Karun Nairಗೆ ಅವಕಾಶ ಏಕೆ ನೀಡಿಲ್ಲ?: ಬಿಸಿಸಿಐ ವಿರುದ್ಧ ಹರ್ಭಜನ್ ಸಿಂಗ್‌ ಪ್ರಶ್ನೆ!
ವಿಜಯ್ ಹಝಾರೆ ಟ್ರೋಫಿ ಟೂರ್ನಿಯಲ್ಲಿ ಉತ್ತಮ ಬ್ಯಾಟಿಂಗ್‌ ಪ್ರದರ್ಶನ ತೋರಿ ಐದು ಶತಕಗಳನ್ನು ಸಿಡಿಸಿರುವ ವಿದರ್ಭ ತಂಡದ ನಾಯಕ ಕರುಣ್ ನಾಯರ್ ಅವರನ್ನು ಮಾಜಿ ಸ್ಪಿನ್ನರ್‌ ಹರ್ಭಜನ್ ಸಿಂಗ್‌ ಬೆಂಬಲಿಸಿದ್ದಾರೆ.
Ramesh Kote
January 15, 2025
ನವದೆಹಲಿ: ವಿಜಯ್ ಹಝಾರೆ ಟ್ರೋಫಿ 50 ಓವರ್‌ಗಳ ದೇಶಿ ಟೂರ್ನಿಯಲ್ಲಿ ಐದು ಶತಕಗಳು ಸೇರಿದಂತೆ ಪ್ರಸ್ತುತ ಗರಿಷ್ಠ ಸ್ಕೋರರ್‌ ಎನಿಸಿಕೊಂಡಿರುವ ಕರ್ನಾಟಕ ಮೂಲದ ವಿದರ್ಭ ತಂಡದ ನಾಯಕ ಕರುಣ್ ನಾಯರ್ ಪರ ಸ್ಪಿನ್‌ ದಿಗ್ಗಜ ಹರ್ಭಜನ್ ಸಿಂಗ್‌ ಬ್ಯಾಟ್‌ ಬೀಸಿದ್ದಾರೆ. ದೇಶಿ ಕ್ರಿಕೆಟ್‌ನಲ್ಲಿ ಸ್ಥಿರವಾಗಿ ರನ್ ಗಳಿಸಿದರೂ ಕರುಣ್ ನಾಯರ್‌ಗೆ ಭಾರತ ತಂಡದಲ್ಲಿ ಅವಕಾಶ ನೀಡಿಲ್ಲವೆಂದು ಮಾಜಿ ಸ್ಪಿನ್ನರ್‌ ಬಿಸಿಸಿಐ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಪ್ರಸ್ತುತ ನಡೆಯುತ್ತಿರುವ ವಿಜಯ್ ಹಝಾರೆ ಟ್ರೋಫಿ ಟೂರ್ನಿಯಲ್ಲಿ ವಿದರ್ಭ ನಾಯಕ ಕರುಣ್ ನಾಯರ್ ಆಡಿದ್ದ ಆರು ಇನಿಂಗ್ಸ್‌ಗಳಲ್ಲಿ 664 ರನ್‌ಗಳನ್ನು ಕಲೆ ಹಾಕಿದ್ದಾರೆ. ಇದರಲ್ಲಿ ಅವರು 120.07 ಸ್ಟ್ರೈಕ್ ರೇಟ್‌ನೊಂದಿಗೆ ಐದು ಶತಕಗಳನ್ನು ಸಿಡಿಸುವ ಮೂಲಕ ಸದ್ಯ ವೈಯಕ್ತಿಕ ಗರಿಷ್ಠ ಸ್ಕೋರರ್‌ ಎನಿಸಿಕೊಂಡಿದ್ದಾರೆ. ಈ ಆರೂ ಇನಿಂಗ್ಸ್‌ಗಳ ಪೈಕಿ ಅವರು ಕೇವಲ ಒಮ್ಮೆ ಮಾತ್ರ ಔಟ್ ಆಗಿದ್ದರು ಎಂಬುದು ವಿಶೇಷ.
IND vs IRE: 304 ರನ್‌ಗಳಿಂದ ಗೆದ್ದು ಇತಿಹಾಸ ಬರೆದ ಭಾರತ ವನಿತೆಯರು!
