ದೆಹಲಿ, ನ. 29: ದೆಹಲಿ ಕೆಂಪು ಕೋಟೆ ಸಮೀಪ ನಡೆದ ಬಾಂಬ್‌ ಸ್ಫೋಟಕ್ಕೆ (Delhi Blast) ಸಂಬಂಧಿಸಿ ಮಹತ್ವದ ಸಂಗತಿ ಹೊರ ಬಂದಿದೆ. ಬಂಧಿತಳಾಗಿರುವ ಪ್ರಕರಣದ ಆರೋಪಿ ಶಾಹೀನ್ ಸಯೀದ್ (Shaheen Saeed) ಕುರಿತಾದ ಮತ್ತಷ್ಟು ರಹಸ್ಯ ಹೊರ ಬಿದ್ದಿದೆ. 2 ಬಾರಿ ಮದುವೆ ಮುರಿದು ಬಿದ್ದ ಆಕೆ ಕೊನೆಗೆ ಕೈ ಹಿಡಿದದ್ದು ಭಯೋತ್ಪಾದಕ ಡಾ. ಮುಜಮ್ಮಿಲ್ ಶಕೀಲ್‌ನನ್ನು. ಬಳಿಕ ಆಕೆಯೂ ನಿಧಾನವಾಗಿ ಭಯೋತ್ಪಾದಕ ಜಾಲದ ಭಾಗವಾದಳು ಎಂದು ಮೂಲಗಳು ತಿಳಿಸಿವೆ. ಇಲ್ಲಿದೆ ದೆಹಲಿ ಸ್ಫೋಟದ ಪ್ರಮುಖ ರೂವಾರಿ 46 ವರ್ಷದ ಶಾಹೀನ್ ಸಯೀದ್‌ನ ಕರಾಳ ಮುಖದ ಪರಿಚಯ.
ದೆಹಲಿ ಸ್ಫೋಟದ ನಂತರ ವೈದ್ಯ ಪರವಾನಗಿ ಕಳೆದುಕೊಂಡ ಶಾಹೀನ್ ಸಯೀದ್ ಮತ್ತು ಮುಜಮ್ಮಿಲ್ ಶಕೀಲ್ 2023ರ ಸೆಪ್ಟೆಂಬರ್‌ನಲ್ಲಿ ವಿವಾಹವಾದರು. ಮೂಲಗಳ ಪ್ರಕಾರ ಮುಜಮ್ಮಿಲ್ ಶಕೀಲ್‌ನ ಸಹವಾಸದ ಬಳಿಕ ಶಾಹೀನ್ ಭಯೋತ್ಪಾದನೆಯ ಕರಾಳ ಜಗತ್ತಿಗೆ ಕಾಲಿಟ್ಟಳು.
ಲಖನೌನಿಂದ ದೆಹಲಿ
ಉತ್ತರ ಪ್ರದೇಶದ ಲಖನೌನ ದಾಲಿಗಂಜ್‌ ಮೂಲದ ಶಾಹೀನ್ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿದ್ದಳು. ಅಲಹಾಬಾದ್‌ನಲ್ಲಿ ಎಂಬಿಬಿಎಸ್‌ ಪೂರೈಸಿದ ಆಕೆ ಫಾರ್ಮಾಕಾಲಜಿಯಲ್ಲಿ ಪರಿಣತಿ ಪಡೆದಿದ್ದಳು. ಸಯೀದ್ ತಂದೆ ಸೈಯದ್ ಅಹ್ಮದ್ ಅನ್ಸಾರಿ ಸರ್ಕಾರಿ ಉದ್ಯೋಗಿ. ಮೂಲತಃ ಇವರದ್ದು ಗೌರವಾನ್ವಿತ ಕುಟುಂಬ ಎನಿಸಿಕೊಂಡಿತ್ತು. ಸಯೀದ್ 2003ರಲ್ಲಿ ನೇತ್ರ ಶಾಸ್ತ್ರಜ್ಞ ಡಾ. ಜಾಫರ್ ಹಯಾತ್‌ನನ್ನು ವಿವಾಹವಾದಳು. ದಂಪತಿಗೆ ಇಬ್ಬರು ಮಕ್ಕಳಿದ್ದರು. ಆದರೆ ಆ ಸಂಬಂಧ ಹೆಚ್ಚು ಕಾಲ ಉಳಿಯಲಿಲ್ಲ.
