ಭಾರತ-ಪಾಕ್‌ ವಿಶ್ವಕಪ್‌ ಪಂದ್ಯ; ಆಸನ ಸಾಮರ್ಥ್ಯಕ್ಕೂ ಅಧಿಕ ಟಿಕೆಟ್‌ ಬೇಡಿಕೆ

ಮುಂಬಯಿ, ನ.3: 2027ರ ಏಕದಿನ ವಿಶ್ವಕಪ್‌ನಲ್ಲಿ ನಡೆಯಲಿರುವ ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯಕ್ಕೆ ಬರೋಬ್ಬರಿ 84 ಲಕ್ಷ ಟಿಕೆಟ್ ಕೋರಿಕೆಗಳು ಬಂದಿವೆ. ಆದರೆ, ಈ ಪಂದ್ಯ ನಡೆಯಲಿರುವ ಕ್ರೀಡಾಂಗಣದ (ಜೋಹಾನ್ಸ್‌ಬರ್ಗ್‌ನ 'ದಿ ವಂಡರರ್ಸ್ ಸ್ಟೇಡಿಯಂ') ಸಾಮರ್ಥ್ಯ ಕೇವಲ 34,000 ಪ್ರೇಕ್ಷಕರಿಗೆ ಮಾತ್ರ ಸೀಮಿತವಾಗಿದೆ. ಅಕ್ಟೋಬರ್ 10ರಂದು ನಡೆಯಲಿರುವ ಈ ಬಹುನಿರೀಕ್ಷಿತ ಪಂದ್ಯವು, ಟೂರ್ನಿಯಲ್ಲೇ ಅತ್ಯಂತ ಹೆಚ್ಚು ಬೇಡಿಕೆಯಿರುವ ಪಂದ್ಯಗಳಲ್ಲಿ ಒಂದಾಗಿ ಹೊರಹೊಮ್ಮಿದೆ.

ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಪ್ರಕಾರ, ಪ್ರಸ್ತುತ ನಡೆಯುತ್ತಿರುವ ಟಿಕೆಟ್ ಹಂಚಿಕೆ ಪ್ರಕ್ರಿಯೆಯಲ್ಲಿ ಭಾರತ-ಪಾಕಿಸ್ತಾನ ಪಂದ್ಯಕ್ಕಾಗಿ 8,397,294 ಟಿಕೆಟ್ ಕೋರಿಕೆಗಳು ಬಂದಿವೆ. ಈ ಬೇಡಿಕೆಯು ಜೋಹಾನ್ಸ್‌ಬರ್ಗ್ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯಕ್ಕಿಂತಲೂ ಬಹಳ ಹೆಚ್ಚಾಗಿದ್ದು, ಕ್ರಿಕೆಟ್ ಜಗತ್ತಿನ ಅತಿದೊಡ್ಡ ಪ್ರತಿಸ್ಪರ್ಧೆಯ ಕುರಿತು ಇರುವ ಅಪಾರ ಆಸಕ್ತಿಯನ್ನು ಇದು ಎತ್ತಿ ತೋರಿಸುತ್ತದೆ.

ಇದಕ್ಕೆ ಹೋಲಿಸಿದರೆ, ನವೆಂಬರ್ 21 ರಂದು 'ದಿ ವಂಡರರ್ಸ್ ಸ್ಟೇಡಿಯಂ'ನಲ್ಲಿಯೇ ನಡೆಯಲಿರುವ 2027ರ ಏಕದಿನ ವಿಶ್ವಕಪ್‌ನ ಫೈನಲ್ ಪಂದ್ಯಕ್ಕೆ ಸುಮಾರು 79 ಲಕ್ಷ (7,900,944) ವಿನಂತಿಗಳು ಬಂದಿದ್ದು, ಇದು ಈವರೆಗೆ ಅತಿ ಹೆಚ್ಚು ಬೇಡಿಕೆಯಿರುವ ಪಂದ್ಯಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದೆ.

