ಅಯೋಧ್ಯೆ ರಾಮ ಜನ್ಮಭೂಮಿ ದೇವಾಲಯದಲ್ಲಿ ಚೀನಾದ ಕೃತಕ ಜ್ಯೋತಿ ಅಳವಡಿಕೆ; ಭಾರಿ ಚರ್ಚೆಗೆ ಕಾರಣವಾಯ್ತು ಟ್ರಸ್ಟ್‌ ನಡೆ

ಲಖನೌ, ಏ. 13: ರಾಮ ಜನ್ಮಭೂಮಿ ದೇವಾಲಯದಲ್ಲಿ (Ram Janmabhoomi temple) ಕೃತಕ ಜ್ಯೋತಿಯನ್ನು ಪ್ರತಿಷ್ಠಾಪಿಸಿರುವುದು ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆಗೆ ಗ್ರಾಸವಾಗಿದ್ದು, ಕೆಲವು ಬಳಕೆದಾರರು ಇದನ್ನು ಚೀನೀ ಆಟಿಕೆ (Chinese toy) ಎಂದು ಕರೆದಿದ್ದಾರೆ. ಸ್ಥಳದಲ್ಲಿ ಇರಿಸಲಾಗಿರುವ ಜ್ಯೋತಿಯ ಸ್ವರೂಪವನ್ನು ಪ್ರಶ್ನಿಸಿದ್ದಾರೆ. ಏಪ್ರಿಲ್ 11ರಂದು ಶ್ರೀ ರಾಮ ಜನ್ಮಭೂಮಿ ತೀರ್ಥಕ್ಷೇತ್ರವು ನೀಡಿದ ಅಧಿಕೃತ ಪೋಸ್ಟ್ ಪ್ರಕಾರ, ಶ್ರೀರಾಮನ ವಿಗ್ರಹವನ್ನು ತಾತ್ಕಾಲಿಕವಾಗಿ ಇರಿಸಿದ್ದ ಸ್ಥಳದಲ್ಲಿ ಕೃತಕ ಜ್ಯೋತಿಯನ್ನು ಸ್ಥಾಪಿಸಲಾಗಿದೆ. ಪುರೋಹಿತರು ನಡೆಸಿದ ಧಾರ್ಮಿಕ ಆಚರಣೆಗಳು ಮತ್ತು ವೈದಿಕ ವಿಧಿವಿಧಾನಗಳನ್ನು ಅನುಸರಿಸಿ ಪ್ರತಿಷ್ಠಾಪನೆಯನ್ನು ನಡೆಸಲಾಯಿತು ಎಂದು ಟ್ರಸ್ಟ್ ತಿಳಿಸಿದೆ.

ದೇವಾಲಯದ ನಿರ್ಮಾಣ ಹಂತದಲ್ಲಿ, ವಿಗ್ರಹವನ್ನು ಇದೇ ಸ್ಥಳದಲ್ಲಿ ಇರಿಸಲಾಗಿತ್ತು ಎಂದು ಪೋಸ್ಟ್‌ನಲ್ಲಿ ಉಲ್ಲೇಖಿಸಲಾಗಿದೆ. ಮುಖ್ಯ ಗರ್ಭಗುಡಿ ಪೂರ್ಣಗೊಂಡ ನಂತರ ಮತ್ತು ದೇವರ ಪ್ರತಿಷ್ಠಾಪನೆಯಾದ ನಂತರ, ಆ ಪ್ರದೇಶವನ್ನು ಈಗ ಸಾಂಕೇತಿಕ ಜ್ವಾಲೆಯಿಂದ ಗುರುತಿಸಲಾಗಿದೆ. ಧಾರ್ಮಿಕ ವಿಧಿವಿಧಾನಗಳ ನಂತರ ಅದನ್ನು ಸ್ಥಾಪಿಸಲಾಗಿದೆ.

