IND vs NZ: ಒಂದೇ ಕೈನಲ್ಲಿ ಸ್ಟನಿಂಗ್‌ ಕ್ಯಾಚ್ ಪಡೆದು ವಿಶೇಷವಾಗಿ ಸಂಭ್ರಮಿಸಿದ ವಿರಾಟ್ ಕೊಹ್ಲಿ! ವಿಡಿಯೊ
ನ್ಯೂಜಿಲೆಂಡ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಒಂದೇ ಕೈಯಲ್ಲಿ ಅದ್ಭುತ ಡೈವಿಂಗ್ ಕ್ಯಾಚ್ ಪಡೆದು ನೇಥನ್ ಸ್ಮಿತ್ ಅವರನ್ನು ಔಟ್ ಮಾಡಿದರು. ಬಳಿಕ ಬಿಲ್ಲು-ಬಾಣದ ರೀತಿಯಲ್ಲಿ ಸಂಭ್ರಮಿಸಿದರು. ದೀಪಾವಳಿ ಹಿನ್ನೆಲೆಯಲ್ಲಿ ಅವರ ವಿಶೇಷ ಸಂಭ್ರಮ ಅಭಿಮಾನಿಗಳ ಗಮನ ಸೆಳೆಯಿತು.
ಸ್ಟನಿಂಗ್‌ ಕ್ಯಾಚ್ ಪಡೆದು ಸಂಭ್ರಮಿಸಿದ ವಿರಾಟ್ ಕೊಹ್ಲಿ! -
ಆಕ್ಲೆಂಡ್‌: ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ಮೊದಲ ಏಕದಿನ ಪಂದ್ಯದಲ್ಲಿ (IND vs NZ) ಟೀಮ್‌ ಇಂಡಿಯಾದ ಮಾಜಿ ನಾಯಕ ವಿರಾಟ್ ಕೊಹ್ಲಿ (Virat Kohli) ತಮ್ಮ ಅದ್ಭುತ ಫೀಲ್ಡಿಂಗ್ ಮೂಲಕ ಮತ್ತೊಮ್ಮೆ ಅಭಿಮಾನಿಗಳ ಮನ ಗೆದ್ದಿದ್ದಾರೆ. ಆಕ್ಲೆಂಡ್‌ನ ಈಡನ್ ಪಾರ್ಕ್‌ನಲ್ಲಿ ನಡೆದಿದ್ದ ಈ ಪಂದ್ಯದಲ್ಲಿ ಕೊಹ್ಲಿ ಒಂದೇ ಕೈಯಲ್ಲಿ ಅದ್ಭುತ ಡೈವಿಂಗ್ ಕ್ಯಾಚ್ ಪಡೆದು ನ್ಯೂಜಿಲೆಂಡ್ ಬ್ಯಾಟರ್ ನೇಥನ್ ಸ್ಮಿತ್ ಅವರನ್ನು ಪೆವಿಲಿಯನ್‌ಗೆ ಕಳುಹಿಸಿದರು.
ಕ್ಯಾಚ್ ಹಿಡಿದ ಬಳಿಕ ಕೊಹ್ಲಿ ಮಾಡಿದ ಬಿಲ್ಲು-ಬಾಣದ ಸಂಭ್ರಮ ಕೂಡ ವಿಶೇಷ ಗಮನ ಸೆಳೆದಿದೆ. ದೀಪಾವಳಿ ಹಬ್ಬದ ಸಂಭ್ರಮ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಅವರ ಈ ಸಂಭ್ರಮಕ್ಕೆ ವಿಶೇಷ ಅರ್ಥ ಕಲ್ಪಿಸಲಾಗಿದೆ. ಈ ಘಟನೆಯ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳ ಗಮನ ಸೆಳೆದಿದೆ.
IND vs NZ 1st ODI: ಅರ್ಷದೀಪ್ ಸಿಂಗ್ ಮಾರಕ ವೇಗಕ್ಕೆ 185ಕ್ಕೆ ನ್ಯೂಜಿಲೆಂಡ್ ಆಲ್‌ಔಟ್‌!
ಒಂದೇ ಕೈಯಲ್ಲಿ ಅದ್ಭುತ ಕ್ಯಾಚ್ ಪಡೆದ ಕೊಹ್ಲಿ
ನ್ಯೂಜಿಲೆಂಡ್ ಇನಿಂಗ್ಸ್‌ನ 29ನೇ ಓವರ್‌ನಲ್ಲಿ ಭಾರತದ ವೇಗಿ ಅನ್ಶುಲ್ ಕಾಂಬೋಜ್ ಬೌಲ್ ಮಾಡುತ್ತಿದ್ದರು. ಈ ವೇಳೆ ನೇಥನ್ ಸ್ಮಿತ್ ಚೆಂಡನ್ನು ಡ್ರೈವ್ ಮಾಡಲು ಪ್ರಯತ್ನಿಸಿದರು. ಆದರೆ ಬ್ಯಾಟ್‌ನ ಅಂಚಿಗೆ ತಾಗಿದ ಚೆಂಡು ಎರಡನೇ ಸ್ಲಿಪ್‌ನಲ್ಲಿದ್ದ ವಿರಾಟ್ ಕೊಹ್ಲಿ ಕಡೆಗೆ ಸಾಗಿತು. ತಕ್ಷಣವೇ ಬಲಭಾಗಕ್ಕೆ ಡೈವ್ ಮಾಡಿದ ಕೊಹ್ಲಿ, ನೆಲಕ್ಕೆ ಬೀಳುವ ಕೆಲವೇ ಇಂಚುಗಳ ಮುನ್ನ ಬಲಗೈಯಲ್ಲಿ ಚೆಂಡನ್ನು ಪಡೆದು ಅದ್ಭುತ ಕ್ಯಾಚ್ ಪೂರ್ಣಗೊಳಿಸಿದರು. ಕ್ಯಾಚ್‌ನ ಅನ್ನು ಪರಿಶೀಲಿಸಲು ಮೂರನೇ ಅಂಪೈರ್‌ಗೆ ನಿರ್ಧಾರವನ್ನು ಕಳುಹಿಸಲಾಗಿತ್ತು. ಮರುಪರಿಶೀಲನೆಯ ಬಳಿಕ ಕ್ಯಾಚ್ ಸರಿಯಾಗಿರುವುದು ದೃಢಪಟ್ಟಿತು. ಇದರಿಂದ ನೇಥನ್ ಸ್ಮಿತ್ ಅವರ ಇನಿಂಗ್ಸ್ ಅಂತ್ಯಗೊಂಡಿತು. ಅವರು 9 ಎಸೆತಗಳಲ್ಲಿ ಕೇವಲ 1 ರನ್ ಗಳಿಸಿದ್ದರು.
