೇಲಿಯಾದ ಜೈವಿಕ ಪ್ರಯೋಗಾಲಯದಿಂದ ಸುಮಾರು 323 ಭಯಾನಕ ವೈರಸ್‌ಗಳ ಸ್ಯಾಂಪಲ್‌ಗಳು ನಾಪತ್ತೆಯಾಗಿರುವ ಆಘಾತಕಾರಿ ಘಟನೆ ನಡೆದಿದ್ದು, ಜಗತ್ತಿನಾದ್ಯಂತ ಭೀತಿ ಆವರಿಸಿದೆ.
Ramesh B
Dec 11, 2024 11:43 PM
ಸಿಡ್ನಿ: 2020ರಲ್ಲಿ ಜಗತ್ತನ್ನೇ ತಲ್ಲಣಗೊಳಿಸಿದ ಕೋವಿಡ್-19 ವೈರಸ್ ದಾಳಿಯ ಪರಿಣಾಮವನ್ನು ಇನ್ನು ಯಾರೂ ಮರೆತಿಲ್ಲ. ಅದಾಗಲೇ ಆಸ್ಟ್ರೇಲಿಯಾದ ಜೈವಿಕ ಪ್ರಯೋಗಾಲಯದಿಂದ ಸುಮಾರು 323 ಭಯಾನಕ ವೈರಸ್‌ಗಳ ಸ್ಯಾಂಪಲ್‌ಗಳು ನಾಪತ್ತೆಯಾಗಿರುವ ಆಘಾತಕಾರಿ ಘಟನೆ ನಡೆದಿದ್ದು, ಜಗತ್ತಿನಾದ್ಯಂತ ಭೀತಿ ಆವರಿಸಿದೆ. ಇದು ಅತಿದೊಡ್ಡ ಜೈವಿಕ ಸುರಕ್ಷತೆಯ ಉಲ್ಲಂಘನೆ ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ. ಮಾರಣಾಂತಿಕ ವೈರಸ್ ನಾಪತ್ತೆಯಾಗಿವ ಸುದ್ದಿಯನ್ನು ಆಸ್ಟ್ರೇಲಿಯಾದ ಕ್ವೀನ್ಸ್‌ಲ್ಯಾಂಡ್ ಸರ್ಕಾರ (Queensland government) ಖಚಿತಪಡಿಸಿದೆ.
ಆಸ್ಟ್ರೇಲಿಯಾದ ಸಾರ್ವಜನಿಕ ಆರೋಗ್ಯ ಇಲಾಖೆ, ಕ್ವೀನ್ಸ್‌ಲ್ಯಾಂಡ್ ಆಡಳಿತವು ಜೈವಿಕ ಸುರಕ್ಷತಾ ಪ್ರೋಟೋಕಾಲ್‌ಗಳ ಈ ಉಲ್ಲಂಘನೆಯ ಬಗ್ಗೆ ತನಿಖೆ ನಡೆಸುವಂತೆ ಸರ್ಕಾರಕ್ಕೆ ಸೂಚನೆ ನೀಡಿದೆ. ಸಾಂಕ್ರಾಮಿಕ ರೋಗ ಹರಡುವ ಹೆಂದ್ರಾ, ಲೈಸಾ ಮತ್ತು ಹ್ಯಾಂಟಾ ಸೇರಿದಂತೆ 323 ವೈರಸ್‌ಗಳು (Infectious Viruses) ಕ್ವೀನ್ಸ್‌ಲ್ಯಾಂಡ್‌ನ ಪಬ್ಲಿಕ್ ಹೆಲ್ತ್ ವೈರಾಲಜಿ ಲ್ಯಾಬ್‌ನಿಂದ ನಾಪತ್ತೆಯಾಗಿವೆ ಎಂದು ವರದಿಯೊಂದು ತಿಳಿಸಿದೆ.
🚨 SHOCKING & CONCERNING NEWSHundreds of 'DEADLY virus' samples are missing from a lab in Australia 😡323 samples of live viruses including Hendra virus, Lyssavirus and Hantavirus went missing in a serious breach of biosecurity protocols. pic.twitter.com/xw0t9U5E0P— Megh Updates 🚨™ (@MeghUpdates) December 11, 2024
ಹೆಂದ್ರಾ ಒಂದು ರೀತಿಯ ಝೂನೋಟಿಕ್ (ಪ್ರಾಣಿಯಿಂದ ಮನುಷ್ಯನಿಗೆ ಹರಡುವ) ವೈರಸ್ ಆಗಿದ್ದು, ಇದು ಆಸ್ಟ್ರೇಲಿಯಾದಲ್ಲಿ ಮಾತ್ರ ಕಂಡು ಬರುತ್ತದೆ. ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರಗಳ ಪ್ರಕಾರ, ಹ್ಯಾಂಟಾ ವೈರಸ್ ಗಂಭೀರ ಅನಾರೋಗ್ಯ ಮತ್ತು ಸಾವಿಗೆ ಕಾರಣವಾಗುತ್ತದೆ. ಇನ್ನು ಲೈಸಾ ವೈರಸ್ ರೇಬೀಸ್‌ಗೆ ಕಾರಣವಾಗುತ್ತದೆ.
