Keshava Prasad B Column: ಬ್ರಿಟನ್‌ ಜತೆ ಭಾರತ ಒಪ್ಪಂದ, ಮೊದಲ ದಿನವೇ ರಫ್ತು ಸಾವಿರ ಟನ್!

ಮನಿಮೈಂಡೆಡ್‌

ಭಾರತ ಮತ್ತು ಯುನೈಟೆಡ್ ಕಿಂಗ್‌ಡಮ್ (UK) ಅಥವಾ ಬ್ರಿಟನ್ ನಡುವಿನ ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದ (CETA) ಜುಲೈ 15, 2026 ರಂದು ಅಧಿಕೃತವಾಗಿ ಜಾರಿಗೆ ಬಂದಿದೆ. ಈ ಒಪ್ಪಂದದ ಮೊದಲ ದಿನದಂದೇ ಭಾರತವು ಬ್ರಿಟನ್‌ಗೆ 140 ಮಿಲಿಯನ್ ಡಾಲರ್‌, ಅಂದರೆ ಸುಮಾರು 1,170 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಸರಕುಗಳನ್ನು ಶೂನ್ಯ ಸುಂಕದ (Zero-duty) ಅಡಿಯಲ್ಲಿ ರಫ್ತು ಮಾಡುವ ಮೂಲಕ ಐತಿಹಾಸಿಕ ಮೈಲಿಗಲ್ಲನ್ನು ಸ್ಥಾಪಿಸಿದೆ.

ಒಂದು ಕಡೆ ನಿಲ್ಲದ ಗಲ್ಫ್‌ ಯುದ್ಧದಿಂದ ಉಂಟಾಗಿರುವ ಕಚ್ಚಾ ತೈಲ ದರ ಏರಿಕೆ, ಮತ್ತೊಂದು ಕಡೆ ಬರಗಾಲದ ಸಂಕಷ್ಟದ ನಡುವೆ ಭಾರತ ಏನು ಮಾಡಬಹುದು? ಎನ್ನುವುದಕ್ಕೆ ಇದು ಒಂದು ನಿದರ್ಶನವಾಗಿದೆ.

ಹಾಗಾದರೆ ಏನಿದು ಒಪ್ಪಂದ? ಇದು ಭಾರತ ಮತ್ತು ಬ್ರಿಟನ್ ನಡುವೆ ನಡೆದ ಅತ್ಯಂತ ಮಹತ್ವದ ವ್ಯಾಪಾರ ಒಪ್ಪಂದವಾಗಿದೆ. 2025ರಲ್ಲಿ ಸಹಿ ಹಾಕಲಾಗಿದ್ದ ಈ ಒಪ್ಪಂದವು ಜುಲೈ 15, 2026ರಿಂದ ಕಾರ್ಯರೂಪಕ್ಕೆ ಬಂದಿದೆ. ಇದರ ಮುಖ್ಯ ಉದ್ದೇಶ ಎರಡೂ ದೇಶಗಳ ನಡುವಿನ ವ್ಯಾಪಾರ ಮತ್ತು ಹೂಡಿಕೆಯನ್ನು ಉತ್ತೇಜಿಸುವುದು. ಈ ಒಪ್ಪಂದದ ಪ್ರಕಾರ, ಭಾರತವು ಯುಕೆಗೆ ರಫ್ತು ಮಾಡುವ ಸುಮಾರು 99‌ ಪರ್ಸೆಂಟ್ ಸರಕುಗಳಿಗೆ ಯಾವುದೇ ಆಮದು ಸುಂಕ ಇರುವುದಿಲ್ಲ!

ಇದನ್ನೂ ಓದಿ: Keshava Prasad B Column: ಇರಾನ್ ಯುದ್ಧ ಜಾಗತಿಕ ಆರ್ಥಿಕ ಹಿಂಜರಿತಕ್ಕೆ ಕಾರಣವಾಗಲಿದೆಯೇ?

