ಮಾಜಿ ಪತ್ನಿ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಿದ ಗಾಯಕ ಕುಮಾರ್ ಸಾನು; 50 ಕೋಟಿ ರುಪಾಯಿ ಪರಿಹಾರ ಕೋರಿ ಅರ್ಜಿ ಸಲ್ಲಿಕೆ

ಮುಂಬೈ, ಡಿ. 18: ಬಾಲಿವುಡ್ (Bollywood) ಹಿನ್ನೆಲೆ ಗಾಯಕ, ಕುಮಾರ್ ಸಾನು (Kumar Sanu) ಎಂದೇ ಜನಪ್ರಿಯರಾಗಿರುವ ಸಾನು ಕುಮಾರ್ ಭಟ್ಟಾಚಾರ್ಜಿ ತಮ್ಮ ಮಾಜಿ ಪತ್ನಿ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಿದ್ದಾರೆ. ತಮ್ಮ ಖ್ಯಾತಿಗೆ ಹಾನಿ ಉಂಟು ಮಾಡಿದ್ದಾರೆ ಎಂದು ಆರೋಪಿಸಿ ಕ್ಷಮೆಯಾಚಿಸಬೇಕು ಮತ್ತು 50 ಕೋಟಿ ರುಪಾಯಿ ಪರಿಹಾರ ನೀಡುವಂತೆ ಕೋರಿದ್ದಾರೆ. ವಕೀಲೆ ಸನಾ ರಯೀಸ್ ಖಾನ್ ಮೂಲಕ ಸಲ್ಲಿಸಲಾದ ಈ ಮೊಕದ್ದಮೆಯಲ್ಲಿ, ಸಾನು ಮತ್ತು ಅವರ ಕುಟುಂಬದ ವಿರುದ್ಧ ಅವಹೇಳನಕಾರಿಯಾದ ಯಾವುದೇ ಹೇಳಿಕೆಗಳು ಅಥವಾ ಪೋಸ್ಟ್‌ಗಳನ್ನು ಮಾಡದಂತೆ ಅವರ ಮಾಜಿ ಪತ್ನಿ ರೀಟಾ ಭಟ್ಟಾಚಾರ್ಯ ಅವರಿಗೆ ಸೂಚಿಸಲಾಗಿದೆ.

ಇದರ ಜತೆಗೆ ಸಾನು ಅವರ ಮಾಜಿ ಪತ್ನಿ ರೀಟಾ, ಮೆಟಾ ಸೇರಿದಂತೆ ಇತರ ಸಾಮಾಜಿಕ ಮಾಧ್ಯಮ ವೇದಿಕೆಗಳು ತಮ್ಮ ಸೈಟ್‌ಗಳಲ್ಲಿ ಈಗಾಗಲೇ ಪ್ರಕಟಿಸಿರುವ ಎಲ್ಲ ಅವಹೇಳನಕಾರಿ ಪೋಸ್ಟ್‌ ತೆಗೆದುಹಾಕುವಂತೆ ನಿರ್ದೇಶನ ನೀಡಲಾಗಿದೆ.

ರೀಟಾ ಭಟ್ಟಾಚಾರ್ಯ ಸಾಮಾಜಿಕ ಮಾಧ್ಯಮ ವೇದಿಕೆಯಾದ ವೈರಲ್ ಭಯಾನಿ ಮತ್ತು ಫಿಲ್ಮ್ ವಿಂಡೋಗೆ ನೀಡಿದ್ದ ಸಂದರ್ಶನದಲ್ಲಿ ಗರ್ಭಿಣಿಯಾಗಿದ್ದಾಗ ತನ್ನೊಂದಿಗೆ ಕುಮಾರ್ ಸಾನು ಕೆಟ್ಟದಾಗಿ ವರ್ತಿಸಿದ್ದರು ಎಂದು ಆರೋಪಿಸಿದ್ದರು. ತನಗೆ ಸರಿಯಾಗಿ ಆಹಾರ ನೀಡುತ್ತಿರಲಿಲ್ಲ. ಅಡುಗೆಮನೆಗೆ ಸೀಮಿತಗೊಳಿಸಿದ್ದರು ಮತ್ತು ವೈದ್ಯಕೀಯ ಆರೈಕೆಯನ್ನೂ ಪಡೆಯಲು ಬಿಟ್ಟಿರಲಿಲ್ಲ ಎಂದು ದೂರಿದ್ದರು.

ನಟಿ ಐಶ್ವರ್ಯ- ಅಭಿಷೇಕ್ ವಿಚ್ಛೇದನ ವದಂತಿ ಬಗ್ಗೆ ಖ್ಯಾತ ನಿರ್ದೇಶಕ ಹೇಳಿದ್ದೇನು?

