Umesh Death: 'ನಮ್ದು ಲವ್ ಮ್ಯಾರೇಜ್, ನಾವ್ಯಾವತ್ತೂ ಜಗಳ ಆಡಿಲ್ಲ'; ಎಂ ಎಸ್ ಉಮೇಶ್‌ರನ್ನು ನೆನೆದು ಬಿಕ್ಕಿ ಬಿಕ್ಕಿ ಅತ್ತ ಪತ್ನಿ ಸುಧಾ
Veteran Actor MS Umesh Death: ಕನ್ನಡ ಚಿತ್ರರಂಗದ ಹಿರಿಯ ಹಾಸ್ಯ ನಟ ಎಂ ಎಸ್ ಉಮೇಶ್ ಅವರ ನಿಧನದಿಂದ ಅವರ ಪತ್ನಿ ಸುಧಾ ತೀವ್ರ ದುಃಖಕ್ಕೆ ಒಳಗಾಗಿದ್ದಾರೆ. 57 ವರ್ಷಗಳ ಅನ್ಯೋನ್ಯ ಜೀವನ ನಡೆಸಿದ ಸುಧಾ, "ನಮ್ಮದು ಲವ್ ಮ್ಯಾರೇಜ್, ಒಂದು ದಿನವೂ ಜಗಳ ಆಡಿಲ್ಲ" ಎಂದು ಪತಿಯನ್ನು ನೆನೆದು ಭಾವುಕರಾಗಿದ್ದಾರೆ.
-
ಕನ್ನಡ ಚಿತ್ರರಂಗದಲ್ಲಿ ಸುದೀರ್ಘ 65 ವರ್ಷಗಳ ಕಾಲ ಸಕ್ರಿಯವಾಗಿದ್ದ ನಟ ಎಂ ಎಸ್ ಉಮೇಶ್ ಅವರು ಭಾನುವಾರ (ನ.30) ಸಾವನ್ನಪ್ಪಿದ್ದಾರೆ. ಲಿವರ್‌ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದ ಅವರನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಅವರು ಇಹಲೋಕ ತ್ಯಜಿಸಿದ್ದಾರೆ. 57 ವರ್ಷಗಳ ಜೊತೆ ಉಮೇಶ್ ಅವರ ಜೊತೆ ಅನ್ಯೋನ್ಯವಾಗಿ ಸಂಸಾರ ಸಾಗಿಸಿದ ಪತ್ನಿ ಸುಧಾ ಅವರು ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ್ದು, ಪತಿಯನ್ನು ನೆನೆದು ಭಾವುಕರಾಗಿದ್ದಾರೆ.
ನಮಗೀಗ ಆಧಾರವಾಗಿ ಯಾರೂ ಇಲ್ಲ
"ನಾವು ಮದುವೆಯಾಗಿ 56-57 ವರ್ಷ ಆಯ್ತು. ನಮ್ಮದು ಲವ್ ಮ್ಯಾರೇಜ್. ಒಂದು ದಿವಸ ನಾವು ಜಗಳವಾಡಿಲ್ಲ. ನಾವಿಬ್ಬರೂ ತುಂಬ ಅನ್ಯೋನ್ಯತೆಯಿ ಇದ್ವಿ. ಅವರು ಇಲ್ಲದೇ ಇರುವುದು ನನಗೆ ಈಗ ಕಷ್ಟವಾಗ್ತಿದೆ. ನನ್ನ ಮಗ ಸತ್ತೋದ. ಇವಾಗ ಒಬ್ಬಳು ಮಗಳು ಇದ್ದಾಳೆ. ನಮಗೆ ಆಧಾರ ಅಂತ ಯಾರೂ ಇಲ್ಲ. ಸಂಬಂಧಿಕರು ಅವರವರ ಪಾಡಿಗೆ ಅವರು ಇರ್ತಾರೆ. ಆದರೆ ನಮ್ಮದು ಅಂತ ಒಂದು ಬೇಕಲ್ಲವೇ?" ಎನ್ನುತ್ತಾರೆ ಸುಧಾ.
ನನಗೂ ಬದುಕುವ ಆಸೆ ಇಲ್ಲ.. ಆದ್ರೆ...
