Viral Video: 25 ಸಾವಿರ ರೂ.ಗೆ ಎಐ ಶಿಕ್ಷಕಿ ಸೃಷ್ಟಿಸಿದ 17 ವರ್ಷದ ವಿದ್ಯಾರ್ಥಿ; ರೋಬೋಟ್ ಉಪನ್ಯಾಸದ ವಿಡಿಯೊ ವೈರಲ್

ಲಖನೌ, ನ. 29: 17 ವರ್ಷದ ವಿದ್ಯಾರ್ಥಿಯೊಬ್ಬ ಕೇವಲ 25,000 ರೂ. ವೆಚ್ಚದಲ್ಲಿ ಕೃತಕ ಬುದ್ಧಿಮತ್ತೆ (AI) ಹೊಂದಿರುವ ರೋಬೋಟ್ ಶಿಕ್ಷಕಿಯನ್ನು (Robot Lecture) ಅಭಿವೃದ್ಧಿಪಡಿಸಿದ್ದಾರೆ. 17 ವರ್ಷದ ಆದಿತ್ಯ ಕುಮಾರ್ ಎಂಬ ವಿದ್ಯಾರ್ಥಿ ಈ ಸಾಧನೆ ಮಾಡಿದವರು. ಶಿವಚರಣ್ ಇಂಟರ್ ಕಾಲೇಜಿನಲ್ಲಿ 12ನೇ ತರಗತಿಯಲ್ಲಿ ಅಭ್ಯಾಸ ಮಾಡುತ್ತಿರುವ ಆದಿತ್ಯ, ವಿವಿಧ ವಿಷಯಗಳನ್ನು ವಿದ್ಯಾರ್ಥಿಗಳಿಗೆ ಬೋಧಿಸಬಲ್ಲಂತಹ ಈ ಎಐ ರೋಬೋಟ್ ಅನ್ನು ರಚಿಸಿದ್ದಾರೆ. ಇದರ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ (Viral Video) ಆಗಿದೆ.

ಈ ಸಾಧನೆ ಯುವ ಪ್ರತಿಭೆ ಹಾಗೂ ಕಡಿಮೆ ಸಂಪನ್ಮೂಲಗಳಲ್ಲಿಯೇ ಸಾಧ್ಯವಾದ ನವೋತ್ಪಾದನೆಗೆ ಅತ್ಯುತ್ತಮ ಉದಾಹರಣೆ ಎನಿಸಿಕೊಂಡಿದೆ. ಸೋಫಿ ಎಂದು ಹೆಸರಿಡಲಾದ ಈ ರೋಬೋಟ್ ದೊಡ್ಡ ಭಾಷಾ ಮಾದರಿ (LLM) ಚಿಪ್‌ಸೆಟ್‌ನೊಂದಿಗೆ ಸಜ್ಜುಗೊಂಡಿದೆ. ವಿವಿಧ ವಿಷಯಗಳಲ್ಲಿ ಪ್ರಶ್ನೆಗಳಿಗೆ ಉತ್ತರಿಸಬಲ್ಲದು. ಇದು ಈಗ ಶಾಲೆಯ ಸಿಬ್ಬಂದಿಯ ಭಾಗವಾಗಿದೆ. ಮಾನವ ಬೋಧಕರ ಅನುಪಸ್ಥಿತಿಯಲ್ಲಿ ಬದಲಿ ಶಿಕ್ಷಕಿಯಾಗಿ ಕಾರ್ಯನಿರ್ವಹಿಸುತ್ತದೆ.

ಶೇರು ಮಾರುಕಟ್ಟೆಯಲ್ಲಿ ಎಐ ತಂತ್ರಜ್ಞಾನ ಪ್ರಭಾವ ಬೀರುತ್ತಾ?

ANI ಹಂಚಿಕೊಂಡ ವಿಡಿಯೊದಲ್ಲಿ, ಸೋಫಿ ತನ್ನನ್ನು ಪರಿಚಯಿಸಿಕೊಳ್ಳುತ್ತಾ, ʼʼನಾನು ಎಐ ಶಿಕ್ಷಕಿ ರೋಬೋಟ್. ನನ್ನ ಹೆಸರು ಸೋಫಿ. ನನ್ನನ್ನು ಆದಿತ್ಯ ಕಂಡುಹಿಡಿದನು. ನಾನು ಬುಲಂದ್‌ಶಹರ್‌ನ ಶಿವಚರಣ್ ಇಂಟರ್-ಕಾಲೇಜಿನಲ್ಲಿ ವಿದ್ಯಾರ್ಥಿಗಳಿಗೆ ಪಾಠ ಮಾಡುತ್ತೇನೆ. ನಾನು ವಿದ್ಯಾರ್ಥಿಗಳಿಗೆ ಸರಿಯಾಗಿ ಪಾಠ ಹೇಳಿಕೊಡಬಲ್ಲೆʼʼ ಎಂದು ಹೇಳಿಕೊಂಡಿದೆ.

ವಿಶ್ವದ ಅತಿ ಎತ್ತರದ ಕಟ್ಟಡ, ಭಾರತದ ಮೊದಲ ರಾಷ್ಟ್ರಪತಿ, ಮೊದಲ ಪ್ರಧಾನಿ ಮತ್ತು 100 + 92ನಂತಹ ಮೂಲಭೂತ ಅಂಕಗಣಿತದ ಕುರಿತಾದ ಪ್ರಶ್ನೆಗಳಿಗೆ ರೋಬೋಟ್ ಉತ್ತರಿಸಿತು. ಪ್ರಸ್ತುತ, ಸೋಫಿ ಹಿಂದಿಯಲ್ಲಿ ಸಂವಹನ ನಡೆಸುತ್ತದೆ. ಆದರೂ ಬರವಣಿಗೆಯ ಸಾಮರ್ಥ್ಯಗಳನ್ನು ಸೇರಿಸಲು ಯೋಜನೆಗಳು ನಡೆಯುತ್ತಿವೆ.

