20 ವರ್ಷದ ಮಗ ರೈಲಿಗೆ ಸಿಲುಕಿ ಸಾವು, ಪುತ್ರನ ಅಗಲಿಕೆಯಿಂದ ನೊಂದಿದ್ದ ಎಂ ಎಸ್ ಉಮೇಶ್; ಪುತ್ರಶೋಕದಲ್ಲೇ ಜೀವನ ಕಳೆದ ಹಿರಿಯ ನಟ
Actor M S Umesh Death: ಕನ್ನಡ ಚಿತ್ರರಂಗದ ಹಿರಿಯ ನಟ ಎಂ ಎಸ್ ಉಮೇಶ್ ನವೆಂಬರ್‌ 30ರಂದು ಬೆಳಗ್ಗೆ ಲಿವರ್ ಕ್ಯಾನ್ಸರ್‌ನಿಂದಾಗಿ ನಿಧನರಾಗಿದ್ದಾರೆ. 15ನೇ ವಯಸ್ಸಿನಲ್ಲಿ ಬಣ್ಣ ಹಚ್ಚಿ 65 ವರ್ಷಗಳ ಕಾಲ ಕನ್ನಡಿಗರನ್ನು ನಗಿಸಿದ್ದ ಉಮೇಶ್, ವೈಯಕ್ತಿಕ ಜೀವನದಲ್ಲಿ ಪುತ್ರಶೋಕದ ನೋವು ಅನುಭವಿಸಿದ್ದರು. ಆ ಕುರಿತ ಮಾಹಿತಿ ಇಲ್ಲಿದೆ.
-
ಕನ್ನಡ ಚಿತ್ರರಂಗ ಕಂಡ ಮಹಾನ್‌ ಕಲಾವಿದ ಎಂ ಎಸ್ ಉಮೇಶ್ (MS Umesh) ಅವರು ನಿಧನರಾಗಿದ್ದಾರೆ. 15ನೇ ವಯಸ್ಸಿನಲ್ಲಿಯೇ ಬಣ್ಣ ಹಚ್ಚಿದ್ದ ಉಮೇಶಣ್ಣ, 65 ವರ್ಷಗಳ ಕಾಲ ಕನ್ನಡ ಸಿನಿಪ್ರಿಯರನ್ನು ನಗಿಸಿದ್ದಾರೆ. ಆದರೆ ನಗಿಸುವವರ ಬದುಕಿನಲ್ಲಿ ಹಲವು ನೋವುಗಳಿರುತ್ತವೆ. ಅಂತೆಯೇ ಉಮೇಶ್ ಅವರ ಬದುಕಿನಲ್ಲೂ ಒಂದು ಹೃದಯಬಿರಿಯುವಂತಹ ನೋವಿತ್ತು. 20 ವರ್ಷದ ಹರೆಯದ ಮಗನ ಸಾವನ್ನು ಕಂಡಿದ್ದ ಉಮೇಶ್, ಜೀವನಪರ್ಯಂತ ಆ ದುಃಖದಲ್ಲೇ ಕಾಲ ಕಳೆದರು.
ರೈಲಿಗೆ ಸಿಲುಕಿ ಸಾವು
ಉಮೇಶ್ ಅವರಿಗೆ ಇಬ್ಬರು ಮಕ್ಕಳು, ಜಯಲಕ್ಷ್ಮೀ ಮತ್ತು ಚಂದ್ರಶೇಖರ್ (Chandrashekhar). ಅಪ್ಪನಂತೆಯೇ ಚಂದ್ರಶೇಖರ್‌ಗೂ ಸಿನಿಮಾ ಕಲಾವಿದ ಆಗಬೇಕು ಎಂಬ ಮಹಾದಾಸೆ ಇತ್ತು. ಡಾ. ರಾಜ್‌ಕುಮಾರ್‌, ವಿಷ್ಣುವರ್ಧನ್‌, ಕಮಲ್‌ ಹಾಸನ್‌ ಎಂದರೆ, ಚಂದ್ರಶೇಖರ್‌ಗೆ ಅಚ್ಚುಮೆಚ್ಚು. ಒಂದಲ್ಲಾ ಒಂದು ದಿನ ಸಿನಿಮಾ ಕಲಾವಿದ ಆಗಬೇಕು ಎಂಬ ಕನಸು ಕಂಡಿದ್ದ ಚಂದ್ರಶೇಖರ್, ಒಂದು ದಿನ ರೈಲಿಗೆ ಸಿಲುಕಿ ಸಾವನ್ನಪ್ಪುತ್ತಾರೆ ಎಂದು, ಯಾರೆಂದರೇ ಯಾರೂ ಊಹಿಸಿರಲಿಲ್ಲ.
Actor Umesh: ಹಾಸ್ಯ ನಟ ಉಮೇಶ್ ಸಿನಿ ಜರ್ನಿ ಹೇಗಿತ್ತು ಗೊತ್ತಾ?