"ಅವರನ್ನು ಆಸ್ಪತ್ರೆಗೆ ಅಡ್ಮಿಟ್‌ ಮಾಡಿದ ದಿನದಿಂದಲೂ ನಾನು ಮನೆಯಲ್ಲಿ ಅಳುತ್ತಿದ್ದೆ. ನನಗೆ ಲೋ ಬಿಪಿ, ನಾನು ಕೂಡ ಹೆಚ್ಚು ನಡೆಯೋದಕ್ಕೆ ಆಗೋದಿಲ್ಲ. ನಮ್ಮ ಕಷ್ಟಗಳನ್ನು ನಾವು ಯಾರೊಂದಿಗೂ ಹಂಚಿಕೊಳ್ಳುತ್ತಿರಲಿಲ್ಲ. ಅಕ್ಕಪಕ್ಕದವರೊಂದಿಗೂ ನಾವು ಏನೂ ಹೇಳಿಕೊಳ್ಳುತ್ತಿರಲಿಲ್ಲ. ನನಗೆ ಇಂದು ತುಂಬಾ ಬೇಜಾರ್‌ ಆಗಿದೆ. ಅವರು ನಿಧನರಾಗಿದ್ದಾರೆ. ನನಗೂ ಬದುಕುವ ಆಸೆ ಇಲ್ಲ. ಆದರೆ ಮಗಳು ದಿಕ್ಕಪಾಲಾಗಿ ಬಿಡ್ತಾಳೆ ಅಲ್ವಾ ಅಂತ ಇದ್ದೀನಿ. ಒಂದು ಸೀರಿಯಲ್‌ ಒಪ್ಪಿಕೊಂಡಿದ್ದರು. ಆದರೆ ಕಾಯಿಲೆ ಅಂತ ಗೊತ್ತಾದ ಮೇಲೆ ಕ್ಯಾನ್ಸಲ್‌ ಮಾಡಿದ್ವಿ" ಎಂದು ಸುಧಾ ಅವರು ಹೇಳಿದ್ದಾರೆ.
ʻನಂಗೇನೂ ಆಗಲ್ಲ.. ನಾನು ಹುಷಾರಾಗ್ತೀನಿʼ ಅಂದಿದ್ರು
"ನಾನು ದುಡಿಬೇಕು ಕಣೇ.. ನಮ್ಮ ಜೀವನಕ್ಕೆ ಬೇಕಲ್ವೇ? ನಾನು ದುಡಿಯೋಕೆ ಹೋಗ್ತಿನಿ ಕಣೇ ಸುಧಾ.. ಅಂತಿದ್ರು.. ನಾನು ಬೇಡ ರೀ.. ಹೋಗ್ಬೇಡಿ ಅಂತಿದ್ದೆ. ಅವರು ಆಸ್ಪತ್ರೆಯಲ್ಲಿ ಇದ್ದಾಗಲೂ, ʻಏನೂ ಆಗಲ್ಲ.. ನಾನು ಹುಷಾರಾಗ್ತೀನಿʼ ಅಂತಿದ್ರು. ಆದ್ರೆ ಅವರಿಗೆ ಗುಣವಾಗಲ್ಲ ಅಂತ ನನ್ನ ಮಗಳಿಗೆ ಮತ್ತು ನನಗೆ ಗೊತ್ತಿತ್ತು. ಆಸ್ಪತ್ರೆಗೆ ಹೋದಾಗಲೇ ಅವರಿಗೆ ಕ್ಯಾನ್ಸರ್‌ ಇದೆ ಗೊತ್ತಾಯ್ತು. ಅದು ದೇಹದ ತುಂಬಾ ಹರಡಿಕೊಂಡಿತ್ತು. ನಮಗೂ ಮೊದಲು ಅದು ಗೊತ್ತಾಗಲಿಲ್ಲ. ಅದನ್ನು ನನ್ನ ಮನಸ್ಸಿನಲ್ಲಿ ಹಾಗೆ ಇಟ್ಟುಕೊಂಡಿದ್ದೆ. ಮುಂದೆ ನನ್ನ ಮತ್ತು ನನ್ನ ಮಗಳ ಜೀವನ ಹೇಗೆ ಅಂತ ಯೋಚನೆ ಮಾಡ್ತಿದ್ದೀನಿ. ಅವರು ಹೊರಟೋದ್ರು. ನಮಗೆ ಯಾರಪ್ಪ ದಿಕ್ಕು? ನಮಗೆ ಗತಿ ಏನು" ಎಂದು ಬೇಸರ ತೋಡಿಕೊಂಡಿದ್ದಾರೆ ಸುಧಾ.