2012ರ ಅಂತ್ಯದಲ್ಲಿ ಇವರಿಬ್ಬರು ದೂರವಾದರು. ʼʼನಮ್ಮ ನಡುವೆ ಯಾವುದೇ ವಿವಾದ ಅಥವಾ ಜಗಳ ಇರಲಿಲ್ಲ. ಆಕೆ ಇಂತಹ ಚಟುವಟಿಕೆಗಳಲ್ಲಿ ಭಾಗಿಯಾಗಬಹುದೆಂಬ ಕಲ್ಪನೆಯೂ ನನಗಿರಲಿಲ್ಲʼʼ ಎಂದು ಡಾ. ಜಾಫರ್ ಹಯಾತ್‌ ಇತ್ತೀಚೆಗೆ ತಿಳಿಸಿದ್ದರು. ಸಯೀದ್ ತಮ್ಮ ಮದುವೆಯ ದಿನ ಹೊರತುಪಡಿಸಿ ಎಂದಿಗೂ ಬುರ್ಖಾ ಧರಿಸಿರಲಿಲ್ಲ ಎಂದು ಹೇಳಿದ್ದರು.
ಡಾ. ಶಾಹೀನ್ ಹೆಂಡತಿ ಎಂದ ದೆಹಲಿ ಸ್ಫೋಟದ ಆರೋಪಿ ಮುಝಮ್ಮಿಲ್!
"ಒಮ್ಮೆ ಅವಳು ಉತ್ತಮ ಸಂಬಳ ಮತ್ತು ಜೀವನದ ಗುಣಮಟ್ಟಕ್ಕಾಗಿ ಆಸ್ಟ್ರೇಲಿಯಾ ಅಥವಾ ಯುರೋಪಿನಲ್ಲಿ ನೆಲೆಸಬೇಕೆಂದು ಸೂಚಿಸಿದ್ದಳು. ಆದರೆ ನಾವು ಈಗಾಗಲೇ ಇಲ್ಲಿ ಉತ್ತಮ ಜೀವನವನ್ನು ನಡೆಸುತ್ತಿದ್ದೇವೆ, ಉತ್ತಮ ಉದ್ಯೋಗ ಹೊಂದಿದ್ದೇವೆ ಎಂದು ನಾನು ವಿದೇಶಕ್ಕೆ ತೆರಳುವುದನ್ನು ನಿರಾಕರಿಸಿದ್ದೆ. ನಮ್ಮ ಸಂಬಂಧಿಕರು ಎಲ್ಲರೂ ಇಲ್ಲಿದ್ದಾರೆ ಎಂದಿದ್ದೆ. ಇದೇ ಕಾರಣಕ್ಕೆ ವಿಚ್ಛೇದನ ನಡೆಯಿತುʼʼ ಎಂದು ತಿಳಿಸಿದ್ದರು.
ಮತ್ತೆ ಮದುವೆಯಾದ ಸಯೀದ್
ಈ ವಿಚ್ಛೇದನವು ಸಯೀದ್‌ಗೆ ದೊಡ್ಡ ಹೊಡೆತ ನೀಡಿತು. ಇದೇ ಕಾರಣಕ್ಕೆ ಉತ್ತರ ಪ್ರದೇಶದ ಕಾನ್ಪುರದ ಜಿಎಸ್‌ವಿಎಂ ವೈದ್ಯಕೀಯ ಕಾಲೇಜಿಗೆ ಇದ್ದಕ್ಕಿಂತ ರಾಜೀನಾಮೆ ನೀಡಿದಳು. ಬಳಿಕ 2021ರಲ್ಲಿ ಗಾಜಿಯಾಬಾದ್‌ನಲ್ಲಿ ಜವಳಿ ವ್ಯಾಪಾರ ನಡೆಸುತ್ತಿದ್ದ ವ್ಯಕ್ತಿಯನ್ನು ಮರುಮದುವೆಯಾಳು. ಆದರೆ ಈ ಮದುವೆಯೂ ಹೆಚ್ಚು ಕಾಲ ಉಳಿಯಲಿಲ್ಲ.
