Moon Drifts From Earth: ಭೂಮಿಯಿಂದ ದೂರ ಸಾಗುತ್ತಿರುವ ಚಂದ್ರ.. ಸಮಯದ ಮೇಲೆ ಪರಿಣಾಮ ಬೀರುತ್ತಾ?
ನಿಧಾನವಾಗಿ ಚಂದ್ರ ಭೂಮಿಯಿಂದ ದೂರ (Moon Drifts From Earth) ಸರಿಯುತ್ತಿದ್ದಾನೆ. ಇದರಿಂದ ಭೂಮಿಯ ಗಂಟೆಗಳು ವ್ಯತ್ಯಾಸವಾಗುವ ಸಾಧ್ಯತೆ ಇದೆ. ಆದರೆ ಇದು ಈಗಲ್ಲ. ಸುಮಾರು ಶತಕೋಟಿ ವರ್ಷಗಳ ನಂತರ. ಚಂದ್ರನು ನಿಧಾನವಾಗಿ ಭೂಮಿಯಿಂದ ದೂರ ಸರಿಯುತ್ತಿರುವುದರಿಂದ ಉಬ್ಬರವಿಳಿತಗಳು, ಭೂಮಿಯ ತಿರುಗುವಿಕೆ ಮತ್ತು ಭೂಮಿಯ ಮೇಲಿನ ಜೀವಿಗಳ ಜೀವನದ ಮೇಲೆ ಪರಿಣಾಮ ಬೀರಲಿದೆ. ಇದರಿಂದ ದಿನದಲ್ಲಿ 25 ಗಂಟೆಗಳ ಕಾಲ ಬರಬಹುದು ಎನ್ನುತ್ತಾರೆ ವಿಜ್ಞಾನಿಗಳು.
ವಿದ್ಯಾ ಇರ್ವತ್ತೂರು
May 30, 2025 5:51 PM
ಚಂದ್ರ ಭೂಮಿಯಿಂದ ದೂರ ಸರಿಯುತ್ತಿರುವುದರಿಂದ ಶತಕೋಟಿ ವರ್ಷಗಳ ಅನಂತರ ದಿನದಲ್ಲಿ 25 ಗಂಟೆಗಳ ಕಾಲ ಇರಬಹುದು ಎನ್ನುತ್ತಾರೆ ವಿಜ್ಞಾನಿಗಳು. ಭೂಮಿಯು ಪ್ರಸ್ತುತ 24 ಗಂಟೆಗಳ ದಿನವನ್ನು ಹೊಂದಿದೆ. ಅದಕ್ಕೆ ಪೂರಕವಾಗಿ ನಮ್ಮ ದೈನಂದಿನ ಚಟುವಟಿಕೆ ಇದೆ. ಆದರೆ ಇನ್ನು ಸುಮಾರು ಶತಕೋಟಿ ವರ್ಷಗಳ ಬಳಿಕ ಇದೆಲ್ಲವೂ ಬದಲಾಗಲಿದೆ.
ಚಂದ್ರನು ವರ್ಷಕ್ಕೆ ಸರಿಸುಮಾರು 3.8 ಸೆಂಟಿ ಮೀಟರ್‌ಗಳಷ್ಟು ಅಂತರದಲ್ಲಿ ಭೂಮಿಯಿಂದ ದೂರ ಸರಿಯುತ್ತಿರುವುದಾಗಿ ವಿಸ್ಕಾನ್ಸಿನ್ ಮ್ಯಾಡಿಸನ್ ವಿಶ್ವವಿದ್ಯಾಲಯದ ಸಂಶೋಧಕರು ಹೇಳಿದ್ದಾರೆ. ಇದು ಚಿಕ್ಕದಾಗಿ ಕಂಡರೂ ಭವಿಷ್ಯದಲ್ಲಿ ಇದರ ಪರಿಣಾಮ ಉಂಟಾಗುತ್ತದೆ. ಚಂದ್ರನು ದೂರ ಸರಿಯುತ್ತಿದ್ದಂತೆ ಭೂಮಿಯ ತಿರುಗುವಿಕೆ ನಿಧಾನವಾಗುತ್ತದೆ. ಇದರಿಂದ ದಿನದಲ್ಲಿ 25 ಗಂಟೆಗಳನ್ನು ಮಾಡಬೇಕಾಗುತ್ತದೆ ಎನ್ನುತ್ತಾರೆ ತಜ್ಞರು.
