IPL 2026: ʻವಿರಾಟ್ ಕೊಹ್ಲಿ ಆರ್ಸಿಬಿಯ ಹೃದಯ ಬಡಿತʼ-ಎಬಿಡಿ ಮಾತು ಒಪ್ಪಬಹುದಾ?
IPL 2026: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಹೃದಯ ಬಡಿತ ವಿರಾಟ್ ಕೊಹ್ಲಿ ಎಂದು ದಕ್ಷಿಣ ಆಫ್ರಿಕಾ ದಿಗ್ಗಜ ಎ ಬಿ ಡಿ ವಿಲಿಯರ್ಸ್ ಬಣ್ಣಿಸಿದ್ದಾರೆ. ಕೊಹ್ಲಿಯ ಬ್ಯಾಟಿಂಗ್ ಕೌಶಲ, ಆಟದ ಉತ್ಸಾಹವನ್ನು ಯಾರಿಂದಲೂ ಸರಿದೂಗಿಸಲು ಸಾಧ್ಯವಿಲ್ಲ ಎಂದು ಆರ್ಸಿಬಿ ದಿಗ್ಗಜ ಹೇಳಿದ್ದಾರೆ.
ಕೊಹ್ಲಿ ಆರ್ಸಿಬಿಯ ಹೃದಯ ಬಡಿತ ಎಂದ ಎಬಿಡಿ. -
ನವದೆಹಲಿ: ಆಧುನಿಕ ಕ್ರಿಕೆಟ್ ದಿಗ್ಗಜ ವಿರಾಟ್ ಕೊಹ್ಲಿ (Virat Kohli) ಇನ್ನೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಹೃದಯ ಬಡಿತ ಎಂದು ದಕ್ಷಿಣ ಆಫ್ರಿಕಾ ಮಾಜಿ ನಾಯಕ ಹಾಗೂ ಆರ್ಸಿಬಿ ದಿಗ್ಗಜ ಎಬಿ ಡಿ ವಿಲಿಯರ್ಸ್ (AB De villiers) ಅಭಿಪ್ರಾಯಪಟ್ಟಿದ್ದಾರೆ. ಟಿ20ಐ ಮತ್ತು ಟೆಸ್ಟ್ ಕ್ರಿಕೆಟ್ಗೆ ವಿದಾಯ ಹೇಳಿದ ಬಳಿಕವೂ, ಕೊಹ್ಲಿ ಆರ್ಸಿಬಿ ತಂಡದಲ್ಲಿ ಕೇಂದ್ರ ವ್ಯಕ್ತಿಯಾಗಿ ಮುಂದುವರಿದಿದ್ದಾರೆ. 2025ರ ಐಪಿಎಲ್ನಲ್ಲಿ ಅವರು ಅತ್ಯುತ್ತಮ ಪ್ರದರ್ಶನ ನೀಡಿದ್ದು, 54.75ರ ಸರಾಸರಿ ಮತ್ತು 144.71 ಸ್ಟ್ರೈಕ್ ರೇಟ್ನೊಂದಿಗೆ 657 ರನ್ಗಳನ್ನು ಸಿಡಿಸಿದ್ದರು. ಈ ಸಾಧನೆಯೊಂದಿಗೆ, ಅವರು ಕಳೆದ ಸೀಸನ್ನ ಟಾಪ್ ರನ್ ಸ್ಕೋರರ್ಗಳ ಪಟ್ಟಿಯಲ್ಲಿ ಮೂರನೇ ಸ್ಥಾನ ಪಡೆದುಕೊಂಡು, ತಮ್ಮ ಮಹತ್ವವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದರು.
ಜಿಯೊ ಸ್ಟಾರ್ ಸಂದರ್ಶನದಲ್ಲಿ ಮಾತನಾಡಿದ ಎಬಿ ಡಿವಿಲಿಯರ್ಸ್, "ವಿರಾಟ್ ಖಂಡಿತವಾಗಿಯೂ ಇನ್ನೂ ಆರ್ಸಿಬಿ ತಂಡದ ಹೃದಯ ಬಡಿತವಾಗಿದ್ದಾರೆ. ಅದು ಕೇವಲ ಅವರ ಪ್ರದರ್ಶನ ಮತ್ತು ಹಲವು ವರ್ಷಗಳ ಕಾಲ ತೋರಿದ ಸ್ಥಿರತೆಯಿಂದ ಮಾತ್ರವಲ್ಲ, ಅವರು ತಂಡಕ್ಕೆ ತರುವ ಹಾಜರಾತಿ ಮತ್ತು ಉತ್ಸಾಹದಿಂದಲೂ ಆಗಿದೆ. ಮೈದಾನದಲ್ಲಿ ಹಾಗೂ ಮೈದಾನದ ಹೊರಗಡೆ ಅವರು ನಡೆದುಕೊಳ್ಳುವ ರೀತಿ, ಯಾವಾಗಲೂ ತಂಡಕ್ಕಾಗಿ ಹೋರಾಡುವ ಮನೋಭಾವ — ಇವೆಲ್ಲವೂ ಅವರನ್ನು ವಿಭಿನ್ನ ವ್ಯಕ್ತಿಯನ್ನಾಗಿ ಮಾಡುತ್ತವೆ,” ಎಂದು ಹೇಳಿದ್ದಾರೆ.
