ವಿಶ್ವದ 5ನೇ ಶ್ರೇಯಾಂಕಿತೆ ಹಾನ್ ಯು ಮಣಿಸಿ ಜಪಾನ್ ಓಪನ್ ಕ್ವಾರ್ಟರ್ ಫೈನಲ್ ತಲುಪಿದ ಸಿಂಧು

ಟೋಕಿಯೊ, ಜು.16: ಎರಡು ಬಾರಿಯ ಒಲಿಂಪಿಕ್ ಪದಕ ವಿಜೇತೆ ಪಿವಿ ಸಿಂಧು, ಗುರುವಾರ ನಡೆದ ಜಪಾನ್ ಓಪನ್ ಸೂಪರ್ 750 ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ವಿಶ್ವದ 5ನೇ ಶ್ರೇಯಾಂಕಿತ ಆಟಗಾರ್ತಿ ಚೀನಾದ ಹಾನ್ ಯು ಅವರನ್ನು ನೇರ ಗೇಮ್‌ಗಳಲ್ಲಿ ಸೋಲಿಸುವ ಮೂಲಕ ಈ ಋತುವಿನ ಅತ್ಯುತ್ತಮ ಪ್ರದರ್ಶನ ನೀಡಿದರು. ಈ ಗೆಲುವಿನೊಂದಿಗೆ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರು.

ವಿಶ್ವದ 10 ನೇ ಶ್ರೇಯಾಂಕದ ಭಾರತೀಯ ಆಟಗಾರ್ತಿಗೆ ಎರಡನೇ ಸುತ್ತಿನ ಪಂದ್ಯದಲ್ಲಿ 21-16, 21-14 ಅಂತರದ ಗೆಲುವು ಸಾಧಿಸಲು ಕೇವಲ 35 ನಿಮಿಷಗಳು ಬೇಕಾಯಿತು. ನಿಧಾನಗತಿಯ ಆರಂಭದ ನಂತರ, ಟೂರ್ನಿಯಲ್ಲಿ ಶ್ರೇಯಾಂಕವಿಲ್ಲದ ಸಿಂಧು ಮೊದಲ ಗೇಮ್‌ನ ಮಧ್ಯದಲ್ಲಿ ತನ್ನ ಲಯವನ್ನು ಕಂಡುಕೊಂಡರು. ಆ ಬಳಿಕ ಬಲವಾದ ಹೊಡೆತಗಳ ಮೂಲಕ ಎದುರಾಳಿ ಮೇಲೆ ಒತ್ತಡ ಹೇರಿ ಮುನ್ನಡೆ ಸಾಧಿಸಿದರು.

ವಾಷಿಂಗ್ಟನ್ ಫ್ರೀಡಂ ತಂಡದ ಬ್ಯಾಟಿಂಗ್‌ ಆರ್ಭಟಕ್ಕೆ ಪಂಜಾಬ್‌ ಕಿಂಗ್ಸ್‌ ದಾಖಲೆ ಪತನ

ಎರಡನೇ ಗೇಮ್‌ನಲ್ಲಿಯೂ ಸಂಪೂರ್ಣವಾಗಿ ಪ್ರಾಬಲ್ಯ ಸಾಧಿಸಿ, 8-0 ಮುನ್ನಡೆ ಸಾಧಿಸಿ ಸ್ಪರ್ಧೆಯನ್ನು ಆರಾಮವಾಗಿ ಮುಗಿಸಿದರು. ಈ ಗೆಲುವಿನೊಂದಿಗೆ, ಸಿಂಧು ಹಾನ್ ವಿರುದ್ಧದ ಹೆಡ್-ಟು-ಹೆಡ್ ದಾಖಲೆಯನ್ನು 8-1ಕ್ಕೆ ಸುಧಾರಿಸಿಕೊಂಡರು.

31 ವರ್ಷದ ಸಿಂಧು ಮುಂದಿನ ಸುತ್ತಿನಲ್ಲಿ ಬದ್ಧ ಎದುರಾಳಿ ಜಪಾನ್‌ನ ನೊಜೊಮಿ ಒಕುಹರಾ ಅವರನ್ನು ಎದುರಿಸಲಿದ್ದಾರೆ. ಅಗ್ರ ಶ್ರೇಯಾಂಕಿತ ದಕ್ಷಿಣ ಕೊರಿಯಾದ ಆನ್ ಸೆ-ಯಂಗ್ ತಮ್ಮ ಎರಡನೇ ಸುತ್ತಿನ ಪಂದ್ಯದಿಂದ ಹಿಂದೆ ಸರಿದ ನಂತರ ಅವರಿಗೆ ವಾಕ್ ಓವರ್ ಸಿಕ್ಕಿತು.

ಮಿಶ್ರ ಡಬಲ್ಸ್ ಜೋಡಿ ತನಿಶಾ ಕ್ರಾಸ್ಟೊ ಮತ್ತು ಧ್ರುವ್ ಕಪಿಲಾ ಪ್ರಿ-ಕ್ವಾರ್ಟರ್ ಫೈನಲ್‌ನಲ್ಲಿ ಸೋತ ನಂತರ ಸಿಂಧು ಈಗ ಟೂರ್ನಿಯಲ್ಲಿ ಭಾರತದ ಏಕೈಕ ಬದುಕುಳಿದ ಆಟಗಾರ್ತಿಯಾಗಿದ್ದಾರೆ. 47 ನಿಮಿಷಗಳ ಕಾಲ ನಡೆದ 16ನೇ ಸುತ್ತಿನ ಪಂದ್ಯದಲ್ಲಿ ಭಾರತದ ಜೋಡಿ 20-22, 17-21 ಅಂತರದಲ್ಲಿ ಅಗ್ರ ಶ್ರೇಯಾಂಕದ ಚೀನಾದ ಫೆಂಗ್ ಯಾನ್ ಝೆ ಮತ್ತು ಹುವಾಂಗ್ ಡಾಂಗ್ ಪಿಂಗ್ ವಿರುದ್ಧ ಸೋತರು.