ಚಂದ್ರ ಭೂಮಿಯಿಂದ ದೂರವಾದಂತೆ ಉಬ್ಬರವಿಳಿತದ ಶಕ್ತಿಗಳು, ಭೂಮಿಯ ತಿರುಗುವಿಕೆ ನಿಧಾನವಾಗುವುದು. ಚಂದ್ರನ ಗುರುತ್ವಾಕರ್ಷಣೆಯು ಭೂಮಿಯ ಮೇಲೆ ಉಬ್ಬರವಿಳಿತವನ್ನು ಉಂಟು ಮಾಡುತ್ತದೆ. ಒಂದರ್ಥದಲ್ಲಿ ಇದು ಬ್ರೇಕ್ ನಂತೆ ಕಾರ್ಯನಿರ್ವಹಿಸುತ್ತದೆ ಎನ್ನುತ್ತಾರೆ ಲಂಡನ್ ವಿಶ್ವವಿದ್ಯಾಲಯದ ರಾಯಲ್ ಹಾಲೋವೇಯ ಪ್ರೊಫೆಸರ್ ಡೇವಿಡ್ ವಾಲ್ಥಮ್.
ಒಂದು ಅಧ್ಯಯನದ ಪ್ರಕಾರ ಸುಮಾರು 1.4 ಶತಕೋಟಿ ವರ್ಷಗಳ ಹಿಂದೆ ಚಂದ್ರ ಭೂಮಿಗೆ ತುಂಬಾ ಸಮೀಪದಲ್ಲಿತ್ತು. ಆಗ ಭೂಮಿಯ ಮೇಲಿನ ಒಂದು ದಿನವು 18 ಗಂಟೆಗಳಿಗಿಂತ ಸ್ವಲ್ಪ ಹೆಚ್ಚು ಕಾಲ ಇತ್ತು. ಆದರೆ ಚಂದ್ರ ದೂರ ಸರಿದಂತೆ ದಿನದ ಉದ್ದವು ಕ್ರಮೇಣ ಈಗಿನ 24 ಗಂಟೆಗಳ ಚಕ್ರಕ್ಕೆ ಬದಲಾಯಿತು.
ಚಂದ್ರನು ಭೂಮಿಯನ್ನು ನಿಯಂತ್ರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾನೆ. ಅದು ಹತ್ತಿರದಲ್ಲಿದ್ದಾಗ ಹೆಚ್ಚು ಶಕ್ತಿಶಾಲಿ ಉಬ್ಬರವಿಳಿತದ ಅಲೆಗಳು ಸೃಷ್ಟಿಯಾಗುತ್ತದೆ. ದೂರ ಹೋದಂತೆ ಉಬ್ಬರವಿಳಿತದ ಪರಿಣಾಮಗಳು ಕಡಿಮೆಯಾಗುತ್ತವೆ. ಭೂಮಿ ಮತ್ತು ಚಂದ್ರನ ನಡುವಿನ ಗುರುತ್ವಾಕರ್ಷಣೆಯ ಪರಸ್ಪರ ಕ್ರಿಯೆಯು ಈ ಸಮತೋಲನವನ್ನು ನಿಯಂತ್ರಣದಲ್ಲಿಡುತ್ತದೆ. ಮಂಗಳ ಮತ್ತು ಗುರುಗಳಂತಹ ಇತರ ಗ್ರಹಗಳು ಕೂಡ ಚಂದ್ರನ ಮೇಲೆ ಗುರುತ್ವಾಕರ್ಷಣೆಯನ್ನು ಬೀರುತ್ತವೆ. ಇದು ಅದರ ನಿರಂತರ ಚಲನೆಗೆ ಕಾರಣವಾಗಿದೆ.
