ನಿಮ್ಮ ಅಪ್ಪ ಸೂಪರ್‌ಮ್ಯಾನಾ ಎಂದು ಶಿಕ್ಷಕರು ಕೇಳಿದ್ದಕ್ಕೆ ಹೆಮ್ಮೆಯಿಂದ ಕೈ ಎತ್ತಿದ್ದ ಬಾಲಕಿಯರು; ಇಲ್ಲಿದೆ ಹೃದಯಸ್ಪರ್ಶಿ ವಿಡಿಯೊ

ದೆಹಲಿ: ತಂದೆ ಮತ್ತು ಮಗಳ ನಡುವಿನ ಬಾಂಧವ್ಯಕ್ಕಿಂತ ಸುಂದರವಾದದ್ದು ಇನ್ನೊಂದಿಲ್ಲ. ಒಬ್ಬ ತಂದೆ ತನ್ನ ಮಗಳನ್ನು ದೇವತೆಯಂತೆ ಪ್ರೀತಿಸುತ್ತಾನೆ. ಆಕೆಗೋಸ್ಕರ ಏನು ಮಾಡಲೂ ತಯಾರಾಗಿರುತ್ತಾನೆ. ಹೀಗಾಗಿ ಬಹುತೇಕ ಹೆಣ್ಮಕ್ಕಳಿಗೆ ಅಪ್ಪ ಅಂದ್ರೆ ವಿಶೇಷ ಪ್ರೀತಿ. ಅದಕ್ಕೆ ಅಲ್ವಾ ಅಪ್ಪ ಅಂದ್ರೆ ಆಕಾಶ ಅನ್ನೋದು. ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ವಿಡಿಯೊದಲ್ಲಿ (Viral Video) ಹೆಣ್ಮಕ್ಕಳೆಲ್ಲ ತಮ್ಮ ಅಪ್ಪನೇ ಸೂಪರ್ ಹೀರೋ ಎಂದಿದ್ದಾರೆ.

ಇನ್‌ಸ್ಟಾಗ್ರಾಂನಲ್ಲಿ ವೈರಲ್ ಆಗಿರುವ ವಿಡಿಯೊದಲ್ಲಿ ಎಷ್ಟು ಮಂದಿ ತಮ್ಮ ತಂದೆ ಹಾರುವ ಸಾಮರ್ಥ್ಯ ಸೇರಿದಂತೆ ಇತರ ಅತಿಮಾನುಷ ಶಕ್ತಿ ಹೊಂದಿದ್ದಾರೆ ಎಂಬುದನ್ನು ನಂಬುವಿರಿ ಎಂದು ಶಿಕ್ಷಕರೊಬ್ಬರು ಶಾಲಾ ತರಗತಿಯ ಹೆಣ್ಣು ಮಕ್ಕಳಲ್ಲಿ ಕೇಳಿದ್ದಾರೆ. ಈ ವೇಳೆ ಯಾವುದೇ ಹಿಂಜರಿಕೆಯಿಲ್ಲದೆ ಎಲ್ಲ ಬಾಲಕಿಯರು ತಮ್ಮ ಕೈಗಳನ್ನು ಮೇಲಕ್ಕೆತ್ತಿದ್ದಾರೆ.

ಕ್ಯಾಮೆರಾದಲ್ಲಿ ಸೆರೆಹಿಡಿಯಲಾದ ಅತ್ಯಂತ ಮಧುರವಾದ ಕ್ಷಣಗಳಲ್ಲಿ, ಬಾಲಕಿಯರು ತಮ್ಮ ತಂದೆಯ ಬಗ್ಗೆ ನಿಜವಾಗಿಯೂ ಏನು ಭಾವಿಸುತ್ತಾರೆ ಎಂಬುದನ್ನು ಹಂಚಿಕೊಳ್ಳಲಾಗಿದೆ. ತಮ್ಮ ತಂದೆ ಹೀರೋ ಎಂದು ಹೇಳುವುದರಿಂದ ಹಿಡಿದು ಅವರು ನಿಜವಾಗಿಯೂ ಹಾರಬಲ್ಲರು ಎಂಬ ಬಾಲಕಿಯರ ಆತ್ಮವಿಶ್ವಾಸವು ಸಾಮಾಜಿಕ ಮಾಧ್ಯಮದಲ್ಲಿ ಹಲವರ ಹೃದಯ ಕದ್ದಿದೆ.