IPL 2026: ಪ್ಯಾಟ್ ಕಮಿನ್ಸ್ ಅನುಪಸ್ಥಿತಿ, ಸನ್ರೈಸರ್ಸ್ ಹೈದರಾಬಾದ್ಗೆ ಇಶಾನ್ ಕಿಶನ್ ನಾಯಕ!
ಕಳೆದ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಚೊಚ್ಚಲ ಐಪಿಎಲ್ ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿತ್ತು. ವಿರಾಟ್ ಕೊಹ್ಲಿ ಮಾತ್ರವಲ್ಲ,ಇವರ ಜೊತೆ ರಜತ್ ಪಾಟಿದಾರ್, ಲಿಯಾಮ್ ಲಿವಿಂಗ್ಸ್ಟೋನ್, ಜಿತೇಶ್ ಶರ್ಮಾ ಹಾಗೂ ರೊಮ್ಯಾರಿಯೊ ಶೆಫರ್ಡ್ ಅವರು ಫೈನಲ್ ಪಂದ್ಯದಲ್ಲಿ ಉಪಯುಕ್ತ ಕಾಣಿಕೆ ನೀಡಿದ್ದರು. ಇವರ ಜೊತೆಗೆ ಕೃಣಾಲ್ ಪಾಂಡ್ಯ ಕೂಡ ನಿರ್ಣಾಯಕ ಸನ್ನಿವೇಶಗಳಲ್ಲಿ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡೂ ವಿಭಾಗಗಳಲ್ಲಿ ಕೊಡುಗೆ ನೀಡಿದ್ದರು.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಯಶಸ್ಸು ಕೇವಲ ಒಬ್ಬ ಅಥವಾ ಇಬ್ಬರು ಆಟಗಾರರ ಮೇಲೆ ಅವಲಂಬಿತವಾಗಿರಲಿಲ್ಲ ಎಂದು ಸ್ಪಷ್ಟಪಡಿಸಿದರು. ಈ ಬಾರಿ ಸಂಪೂರ್ಣ ತಂಡ ಒಟ್ಟಾಗಿ ಕೆಲಸ ಮಾಡಿದ್ದು, ಹಿಂದಿನ ಸೀಸನ್ಗಳಿಂದ ಇದು ದೊಡ್ಡ ವ್ಯತ್ಯಾಸವಾಗಿದೆ. ಪ್ರತಿಯೊಬ್ಬ ಆಟಗಾರ ತನ್ನ ಪಾತ್ರವನ್ನು ಸಮರ್ಥವಾಗಿ ನಿರ್ವಹಿಸಿದ ಪರಿಣಾಮವೇ ತಂಡದ ಯಶಸ್ಸಿಗೆ ಕಾರಣವಾಯಿತು ಎಂದು ಅವರು ತಿಳಿಸಿದ್ದಾರೆ.
IPL 2026: ಐಪಿಎಲ್ ಆರಂಭಕ್ಕೂ ಮುನ್ನ ಅಕ್ಷರ್ ಪಟೇಲ್ಗೆ ಎಚ್ಚರಿಕೆ ನೀಡಿದ ಚೇತೇಶ್ವರ್ ಪೂಜಾರ!
“ವಿರಾಟ್ ಕೊಹ್ಲಿ ಆ ರೀತಿಯ ಶಕ್ತಿಯನ್ನು ತರುತ್ತಾರೆ ಮತ್ತು ಯುವ ಆಟಗಾರರಿಗೆ ‘ನಾವು ಟ್ರೋಫಿ ಗೆಲ್ಲಬಹುದು’ ಎಂಬ ನಂಬಿಕೆಯನ್ನು ಮೂಡಿಸುತ್ತಾರೆ. ಕಳೆದ ವರ್ಷ ಆರ್ಸಿಬಿ ಅದನ್ನು ಸಾಧಿಸಿದೆ. ನನಗೆ ಕಳೆದ ಸೀಸನ್ನಲ್ಲಿ ಇಷ್ಟವಾದದ್ದು ಏನೆಂದರೆ, ಕೊಹ್ಲಿ ಪ್ರಮುಖ ರನ್ಸ್ಕೋರರ್ಗಳಲ್ಲಿ ಒಬ್ಬರಾಗಿದ್ದರು. ಆದರೆ ಇತರ ಆಟಗಾರರೂ ಮುಂದೆ ಬಂದು ತಮ್ಮ ಪಾತ್ರವನ್ನು ನಿರ್ವಹಿಸಿದ್ದಾರೆ. ಹಿಂದಿನ ದಿನಗಳಲ್ಲಿ ಆರ್ಸಿಬಿ ಕೇವಲ ಎರಡು, ಮೂರು ಅಥವಾ ನಾಲ್ಕು ಆಟಗಾರರ ಮೇಲೆ ಅವಲಂಬಿತವಾಗಿ ತಪ್ಪು ಮಾಡುತ್ತಿತ್ತು. ಆದರೆ ಈ ಬಾರಿ, ಸಂಪೂರ್ಣ ತಂಡವೇ ತಮ್ಮದೇ ಆದ ಕೊಡುಗೆಯನ್ನು ನೀಡಿತು,” ಎಂದು ಎಬಿ ಡಿ ವಿಲಿಯರ್ಸ್ ಹೇಳಿದ್ದಾರೆ.