ಇದರಿಂದಾಗಿ ಭಾರತದ ಜವಳಿ, ಚರ್ಮದ ಉತ್ಪನ್ನಗಳು, ಪಾದರಕ್ಷೆಗಳು, ಎಲೆಕ್ಟ್ರಾನಿಕ್ಸ್, ರತ್ನ ಮತ್ತು ಆಭರಣಗಳು, ಮೆಕ್ಯಾನಿಕಲ್ ಮತ್ತು ಎಲೆಕ್ಟ್ರಿಕಲ್ ಯಂತ್ರೋಪಕರಣಗಳು, ಪ್ಲಾಸ್ಟಿಕ್, ಸಾಗರೋತ್ಪನ್ನಗಳು, ಮತ್ತು ಸಂಸ್ಕರಿಸಿದ ಆಹಾರ ಪದಾರ್ಥಗಳಿಗೆ ಲಾಭವಾಗಲಿದೆ. ಈ ಹಿಂದೆ ಇವುಗಳಿಗೆ ಶೇಕಡಾ 2- 16 ವರೆಗೆ ಆಮದು ಸುಂಕವಿತ್ತು.

ಈ ಒಪ್ಪಂದವು ವಿಶೇಷವಾಗಿ ಭಾರತದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಗಾತ್ರದ ಉದ್ಯಮಗಳ ವಲಯವನ್ನು ಬಲಪಡಿಸುತ್ತದೆ, ಇದರಿಂದಾಗಿ ರಫ್ತು ಹೆಚ್ಚಾಗಿ ಹೊಸ ಉದ್ಯೋಗಾವಕಾಶಗಳು ಸೃಷ್ಟಿಯಾಗಲಿವೆ.

CETA ಜೊತೆಗೆ, 'ಡಬಲ್ ಕಾಂಟ್ರಿಬ್ಯೂಷನ್ ಕನ್ವೆನ್ಷನ್'(DCC) ಕೂಡ ಜಾರಿಗೆ ಬಂದಿದೆ. ಇದು UKಯಲ್ಲಿ ಕೆಲಸ ಮಾಡುವ ಭಾರತೀಯ ವೃತ್ತಿಪರರಿಗೆ ಅನುಕೂಲಕರವಾಗಿದೆ. ಹೇಗೆ ಎಂದರೆ, ಅರ್ಹ ಭಾರತೀಯ ಉದ್ಯೋಗಿಗಳು ಮತ್ತು ಕಂಪನಿಗಳು ಬ್ರಿಟನ್‌ ನಲ್ಲಿ ಐದು ವರ್ಷಗಳವರೆಗೆ ಸಾಮಾಜಿಕ ಭದ್ರತಾ ದೇಣಿಗೆಯನ್ನು (Social Security Contribution) ಪಾವತಿಸುವುದರಿಂದ ವಿನಾಯಿತಿ ಪಡೆಯುತ್ತಾರೆ, ಇದರಿಂದ ಅವರ ಉಳಿತಾಯ ಹೆಚ್ಚಾಗುತ್ತದೆ.

ಉಭಯ ದೇಶಗಳು ಈ ಒಪ್ಪಂದದ ಮೂಲಕ 2030ರ ವೇಳೆಗೆ ತಮ್ಮ ದ್ವಿಪಕ್ಷೀಯ ವ್ಯಾಪಾರವನ್ನು 100 ಶತಕೋಟಿ ಡಾಲರ್‌'ಗೆ ಏರಿಸುವ ಗುರಿಯನ್ನು ಹೊಂದಿವೆ. ಭಾರತೀಯ ರಫ್ತುದಾರರಿಗೆ ಜಾಗತಿಕ ಮಾರುಕಟ್ಟೆ ಯಲ್ಲಿ ಹೆಚ್ಚು ಸ್ಪರ್ಧಾತ್ಮಕವಾಗಲು ಸಹಾಯ ಮಾಡುತ್ತದೆ ಮತ್ತು ಭಾರತದ 'ಮೇಕ್ ಇನ್ ಇಂಡಿಯಾ' ಅಭಿಯಾನಕ್ಕೆ ಹೆಚ್ಚಿನ ವೇಗ ನೀಡಲಿದೆ.