ಇಲ್ಲಿದೆ ಪೋಸ್ಟ್:

ಈ ಕ್ರಮವು ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಟೀಕೆಗೆ ಗುರಿಯಾಗಿದೆ. ಪವನ್ ಪಾಂಡೆ ಎಂಬ ಎಕ್ಸ್ ಬಳಕೆದಾರ, ಜ್ವಾಲೆಯ ಸತ್ಯಾಸತ್ಯತೆಯನ್ನು ಪ್ರಶ್ನಿಸಿದರು. ಇದು ಸಾಂಪ್ರದಾಯಿಕ ಅಖಂಡ ಜ್ಯೋತಿ (ಶಾಶ್ವತ ಜ್ವಾಲೆ)ಗಿಂತ ಕೃತಕವಾಗಿ ಕಾಣುತ್ತದೆ ಎಂದು ಆರೋಪಿಸಿದರು. ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ ಅವರು, ನಿಜವಾದ, ನಿರಂತರವಾಗಿ ಉರಿಯುತ್ತಿರುವ ಜ್ವಾಲೆಯನ್ನು ನಿರ್ವಹಿಸುವ ದೀರ್ಘಕಾಲದ ಸಂಪ್ರದಾಯವನ್ನು ಕೈಬಿಡಲಾಗಿದೆಯೇ ಎಂದು ಪ್ರಶ್ನಿಸುತ್ತಾ, ದೇವಾಲಯದ ಅಧಿಕಾರಿಗಳನ್ನು ಟೀಕಿಸಿದರು.

ಅಯೋಧ್ಯೆ ರಾಮ ಮಂದಿರದ 15 ಕಿ.ಮೀ. ವ್ಯಾಪ್ತಿಯಲ್ಲಿ ಮಾಂಸಾಹಾರ ನಿಷೇಧ

ಭಾರತದ ಪವಿತ್ರ ಭೂಮಿಯಿಂದ ಶಾಶ್ವತ ಜ್ಯೋತಿಯನ್ನು ಬೆಳಗಿಸುವ ಸಂಪ್ರದಾಯ ಕಳೆದುಹೋಗಿದೆಯೇ? ಈ ಚೀನೀ ಆಟಿಕೆ ಜ್ವಾಲೆಯನ್ನು ಅದರ ಹೆಸರಿನಲ್ಲಿ ಇಲ್ಲಿ ಇರಿಸಲಾಗಿದೆಯೇ? ಎಂದು ಬರೆದಿರುವ ಪೋಸ್ಟ್‌ಗೆ ಹತಾಶೆಯ ಪ್ರತಿಕ್ರಿಯೆಗಳು ಹರಿದು ಬಂದಿವೆ. ದೇವಾಲಯದ ಟ್ರಸ್ಟ್‌ಗೆ ಸಂಬಂಧಿಸಿದ ಚಂಪತ್ ರಾಯ್ ಅವರನ್ನು ಉದ್ದೇಶಿಸಿ ಪವನ್‌ ಪಾಂಡೆ, ಇಂತಹ ದೊಡ್ಡ ಟ್ರಸ್ಟ್‌ಗೆ ನಿಜವಾದ ಜ್ಯೋತಿಯನ್ನು ನಿರ್ವಹಿಸುವುದು ತುಂಬಾ ಕಷ್ಟವೇ? ಎಂದು ಪ್ರಶ್ನಿಸಿದರು.

ಈ ಧಾರ್ಮಿಕ ಸಂಪ್ರದಾಯಗಳು ಮತ್ತು ಅವುಗಳ ಆಧುನಿಕ ವ್ಯಾಖ್ಯಾನಗಳ ಬಗ್ಗೆ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕ ಚರ್ಚೆಯನ್ನು ಹುಟ್ಟುಹಾಕಿದೆ. ದೇವಾಲಯದ ಅಧಿಕಾರಿಗಳು ಈ ಟೀಕೆಗೆ ಸಂಬಂಧಿಸಿದಂತೆ ಇದುವರೆಗೆ ಯಾವುದೇ ವಿವರವಾದ ಪ್ರತಿಕ್ರಿಯೆಯನ್ನು ನೀಡಿಲ್ಲ. ಅವರ ಆರಂಭಿಕ ಹೇಳಿಕೆಯಲ್ಲಿ ಪ್ರತಿಷ್ಠಾಪನೆಯನ್ನು ಧಾರ್ಮಿಕ ಮತ್ತು ಸಾಂಕೇತಿಕ ಕ್ರಿಯೆ ಎಂದು ವಿವರಿಸಲಾಗಿದೆ.