ಡಾಬರ್‌ಗೆ ಶಾಕ್‌ ನೀಡಿದ ಫೆಸ್ಸಿ; 100% ಪ್ಯೂರ್‌ ಲೇಬಲ್‌ ಇರುವ ಆಹಾರ ಮಾರಾಟ ನಿಷೇಧ

ಬೆಂಗಳೂರು: ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (FSSAI), ಡಾಬರ್ ಇಂಡಿಯಾ (Dabur India) 'ಶೇಕಡಾ 100' ಹಕ್ಕುಗಳನ್ನು ಹೊಂದಿರುವ ಹಲವಾರು ಆಹಾರ ಉತ್ಪನ್ನಗಳನ್ನು ಮಾರಾಟ ಮಾಡುವುದನ್ನು ನಿಷೇಧಿಸಿದೆ. ಇಂತಹ ಲೇಬಲ್‌ಗಳು ಗ್ರಾಹಕರನ್ನು ದಾರಿ ತಪ್ಪಿಸಬಹುದು ಫೆಸ್ಸಿ ಅಭಿಪ್ರಾಯ ಪಟ್ಟಿದೆ. ಜೇನುತುಪ್ಪ, ಆಪಲ್ ಸೈಡರ್ ವಿನೆಗರ್, ವರ್ಜಿನ್ ತೆಂಗಿನ ಎಣ್ಣೆ, ಎಳ್ಳೆಣ್ಣೆ, ಹಸುವಿನ ತುಪ್ಪ, ತೆಂಗಿನ ನೀರು ಮತ್ತು ತೆಂಗಿನ ಹಾಲು ಸೇರಿದಂತೆ ದಾರಿತಪ್ಪಿಸುವ 'ಶೇಕಡಾ 100' ಹಕ್ಕುಗಳನ್ನು ಹೊಂದಿರುವ ಉತ್ಪನ್ನಗಳ ಮಾರಾಟಕ್ಕಾಗಿ ಡಾಬರ್ ಇಂಡಿಯಾ ಲಿಮಿಟೆಡ್ ವಿರುದ್ಧ ನಿಷೇಧ ಆದೇಶವನ್ನು ಹೊರಡಿಸಲಾಗಿದೆ ಎಂದು ಫೆಸ್ಸಿ ತಿಳಿಸಿದೆ.

"ಶೇಕಡಾ 100 ಶುದ್ಧತೆ" ಎಂಬ ಹೇಳಿಕೆಯೊಂದಿಗೆ ಮಾರಾಟ ಮಾಡಲಾದ ಡಾಬರ್ ಹೋಮ್ಮೇಡ್ ತೆಂಗಿನ ಹಾಲು ಸಹ ಪಟ್ಟಿಯಲ್ಲಿ ಸೇರಿಸಲಾಗಿದೆ. ಶೇಕಡಾ 100' ಎಂಬ ತಪ್ಪುದಾರಿಗೆಳೆಯುವ ಹಕ್ಕುಗಳನ್ನು ನಿಲ್ಲಿಸುವಂತೆ ನಿರ್ದೇಶಿಸುವ ಸೂಚನೆಯನ್ನು ಡಾಬರ್‌ಗೆ ಈ ಹಿಂದೆ ನೀಡಲಾಗಿತ್ತು, ಆದರೆ ಯಾವುದೇ ತೃಪ್ತಿದಾಯಕ ಸರಿಪಡಿಸುವ ಕ್ರಮ ತೆಗೆದುಕೊಳ್ಳಲಾಗಿಲ್ಲ ಎಂದು ನಿಯಂತ್ರಕರು ತಿಳಿಸಿದ್ದಾರೆ.

