ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್‌ಗೆ ಕೊಲಂಬೊಗೆ ಆಗಮಿಸಿದ ಭಾರತ ತಂಡ

ಕೊಲಂಬೊ, ಆ.21: ಶ್ರೀಲಂಕಾ ವಿರುದ್ಧದ ಎರಡು ಪಂದ್ಯಗಳ ಸರಣಿಯ ಎರಡನೇ ಮತ್ತು ಅಂತಿಮ ಟೆಸ್ಟ್ ಪಂದ್ಯಕ್ಕಾಗಿ ಭಾರತೀಯ ಕ್ರಿಕೆಟ್ ತಂಡ ಕೊಲಂಬೊಗೆ ಆಗಮಿಸಿದೆ. ಮೊದಲ ಪಂದ್ಯ ಗೆದ್ದಿರುವ ಟೀಮ್‌ ಇಂಡಿಯಾ ಇದೀಗ ಈ ಪಂದ್ಯವನ್ನು ಗೆದ್ದು ಸರಣಿ ಕ್ಲೀನ್‌ಸ್ವೀಪ್‌ ಮಾಡುವ ಜೋಶ್‌ನಲ್ಲಿದೆ. ಈ ಪಂದ್ಯವು ಆಗಸ್ಟ್ 23 ರ ಭಾನುವಾರದಿಂದ ಪ್ರಾರಂಭವಾಗಿ ಆಗಸ್ಟ್ 27 ರವರೆಗೆ ನಡೆಯಲಿದೆ.

ಗಾಲೆಯಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯವನ್ನು ಭಾರತ 165 ರನ್‌ಗಳಿಂದ ಗೆಲುವು ಸಾಧಿಸಿತ್ತು. ಎರಡನೇ ಟೆಸ್ಟ್‌ಗೆ ಭಾರತ ತನ್ನ ಆಡುವ ಬಳಗದಲ್ಲಿ ಯಾವುದೇ ಬದಲಾವಣೆ ಮಾಡುವ ಸಾಧ್ಯತೆ ಕಡಿಮೆ. ಕೊಲಂಬೊ ಪಿಚ್‌ ಕೂಡ ಸ್ಪಿನ್‌ ಟ್ರ್ಯಾಕ್‌ ಆಗಿದೆ. ಹೀಗಾಗಿ ಅನುಭವಿ ರವೀಂದ್ರ ಜಡೇಜಾ ಮತ್ತು ಯುವ ಸ್ಪಿನ್ನರ್‌ ಮಾನವ್‌ ಸುತಾರ್‌ ಮೇಲೆ ಹೆಚ್ಚಿನ ನಿರೀಕ್ಷೆ ಇಡಲಾಗಿದೆ.

ಭಾರತಕ್ಕೆ ಗೆಲುವು ಅಗತ್ಯ

ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ 10 ಟೆಸ್ಟ್‌ಗಳಲ್ಲಿ ಐದನೇ ಗೆಲುವು ಸಾಧಿಸಿದ ನಂತರ ಭಾರತ ತನ್ನ ಪಾಯಿಂಟ್‌ಗಳನ್ನು 64 ಅಂಕಗಳಿಗೆ ಹೆಚ್ಚಿಸಿಕೊಂಡಿದೆ. ಅಂಕಗಳ ಶೇಕಡಾವಾರು (ಪಿಸಿಟಿ) 53.33 ಕ್ಕೆ ಏರಿದೆ ಆದರೆ ಸ್ಥಾನದ ಬದಲಾವಣೆಯಾಗಿಲ್ಲ. ಹಿಂದಿನಂತೆ 5ನೇ ಸ್ಥಾನದಲ್ಲಿಯೇ ಉಳಿದಿದೆ. ಕಳೆದ ವಾರ ಆಸ್ಟ್ರೇಲಿಯಾ ವಿರುದ್ಧ ಐತಿಹಾಸಿಕ ಗೆಲುವಿನ ನಂತರ ಬಾಂಗ್ಲಾದೇಶವು ಪಟ್ಟಿಯಲ್ಲಿ ಮೇಲಕ್ಕೆ ಬಂದಿತ್ತು. ಶ್ರೀಲಂಕಾ ಕೂಡ ಸೋಲಿನ ಹೊರತಾಗಿಯೂ ಆರನೇ ಸ್ಥಾನವನ್ನು ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಆದರೆ ಅಂಕಗಳ ಶೇಕಡಾವಾರು 41.67 ರಿಂದ 33.33 ಕ್ಕೆ ಇಳಿದಿದೆ.

ತಲಾ ಐದು ವಿಕೆಟ್‌; ಅರ್ಧ ಚೆಂಡು ಹಂಚಿಕೊಂಡ ಇಂಗ್ಲೆಂಡ್‌ ವೇಗಿಗಳು

ಭಾರತ ತನ್ನ ಉಳಿದ ಎಂಟು ಟೆಸ್ಟ್‌ಗಳಲ್ಲಿ ಏಳನ್ನು ಗೆದ್ದರೆ, ಅದು 68.52 PCT ಯೊಂದಿಗೆ ಮುಗಿಸುತ್ತದೆ. ಅದೇ ಸಮಯದಲ್ಲಿ, ಆರು ಗೆಲುವುಗಳು ಮತ್ತು ಎರಡು ಸೋಲುಗಳು ಅವರ PCT 62.96 ಕ್ಕೆ ಏರಿಕೆಯಾಗುತ್ತದೆ. ಮಾತ್ರವಲ್ಲದೆ ಭಾರತಕ್ಕೆ ಯಾವುದೇ ಪೆನಾಲ್ಟಿ ಪಾಯಿಂಟ್‌ಗಳು ಸಿಗದಿದ್ದರೆ ಮಾತ್ರ ಈ ಸನ್ನಿವೇಶಗಳು ಸಾಧ್ಯ.

ಆಸ್ಟ್ರೇಲಿಯಾ ಒಂಬತ್ತು ಟೆಸ್ಟ್‌ಗಳಲ್ಲಿ ಏಳು ಗೆಲುವುಗಳು ಮತ್ತು 77.78 ಅಂಕಗಳೊಂದಿಗೆ WTC 2025-27 ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ದಕ್ಷಿಣ ಆಫ್ರಿಕಾ 75% ನೊಂದಿಗೆ ಎರಡನೇ ಸ್ಥಾನದಲ್ಲಿದೆ. ನ್ಯೂಜಿಲೆಂಡ್ 72.22% ಮತ್ತು ಬಾಂಗ್ಲಾದೇಶ 66.67% ನೊಂದಿಗೆ ನಂತರದ ಸ್ಥಾನದಲ್ಲಿದೆ.