ಲಖನೌ: ಕರ್ವಾ ಚೌತ್‌ಗೆ ವಸ್ತುಗಳನ್ನು ಖರೀದಿಸಲು ಹೋಗುತ್ತಿದ್ದ ದಂಪತಿಗಳಿಗೆ ಭೀಕರ ರಸ್ತೆ ಅಪಘಾತ (Accident) ಸಂಭವಿಸಿದೆ. ಈ ಅಪಘಾತದಲ್ಲಿ 35 ವರ್ಷದ ಮಹಿಳೆ ಸ್ಥಳದಲ್ಲೇ ದುರ್ಮರಣಗೊಂಡಿದ್ದಾರೆ. ಅಪಘಾತವು ಎಷ್ಟು ಭೀಕರವಾಗಿತ್ತು ಎಂದರೆ ಆಕೆಯ ಹೃದಯವು (heart) ಎದೆಯಿಂದ ಹೊರಬಂದಿದೆ. ಈ ದೃಶ್ಯವನ್ನು ನೋಡಿ ಪ್ರತ್ಯಕ್ಷದರ್ಶಿಗಳು ನಡುಗಿ ಹೋಗಿದ್ದಾರೆ. ಉತ್ತರ ಪ್ರದೇಶದ (Uttar Pradesh) ಹಾಪುರದಲ್ಲಿ ಬುಧವಾರ ಈ ದುರಂತ ಸಂಭವಿಸಿದೆ,
ವರದಿಯ ಪ್ರಕಾರ, ದಂಪತಿಯನ್ನು ಅನುರಾಧ ಮತ್ತು ಅವರ ಪತಿ ಹರಿಓಮ್ ಎಂದು ಗುರುತಿಸಲಾಗಿದೆ. ಹಾಪುರ್ ಜಿಲ್ಲೆಯ ಹಫೀಜ್‌ಪುರ ಪೊಲೀಸ್ ಠಾಣೆ ವ್ಯಾಪ್ತಿಗೆ ಬರುವ ಭಾಟಿಯಾನಾ ಗ್ರಾಮದ ನಿವಾಸಿಗಳಾಗಿದ್ದು, ದುರ್ಘಟನೆ ನಡೆದಾಗ ಅವರು ಧೌಲಾನಾ-ಗುಲಾವತಿ ರಸ್ತೆಯಲ್ಲಿ ತಮ್ಮ ಬೈಕ್‌ನಲ್ಲಿ ಹೋಗುತ್ತಿದ್ದರು.
ಹರಿಓಂ ಮತ್ತು ಅನುರಾಧಾ ಗುಲಾವತಿ ಮಾರುಕಟ್ಟೆಗೆ ತೆರಳುತ್ತಿದ್ದಾಗ ಕಪೂರ್‌ಪುರ ಪ್ರದೇಶದ ಮಧ್ಯ ಗಂಗಾ ಕಾಲುವೆಯ ಬಳಿಯ ಸೇತುವೆಯ ಮೇಲೆ ಹೋಗುತ್ತಿದ್ದರು. ಅದೇ ಸಮಯದಲ್ಲಿ, ವಿರುದ್ಧ ದಿಕ್ಕಿನಿಂದ ಬರುತ್ತಿದ್ದ ಟ್ರಕ್ ರಸ್ತೆಯಲ್ಲಿನ ಗುಂಡಿಯನ್ನು ತಪ್ಪಿಸಲು ಮುಂದಾಯಿತು. ಈ ವೇಳೆ ನಿಯಂತ್ರಣ ತಪ್ಪಿದ ಟ್ರಕ್ ಎದುರಿನಿಂದ ಬರುತ್ತಿದ್ದ ದಂಪತಿಯ ಬೈಕ್‌ಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿ ಹೊಡೆದ ರಭಸಕ್ಕೆ ದಂಪತಿ ರಸ್ತೆಗೆ ಬಿದ್ದಿದ್ದಾರೆ.
ಈ ಅಪಘಾತವು ಎಷ್ಟು ಭೀಕರವಾಗಿತ್ತೆಂದರೆ, ಅನುರಾಧಾಳ ದೇಹವು ತೀವ್ರವಾಗಿ ಛಿದ್ರವಾಯಿತು. ಅತ್ಯಂತ ಭಯಾನಕ ಘಟನೆಯಲ್ಲಿ, ಅವಳ ಹೃದಯವು ಅವಳ ಎದೆಯ ಹೊರಗೆ ಕಾಣಿಸಿಕೊಂಡಿತು. ಅದು ಸ್ವಲ್ಪ ಸಮಯದವರೆಗೆ ಬಡಿಯುತ್ತಲೇ ಇತ್ತು. ಬಹಳ ಗಂಭೀರವಾಗಿ ಗಾಯಗೊಂಡ ಹರಿಓಮ್ ಕೂಡ ತನ್ನ ಹೆಂಡತಿ ಸಾಯುವುದನ್ನು ನೋಡುತ್ತಾ ನೋವಿನಿಂದ ಕಿರುಚಿದ್ದಾರೆ. ಗ್ರಾಮಸ್ಥರು ಈ ದೃಶ್ಯವನ್ನು ನೋಡಿ ಭೀತಿಗೊಂಡರು.
