ಏಷ್ಯನ್‌ ಗೇಮ್ಸ್‌: ಮಹಿಳಾ ಟಿಟಿ ಪಂದ್ಯದಲ್ಲಿ ಭಾರತ-ಪಾಕ್‌ ಹ್ಯಾಂಡ್‌ಶೇಕ್‌!

ನಗೋಯಾ, ಸೆ.21: ಭಾರತ ಹಾಗೂ ಪಾಕಿಸ್ತಾನ ಆಟಗಾರರು ಪರಸ್ಪರ ಕೈಕುಲುಕಿ, ಹೈ-ಫೈವ್ ಮಾಡಿದ ಘಟನೆ ಇಲ್ಲಿ ನಡೆಯುತ್ತಿರುವ ಏಷ್ಯನ್ ಗೇಮ್ಸ್‌ನ ಮಹಿಳಾ ಟೇಬಲ್ ಟೆನಿಸ್ ಪಂದ್ಯದಲ್ಲಿ ನಡೆಯಿತು. ಪಂದ್ಯದುದ್ದಕ್ಕೂ ಉಭಯ ದೇಶಗಳ ಆಟಗಾರ್ತಿಯರು ಕೈಕುಲುಕಿ ಕ್ರೀಡಾಸ್ಫೂರ್ತಿಯನ್ನು ಮೆರೆದರು.

ಸೋಮವಾರ ನಡೆದ ಪಂದ್ಯದಲ್ಲಿ ಸುತಿರ್ಥಾ ಮುಖರ್ಜಿ, ಸಿಂಡ್ರೆಲಾ ದಾಸ್ ಮತ್ತು ಶ್ರೀಜಾ ಅಕುಲಾ ಜಯ ಸಾಧಿಸಿದರು. ಸುತಿರ್ಥಾ ಅವರು ಅಲೀನಾ ಖಾನ್ ವಿರುದ್ಧ 3-0 (11-3, 11-3, 11-4) ಅಂತರದ ಸ್ಪಷ್ಟ ಗೆಲುವು ಸಾಧಿಸುವ ಮೂಲಕ ಭಾರತಕ್ಕೆ 1-0 ಮುನ್ನಡೆ ಒದಗಿಸಿಕೊಟ್ಟರು. ಈ ಪಂದ್ಯದ ನಂತರ ಭಾರತೀಯ ಮತ್ತು ಪಾಕಿಸ್ತಾನಿ ಆಟಗಾರರು ಪರಸ್ಪರ ಹಸ್ತಲಾಘವ ಮಾಡಿಕೊಂಡರು. ಪ್ರತಿ ಪಂದ್ಯ ಮುಗಿದ ಬಳಿಕವೂ ಎರಡೂ ತಂಡದ ಆಟಗಾರರು ಪರಸ್ಪರ ಅಭಿನಂದಿಸಿದರು.

ಪುರುಷರ ಏರ್ ರೈಫಲ್ ಸ್ಪರ್ಧೆಯಲ್ಲಿ ಭಾರತಕ್ಕೆ ಬೆಳ್ಳಿ; ಪಾಕಿಸ್ತಾನ ವಿರುದ್ಧ ಮಹಿಳಾ ಟಿಟಿ ತಂಡಕ್ಕೆ ಜಯ

ಸಿಂಡ್ರೆಲಾ ಮತ್ತು ಶ್ರೀಜಾ ಕೂಡ ತಮ್ಮ ಎದುರಾಳಿಗಳನ್ನು ಸೋಲಿಸಿದ ನಂತರ ಅವರೊಂದಿಗೆ ಹಸ್ತಲಾಘವ ಮಾಡಿಕೊಂಡರು. ಈ ಸರಣಿಯ ಎರಡನೇ ಪಂದ್ಯದಲ್ಲಿ ಸಿಂಡ್ರೆಲಾ ಮತ್ತೊಂದು ಪ್ರಭಾವಶಾಲಿ ಪ್ರದರ್ಶನ ನೀಡಿದರು. ಅವರು ಕಲ್ಸೂಮ್ ಖಾನ್ ಅವರನ್ನು 11-6, 11-7, 11-5 ಅಂತರದ ನೇರ ಗೇಮ್‌ಗಳಲ್ಲಿ ಸೋಲಿಸಿದರು. ಈ ಗೆಲುವು ಭಾರತಕ್ಕೆ 2-0 ಮುನ್ನಡೆ ಒದಗಿಸಿತು.

ಮೂರನೇ ಗೇಮ್‌ನಲ್ಲಿ ಫಾತಿಮಾ ಖಾನ್ ವಿರುದ್ಧದ ಪಂದ್ಯದಲ್ಲಿ ಕಣಕ್ಕಿಳಿದ ಶ್ರೀಜಾ ಅಕುಲಾ ಅತ್ಯಂತ ಪ್ರಭಾವಶಾಲಿ ರೀತಿಯಲ್ಲಿ ಆ ಪಂದ್ಯವನ್ನು ಗೆದ್ದುಕೊಂಡರು. ಅವರು ಮೂರು ಗೇಮ್‌ಗಳಲ್ಲಿ ಕೇವಲ 13 ಅಂಕಗಳನ್ನು ಮಾತ್ರ ಬಿಟ್ಟುಕೊಟ್ಟು, 11-4, 11-4, 11-5 ಅಂತರದಲ್ಲಿ ಜಯ ಸಾಧಿಸುವ ಮೂಲಕ ಭಾರತೀಯ ತಂಡಕ್ಕೆ ಮತ್ತೊಂದು 3-0 ಅಂತರದ ಗೆಲುವು ತಂದುಕೊಟ್ಟರು.

ಕಳೆದ ವರ್ಷ ನಡೆದ ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ, ಕ್ರಿಕೆಟ್‌ನಲ್ಲಿ ಪಾಕಿಸ್ತಾನದೊಂದಿಗೆ ಕೈಕುಲುಕದಿರುವ ಕಠಿಣ ನೀತಿಯನ್ನು ಭಾರತ ಅನುಸರಿಸುತ್ತಾ ಬಂದಿದೆ. ಅಂದಿನಿಂದ, ಪಂದ್ಯದ ಆರಂಭಕ್ಕೂ ಮುನ್ನ ಮತ್ತು ನಂತರ ಭಾರತೀಯ ನಾಯಕರು ಹಾಗೂ ಆಟಗಾರರು ಎದುರಾಳಿ ತಂಡದ ಆಟಗಾರರೊಂದಿಗೆ ಕೈಕುಲುಕಿಲ್ಲ.

ಆದರೆ, ಇತರ ಕ್ರೀಡೆಗಳಲ್ಲಿ ಪರಿಸ್ಥಿತಿ ಇದಕ್ಕಿಂತ ಭಿನ್ನವಾಗಿದೆ. ಇತ್ತೀಚೆಗೆ ನಡೆದ ಹಾಕಿ ವಿಶ್ವಕಪ್‌ನಲ್ಲಿ, ಪಂದ್ಯ ಆರಂಭವಾಗುವ ಮುನ್ನ ಭಾರತೀಯ ಆಟಗಾರರು ಎದುರಾಳಿ ತಂಡದ ಆಟಗಾರರೊಂದಿಗೆ 'ಹೈ-ಫೈವ್' (high-five) ಮಾಡುವುದು ಕಂಡುಬಂದಿತ್ತು.