ಕಾಂಗ್ರೆಸ್‌ ಮಹಿಳಾ ಸಂಸದೆಯರಿಂದ ಪ್ರಧಾನಿ ಮೇಲೆ ಅಟ್ಯಾಕ್‌ಗೆ ನಡೆದಿತ್ತಾ ತಯಾರಿ? ಶಾಕಿಂಗ್‌ ವಿಡಿಯೋ ಹಂಚಿಕೊಂಡ ಕೇಂದ್ರ ಸಚಿವ

ನವದೆಹಲಿ: ಲೋಕಸಭೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ಭಾಷಣ ಮಾಡಬೇಕಿದ್ದ ದಿನ ನಡೆದ ಗದ್ದಲದ ದೃಶ್ಯಗಳನ್ನು ಸಂಸದೀಯ ವ್ಯವಹಾರಗಳ ಸಚಿವ ಕಿರೆನ್ ರಿಜಿಜು (Kiren Rijiju) ಮಂಗಳವಾರ ಹಂಚಿಕೊಂಡಿದ್ದಾರೆ. ಈ ವೇಳೆ, ಬಿಜೆಪಿ(BJP) ಮಹಿಳಾ ಸಂಸದರು ಲೋಕಸಭಾಧ್ಯಕ್ಷ ಓಂ ಬಿರ್ಲಾ (Om Birla) ಅವರಿಗೆ ಸಲ್ಲಿಸಿದ ದೂರನ್ನು ರಿಜಿಜು ಬೆಂಬಲಿಸಿದ್ದು, ಕಾಂಗ್ರೆಸ್ (Congress) ಸಂಸದರು ಸಂಸತ್ತಿನ ಮಿತಿಗಳನ್ನು ಮೀರಿ ವರ್ತಿಸಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ.

ಈ ಕುರಿತು 'X' (ಟ್ವಿಟರ್) ನಲ್ಲಿ ಪೋಸ್ಟ್ ಮಾಡಿರುವ ರಿಜಿಜು, "ಕಾಂಗ್ರೆಸ್ ಪಕ್ಷವು ತನ್ನ ಸಂಸದರ ಅತ್ಯಂತ ಕೆಳಮಟ್ಟದ ನಡವಳಿಕೆಯನ್ನು ಕಂಡು ಹೆಮ್ಮೆಪಡುತ್ತಿದೆ! ನಾವು ಬಿಜೆಪಿ ಸಂಸದರನ್ನು ತಡೆಯದಿದ್ದರೆ ಮತ್ತು ಮಹಿಳಾ ಸಂಸದರಿಗೆ ಕಾಂಗ್ರೆಸ್ ಸಂಸದರನ್ನು ಎದುರಿಸಲು ಬಿಟ್ಟಿದ್ದರೆ, ಅದು ಅತಿ ಕೆಟ್ಟ ಪರಿಸ್ಥಿತಿಗೆ ಕಾರಣವಾಗುತ್ತಿತ್ತು. ಸಂಸತ್ತಿನ ಘನತೆ ಮತ್ತು ಪವಿತ್ರತೆಯನ್ನು ಕಾಪಾಡುವುದು ನಮಗೆ ಮುಖ್ಯವಾಗಿದೆ," ಎಂದು ಕಿಡಿಕಾರಿದ್ದಾರೆ.

ಫೆಬ್ರವರಿ 4 ರಂದು ಪ್ರಧಾನಿ ಭಾಷಣಕ್ಕೂ ಕೆಲವೇ ನಿಮಿಷಗಳ ಮೊದಲು ಕಲಾಪವನ್ನು ಮುಂದೂಡಲಾಗಿತ್ತು. ವಿರೋಧ ಪಕ್ಷದ ಸಂಸದರು ಅಹಿತಕರ ಸನ್ನಿವೇಶ ಸೃಷ್ಟಿಸಬಹುದೆಂದು, ಕಲಾಪಕ್ಕೆ ಬರದಂತೆ ತಾನು ಪ್ರಧಾನಿಯವರಿಗೆ ಸಲಹೆ ನೀಡಿದ್ದಾಗಿ ಸ್ಪೀಕರ್ ಓಂ ಬಿರ್ಲಾ ನಂತರ ತಿಳಿಸಿದ್ದರು.