ಇದನ್ನೂ ಓದಿ: Viral Video: ಸ್ಟ್ರೀಟ್‌ ಫುಡ್‌ ಪ್ರಿಯರೇ ಎಚ್ಚರ...ಎಚ್ಚರ! ಈ ವಿಡಿಯೊ ನೋಡಿದ್ರೆ ಶಾಕ್‌ ಆಗ್ತೀರಾ
ಕೂಡಲೇ ಗ್ರಾಮಸ್ಥರು ಮತ್ತು ದಾರಿಹೋಕರು ಸ್ಥಳಕ್ಕೆ ಧಾವಿಸಿ ಗಾಯಗೊಂಡ ದಂಪತಿಯನ್ನು ರಸ್ತೆಬದಿಯಲ್ಲಿ ಸ್ಥಳಾಂತರಿಸಿ ತಕ್ಷಣ ಪೊಲೀಸರಿಗೆ ಕರೆ ಮಾಡಿದರು. ಕೆಲವು ಸ್ಥಳೀಯರು ಟ್ರಕ್ ಚಾಲಕನನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದರು. ಅನುರಾಧಾಳ ಶವವನ್ನು ವಶಕ್ಕೆ ತೆಗೆದುಕೊಂಡು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಯಿತು. ಇದು ಅವರ ಕುಟುಂಬದವರನ್ನು ಕೆರಳಿಸಿತು. ಏಕೆಂದರೆ ಅವರಿಗೆ ಮೊದಲೇ ತಿಳಿಸಿರಲಿಲ್ಲ ಎಂದು ಅವರು ಆರೋಪಿಸಿದ್ದಾರೆ.
ಮುಖ್ಯ ಅಧಿಕಾರಿ ಅನಿತಾ ಚೌಹಾಣ್ ಮತ್ತು ಇತರ ಅಧಿಕಾರಿಗಳು ಮಧ್ಯಪ್ರವೇಶಿಸಿದ ನಂತರ ಉದ್ವಿಗ್ನತೆ ಕಡಿಮೆಯಾಯಿತು. ವರದಿಯ ಪ್ರಕಾರ, ಟ್ರಕ್ ಚಾಲಕನ ವಿರುದ್ಧ ಪ್ರಥಮ ಮಾಹಿತಿ ವರದಿ (ಎಫ್‌ಐಆರ್) ದಾಖಲಿಸಲಾಗಿದೆ ಎಂದು ಸಿಒ ಚೌಹಾಣ್ ಹೇಳಿದರು. ಅಪಘಾತದ ಬಗ್ಗೆ ಸಂಪೂರ್ಣ ತನಿಖೆ ನಡೆಸುವುದಾಗಿ ಭರವಸೆ ನೀಡಿದರು. ಅನುರಾಧ ಅವರು ಸ್ಥಳದಲ್ಲೇ ಮೃತಪಟ್ಟರೆ, ಅವರ ಪತಿ ಹರಿಓಮ್ ಆಸ್ಪತ್ರೆಗೆ ದಾಖಲಾಗಿದ್ದು, ಸಾವು ಬದುಕಿನ ನಡುವೆ ಹೋರಾಡುತ್ತಿದ್ದಾರೆ. ಅವರ ಇಬ್ಬರು ಪುತ್ರರಾದ ಆಯುಷ್ ಮತ್ತು ಆರವ್ ತಮ್ಮ ತಂದೆ-ತಾಯಿಯ ಸ್ಥಿತಿಯನ್ನು ನೋಡಿ ರೋಧಿಸುತ್ತಿದ್ದಾರೆ.
ಅಂದಹಾಗೆ, ಧೌಲಾನಾ-ಗುಲಾವತಿ ರಸ್ತೆಯು ವರ್ಷಗಳಿಂದ ಹೊಂಡಗಳು ಮತ್ತು ಕಳಪೆ ಸ್ಥಿತಿಯಲ್ಲಿದೆ ಎಂದು ಸ್ಥಳೀಯ ನಿವಾಸಿಗಳು ದೂರಿದ್ದಾರೆ. ಹೊಂಡ-ಗುಂಡಿಯ ರಸ್ತೆಯಿಂದ ಈ ಹಿಂದೆಯೂ ಹಲವಾರು ಅಪಘಾತಗಳಿಗೆ ಕಾರಣವಾಗಿವೆ. ರಸ್ತೆಯನ್ನು ಸರಿಪಡಿಸುವಂತೆ ಎಷ್ಟೇ ಮನವಿ ಮಾಡಿದರೂ, ಯಾವುದೇ ದುರಸ್ತಿ ಕಾರ್ಯವನ್ನು ಕೈಗೊಳ್ಳಲಾಗಿಲ್ಲ ಎಂದು ಸ್ಥಳೀಯರು ಬೇಸರ ವ್ಯಕ್ತಪಡಿಸಿದ್ದಾರೆ.