ಬೌಂಡರಿ ಲೈನ್ ಕ್ಯಾಚ್‌ ನಿಯಮದಲ್ಲಿ ಬದಲಾವಣೆ; ಇನ್ನು ಮುಂದೆ ಈ ರೀತಿ ಕ್ಯಾಚ್ ಹಿಡಿದರೆ ನಾಟೌಟ್‌

ದುಬೈ: ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಟದಲ್ಲಿ ಹಲವು ಬದಲಾವಣೆ ಜಾರಿಗೆ ತಂದಿದ್ದ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಮಿತಿ(ICC) ಇದೀಗ ಬೌಂಡರಿ ಲೈನ್ ಕ್ಯಾಚ್‌ಗಳ(boundary catches Rule Change) ತೀರ್ಪು ನಿಯಮಗಳಲ್ಲಿಯೂ ಬದಲಾವಣೆ ಮಾಡಲು ಮುಂದಾಗಿದೆ. ಬದಲಾದ ಫೀಲ್ಡಿಂಗ್ ಡೈನಾಮಿಕ್ಸ್ ಅನ್ನು ಮರುರೂಪಿಸಲು ಮೇರಿಲ್ಬೋನ್ ಕ್ರಿಕೆಟ್ ಕ್ಲಬ್ (MCC) ಮಹತ್ವದ ನಿರ್ಧಾರ ಮಾಡಿದೆ. ಬೌಂಡರಿ ಕ್ಯಾಚ್‌ಗಳನ್ನು ನಿಯಂತ್ರಿಸುವ ಕಾನೂನಿಗೆ ನಿರ್ಣಾಯಕ ತಿದ್ದುಪಡಿಯನ್ನು ಘೋಷಿಸಿದೆ.

2023 ರ ಬಿಗ್ ಬ್ಯಾಷ್ ಲೀಗ್ (BBL) ಸಮಯದಲ್ಲಿ ಮೈಕೆಲ್ ನೇಸರ್ ಬನ್ನಿ ಹಾಪ್ ಶೈಲಿಯಲ್ಲಿ ಹಿಡಿದಿದ್ದ ಕ್ಯಾಚ್‌ ಬಗ್ಗೆ ಕ್ರಿಕೆಟ್‌ ಪರಿಣಿತರು ಭಾರೀ ವಿರೋಧ ವ್ಯಕ್ತಪಡಿಸಿದ್ದರು. ಇದೀಗ ಈ ಕ್ಯಾಚನ್ನೇ ಗುರಿಯಾಗಿಸಿ ಹೊಸ ನಿಯಮ ಜಾರಿಗೆ ಮುಂದಾಗಿದೆ. ಫೀಲ್ಡರ್‌ಗಳು ಬೌಂಡರಿಯ ಹೊರಗೆ ನೆಲಕ್ಕಿಂತ ಮೇಲೆ ಹಾರಿ ಚೆಂಡಿನೊಂದಿಗೆ ಬಹು ಸಂಪರ್ಕಗಳನ್ನು ಮಾಡುವುದನ್ನು ನಿರ್ಬಂಧಿಸುವ ಎಂಸಿಸಿ ಯ ಹೊಸ ನಿಯಮಗಳು ಅಕ್ಟೋಬರ್ 2026 ರಲ್ಲಿ ಅಧಿಕೃತವಾಗಿ ಎಂಸಿಸಿ ಯ ಕಾನೂನುಗಳಲ್ಲಿ ಸೇರಲಿದೆ. ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ಹೆಚ್ಚು ಸಾಮಾನ್ಯವಾಗುತ್ತಿರುವ ಬಹು ಸಂಪರ್ಕ ಕ್ಯಾಚ್‌ಗಳಿಗೆ ಈ ನಿಯಮ ಮಾಡಲಾಗಿದೆ.