ವಿಡಿಯೋ ನೋಡಿ

‘ಬಿಜೆಪಿ ಸಂಸದರು ತೀವ್ರ ಆಕ್ರೋಶ’

ಸುದ್ದಿಗಾರರೊಂದಿಗೆ ಮಾತನಾಡಿದ ರಿಜಿಜು, "ಕಾಂಗ್ರೆಸ್ ಸಂಸದರ ವರ್ತನೆಯ ವಿರುದ್ಧ ಬಿಜೆಪಿ ಮಹಿಳಾ ಸಂಸದರು ಸ್ಪೀಕರ್‌ಗೆ ದೂರು ನೀಡಿದ್ದಾರೆ. ಕಾಂಗ್ರೆಸ್ ಸಂಸದರು ಆಡಳಿತ ಪಕ್ಷದ (Treasury side) ಸಾಲಿಗೆ ನುಗ್ಗಿದ್ದರು. ಪ್ರಧಾನಿ ಕುಳಿತುಕೊಳ್ಳುವ ಬೆಂಚ್ ದಾಟಿ ಇಡೀ ಸ್ಥಳಕ್ಕೆ ಮುತ್ತಿಗೆ ಹಾಕುವ ಪ್ರಯತ್ನ ಮಾಡಿದ್ದರು," ಎಂದರು.

ಮದುವೆಯಲ್ಲಿ ಗನ್ ಹಿಡಿದು ‘ಧುರಂಧರ್’ ಹಾಡಿಗೆ ಡ್ಯಾನ್ಸ್ ಮಾಡಿದ ಶಾಸಕ ಎಂ.ವೈ. ಪಾಟೀಲ್ ಆಪ್ತ; ವಿಡಿಯೊ ವೈರಲ್‌

"ನಾವು ನಮ್ಮ ಎನ್‌ಡಿಎ ಸಂಸದರನ್ನು ನಿಯಂತ್ರಿಸಬೇಕಾಯಿತು. ಕಾಂಗ್ರೆಸ್ ಸಂಸದರ ಈ ವರ್ತನೆಯಿಂದ ನಮ್ಮ ಮಹಿಳಾ ಸಂಸದರು ತೀವ್ರ ಆಕ್ರೋಶಗೊಂಡಿದ್ದರು. ದೈಹಿಕ ಸಂಘರ್ಷಕ್ಕೆ ಅವಕಾಶ ನೀಡದಂತೆ ನಾವು ಅವರನ್ನು ತಡೆದವು. ಬಳಿಕ ಈ ಸಂಸದರು ಸ್ಪೀಕರ್ ಚೇಂಬರ್‌ಗೆ ಹೋಗಿ ಬೆದರಿಕೆ ಹಾಕಿದ್ದಾರೆ. ಈಗ ದೂರು ದಾಖಲಾಗಿದೆ, ಸ್ಪೀಕರ್ ಯಾವ ಕ್ರಮ ಕೈಗೊಳ್ಳುತ್ತಾರೆ ಎಂದು ಕಾದು ನೋಡೋಣ," ಎಂದು ರಿಜಿಜು ಹೇಳಿದ್ದಾರೆ

ಮಹಿಳಾ ಸಂಸದರ ದೂರಿನಲ್ಲೇನಿದೆ?

ಅಧ್ಯಕ್ಷರ ಭಾಷಣದ ಮೇಲಿನ ವಂದನಾ ನಿರ್ಣಯದ ಚರ್ಚೆಯ ಸಂದರ್ಭದಲ್ಲಿ ವಿರೋಧ ಪಕ್ಷದ ಸಂಸದರು ಪೇಪರ್ ಎಸೆದದ್ದು ಮತ್ತು ಸದನದ ಬಾವಿಗಿಳಿದು ಪ್ರತಿಭಟಿಸಿದ್ದನ್ನು ಬಿಜೆಪಿ ಮಹಿಳಾ ಸಂಸದರು ಖಂಡಿಸಿದ್ದಾರೆ.

ಫೆಬ್ರವರಿ 4 ರಂದು ವಿರೋಧ ಪಕ್ಷದ ಮಹಿಳಾ ಸಂಸದರು "ಪ್ರಧಾನಿಯವರ ಪೀಠವನ್ನು ಸುತ್ತುವರೆದಿದ್ದಾರೆ", ನಂತರ ಸ್ಪೀಕರ್ ಚೇಂಬರ್ ಬಳಿ ಆಕ್ರಮಣಕಾರಿಯಾಗಿ ವರ್ತಿಸಿದ್ದಾರೆ ಎಂದು ಬಿಜೆಪಿ ಸಂಸದರು ಪತ್ರದಲ್ಲಿ ದೂರಿದ್ದಾರೆ. ಈ ಘಟನೆಯಲ್ಲಿ ಭಾಗಿಯಾದ ಸಂಸದರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಅವರು ಸ್ಪೀಕರ್ ಬಿರ್ಲಾಗೆ ಆಗ್ರಹಿಸಿದ್ದಾರೆ.