ಟೂರ್ನಮೆಂಟ್‌ನ ಟಿಕೆಟ್ ಹಂಚಿಕೆ ಪ್ರಕ್ರಿಯೆಗೆ ಅಭೂತಪೂರ್ವ ಪ್ರತಿಕ್ರಿಯೆ ವ್ಯಕ್ತವಾಗಿರುವ ನಡುವೆಯೇ, ಭಾರತ ಮತ್ತು ಪಾಕಿಸ್ತಾನ ನಡುವಿನ ಪಂದ್ಯಕ್ಕೆ ಭಾರಿ ಬೇಡಿಕೆ ಕಂಡುಬಂದಿದೆ. ಐಸಿಸಿ 193 ದೇಶಗಳ ಅಭಿಮಾನಿಗಳಿಂದ 12 ಕೋಟಿಗೂ (120 ಮಿಲಿಯನ್) ಹೆಚ್ಚು ಟಿಕೆಟ್ ವಿನಂತಿಗಳನ್ನು ಸ್ವೀಕರಿಸಿದೆ. ಈ ಪೈಕಿ 28 ಲಕ್ಷ (2.8 ಮಿಲಿಯನ್) ಮಂದಿ ಅಭಿಮಾನಿಗಳು ಪಂದ್ಯಾವಳಿಯನ್ನು ವೀಕ್ಷಿಸಲು ಆಸಕ್ತಿ ವ್ಯಕ್ತಪಡಿಸಿ ನೋಂದಾಯಿಸಿಕೊಂಡಿದ್ದಾರೆ.

ಜೈಸ್ವಾಲ್, ರಾಥೋಡ್ ಆಕರ್ಷಕ ಶತಕ; 2ನೇ ಅನಧಿಕೃತ ಟೆಸ್ಟ್ ಡ್ರಾದಲ್ಲಿ ಅಂತ್ಯ

2027ರ ಏಕದಿನ ವಿಶ್ವಕಪ್ ಟೂರ್ನಿಯು 24 ವರ್ಷಗಳ ನಂತರ ಮೊದಲ ಬಾರಿಗೆ ಆಫ್ರಿಕಾ ನೆಲಕ್ಕೆ ಮರಳಲಿದೆ. ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಮತ್ತು ನಮೀಬಿಯಾ ದೇಶಗಳು ಜಂಟಿಯಾಗಿ ಈ ಟೂರ್ನಿಯನ್ನು ಆಯೋಜಿಸಲಿವೆ. ಒಟ್ಟು 12 ಸ್ಥಳಗಳಲ್ಲಿ ನಡೆಯಲಿರುವ ಈ ಟೂರ್ನಿಯಲ್ಲಿ 14 ತಂಡಗಳು 57 ಪಂದ್ಯಗಳಲ್ಲಿ ಸೆಣಸಾಡಲಿವೆ.

ದಕ್ಷಿಣ ಆಫ್ರಿಕಾದ ಎಂಟು ಕ್ರೀಡಾಂಗಣಗಳಲ್ಲಿ ನಡೆದ 41 ಪಂದ್ಯಗಳಿಗೆ ಒಟ್ಟು 105 ದಶಲಕ್ಷಕ್ಕೂ ಹೆಚ್ಚು ಟಿಕೆಟ್ ಕೋರಿಕೆಗಳು ಬಂದಿವೆ. ಇದರಲ್ಲಿ ಆತಿಥೇಯ ತಂಡ ಭಾಗವಹಿಸಿದ ಪಂದ್ಯಗಳಿಗೆ ಸಂಬಂಧಿಸಿದಂತೆ ಸುಮಾರು 26 ದಶಲಕ್ಷ ಕೋರಿಕೆಗಳು ಸಲ್ಲಿಕೆಯಾಗಿವೆ.

ಟಿಕೆಟ್ ಪಡೆಯುವ ಪ್ರಕ್ರಿಯೆಯು ನವೆಂಬರ್ 21, 2026 ರವರೆಗೆ ತೆರೆದಿರುತ್ತದೆ. ಅಭಿಮಾನಿಗಳು ಐಸಿಸಿಯ (ICC) ಅಧಿಕೃತ ಟಿಕೆಟಿಂಗ್ ವೆಬ್‌ಸೈಟ್ ಮೂಲಕ ತಮ್ಮ ಆಸಕ್ತಿಯನ್ನು ನೋಂದಾಯಿಸಿಕೊಳ್ಳಬಹುದು. ಲಭ್ಯವಿರುವ ಟಿಕೆಟ್‌ಗಳ ಸಂಖ್ಯೆಗಿಂತ ಬೇಡಿಕೆ ಹೆಚ್ಚಿರುವ ಪಂದ್ಯಗಳಿಗೆ, ಯಾದೃಚ್ಛಿಕ ಆಯ್ಕೆ ಪ್ರಕ್ರಿಯೆಯ ಮೂಲಕ ಅರ್ಜಿದಾರರನ್ನು ಆಯ್ಕೆ ಮಾಡಲಾಗುತ್ತದೆ.