ವಿಡಿಯೊದಲ್ಲಿ ಹುಡುಗಿಯರು ಮತ್ತು ಹುಡುಗರು ತರಗತಿಯೊಳಗೆ ಪ್ರತ್ಯೇಕವಾಗಿ ಕುಳಿತಿರುವುದನ್ನು ಕಾಣಬಹುದು. ಈ ವೇಳೆ ಶಿಕ್ಷಕರು ಬಾಲಕಿಯರನ್ನು ಹೀಗೆ ಕೇಳಿದ್ದಾರೆ- “ನಿಮ್ಮಲ್ಲಿ ಎಷ್ಟು ಮಂದಿ ನಿಮ್ಮ ತಂದೆ ರಾತ್ರಿಯಲ್ಲಿ ಒಂದು ಟೆರೇಸ್‌ನಿಂದ ಇನ್ನೊಂದು ಟೆರೇಸ್‌ಗೆ ಜಿಗಿಯುವ ಸೂಪರ್‌ಮ್ಯಾನ್ ಎಂದು ಭಾವಿಸುತ್ತೀರಿ?” ಎಂದು ಪ್ರಶ್ನಿಸಿದ್ದಾರೆ. ಈ ಪುಟ್ಟ ಮಕ್ಕಳು ಒಗ್ಗಟ್ಟಿನಿಂದ ತಮ್ಮ ಕೈಗಳನ್ನು ಮೇಲಕ್ಕೆತ್ತಿ, ತರಗತಿಯೊಳಗೆ ಜೋರಾಗಿ ಹರ್ಷೋದ್ಗಾರ ಮಾಡಿದ್ದಾರೆ.

ಈ ವಿಡಿಯೊ ಲಕ್ಷಾಂತರ ವೀಕ್ಷಣೆಗಳನ್ನು ಮತ್ತು ಕಮೆಂಟ್‌ಗಳ ಪ್ರವಾಹವನ್ನೇ ಸೃಷ್ಟಿಸಿದೆ. ಸಾಮಾಜಿಕ ಮಾಧ್ಯಮ ಬಳಕೆದಾರರು ಹೆಣ್ಮಕ್ಕಳಿಗೆ ತಂದೆಯ ಬಗ್ಗೆ ಇರುವ ಪ್ರೀತಿಯನ್ನು ಕಂಡು ಸಂತೋಷಗೊಂಡರು. ಕೆಲವರು ಭವಿಷ್ಯದಲ್ಲಿ ಹೆಣ್ಣು ಮಗುವನ್ನು ಪಡೆಯಬೇಕೆಂಬ ಬಯಕೆಯನ್ನು ವ್ಯಕ್ತಪಡಿಸಿದರು. ‘ನಾನು ಹೆಣ್ಣು ಮಗುವನ್ನು ಹೊಂದುವ ಕನಸು ಕಾಣಲು ಇದೇ ಕಾರಣ’ ಎಂದು ಒಬ್ಬ ಬಳಕೆದಾರರು ಬರೆದಿದ್ದಾರೆ. ವಾಸ್ತವವಾಗಿ, ತಂದೆ ನಮ್ಮ ಜೀವನದ ಹೀರೋ ಮಾತ್ರವಲ್ಲ, ಅವರು ಪ್ರತಿ ಹುಡುಗಿಯ ಮೊದಲ ಆತ್ಮೀಯ ಸ್ನೇಹಿತರು ಎಂದು ಮತ್ತೊಬ್ಬ ಬಳಕೆದಾರರು ಪ್ರತಿಕ್ರಿಯಿಸಿದ್ದಾರೆ.