ಕ್ರಿಕೆಟ್‌ ಆಡುವಾಗ ನಡೆದಿದ್ದ ದುರ್ಘಟನೆ
ಒಂದು ಭಾನುವಾರ ಸ್ನೇಹಿತರ ಜೊತೆಗೆ ಚಂದ್ರಶೇಖರ್ ಕ್ರಿಕೆಟ್‌ ಆಡುತ್ತಿದ್ದರು. ಫೀಲ್ಡಿಂಗ್‌ ಮಾಡುತ್ತಿದ್ದ ಚಂದ್ರಶೇಖರ್, ಬಾಲ್‌ ಅನ್ನು ಹಿಡಿಯಲು ಓಡಿದ್ದಾರೆ. ಓಡುತ್ತ ಸೀದಾ ಪಕ್ಕದಲ್ಲೇ ಇದ್ದ ರೈಲ್ವೇ ಟ್ರ್ಯಾಕ್‌ ಮೇಲೆ ಬಂದಿದ್ದಾರೆ. ಆ ಸಮಯಕ್ಕೆ ಸರಿಯಾಗಿ ಬಂದ ರೈಲೊಂದು ಚಂದ್ರಶೇಖರ್‌ಗೆ ಡಿಕ್ಕಿ ಹೊಡೆದಿದೆ. 20ರ ಅಸುಪಾಸಿನಲ್ಲಿದ್ದ ಚಂದ್ರಶೇಖರ್, ದುರಂತ ಸಾವನ್ನಪ್ಪುತ್ತಾರೆ. "ಪುತ್ರ ಶೋಕಂ ನಿರಂತರಂ" (ಮಗನನ್ನು ಕಳೆದುಕೊಂಡ ದುಃಖವು ಶಾಶ್ವತವಾಗಿದೆ) ಅನ್ನೋ ಹಾಗೇ, ಆ ದುರ್ಘಟನೆ ಸಂಭವಿಸಿ, ಹಲವು ವರ್ಷಗಳು ಕಳೆದರೂ, ಉಮೇಶ್ ಅವರಿಗೆ ಮಗನ ಅಗಲಿಕೆಯ ನೋವು ಕಾಡುತ್ತಲೇ ಇತ್ತು.
ಉಮೇಶ್ ಅವರು ತೆರೆಮೆಲೆ ಹಲವು ಕಾಮಿಡಿ ಪಾತ್ರಗಳ ಮೂಲಕ ನಗಿಸಿದ್ದಾರೆ. 80 ವರ್ಷವಾದರೂ, ಅವರಲ್ಲಿನ ನಟನೆ ಮಾಡಬೇಕೆಂಬ ಹುಮ್ಮಸ್ಸು ಕಮ್ಮಿ ಆಗಿರಲಲ್ಲ. ಈಚೆಗಷ್ಟೇ ಅವರು ನಟಿಸಿದ್ದ ಸಿನಿಮಾವೊಂದು ತೆರೆಕಂಡಿತ್ತು. ಮನಸ್ಸಿನೊಳಗೆ ಅಷ್ಟೆಲ್ಲಾ ದುಃಖವನ್ನು ಇರಿಸಿಕೊಂಡಿದ್ದರೂ ಉಮೇಶ್ ಅವರು ಮಾತ್ರ ತೆರೆಮೇಲೆ ಎಲ್ಲರನ್ನು ನಗಿಸುತ್ತಲೇ ಇದ್ದರು. ಇದೀಗ ಆ ಹಿರಿಯ ಜೀವ ಕೂಡ ಇಹಲೋಕ ತ್ಯಜಿಸಿದ್ದು ಕನ್ನಡ ಚಿತ್ರರಂಗ ನಿಜಕ್ಕೂ ಬಡವಾಗಿದೆ.
ಹಿರಿಯ ನಟ ಉಮೇಶ್ ನಿಧನ
ಉಮೇಶ್ ಅವರಿಗೆ ಏನಾಗಿತ್ತು?
ಈಚೆಗೆ ನಟ ಉಮೇಶ್ ಅವರು ಮನೆಯಲ್ಲಿ ಇರುವಾಗಲೇ ಕಾಲುಜಾರಿಬಿದ್ದು ಗಾಯಗೊಂಡಿದ್ದರು. ಹಾಗಾಗಿ, ಅವರನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆ ವೇಳೆ ಪರೀಕ್ಷೆ ಮಾಡಿದಾಗ, ಅವರಿಗೆ ಲಿವರ್ ಕ್ಯಾನ್ಸರ್‌ ಇರುವುದು ಗೊತ್ತಾಗಿತ್ತು. ಕ್ಯಾನ್ಸರ್‌ ಆಗಲೇ 4ನೇ ಹಂತ ತಲುಪಿತ್ತು. ಇದೀಗ ಚಿಕಿತ್ಸೆ ಫಲಕಾರಿಯಾಗದೇ ಅವರು ಸಾವನ್ನಪ್ಪಿದ್ದಾರೆ. 1945ರ ಏಪ್ರಿಲ್‌ 24ರಂದು ಜನಿಸಿದ್ದ ಉಮೇಶ್ ಅವರು 15ನೇ ವಯಸ್ಸಿನಲ್ಲಿ ಚಿತ್ರರಂಗಕ್ಕೆ ಕಾಲಿಟ್ಟಿದ್ದರು. ಸುಮಾರು 65 ವರ್ಷಗಳ ವೃತ್ತಿ ಬದುಕಿನಲ್ಲಿ 350ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ.