ಮೊದಲ ದಿನದಂದು, ದೇಶದಾದ್ಯಂತ ವಿವಿಧ ಬಂದರುಗಳು, ವಿಮಾನ ನಿಲ್ದಾಣಗಳು ಮತ್ತು ಕೈಗಾರಿಕಾ ಕೇಂದ್ರಗಳಿಂದ 50ಕ್ಕೂ ಹೆಚ್ಚು ರಫ್ತು ಕನ್ಸೈನ್‌ಮೆಂಟ್‌ಗಳನ್ನು ಕಳುಹಿಸಲಾಯಿತು. ಜವಳಿ ಉತ್ಪನ್ನಗಳು, ಸಿದ್ಧ ಉಡುಪುಗಳು ಮತ್ತು ನೂಲು ಪ್ರಮುಖವಾಗಿ ರಫ್ತಾಗಿವೆ. ಮುಂಬಯಿನ ವಿಶೇಷ ಆರ್ಥಿಕ ವಲಯಗಳಿಂದ ಚಿನ್ನದ ಆಭರಣಗಳು ಮತ್ತು ಅಮೂಲ್ಯ ರತ್ನಗಳ ದೊಡ್ಡ ರಫ್ತು ನಡೆದಿದೆ.

ಯಂತ್ರೋಪಕರಣಗಳು ಮತ್ತು ಫ್ಯಾಬ್ರಿಕೇಟೆಡ್ ಮೆಟಲ್ ಉತ್ಪನ್ನಗಳಂತಹ ಇಂಜಿನಿಯರಿಂಗ್ ವಸ್ತುಗಳು. ಔಷಧ ಕಂಪನಿಗಳಿಂದ ತಯಾರಾದ ವಿವಿಧ ಔಷಧಿಗಳು, ಮೀನು ಮತ್ತು ಇತರ ಸಮುದ್ರ ಆಹಾರ ಉತ್ಪನ್ನಗಳು, ಕೈಗಾರಿಕಾ ರಾಸಾಯನಿಕಗಳು ಮತ್ತು ಪ್ಲಾಸ್ಟಿಕ್ ಉತ್ಪನ್ನಗಳು, ಸಂಸ್ಕರಿಸಿದ ಆಹಾರಗಳು, ಮಸಾಲೆ ಪದಾರ್ಥಗಳು, ಚಹಾ ಮತ್ತು ಕಾಫಿ ಮುಂತಾದ ಕೃಷಿ ಆಧಾರಿತ ಉತ್ಪನ್ನಗಳು, ಎಲೆಕ್ಟ್ರಾನಿಕ್ ಬಿಡಿಭಾಗಗಳು ಮತ್ತು ಉಪಕರಣಗಳು ರಫ್ತಾಗಿವೆ.

ಭಾರತ ಮತ್ತು ಯುನೈಟೆಡ್ ಕಿಂಗ್‌ಡಮ್ ನಡುವಿನ ಈ ವ್ಯಾಪಾರ ಒಪ್ಪಂದದ (CETA) ಹಿನ್ನೆಲೆ ಬಹಳ ದೀರ್ಘಕಾಲದ ಚರ್ಚೆ ಮತ್ತು ಸಿದ್ಧತೆಗಳನ್ನು ಒಳಗೊಂಡಿತ್ತು.

ಐರೋಪ್ಯ ಒಕ್ಕೂಟದಿಂದ ಬ್ರಿಟನ್ 2020ರಲ್ಲಿ ಹೊರಬಂದ ನಂತರ (ಬ್ರೆಕ್ಸಿಟ್), ಅದು ತನ್ನದೇ ಆದ ಸ್ವತಂತ್ರ ವ್ಯಾಪಾರ ನೀತಿಯನ್ನು ರೂಪಿಸಿಕೊಳ್ಳುವ ಅವಶ್ಯಕತೆ ಇತ್ತು. ಅದೇ ಸಮಯದಲ್ಲಿ, ಭಾರತವು ತನ್ನ 'ಮೇಕ್ ಇನ್ ಇಂಡಿಯಾ' ಅಭಿಯಾನದ ಮೂಲಕ ಜಾಗತಿಕ ರಫ್ತು ವೃದ್ಧಿಸಲು ಬೃಹತ್ ಮಾರುಕಟ್ಟೆಗಳನ್ನು ಹುಡುಕುತ್ತಿತ್ತು. ಈ ಎರಡು ರಾಷ್ಟ್ರಗಳ ಅಗತ್ಯಗಳು ಒಂದಕ್ಕೊಂದು ಹೊಂದಿಕೆಯಾಗಿತ್ತು.