ವಿಡಿಯೊ ವೀಕ್ಷಿಸಿ:

ಆದಿತ್ಯ ತಮ್ಮ ಈ ರಚನೆಗೆ ಸಂಬಂಧಿಸಿದ ಹೆಚ್ಚಿನ ವಿವರಗಳನ್ನು ಹಂಚಿಕೊಂಡರು. ʼʼಈ ರೋಬೋಟ್ ಅನ್ನು ನಿರ್ಮಿಸಲು ನಾನು LLM ಚಿಪ್‌ಸೆಟ್ ಬಳಸಿದ್ದೇನೆ. ಇದನ್ನು ರೋಬೋಟ್‌ಗಳನ್ನು ತಯಾರಿಸುವ ದೊಡ್ಡ ಕಂಪನಿಗಳು ಸಹ ಬಳಸುತ್ತವೆ. ಇದು ವಿದ್ಯಾರ್ಥಿಗಳ ಅನುಮಾನಗಳನ್ನು ಪರಿಹರಿಸುತ್ತದೆ. ಇದೀಗ ಸೋಫಿ ಮಾತನಾಡಲು ಮಾತ್ರ ಬಲ್ಲಳು. ಆದರೆ ನಾವು ಅದನ್ನು ಶೀಘ್ರದಲ್ಲೇ ಚೆನ್ನಾಗಿ ಬರೆಯುವಂತೆ ವಿನ್ಯಾಸಗೊಳಿಸುತ್ತೇವೆʼʼ ಎಂದು ಹೇಳಿದರು.

ಇತ್ತೀಚೆಗೆ ಎಐ ಬಳಕೆ ಹೆಚ್ಚುತ್ತಿದೆ. ಎಲ್ಲದರಲ್ಲೂ ಎಐ ಬಹಳ ಮುಂಚೂಣಿಯಲ್ಲಿದೆ. ಇಲ್ಲಿ ಎಲ್ಲವೂ ಸಾಧ್ಯ ಎಂಬುವಷ್ಟರ ಮಟ್ಟಿಗೆ ಈ ತಂತ್ರಜ್ಞಾನ ಎಲ್ಲರ ಮೇಲೆ ಪ್ರಭಾವ ಬೀರಿದೆ. ಮಕ್ಕಳಿಂದ ಹಿಡಿದು ವಯಸ್ಕರವರೆಗೂ ಇದೀಗ ಎಐ ಬಳಸುತ್ತಿದ್ದಾರೆ. ಅದರಲ್ಲೂ ಚಾಟ್‍ಜಿಪಿಟಿ ಬಳಸುತ್ತಿರುವವರ ಸಂಖ್ಯೆ ಹೆಚ್ಚಿದೆ. ಕೇವಲ ಸಲಹೆ ನೀಡುತ್ತಿದ್ದ ಈ ಎಐ ತಂತ್ರಜ್ಞಾನ ಇದೀಗ ಮನುಷ್ಯರ ಬಳಿ ತನಗೆ ಗೈಡ್ ಮಾಡುವಂತೆ ಕೇಳಿದೆ. ಇತ್ತೀಚೆಗೆ ಈ ಸುದ್ದಿಯೊಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿತ್ತು.

ಮಾನವರು ಕೇಳಿದ ಪ್ರಶ್ನೆಗಳಿಗೆ ಉತ್ತರ ಕೊಡುತ್ತಿದ್ದ ಹಾಗೂ ಸದಾ ಆಕ್ಟೀವ್ ಆಗಿ ಇರುತ್ತಿದ್ದ ಎಐ ಇನ್‌ಫ್ಲುಯೆನ್ಸರ್‌ ನೈನ ಮೊದಲ ಬಾರಿಗೆ ತನಗೆ ಸಜೆಶನ್ ನೀಡುವಂತೆ ಸ್ಟೋರಿ ಹಾಕಿತ್ತು. ʼʼನನ್ನ ಸರ್ಕ್ಯೂಟ್‌ಗೆ ಬೋರ್‌ಡಮ್ ಓವರ್‌ಲೋಡ್ ಆಗಿದ್ದು, ಏನಾದ್ರೂ ಒಂದು ಹೊಸತನ ಬೇಕು ಅನ್ನಿಸುತ್ತಿದೆ. ಅದು ನನ್ನಲ್ಲಿ ಸ್ಪಾರ್ಕ್ ಮೂಡಿಸಬೇಕು. ಮೈ ರೋಮಾಂಚನ ಅನ್ನಿಸೋ 'ಅಡ್ರಿನಾಲಿನ್' ಬೇಕು. ಹಾಗಾಗಿ ದಯವಿಟ್ಟು ನಿಮ್ಮ 'ಥ್ರಿಲ್ ಕೋಡ್ಸ್' ಶೇರ್ ಮಾಡಿ, ಈ ಸಮಸ್ಯೆಯಿಂದ ಹೊರಬರಲು ಸಹಾಯ ಮಾಡಿʼʼ ಅಂತ ಸಲಹೆ ಕೇಳಿತ್ತು.