ಶಾಹಿನ್ ವಿದೇಶಕ್ಕೆ ತೆರಳಲು ಬಯಸಿದ್ದಳು; ರಹಸ್ಯ ಬಹಿರಂಗಪಡಿಸಿದ ಮಾಜಿ ಪತಿ
ಮುಜಮ್ಮಿಲ್ ಸಯೀದ್ ಜೀವನಕ್ಕೆ ಪ್ರವೇಶ
ಹರಿಯಾಣದ ಫರಿದಾಬಾದ್‌ನ ಅಲ್-ಫಲಾಹ್ ವಿಶ್ವವಿದ್ಯಾಲಯದಲ್ಲಿ ಕೆಲಸ ಮಾಡುತ್ತಿದ್ದ ಸಯೀದ್ ಬಾಳಿಗೆ ಬಳಿಕ ಬಂದಿದ್ದೇ ಕಾಶ್ಮೀರಿ ವೈದ್ಯ ಮುಜಮ್ಮಿಲ್ ಶಕೀಲ್. ಕಾಲೇಜಿನಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದರಿಂದ ಅವರ ಮಧ್ಯೆ ಬಾಂದವ್ಯ ಬೆಸೆಯಿತು. ಶಕೀಲ್ ಮತ್ತು ಸಯೀದ್ 2023ರ ಸೆಪ್ಟೆಂಬರ್‌ನಲ್ಲಿ ಅಲ್-ಫಲಾಹ್ ವಿಶ್ವವಿದ್ಯಾಲಯದ ಬಳಿಯ ಮಸೀದಿಯಲ್ಲಿ ವಿವಾಹವಾದರು. ಬಳಿಕ ಸಯೀದ್ ಜೈಶ್-ಎ-ಮೊಹಮ್ಮದ್ ಉಗ್ರ ಸಂಘಟನೆಯೆ ಭಾಗವಾದಳು. ಆಕೆ ತನ್ನ ವೈದ್ಯಕೀಯ ಗುರುತನ್ನು ಬಳಸಿಕೊಂಡು ಜಮ್ಮು ಮತ್ತು ಕಾಶ್ಮೀರ, ದೆಹಲಿ-ಎನ್‌ಸಿಆರ್ ಮತ್ತು ಹರಿಯಾಣ ನಡುವೆ ಪ್ರಯಾಣಿಸಿ ಉಗ್ರ ವಾದವನ್ನು ಹರಡಲು ಆರಂಭಿಸಿದಳು. ಪಾಕಿಸ್ತಾನದ ಉಗ್ರ ಸಂಘಟನೆಯ ಸ್ಥಾಪಕ ಮಸೂದ್ ಅಜರ್ ಸಹೋದರಿ ಸಾದಿಯಾ ಅಜರ್ ನೇತೃತ್ವದ ಜಮಾತ್ ಉಲ್-ಮೊಮಿನಾತ್‌ನ ಭಾರತೀಯ ಶಾಖೆಯ ಉಸ್ತುವಾರಿಯನ್ನು ಸಯೀದ್‌ಗೆ ವಹಿಸಲಾಗಿತ್ತು ಎಂದು ಹೇಳಲಾಗಿದೆ. ಸದ್ಯ ಆಕೆಯ ವಿಚಾರಣೆ ನಡೆಯುತ್ತಿದೆ.