ಈ ವ್ಯಾಪಾರ ಒಪ್ಪಂದದ ಮಾತುಕತೆಗಳು ಅಧಿಕೃತವಾಗಿ ಜನವರಿ 2022 ರಲ್ಲಿ ಆರಂಭವಾದವು. ಅಂದಿನಿಂದ, ಎರಡೂ ದೇಶಗಳ ವ್ಯಾಪಾರ ಸಚಿವಾಲಯಗಳು ಹಲವು ಸುತ್ತಿನ ಮಾತುಕತೆಗಳನ್ನು ನಡೆಸಿದವು. ಈ ಪ್ರಕ್ರಿಯೆಯಲ್ಲಿ ಕೆಲವು ಸವಾಲುಗಳು ಮುಖ್ಯವಾಗಿದ್ದವು. ಭಾರತೀಯ ಜವಳಿ ಮತ್ತು ಕೃಷಿ ಉತ್ಪನ್ನಗಳ ಮೇಲೆ ಬ್ರಿಟನ್ ವಿಧಿಸುತ್ತಿದ್ದ ಸುಂಕಗಳನ್ನು ತೆಗೆದುಹಾಕುವುದು. ಭಾರತೀಯ ತಂತ್ರಜ್ಞರು ಮತ್ತು ವೃತ್ತಿಪರರಿಗೆ ಸುಲಭವಾಗಿ ಯುಕೆ ವೀಸಾ ಪಡೆಯುವುದು ಮತ್ತು ಕೆಲಸ ಮಾಡುವ ಅವಕಾಶಗಳನ್ನು ಕಲ್ಪಿಸುವುದು.

ಭಾರತೀಯ ಉದ್ಯೋಗಿಗಳು ಅಲ್ಲಿ ಪಾವತಿಸಬೇಕಾದ ಸಾಮಾಜಿಕ ಭದ್ರತಾ ದೇಣಿಗೆಯ ಮೇಲಿನ ಅವಳಿ ಹೊರೆ ತಗ್ಗಿಸುವುದು ಆ ಸವಾಲುಗಳಾಗಿತ್ತು. ಈ ಬಗ್ಗೆ ಸುದೀರ್ಘ ಮಾತುಕತೆಗಳ ನಂತರ, 2025 ರಲ್ಲಿ ಎರಡೂ ದೇಶಗಳು ಅಂತಿಮವಾಗಿ ಒಪ್ಪಂದಕ್ಕೆ ಸಹಿ ಹಾಕಿದವು. ಹಲವು ಕಾನೂನು ಪ್ರಕ್ರಿಯೆಗಳು ಮತ್ತು ಆಂತರಿಕ ಸಿದ್ಧತೆಗಳ ನಂತರ, ಜುಲೈ 15, 2026ರಂದು ಈ ಒಪ್ಪಂದ ಅಧಿಕೃತ ವಾಗಿ ಜಾರಿಗೆ ಬಂದಿತು.

ಎರಡೂ ದೇಶಗಳ ನಡುವಿನ ಸರಕು ಮತ್ತು ಸೇವೆಗಳ ವಿನಿಮಯವನ್ನು ಹೆಚ್ಚಿಸುವುದು. ಭಾರತೀಯ ಉತ್ಪನ್ನಗಳು ಯುಕೆಯ ಮಾರುಕಟ್ಟೆಯಲ್ಲಿ ಚೀನಾ ಮತ್ತು ಇತರ ದೇಶಗಳ ಉತ್ಪನ್ನ ಗಳ ಜೊತೆ ಸ್ಪರ್ಧಿಸಲು ಅನುಕೂಲವಾಗುವಂತೆ ಸುಂಕ ಮುಕ್ತ ಪ್ರವೇಶ ನೀಡುವುದು. ಕೇವಲ ಸರಕುಗಳಷ್ಟೇ ಅಲ್ಲದೆ, ಡಿಜಿಟಲ್ ಸೇವೆಗಳು ಮತ್ತು ತಂತ್ರಜ್ಞಾನ ವಲಯದಲ್ಲಿ ಸಹಕಾರ ವನ್ನು ಹೆಚ್ಚಿಸುವುದು ವ್ಯಾಪಾರದ ದೃಷ್ಟಿಯ ಉದ್ದೇಶಗಳಾಗಿತ್ತು.

