Operation Sindoor: ಆಪರೇಷನ್ ಸಿಂದೂರ್‌ ಚುಟ್ ಪುಟ್ ಯುದ್ಧ ಎಂದ ಮಲ್ಲಿಕಾರ್ಜುನ ಖರ್ಗೆ; ಬಿಜೆಪಿ ಆಕ್ರೋಶ
Mallikarjun Kharge: ಕಾಂಗ್ರೆಸ್‌ ರಾಷ್ಟ್ರೀಯ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ಟೀಕೆ ವ್ಯಕ್ತಪಡಿಸಿದ್ದು, ಆಪರೇಷನ್ ಸಿಂದೂರ್‌ ಅನ್ನು ʼಚುಟ್ ಪುಟ್ ಯುದ್ಧʼ ಎಂದು ಕರೆದಿದ್ದಾರೆ. ಕರ್ನಾಟಕದ ಸಮರ್ಪಣೆ ಸಂಕಲ್ಪ ರ‍್ಯಾಲಿಯಲ್ಲಿ ಮಾತನಾಡಿದ ಖರ್ಗೆ, 26 ಜನರ ಸಾವಿಗೆ ಕಾರಣವಾದ ಪಹಲ್ಗಾಮ್‌ ಭಯೋತ್ಪಾದಕ ದಾಳಿಗೂ ಮುನ್ನ ಪ್ರಧಾನಿ ನರೇಂದ್ರ ಮೋದಿ ಜಮ್ಮು ಮತ್ತು ಕಾಶ್ಮೀರ ಭೇಟಿಯನ್ನು ರದ್ದುಗೊಳಿಸಿದ್ದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.
ಮಲ್ಲಿಕಾರ್ಜುನ ಖರ್ಗೆ
Sushmitha Jain
May 20, 2025 10:45 PM
ಕಾರವಾರ: ಕಾಂಗ್ರೆಸ್‌ ರಾಷ್ಟ್ರೀಯ ಅಧ್ಯಕ್ಷ (Congress President) ಮಲ್ಲಿಕಾರ್ಜುನ ಖರ್ಗೆ (Mallikarjun Kharge) ಕೇಂದ್ರ ಸರ್ಕಾರದ (Central Government) ವಿರುದ್ಧ ವಾಗ್ದಾಳಿ ನಡೆಸಿದ್ದು, ಆಪರೇಷನ್ ಸಿಂದೂರ್‌ (Operation Sindoor) ಅನ್ನು “ಚುಟ್ ಯುದ್ಧ" (Chhutput Yuddha) ಎಂದು ಕರೆದಿದ್ದಾರೆ. ಕರ್ನಾಟಕದ ಸಮರ್ಪಣೆ ಸಂಕಲ್ಪ ರ‍್ಯಾಲಿಯಲ್ಲಿ ಮಾತನಾಡಿದ ಖರ್ಗೆ, 26 ಜನರ ಸಾವಿಗೆ ಕಾರಣವಾದ ಪಹಲ್ಗಾಮ್‌ ಭಯೋತ್ಪಾದಕ ದಾಳಿಗೂ ಮುನ್ನ ಪ್ರಧಾನಿ ನರೇಂದ್ರ ಮೋದಿ ಅವರು ಜಮ್ಮು ಮತ್ತು ಕಾಶ್ಮೀರ ಭೇಟಿಯನ್ನು ರದ್ದುಗೊಳಿಸಿದ್ದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.
ಗುಪ್ತಚರ ಮಾಹಿತಿಯ ಬಗ್ಗೆ ಮೌನ ಏಕೆ?
ಏಪ್ರಿಲ್‌ 22ರಂದು ನಡೆದ ದಾಳಿಗೂ ಮುನ್ನ ಗುಪ್ತಚರ ಇಲಾಖೆಯಿಂದ ದೊಡ್ಡ ಮಟ್ಟದ ಹಿಂಸಾಚಾರದ ಎಚ್ಚರಿಕೆ ಸಿಕ್ಕಿತ್ತು ಎಂದು ಖರ್ಗೆ ಹೇಳಿದರು. "ಪ್ರಧಾನಿ ಮೋದಿ ಏಪ್ರಿಲ್‌ 17ರಂದು ಕಾಶ್ಮೀರಕ್ಕೆ ಭೇಟಿ ನೀಡಬೇಕಿತ್ತು. ಆದರೆ ಗುಪ್ತಚರ ಎಚ್ಚರಿಕೆಯಿಂದಾಗಿ ಭೇಟಿ ರದ್ದಾಯಿತು. ಸರ್ಕಾರಕ್ಕೆ ಈ ಮಾಹಿತಿ ಇದ್ದರೆ, ಸಾರ್ವಜನಿಕರಿಗೆ ಏಕೆ ಎಚ್ಚರಿಕೆ ನೀಡಲಿಲ್ಲ?" ಎಂದು ಪ್ರಶ್ನಿಸಿದರು. "ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಿದ್ದರೆ, 26 ನಿರಪರಾಧಿಗಳ ಜೀವ ಉಳಿಯುತ್ತಿತ್ತು," ಎಂದು ಅವರು ಆರೋಪಿಸಿದರು.