ಇನ್ನು ಈ ಆರೋಪಗಳನ್ನು ಕುಮಾರ್ ಸಾನು ಹಾಗೂ ಅವರ ಕಾನೂನು ತಂಡವು ತಳ್ಳಿ ಹಾಕಿದೆ. ಇದು ದುರುದ್ದೇಶಪೂರಿತ ಮತ್ತು ಅವರ ಖ್ಯಾತಿಗೆ ಗಂಭೀರ ಹಾನಿಯನ್ನುಂಟು ಮಾಡಿದೆ ಎಂದು ವಾದಿಸಿದೆ. ಬಾಂದ್ರಾ ಕುಟುಂಬ ನ್ಯಾಯಾಲಯದಲ್ಲಿ 2001ರ ವಿಚ್ಛೇದನ ಒಪ್ಪಂದದಲ್ಲಿನ ಸಮ್ಮತಿ ಷರತ್ತನ್ನು ಉಲ್ಲೇಖಿಸಲಾಗಿದೆ. ಅದರಲ್ಲಿ ಇಬ್ಬರೂ ಕೂಡ ಭವಿಷ್ಯದಲ್ಲಿ ಒಬ್ಬರ ಮೇಲೊಬ್ಬರು ಆರೋಪಗಳನ್ನು ಮಾಡಬಾರದು ಎಂದು ಷರತ್ತು ವಿಧಿಸಿದೆ ಎಂದು ವರದಿಯಾಗಿದೆ. ಆದರೆ ರೀಟಾ ಸಂದರ್ಶನದಲ್ಲಿ ಕೆಲವು ಹೇಳಿಕೆಗಳನ್ನು ನೀಡಿರುವುದು ಈ ಷರತ್ತಿನ ಉಲ್ಲಂಘನೆ ಎಂದು ಸಾನು ಆರೋಪಿಸಿದ್ದಾರೆ.

1986ರ ನವೆಂಬರ್ 18ರಂದು ಸಾನು ಹಾಗೂ ರೀಟಾ ವಿವಾಹವಾದರು. ಆದರೆ ಈ ವಿವಾಹವು ಹೆಚ್ಚು ಕಾಲ ಉಳಿಯಲಿಲ್ಲ. 1994ರಲ್ಲಿ ಮದುವೆಯ ಏಳು ವರ್ಷಗಳ ನಂತರ, ಇಬ್ಬರೂ ಬೇರ್ಪಟ್ಟರು. ಏಳು ವರ್ಷಗಳ ನಂತರ ಅಂದರೆ 2001ರಲ್ಲಿ ಬಾಂದ್ರಾ ಕೌಟುಂಬಿಕ ನ್ಯಾಯಾಲಯದಲ್ಲಿ ವಿಚ್ಛೇದನ ಪಡೆದರು. 2001ರ ಫೆಬ್ರವರಿ 16ರಂದು ಸಾನು ಮತ್ತೆ ಎರಡನೇ ಮದುವೆಯಾದರು.

ಇವರಿಬ್ಬರು ಬೇರ್ಪಟ್ಟ 32 ವರ್ಷಗಳ ನಂತರ, ರೀಟಾ ಸಂದರ್ಶನವನ್ನು ನೀಡಿದರು. ಅದು ಸಾನು ಅವರ ಸಹಾನುಭೂತಿ ಗಳಿಸಲು ಮತ್ತು ಅವರ ಮಾನಹಾನಿ ಮಾಡಲು ಸತ್ಯವನ್ನು ಹಂಚಿಕೊಳ್ಳುವ ನೆಪದಲ್ಲಿ ಹೇಳಲಾದ ಹಸಿ ಸುಳ್ಳು ಎಂದು ಆರೋಪಿಸಲಾಗಿದೆ. 2025ರ ಸೆಪ್ಟೆಂಬರ್ 22 ಮತ್ತು 28ರಂದು ರೀಟಾ ಕೆಲವು ಸಾಮಾಜಿಕ ಮಾಧ್ಯಮ ವೇದಿಕೆಗಳಿಗೆ ಸಂದರ್ಶನಗಳನ್ನು ನೀಡಿದರು. ಇದರಲ್ಲಿ ಅವರು ದಶಕಗಳ ಹಿಂದೆ ತಮ್ಮ ನಡುವೆ ಇದ್ದ ಸಮಸ್ಯೆಗಳ ಬಗ್ಗೆ ಮಾತನಾಡಿದ್ದರು. ಮೊಕದ್ದಮೆಯ ಪ್ರಕಾರ ಈ ವಿಡಿಯೊಗಳು ಭಾರಿ ವೈರಲ್ ಆಗಿದ್ದು, ಸುಮಾರು 1.5 ಮಿಲಿಯನ್ ವೀಕ್ಷಣೆಗಳನ್ನು ಗಳಿಸಿದೆ.

ಸಾನು ಕಾನೂನಿನ ಮೂಲಕ ಶೋ-ಕಾಸ್ ನೋಟಿಸ್ ನೀಡಿದ ನಂತರ, ಸಂಬಂಧಪಟ್ಟ ಸಾಮಾಜಿಕ ಮಾಧ್ಯಮ ವೇದಿಕೆಗಳು ವಿಡಿಯೊಗಳನ್ನು ಅಳಿಸಿಹಾಕಿದವು. ಮೆಟಾ ಮತ್ತು ಯೂಟ್ಯೂಬ್‌ಗೆ ನೋಟಿಸ್ ಜಾರಿ ಮಾಡಲಾಗಿದೆ.