ಇಂಗ್ಲೆಂಡ್‌ ವಿರುದ್ಧದ ಏಕದಿನ ಸರಣಿ ಹಾಗೂ 2025ರ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಭಾರತ ತಂಡದ ಆಯ್ಕೆಯ ರೇಸ್‌ನಲ್ಲಿರುವ ಆಟಗಾರರ ಪೈಕಿ ಕರುಣ್ ನಾಯರ್ ಮುಂಚೂಣಿಯಲ್ಲಿದ್ದಾರೆ. ಭಾರತದ ಪರ ತ್ರಿಶತಕ ಸಿಡಿಸಿರುವ ಕನ್ನಡಿಗ, ಇಲ್ಲಿಯತನಕ ಆರು ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದಾರೆ. ಇದೀಗ ಭಾರತ ತಂಡಕ್ಕೆ ಕಮ್‌ಬ್ಯಾಕ್‌ ಮಾಡಲು ಎದುರು ನೋಡುತ್ತಿರುವ ಕರುಣ್ ನಾಯರ್‌ಗೆ ಹರ್ಭಜನ್ ಸಿಂಗ್‌ ಬೆಂಬಲ ವ್ಯಕ್ತಪಡಿಸಿದ್ದಾರೆ.
ಕರುಣ್ ನಾಯರ್ ಪರ ಹರ್ಭಜನ್ ಸಿಂಗ್‌ ಬ್ಯಾಟಿಂಗ್‌
ಹರ್ಭಜನ್ ಆಯ್ಕೆಯ ಮಾನದಂಡಗಳ ಬಗ್ಗೆಯೂ ಪ್ರಶ್ನೆಗಳನ್ನು ಎತ್ತಿದರು. ಕಳಪೆ ಫಾರ್ಮ್‌ನಿಂದಾಗಿ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿಯನ್ನು ರಣಜಿ ಟ್ರೋಫಿ ಆಡಲು ಕೇಳಲಾಗುತ್ತಿದೆ, ಆದರೆ ದೇಶೀಯ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದವರಿಗೆ ಅವಕಾಶ ಸಿಗುತ್ತಿಲ್ಲ ಎಂದು ಅವರು ಆರೋಪ ಮಾಡಿದ್ದಾರೆ.
ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿದ, "ನಾನು ಕರುಣ್ ನಾಯರ್ ಅಂಕಿಅಂಶಗಳನ್ನು ನೋಡುತ್ತಿದ್ದೇನೆ, ಅವರು ಆಡಿದ ಆರು ಇನಿಂಗ್ಸ್‌ಗಳಲ್ಲಿ ಐದರಲ್ಲಿ ಅಜೇಯರಾಗಿ ಉಳಿದಿದ್ದಾರೆ. ಇದರಲ್ಲಿ ಅವರು 120ರ ಸ್ಟ್ರೈಕ್ ರೇಟ್‌ನಲ್ಲಿ 664 ರನ್ ಗಳಿಸಿದ್ದಾರೆ. ಆದರೂ ಅವರನ್ನು ಆಯ್ಕೆ ಮಾಡಲಾಗಿಲ್ಲ. ಹಲವು ಆಟಗಾರರನ್ನು ಕೇವಲ ಎರಡು ಪಂದ್ಯಗಳ ಆಧಾರದ ಮೇಲೆ ಆಯ್ಕೆ ಮಾಡಲಾಗುತ್ತದೆ, ಕೆಲವರನ್ನು ಐಪಿಎಲ್ ಆಧಾರದ ಮೇಲೆ ಮಾತ್ರ ಆಯ್ಕೆ ಮಾಡಲಾಗುತ್ತದೆ. ಅದಕ್ಕಾಗಿ ನಿಯಮಗಳು ಏಕೆ ವಿಭಿನ್ನವಾಗಿವೆ? ರೋಹಿತ್ ಮತ್ತು ವಿರಾಟ್ ಫಾರ್ಮ್‌ನಲ್ಲಿಲ್ಲ ಎಂದು ಜನರು ಹೇಳುತ್ತಾರೆ ಮತ್ತು ನೀವು ಅವರನ್ನು ರಣಜಿಗೆ ಕಳುಹಿಸುತ್ತಿದ್ದೀರಿ. ಆದರೆ ರಣಜಿ ಆಡುತ್ತಾ ರನ್ ಗಳಿಸುತ್ತಿರುವವರನ್ನು ಏಕೆ ಕಡೆಗಣಿಸುತ್ತಿದ್ದೀರಿ? ಈ ಆಟಗಾರರು ಯಾವಾಗ ಆಡುತ್ತಾರೆ?," ಎಂದು ಪ್ರಶ್ನೆ ಮಾಡಿದ್ದಾರೆ.