ರಾಜಕೀಯ ಗಿಮಿಕ್‌ಗಿಂತ ರಾಷ್ಟ್ರೀಯ ಭದ್ರತೆ ಮುಖ್ಯ
ಮೋದಿ ಸರ್ಕಾರ ರಾಷ್ಟ್ರೀಯ ಭದ್ರತೆಗಿಂತ ರಾಜಕೀಯ ಗಿಮಿಕ್‌ಗೆ ಆದ್ಯತೆ ನೀಡುತ್ತಿದೆ ಎಂದು ಖರ್ಗೆ ಆರೋಪಿಸಿದರು. ಪಹಲ್ಗಾಮ್‌ ದಾಳಿಯ ನಂತರ ನಡೆದ ಎರಡು ಸರ್ವಪಕ್ಷಗಳ ಸಭೆಗಳಿಗೆ ಪ್ರಧಾನಿ ಗೈರಾಗಿದ್ದಕ್ಕೆ ಟೀಕಿಸಿದ ಅವರು, "ನಾಗರಿಕರು ಸಾಯುತ್ತಿರುವಾಗ ಮೋದಿ ಬಿಹಾರದಲ್ಲಿ ಚುನಾವಣಾ ಪ್ರಚಾರದಲ್ಲಿ ತೊಡಗಿದ್ದರು. ನಾವು ಸಭೆಗೆ ಗೈರಾದರೆ ದೇಶದ್ರೋಹಿಗಳು, ಮೋದಿ ಗೈರಾದರೆ ದೇಶಪ್ರೇಮಿಗಳು. ಈ ಡಬಲ್‌ ಸ್ಟ್ಯಾಂಡರ್ಡ್‌ ಏಕೆ?" ಎಂದು ಪ್ರಶ್ನಿಸಿದರು.
ಆಪರೇಷನ್ ಸಿಂದೂರ್‌ ಅಡಿಯಲ್ಲಿ ಭಾರತವು ಪಾಕಿಸ್ತಾನದಲ್ಲಿ ನಡೆಸಿದ ಇತ್ತೀಚಿನ ಸೇನಾ ಕಾರ್ಯಾಚರಣೆಯನ್ನು ಅಂತಾರಾಷ್ಟ್ರೀಯವಾಗಿ ಕಡಿಮೆ ಮಾಡಿ ತೋರಿಸಲಾಗುತ್ತಿದೆ ಎಂದು ಖರ್ಗೆ ಆರೋಪಿಸಿದರು. "ಪಾಕಿಸ್ತಾನಕ್ಕೆ ಚೀನಾದಿಂದ ಗುಟ್ಟಾಗಿ ಬೆಂಬಲ ಸಿಗುತ್ತಿದೆ. ಈ ಚುಟ್ ಪುಟ್ ಯುದ್ಧಗಳಲ್ಲಿ ಪಾಕಿಸ್ತಾನ ಭಾರತವನ್ನು ಎಲ್ಲ ರೀತಿಯಲ್ಲೂ ಕಡಿಮೆ ಮಾಡಿ ತೋರಿಸುತ್ತಿದೆ" ಎಂದು ಅವರು ಹೇಳಿದರು.
ಈ ಸುದ್ದಿಯನ್ನು ಓದಿ: Viral Video: ಯುವಕನ ಮೇಲೆ ನಾಲ್ವರಿಂದ ಭೀಕರ ಹಲ್ಲೆ; ಶಾಕಿಂಗ್‌ ವಿಡಿಯೊ ವೈರಲ್
ಆಪರೇಷನ್ ಸಿಂದೂರ್‌ ನಂತರ ರಾಜತಾಂತ್ರಿಕ ಒಮ್ಮತಕ್ಕಾಗಿ ಬಹುಪಕ್ಷೀಯ ತಂಡಗಳನ್ನು ವಿದೇಶಕ್ಕೆ ಕಳುಹಿಸುವ ಸರ್ಕಾರದ ಕ್ರಮವನ್ನು ಖರ್ಗೆ ಟೀಕಿಸಿದರು. "ಪ್ರಧಾನಿ ನಮ್ಮೊಂದಿಗೆ ಸಮಾಲೋಚನೆ ಮಾಡಲಿಲ್ಲ. ಆದರೂ ರಾಷ್ಟ್ರೀಯ ಹಿತಾಸಕ್ತಿಗಾಗಿ ನಾವು ವಿರೋಧಿಸಲಿಲ್ಲ. ನಮ್ಮ ಗುರಿ ದೇಶವನ್ನು ರಕ್ಷಿಸುವುದು, ಕೀರ್ತಿಗಾಗಿ ಓಡಾಡುವುದಲ್ಲ" ಎಂದು ಅವರು ಸ್ಪಷ್ಟಪಡಿಸಿದರು.
ಬಿಜೆಪಿಯಿಂದ ತಿರುಗೇಟು
ಖರ್ಗೆ ಅವರ ಹೇಳಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ ಬಿಜೆಪಿ ಸಂಸದ ಸಂಬಿತ್‌ ಪಾತ್ರ, "ಆಪರೇಷನ್ ಸಿಂದೂರ್‌ ಅನ್ನು ಚುಟ್ ಪುಟ್ ಯುದ್ಧ ಎಂದು ಕರೆಯುವುದು ದೇಶದ ವೀರ ಯೋಧರಿಗೆ ಮಾಡುವ ಅವಮಾನ. ಭಾರತೀಯ ಸೇನೆ ಪಾಕಿಸ್ತಾನದ 9 ಭಯೋತ್ಪಾದಕ ಶಿಬಿರಗಳನ್ನು ಧ್ವಂಸಗೊಳಿಸಿತು. 100ಕ್ಕೂ ಹೆಚ್ಚು ಉಗ್ರರನ್ನು ಹೊಡೆದುರುಳಿಸಿತು. 11 ಪಾಕ್‌ ವಾಯುನೆಲೆಗಳನ್ನು ನಾಶಪಡಿಸಿತು. ಇದನ್ನು ಖರ್ಗೆ ಚುಟ್ ಪುಟ್ ಯುದ್ಧ ಎನ್ನುತ್ತಾರೆಯೇ?" ಎಂದು ಕಿಡಿಕಾರಿದರು.