🔴 VIRAT KOHLI IS BACK WITH HIS ICONIC DHANUSH CELEBRATION! 🥹🏹 - Finally, our day is made! The GOAT has brought back his iconic celebration for us! 😭❤️ https://t.co/sayD7M3Ahh
— Sam (@cricsam02) November 4, 2026
ಕ್ಯಾಚ್ ಬಳಿಕ ಬಿಲ್ಲು-ಬಾಣದ ಸಂಭ್ರಮ
ಕ್ಯಾಚ್ ಹಿಡಿದ ತಕ್ಷಣವೇ ವಿರಾಟ್ ಕೊಹ್ಲಿ ಸಂಭ್ರಮದಿಂದ ಮೈದಾನದಲ್ಲಿ ಓಡಿದರು. ಬಳಿಕ ಬಿಲ್ಲು ಹಿಡಿದು ಬಾಣ ಬಿಡುವ ರೀತಿಯಲ್ಲಿ ವಿಶೇಷ ಸಂಭ್ರಮ ಆಚರಿಸಿದರು. ದೀಪಾವಳಿ ಹಬ್ಬ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಕೊಹ್ಲಿ ಅವರ ಈ ಬಿಲ್ಲು-ಬಾಣದ ಸಂಭ್ರಮವು ಭಗವಾನ್ ಶ್ರೀರಾಮನನ್ನು ನೆನಪಿಸುವಂತಿತ್ತು. ನಂತರ ತಂಡದ ಆಟಗಾರರತ್ತ ತಿರುಗಿ ಡಬ್ಲ್ಯುಡಬ್ಲ್ಯುಇ ತಾರೆ ಜಾನ್ ಸೀನಾ ಅವರ ಪ್ರಸಿದ್ಧ 'You Can't See Me' ಶೈಲಿಯಲ್ಲಿಯೂ ಸಂಭ್ರಮಿಸಿದರು.
IND vs NZ: 4 ವಿಕೆಟ್‌ನೊಂದಿಗೆ ಜಾವಗಲ್‌ ಶ್ರೀನಾಥ್‌ ಒಳಗೊಂಡ ಎಲೈಟ್‌ ಲಿಸ್ಟ್‌ ಸೇರಿದ ಅರ್ಷದೀಪ್ ಸಿಂಗ್!
ನ್ಯೂಜಿಲೆಂಡ್ ಸಂಕಷ್ಟಕ್ಕೆ ಸಿಲುಕಿದ ಸಂದರ್ಭ
ಕೊಹ್ಲಿ ಈ ಅದ್ಭುತ ಕ್ಯಾಚ್ ಪಡೆದಾಗ ನ್ಯೂಜಿಲೆಂಡ್ ತಂಡ 28.3 ಓವರ್‌ಗಳಲ್ಲಿ 115 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡಿತ್ತು. ಭಾರತದ ಬೌಲರ್‌ಗಳು ನಿರಂತರವಾಗಿ ವಿಕೆಟ್ ಪಡೆಯುತ್ತಿದ್ದರೆ, ಫೀಲ್ಡಿಂಗ್‌ನಲ್ಲಿಯೂ ತಂಡ ಉತ್ತಮ ಪ್ರದರ್ಶನ ನೀಡುತ್ತಿತ್ತು.
ಅರ್ಷದೀಪ್ ಸಿಂಗ್, ಅನ್ಶುಲ್ ಕಾಂಬೋಜ್ ಸೇರಿದಂತೆ ಭಾರತದ ಬೌಲರ್‌ಗಳು ನ್ಯೂಜಿಲೆಂಡ್ ಬ್ಯಾಟರ್‌ಗಳಿಗೆ ರನ್ ಗಳಿಸಲು ಅವಕಾಶ ನೀಡಲಿಲ್ಲ. ಅಂತಿಮವಾಗಿ ನ್ಯೂಜಿಲೆಂಡ್ ತಂಡ 40.2 ಓವರ್‌ಗಳಲ್ಲಿ 185 ರನ್‌ಗಳಿಗೆ ಆಲೌಟ್ ಆಯಿತು.