ಬೌಂಡರಿಯಲ್ಲಿ ಹಿಡಿಯುವಾಗ "ಬನ್ನಿ ಹಾಪ್ಸ್" ಕಾನೂನುಬಾಹಿರವೆಂದು ಪರಿಗಣಿಸುವ ನಿಯಮ ಬದಲಾವಣೆಯ ವಿವರಣೆ ಇಲ್ಲಿದೆ.

ಪರಿಷ್ಕೃತ ನಿಯಮದ ಪ್ರಕಾರ, ಬೌಂಡರಿಯ ಹೊರಗಿನಿಂದ ಜಿಗಿದ ಫೀಲ್ಡರ್‌ಗೆ ಗಾಳಿಯಲ್ಲಿ ಚೆಂಡನ್ನು ಒಮ್ಮೆ ಮಾತ್ರ ಸ್ಪರ್ಶಿಸಲು ಅವಕಾಶವಿದೆ. ಕಾನೂನುಬದ್ಧವಾಗಿ ಕ್ಯಾಚ್ ಅನ್ನು ಪೂರ್ಣಗೊಳಿಸಲು, ಅವರು ನಂತರ ಸಂಪೂರ್ಣವಾಗಿ ಬೌಂಡರಿಯೊಳಗೆ ಇಳಿಯಬೇಕು. ಬೌಂಡರಿ ಲೈನ್‌ ಹೊರಗೆ ಗಾಳಿಯಲ್ಲಿ ಇರುವಾಗ ಮಾಡಿದ ಯಾವುದೇ ಎರಡನೇ ಸಂಪರ್ಕ, ಅಥವಾ ಆ ಸ್ಪರ್ಶದ ನಂತರ ಫೀಲ್ಡರ್ ಹೊರಗೆ ಇಳಿದರೆ, ಅದು ಬೌಂಡರಿ ಎಂದು ಘೋಷಿಸಲಾಗುತ್ತದೆ.

ರಿಲೇ ಕ್ಯಾಚ್‌ಗಳು ಸಹ ಇದರಡಿಯಲ್ಲಿ ಬರುತ್ತವೆ. ಒಬ್ಬ ಫೀಲ್ಡರ್ ಬೌಂಡರಿ ಗೆರೆಯ ಹೊರಗಿನಿಂದ ಚೆಂಡನ್ನು ಮುಟ್ಟಿದರೆ ಅದನ್ನು ತಂಡದ ಸಹ ಆಟಗಾರನಿಗೆ ರವಾನಿಸಲು ಸಹ ನಿಯಮ ಜಾರಿಗೆ ಮಾಡಲಾಗಿದೆ. ಇದರ ಪ್ರಕಾರ ಸಹ ಆಟಗಾರ ಚೆಂಡನ್ನು ಹಿಡಿಯುವ ಮೊದಲು ಸಂಪರ್ಕಕ್ಕೆ ಬಂದ ಆಟಗಾರನೂ ಆಟದ ಮೈದಾನದೊಳಗೆ ಹಿಂತಿರುಗಬೇಕು.

ಜೂನ್‌ 11ರಂದು ಆರಂಭವಾಗಲಿರುವ ವಿಶ್ವ ಟೆಸ್ಟ್‌ ಚಾಂಪಿಯನ್‌ ಶಿಪ್‌ ಫೈನಲ್‌ ಪಂದ್ಯಕ್ಕೆ ಸದ್ಯ ಜಾರಿಯಲ್ಲಿರುವ ನಿಯಮಗಳೇ ಅನ್ವಯವಾಗಲಿದೆ. ಆದರೆ, ಎಂಸಿಸಿ ಕಾನೂನುಗಳಲ್ಲಿ ಔಪಚಾರಿಕ ಸಂಯೋಜನೆಯು ಅಕ್ಟೋಬರ್ 2026 ರಲ್ಲಿ ಜಾಗತಿಕ ಕಾನೂನು ಪರಿಷ್ಕರಣೆಗಳ ಸಮಯದಲ್ಲಿ ಅಧಿಕೃತವಾಗಿ ಕಾನೂನುಗಳಲ್ಲಿ ಸೇರಲಿದೆ.