ʻರೋಹಿತ್‌ ಶರ್ಮಾಗೆ ಒತ್ತಡ ಹೇರಿ ಟೆಸ್ಟ್‌ಗೆ ವಿದಾಯ ಹೇಳಿಸಲಾಗಿದೆʼ:ಬಾಲ್ಯದ ಕೋಚ್‌ ಆರೋಪ!
ಭಾರತ ಏಕದಿನ ತಂಡದ ನಾಯಕ ರೋಹಿತ್‌ ಶರ್ಮಾ ಬುಧವಾರ ಟೆಸ್ಟ್‌ ಕ್ರಿಕೆಟ್‌ ವೃತ್ತಿ ಜೀವನಕ್ಕೆ ವಿದಾಯ ಹೇಳಿದ್ದರು. ಆ ಮೂಲಕ ಏಕದಿನ ಕ್ರಿಕೆಟ್‌ನಲ್ಲಿ ಅವರು ಮುಂದುವರಿಯಲಿದ್ದಾರೆ. ಆದರೆ, ರೋಹಿತ್‌ ಶರ್ಮಾ ಅವರ ಬಾಲ್ಯದ ಕೋಚ್‌ ಬಿಸಿಸಿಐ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.
ರೋಹಿತ್‌ ಶರ್ಮಾರ ಬಾಲ್ಯದ ಕೋಚ್‌ ಹೇಳಿಕೆ.
Ramesh Kote
May 8, 2025 4:28 PM
ನವದೆಹಲಿ: ರೋಹಿತ್‌ ಶರ್ಮಾ(Rohit Sharma) ಅವರು ಟೆಸ್ಟ್‌ ಕ್ರಿಕೆಟ್‌ಗೆ ವಿದಾಯ ಹೇಳಿದ ವಿಧಾನವನ್ನು ಅವರ ಬಾಲ್ಯದ ಕೋಚ್‌ ದಿನೇಶ್‌ ಲಾಡ್‌ (Dinesh Lad) ಖಂಡಿಸಿದ್ದಾರೆ. ಟೆಸ್ಟ್‌ ಕ್ರಿಕೆಟ್‌ಗೆ ವಿದಾಯ ಹೇಳಿರುವುದು ರೋಹಿತ್‌ ಶರ್ಮಾ ಅವರ ವೈಯಕ್ತಿಕ ನಿರ್ಧಾರವಲ್ಲ. ಬಿಸಿಸಿಐ ಒತ್ತಡ ಹೇರಿ ರೋಹಿತ್‌ ಶರ್ಮಾ (Rohit sharma Test Retirement) ಅವರಿಂದ ಟೆಸ್ಟ್‌ ಕ್ರಿಕೆಟ್‌ಗೆ ನಿವೃತ್ತಿ ಪಡೆದಿದೆ ಎಂದು ಅವರು ಗಂಭೀರ ಆರೋಪ ಮಾಡಿದ್ದಾರೆ. ಟಿ20ಐ ಕ್ರಿಕೆಟ್‌ಗೆ ವಿದಾಯ ಹೇಳಿದ ಬಳಿಕ ಟೆಸ್ಟ್‌ ಹಾಗೂ ಒಡಿಐ ಕ್ರಿಕೆಟ್‌ ಕಡೆಗೆ ಹೆಚ್ಚಿನ ಗಮನ ಹರಿಸಿ ಐಸಿಸಿ ಟ್ರೋಫಿ ಗೆಲ್ಲಬೇಕೆಂದು ರೋಹಿತ್‌ ಶರ್ಮಾ ಅಂದುಕೊಂಡಿದ್ದರು. ಆದರೆ, ಈ ರೀತಿ ತುರಾತುರಿಯಲ್ಲಿ ವಿದಾಯ ಹೇಳಿರುವುದು ಸರಿಯಿಲ್ಲ ಎಂದು ದೂರಿದ್ದಾರೆ.