Champions Trophy ಟೂರ್ನಿಯ ಬಳಿಕ ಗೌತಮ್‌ ಗಂಭೀರ್‌ ಭವಿಷ್ಯ ನಿರ್ಧಾರ!
ಕಳೆದ ವರ್ಷ ನಾಲ್ಕು ಶತಕ ಸಿಡಿಸಿದ್ದ ಕರುಣ್
ಕಳೆದ ವರ್ಷ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಕರುಣ್ ನಾಯರ್‌ಗೆ ಉತ್ತಮವಾಗಿತ್ತು. ಅವರು ನಾಲ್ಕು ಶತಕಗಳು ಮತ್ತು ಏಳು ಅರ್ಧ ಶತಕಗಳನ್ನು ಒಳಗೊಂಡಂತೆ 44.42 ರ ಸರಾಸರಿಯಲ್ಲಿ 1,466 ರನ್ ಗಳಿಸಿದ್ದರು. 202 ರನ್‌ಗಳು ಇವರ ವೈಯಕ್ತಿಕ ಗರಿಷ್ಠ ಸ್ಕೋರ್‌ ಆಗಿದೆ. ಇನ್ನು ಇಂಗ್ಲಿಷ್ ಕೌಂಟಿ ಕ್ರಿಕೆಟ್‌ನಲ್ಲಿ ನಾಯರ್ ನಾರ್ಥ್‌ಹ್ಯಾಮ್ಟನ್‌ಶೈರ್‌ ಪರ ಏಳು ಪಂದ್ಯಗಳಿಂದ 48.70ರ ಸರಾಸರಿಯಲ್ಲಿ 487 ರನ್ ಗಳಿಸಿದ್ದರು. ಇದರಲ್ಲಿ ಒಂದು ಶತಕ ಮತ್ತು ಮೂರು ಅರ್ಧ ಶತಕಗಳು ಸೇರಿವೆ.
"ತ್ರಿ ಶತಕ ಸಿಡಿಸಿದ ಬಳಿಕ ಅವರನ್ನು ಭಾರತ ತಂಡದಿಂದ ಏಕೆ ಕೈಬಿಡಲಾಯಿತು ಎಂದು ನನಗೆ ಅರ್ಥವಾಗಲಿಲ್ಲ. ಅವರಂತಹ ಆಟಗಾರರ ಬಗ್ಗೆ ಯಾರೂ ಮಾತನಾಡುವುದಿಲ್ಲ ಎಂಬ ಬೇಸರವಿದೆ. 2018ರಲ್ಲಿ ಅವರು ತಂಡದೊಂದಿಗೆ ಇಂಗ್ಲೆಂಡ್‌ಗೆ ಪ್ರವಾಸಕ್ಕೆ ತೆರಳಿದ್ದರು. ಆದರೆ ಆಡಲು ಅವಕಾಶ ಸಿಗಲಿಲ್ಲ. ಐದನೇ ಟೆಸ್ಟ್‌ಗೆ ಭಾರತದಿಂದ ಒಬ್ಬ ಆಟಗಾರನನ್ನು ಕರೆಸಿಕೊಳ್ಳಲಾಗಿತ್ತು. ಅವರು ಬಹುಶಃ ಹನುಮ ವಿಹಾರಿ. ಈ ವೇಳೆ ಕರುಣ್ ನಾಯರ್ ಅವರನ್ನು ಕೈ ಬಿಡಲಾಗಿತ್ತು. ಇದಕ್ಕೆ ಕಾರಣವೇನೆಂದು ಗೊತ್ತಿಲ್ಲ," ಎಂದು ಹರ್ಭಜನ್ ಸಿಂಗ್‌ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ.