ತಪ್ಪುದಾರಿಗೆಳೆಯುವ '100%' ಹೇಳಿಕೆಗಳನ್ನು ಹೊಂದಿರುವ ಎಲ್ಲಾ ಇತರ ಆಹಾರ ಉತ್ಪನ್ನಗಳ ಜೊತೆಗೆ, ನೋಟಿಸ್‌ನಲ್ಲಿ ಗುರುತಿಸಲಾದ ಆಹಾರ ಉತ್ಪನ್ನಗಳ ಮಾರಾಟವನ್ನು ತಕ್ಷಣವೇ ನಿಲ್ಲಿಸುವಂತೆ FSSAI ಈಗ ಡಾಬರ್‌ಗೆ ನಿರ್ದೇಶನ ನೀಡಿದೆ. ಕಂಪನಿಯು 15 ದಿನಗಳಲ್ಲಿ ತೆಗೆದುಕೊಂಡ ಕ್ರಮದ ವರದಿಯನ್ನು ಸಲ್ಲಿಸುವಂತೆಯೂ ಕೇಳಲಾಗಿದೆ. ಸಂಸ್ಕರಿಸಿದ ಆಹಾರಗಳಲ್ಲಿ ಶೇ. 100 ರಷ್ಟು ಶುದ್ಧತೆಯನ್ನು ಖಾತರಿಪಡಿಸುವುದು ಪ್ರಾಯೋಗಿಕವಾಗಿ ಅಸಾಧ್ಯ. ಇಂತಹ ಪದಗಳು ಗ್ರಾಹಕರ ಹಾದಿ ತಪ್ಪಿಸುತ್ತವೆ ಮತ್ತು ಮಾರುಕಟ್ಟೆಯಲ್ಲಿ ಇತರ ಬ್ರ್ಯಾಂಡ್‌ಗಳ ಬಗ್ಗೆ ತಪ್ಪು ಕಲ್ಪನೆ ಮೂಡಿಸುತ್ತವೆ ಎಂದು FSSAI ತಿಳಿಸಿದೆ.

ಪ್ರತಿಯೊಂದು ಪ್ಯಾಕೇಜ್ಡ್ ಆಹಾರದ ಮೇಲೂ ಪ್ರತಿ 100 ಗ್ರಾಂ ಅಥವಾ 100 ಮಿಲಿ ಲೀಟರ್‌ಗೆ ಸಿಗುವ ಒಟ್ಟು ಕ್ಯಾಲೊರಿ (ಶಕ್ತಿ), ಸ್ಯಾಚುರೇಟೆಡ್ ಫ್ಯಾಟ್, ಟ್ರಾನ್ಸ್ ಫ್ಯಾಟ್, ಕೊಲೆಸ್ಟ್ರಾಲ್, ಸೋಡಿಯಂ, ಕಾರ್ಬೋಹೈಡ್ರೇಟ್ ಮತ್ತು ಪ್ರೊಟೀನ್ ವಿವರಗಳನ್ನು ಕಡ್ಡಾಯವಾಗಿ ನೀಡಬೇಕು. ಆಹಾರ ಪದಾರ್ಥದಲ್ಲಿರುವ ಒಟ್ಟು ಸಕ್ಕರೆ, ಉಪ್ಪು (ಸೋಡಿಯಂ) ಅಥವಾ ಸ್ಯಾಚುರೇಟೆಡ್ ಫ್ಯಾಟ್ ಪ್ರಮಾಣವು ನಿಗದಿಪಡಿಸಿದ ದೈನಂದಿನ ಮಿತಿಗಿಂತ (RDA) ಹೆಚ್ಚಿದ್ದರೆ, ಆ ಪೌಷ್ಟಿಕಾಂಶದ ವಿವರವನ್ನು ಕೆಂಪು ಬಣ್ಣದಲ್ಲಿ ಹೈಲೈಟ್ ಮಾಡಬೇಕು ಎಂದು ಫೆಸ್ಸಿ ತಿಳಿಸಿದೆ.

ORS Label Ban: ಹಣ್ಣಿನ ಪಾನೀಯದ ಮೇಲೆ ಒಆರ್‌ಎಸ್‌ ಲೇಬಲ್ ಬಳಕೆ ನಿಷೇಧ; FSSAI ಮಹತ್ವದ ಆದೇಶ

ಡಾಬರ್ ಹೇಳಿದ್ದೇನು?

ಡಾಬರ್ ಸಂಸ್ಥೆಯು FSSAI ಸೂಚನೆಯನ್ನು ಸ್ವೀಕರಿಸಿದ್ದು, ನಿಯಂತ್ರಕರು ಉಲ್ಲೇಖಿಸಿರುವ ವಿಷಯವನ್ನು ಪರಿಶೀಲಿಸುತ್ತಿದೆ ಎಂದು ಹೇಳಿದೆ. "ನಾವು FSSAI ಸೂಚನೆಯನ್ನು ಸ್ವೀಕರಿಸಿದ್ದೇವೆ ಮತ್ತು ನಮ್ಮ ವೆಬ್‌ಸೈಟ್‌ನಲ್ಲಿ ಸೂಚನೆಯಲ್ಲಿ ಉಲ್ಲೇಖಿಸಲಾದ ವಿಷಯವನ್ನು ಪರಿಶೀಲಿಸುವ ಪ್ರಕ್ರಿಯೆಯಲ್ಲಿದ್ದೇವೆ" ಎಂದು ಡಾಬರ್‌ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.