ಇಂಗ್ಲೆಂಡ್‌ ಪ್ರವಾಸದ ಟೆಸ್ಟ್‌ ಸರಣಿಗೂ ಮುನ್ನ ರೋಹಿತ್‌ ಶರ್ಮಾ ಅವರನ್ನು ಟೆಸ್ಟ್‌ ನಾಯಕತ್ವದಿಂದ ಕೆಳಗಿಳಿಸಲು ಅಜಿತ್‌ ಅಗರ್ಕರ್‌ ಸಾರಥ್ಯದ ಬಿಸಿಸಿಐ ಆಯ್ಕೆ ಸಮಿತಿಯು ನಿರ್ಧರಿಸಿತ್ತು. ಆ ಮೂಲಕ ಅವರನ್ನು ಕೇವಲ ಹಿರಿಯ ಬ್ಯಾಟ್ಸ್‌ಮನ್‌ ಆಗಿ ಇಂಗ್ಲೆಂಡ್‌ ಕರೆದುಕೊಂಡು ಹೋಗುವ ಬಗ್ಗೆಯೂ ಯಾವೂದೇ ಖಚಿತ ಮಾಹಿತಿ ಇರಲಿಲ್ಲ. ಇದಾದ ಬೆನ್ನಲ್ಲೆ ಬುಧವಾರ ರೋಹಿತ್‌ ಶರ್ಮಾ ತನ್ನ ಅಧಿಕೃತ ಇನ್‌ಸ್ಟಾಗ್ರಾಮ್‌ ಖಾತೆಯ ಸ್ಟೋರಿಯಲ್ಲಿ ಟೆಸ್ಟ್‌ ವೃತ್ತಿ ಜೀವನಕ್ಕೆ ಹಠಾತ್‌ ವಿದಾಯ ಹೇಳಿದ್ದರು. ಆ ಮೂಲಕ ತಮ್ಮ ಅಭಿಮಾನಿಗಳಿಗೆ ಶಾಕ್‌ ನೀಡಿದ್ದರು.
Rohit sharma Test Retirement: ರೋಹಿತ್‌ ಶರ್ಮಾರ ಟೆಸ್ಟ್‌ ಕ್ರಿಕೆಟ್‌ ದಾಖಲೆಗಳು!
ರೋಹಿತ್‌ ಶರ್ಮಾ ಅವರು ಕಳೆದ ಟೆಸ್ಟ್‌ ಸರಣಿಗಳಲ್ಲಿ ಬ್ಯಾಟ್ಸ್‌ಮನ್‌ ಆಗಿ ಹಾಗೂ ನಾಯಕನಾಗಿಯೂ ವೈಫಲ್ಯ ಅನುಭವಿಸಿದ್ದರು. ಇದರ ಪರಿಣಾಮವಾಗಿ ಭಾರತ ತಂಡ, ತವರು ಅಂಗಣದಲ್ಲಿ ನ್ಯೂಜಿಲೆಂಡ್‌ ವಿರುದ್ದ ಕ್ಲೀನ್‌ ಸ್ವೀಪ್‌ ಆಘಾತ ಅನುಭವಿಸಿತ್ತು. ನಂತರ ಆಸ್ಟ್ರೇಲಿಯಾ ವಿರುದ್ಧ ಬಾರ್ಡರ್‌-ಗವಾಸ್ಕರ್‌ ಟ್ರೋಫಿ ಟೆಸ್ಟ್‌ ಸರಣಿಯಲ್ಲಿಯೂ ಸೋಲು ಅನುಭವಿಸಿತ್ತು.
ರೋಹಿತ್‌ ಶರ್ಮಾ ಬಾಲ್ಯದ ಕೋಚ್‌ ಹೇಳಿಕೆ
"ರೋಹಿತ್‌ ಶರ್ಮಾ ತುರಾತುರಿಯಲ್ಲಿ ನಿರ್ಧಾರ ತೆಗೆದುಕೊಂಡಿಲ್ಲ. ರೆಡ್‌ ಬಾಲ್‌ ಕ್ರಿಕೆಟ್‌ನಲ್ಲಿ ಫಾರ್ಮ್‌ನಲ್ಲಿ ಇಲ್ಲವೆಂದು ಅವರು ನಿವೃತ್ತಿ ಪಡೆದಿಲ್ಲ. ಟಿ20 ವಿಶ್ವಕಪ್‌ ಟೂರ್ನಿಯ ಬಳಿಕ ಅಂತಾರಾಷ್ಟ್ರೀಯ ಚುಟುಕು ಕ್ರಿಕೆಟ್‌ನಿಂದ ಮುಂದುವರಿಯಲು ಅವರು ಬಯಸಿರಲಿಲ್ಲ. ಅವರು ಏಕದಿನ ಹಾಗೂ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಮುಂದುವರಿದು, ತನ್ನ ಕಡೆಯಿಂದ ಉತ್ತಮವಾದ ಪ್ರದರ್ಶನವನ್ನು ನೀಡಲು ಬಯಸಿದ್ದರು," ಎಂದು ಅವರ ಕೋಚ್‌ ದಿನೇಶ್‌ ಲಾಡ್‌ ಹೇಳಿರುವುದನ್ನು ಪಿಟಿಐ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
"ಮುಂಬರುವ ಇಂಗ್ಲೆಂಡ್‌ ಟೆಸ್ಟ್‌ ಸರಣಿಯ ನಿಮಿತ್ತ ಈ ನಿರ್ಧಾರವನ್ನು ತೆಗೆದುಕೊಂಡಿಲ್ಲ. ಮುಂದಿನ ತಲೆಮಾರಿಗೆ ಟೆಸ್ಟ್‌ ತಂಡದಲ್ಲಿ ಅವಕಾಶ ನೀಡಬೇಕು ಹಾಗೂ ಬೆಳೆಸಬೇಕೆಂಬ ಕಾರಣದಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಅವರು ಟಿ20 ವಿಶ್ವಕಪ್‌ ಟೂರ್ನಿಯ ಬಳಿಕ ನಿವೃತ್ತಿ ಪಡೆದಿದ್ದು ಕೂಡ ಇದೇ ಕಾರಣ,"ಎಂದು ಅವರು ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.