ಕಾಣೆಯಾದ ಪೈಕಿ ಸುಮಾರು 100ರಷ್ಟು ಹೆಂದ್ರಾ ವೈರಸ್‌ನ ಮಾದರಿ ಇದೆ ಎಂದು ಕ್ವೀನ್ಸ್‌ಲ್ಯಾಂಡ್‌ನ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ. ಇದು ಮಾನವರಲ್ಲಿ ಶೇ. 57ರಷ್ಟು ಸಾವಿಗೆ ಕಾರಣವಾಗುವ ರೋಗಕಾರಕವಾಗಿದೆ. 1990ರ ದಶಕದಲ್ಲಿ ಮೊದಲ ಬಾರಿಗೆ ಪ್ರತ್ಯೇಕಿಸಲ್ಪಟ್ಟ ಈ ವೈರಸ್ ಕುದುರೆಗಳಿಂದ ಮನುಷ್ಯರಿಗೆ ಹರಡುತ್ತದೆ. ಈ ವೈರಸ್‌ನ ಮಾದರಿಗಳು ಕ್ವೀನ್ಸ್‌ಲ್ಯಾಂಡ್‌ನ ಸಾರ್ವಜನಿಕ ಆರೋಗ್ಯ ವೈರಾಲಜಿ ಪ್ರಯೋಗಾಲಯದಲ್ಲಿದ್ದವು. ಒಂದು ಫ್ರೀಜರ್‌ನಿಂದ ಮತ್ತೊಂದು ಫ್ರೀಜರ್‌ಗೆ ವರ್ಗಾಯಿಸುವ ಪ್ರಕ್ರಿಯೆಯ ವೇಳೆ ಇವು ನಾಪತ್ತೆಯಾಗಿರುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.
"ಕೆಲವು ಹ್ಯಾಂಟಾ ವೈರಸ್‌ಗಳು ಶೇ. 15ವರೆಗೆ ಸಾವಿನ ಪ್ರಮಾಣವನ್ನು ಹೊಂದಿವೆ. ಇನ್ನು ಕೆಲವು ಕೋವಿಡ್ - 19ಗಿಂತ 100 ಪಟ್ಟು ಹೆಚ್ಚು ಮಾರಕವಾಗಿವೆʼʼ ಎಂದು ಮೋಸ್ಟನ್‌ನ ಈಶಾನ್ಯ ವಿಸ್ವವಿದ್ಯಾನಿಲಯದ ಎಐ ಮತ್ತು ಜೀವ ವಿಜ್ಞಾನದ ನಿರ್ದೇಶಕ ಸ್ಯಾಮ್‌ ಸ್ಕಾರ್ಪಿನೊ ತಿಳಿಸಿದ್ದಾರೆ.
ಅಪಾಯವಿಲ್ಲ
ಈ ವೈರಸ್‌ಗಳನ್ನು ಕದಿಯಲಾಗಿಲ್ಲ ಅಥವಾ ಶಸ್ತ್ರಾಸ್ತ್ರಗಳಾಗಿ ಬಳಸಲಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕ್ವೀನ್ಸ್‌ಲ್ಯಾಂಡ್‌ನ ಮುಖ್ಯ ಆರೋಗ್ಯ ಅಧಿಕಾರಿ ಜಾನ್ ಗೆರಾರ್ಡ್ ಅವರು ಈ ಬಗ್ಗೆ ಮಾತನಾಡಿ, ಇವು ಸಾರ್ವಜನಿಕರಿಗೆ ಅಪಾಯವನ್ನುಂಟು ಮಾಡುವ ಸಾಧ್ಯತೆ ತೀರಾ ಕಡಿಮೆ ಎಂದು ತಿಳಿಸಿದ್ದಾರೆ. "ಇವು ಅಪಾಯಕಾರಿಯಾಗಲಾರವು. ತಾಪಮಾನದಲ್ಲಿ ವ್ಯತ್ಯಸವಾದರೆ ಈ ವೈರಸ್‌ಗಳ ಸಾಮರ್ಥ್ಯ ಕುಂಠಿತವಾಗುತ್ತವೆʼʼ ಎಂದಿದ್ದಾರೆ. ಈ ವೈರಸ್‌ಗಳನ್ನು ಲ್ಯಾಬ್‌ಗಳಲ್ಲಿ ನಾಶ ಪಡಿಸಿರುವ ಸಾಧ್ಯತೆಯೂ ಇದೆ. ಅದಾಗ್ಯೂ ಇದು ಗಂಭೀರ ಪ್ರಕರಣವಾಗಿರುವ ಹಿನ್ನೆಲೆಯಲ್ಲಿ ತನಿಖೆಗೆ ಸರ್ಕಾರ ಮುಂದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: South Korea: ಅಂಡರ್‌ವೇರ್‌ನಿಂದ ಆತ್ಮಹತ್ಯೆಗೆ ಯತ್ನಿಸಿದ ದಕ್ಷಿಣ ಕೊರಿಯಾ ಮಾಜಿ ರಕ್ಷಣಾ ಸಚಿವ