ಅಪೋಲೋ ಕಾರ್ಯಾಚರಣೆಗಳ ಸಮಯದಲ್ಲಿ ವಿಜ್ಞಾನಿಗಳು ಚಂದ್ರನ ಮೇಲ್ಮೈಯಲ್ಲಿ ಪ್ರತಿಫಲಕಗಳನ್ನು ಸ್ಥಾಪಿಸಿದ್ದಾರೆ. ಇದರಿಂದ ಚಂದ್ರನ ದೂರವನ್ನು ನಿಖರವಾಗಿ ಅಳೆಯಲು ಲೇಸರ್ ಕಿರಣಗಳನ್ನು ಬಳಸಲಾಗುತ್ತದೆ. ಪ್ರಸ್ತುತ, ಚಂದ್ರನು ಭೂಮಿಯಿಂದ ಸರಾಸರಿ 3,84,400 ಕಿಲೋ ಮೀಟರ್ ದೂರದಲ್ಲಿದೆ. ಒಂದು ಕಕ್ಷೆಯನ್ನು ಪೂರ್ಣಗೊಳಿಸಲು ಸುಮಾರು 27.3 ದಿನಗಳನ್ನು ತೆಗೆದುಕೊಳ್ಳುತ್ತದೆ. ಅಂದಾಜಿನ ಪ್ರಕಾರ ಸುಮಾರು 200 ಮಿಲಿಯನ್ ವರ್ಷಗಳ ಬಳಿಕ ಭೂಮಿಯ ಮೇಲಿನ ಸಮಯ ದಿನಕ್ಕೆ 25 ಗಂಟೆ ಆಗಬಹುದು ಎನ್ನುತ್ತಾರೆ ವಿಜ್ಞಾನಿಗಳು.
ಚಂದ್ರನು ಭೂಮಿಯಿಂದ ದೂರ ಹೋಗುತ್ತಿರುವುದು ಪ್ರಸ್ತುತ ನಮ್ಮ ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರುವುದಿಲ್ಲವಾದರೂ ಹವಾಮಾನ, ಉಬ್ಬರವಿಳಿತ ಮತ್ತು ಪರಿಸರ ವ್ಯವಸ್ಥೆಗಳ ಮೇಲೆ ಭವಿಷ್ಯದಲ್ಲಿ ಪರಿಣಾಮ ಬೀರುವ ಸಾಧ್ಯತೆ ಇದೆ. ಇದರಿಂದ ದೀರ್ಘವಾದ ಹಗಲು ಉಂಟಾಗುತ್ತದೆ. ಇದು ನೈಸರ್ಗಿಕ ನಡವಳಿಕೆಗಳ ಮೇಲೆ ಪರಿಣಾಮ ಬೀರುತ್ತದೆ.
ಚಂದ್ರ ಭೂಮಿಯಿಂದ ದೂರ ಸರಿಯುತ್ತಿರುವ ವಿಷಯ ಈಗ ಚಂದ್ರ ವಿಜ್ಞಾನ ಮತ್ತು ಖಗೋಳಶಾಸ್ತ್ರದಲ್ಲಿ ಆಸಕ್ತಿಯನ್ನು ಹೆಚ್ಚಿಸಿದೆ. ಚಂದ್ರನ ಕಕ್ಷೆ ಬದಲಾದಂತೆ ಅದು ಭೂಮಿಯ ಗುರುತ್ವಾಕರ್ಷಣೆ ಮತ್ತು ಇತರ ಗ್ರಹಗಳ ಚಲನೆಯ ಮೇಲೆ ಸೂಕ್ಷ್ಮ ಪ್ರಭಾವ ಬೀರಬಹುದು ಎನ್ನುತ್ತಾರೆ ತಜ್ಞರು. ಆದರೆ ಈ ಬಗ್ಗೆ ಹೆಚ್ಚಿನ ಸಂಶೋಧನೆ ಅಗತ್ಯವಿದೆ.