Rohit sharma Retirement: ಟೆಸ್ಟ್‌ ಕ್ರಿಕೆಟ್‌ಗೆ ಹಠಾತ್‌ ವಿದಾಯ ಹೇಳಿದ ರೋಹಿತ್‌ ಶರ್ಮಾ!
ರೋಹಿತ್‌ ಶರ್ಮಾ 2027ರ ಏಕದಿನ ವಿಶ್ವಕಪ್‌ ಗೆಲ್ಲಬೇಕು
2024-25ರ ಸಾಲಿನ ಟೆಸ್ಟ್‌ ಋತುವಿನಲ್ಲಿ ರೋಹಿತ್‌ ಶರ್ಮಾ ಬ್ಯಾಟಿಂಗ್‌ ವೈಫಲ್ಯ ಅನುಭವಿಸಿದ್ದಾರೆ. ಈ ಆವೃತ್ತಿಯಲ್ಲಿ ಆಡಿದ 8 ಟೆಸ್ಟ್‌ ಪಂದ್ಯಗಳಿಂದ ಅವರು ಕೇವಲ 186 ರನ್‌ಗಳನ್ನು ಗಳಿಸಿದ್ದರು. ಆಸ್ಟ್ರೇಲಿಯಾ ವಿರುದ್ಧದ ಬಾರ್ಡರ್‌-ಗವಾಸ್ಕರ್‌ ಟ್ರೋಫಿ ಟೆಸ್ಟ್‌ ಸರಣಿಯಲ್ಲಿಯೂ ರೋಹಿತ್‌ ಶರ್ಮಾ ವೈಫಲ್ಯ ಅನುಭವಿಸಿದ್ದರು. ಆದರೆ, ಈಖ ಸರಣಿಯ ಕೊನೆಯ ಪಂದ್ಯದಲ್ಲಿ ರೋಹಿತ್‌ ಶರ್ಮಾ ಆಡಿರಲಿಲ್ಲ. ಸ್ವತಃ ಅವರೇ ಪ್ಲೇಯಿಂಗ್‌ xiನಿಂದ ದೂರ ಉಳಿದಿದ್ದರು.
"ವಿಶ್ವ ಟೆಸ್ಟ್‌ ಚಾಂಪಿಯನ್‌ಷಿಪ್‌ ಗೆಲ್ಲುವುದು ರೋಹಿತ್‌ ಶರ್ಮಾ ಗುರಿಯಾಗಿತ್ತು ಆದರೆ ಅನಿರೀಕ್ಷತವಾಗಿ ಭಾರತ ತಂಡ ಫೈನಲ್‌ಗೆ ಅರ್ಹತೆ ಪಡೆಯಲಿಲ್ಲ. ಇದೀಗ 2027ರ ಐಸಿಸಿ ಏಕದಿನ ವಿಶ್ವಕಪ್‌. ಅದರಂತೆ ಅವರು 2027ರ ಐಸಿಸಿ ಏಕದಿನ ವಿಶ್ವಕಪ್‌ ಗೆದ್ದ ಬಳಿಕ ರೋಹಿತ್‌ ಶರ್ಮಾ ವಿದಾಯ ಹೇಳಬೇಕು," ಎಂದು ದಿನೇಶ್‌ ಲಾಡ್‌ ತಿಳಿಸಿದ್ದಾರೆ.