ಈ ಒಪ್ಪಂದವು ಕೇವಲ ವ್ಯಾಪಾರಕ್ಕೆ ಸೀಮಿತವಾಗಿಲ್ಲ. ಇದು ಭಾರತ ಮತ್ತು ಬ್ರಿಟನ್ ನಡುವಿನ ರಾಜತಾಂತ್ರಿಕ ಮತ್ತು ರಾಜಕೀಯ ಸಂಬಂಧವನ್ನು ಗಟ್ಟಿಗೊಳಿಸುವ ಉದ್ದೇಶವನ್ನು ಹೊಂದಿದೆ. ಹೀಗಾಗಿ ಇದು ಎರಡೂ ದೇಶಗಳ ಆರ್ಥಿಕತೆಗೆ ಪರಸ್ಪರ ಲಾಭದಾಯಕವಾದ ಒಪ್ಪಂದವಾಗಿದೆ. ಹಾಗಾದರೆ ಬ್ರಿಟನ್‌ಗೆ ಏನು ಲಾಭ? ಭಾರತ ವಿಶ್ವದ ಅತಿ ವೇಗವಾಗಿ ಬೆಳೆಯುತ್ತಿರುವ ದೊಡ್ಡ ಆರ್ಥಿಕತೆಗಳಲ್ಲಿ ಒಂದಾಗಿದೆ.

ಭಾರತದ ಬೃಹತ್ ಗ್ರಾಹಕ ಮಾರುಕಟ್ಟೆಗೆ ಬ್ರಿಟಿಷ್ ಕಂಪನಿಗಳಿಗೆ ಸುಲಭ ಪ್ರವೇಶ ಸಿಗುತ್ತದೆ. ಭಾರತದಿಂದ ಆಮದು ಮಾಡಿಕೊಳ್ಳುವ ಜವಳಿ, ಔಷಧೀಯ ಉತ್ಪನ್ನಗಳು ಮತ್ತು ಕೃಷಿ ಪದಾರ್ಥ ಗಳು ಯುಕೆಯ ಗ್ರಾಹಕರಿಗೆ ಕಡಿಮೆ ಬೆಲೆಯಲ್ಲಿ ಸಿಗಲಿವೆ. ಇದು ಅಲ್ಲಿನ ಹಣದುಬ್ಬರವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ಚೀನಾದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡಲು ಬ್ರಿಟನ್ ಬಯಸುತ್ತಿದೆ. ಭಾರತವನ್ನು ವಿಶ್ವಾಸಾರ್ಹ ಪೂರೈಕೆದಾರನಾಗಿ ಬಳಸಿಕೊಳ್ಳುವುದು ಯುಕೆಯ ಉದ್ದೇಶವಾಗಿದೆ.

ಭಾರತವು ಕಳೆದ ಮೂರುವರೆ ವರ್ಷಗಳಲ್ಲಿ 9 ಪ್ರಮುಖ ಮುಕ್ತ ವ್ಯಾಪಾರ ಒಪ್ಪಂದಗಳನ್ನು (FTAs) ಸಹಿ ಹಾಕಿದೆ. ಇತ್ತೀಚಿನ ಅವಧಿಯಲ್ಲಿ ಯುನೈಟೆಡ್ ಕಿಂಗ್‌ಡಮ್, ಒಮಾನ್ ಮತ್ತು ನ್ಯೂಜಿಲೆಂಡ್‌ ನೊಂದಿಗೆ ಒಪ್ಪಂದಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲಾಗಿದೆ. ಜನವರಿ 2026ರಲ್ಲಿ ಭಾರತ ಮತ್ತು ಯುರೋಪಿಯನ್ ಯೂನಿಯನ್ ನಡುವಿನ ಐತಿಹಾಸಿಕ ಒಪ್ಪಂದವು ಸಹ ಪೂರ್ಣ ಗೊಂಡಿದೆ.

ಭಾರತವು ವಿವಿಧ ದೇಶಗಳು ಮತ್ತು ಬ್ಲಾಕ್‌ಗಳೊಂದಿಗೆ ಮಾತುಕತೆ ನಡೆಸುತ್ತಿದ್ದು, ಮುಂಬರುವ 10-12 ತಿಂಗಳುಗಳಲ್ಲಿ ಸುಮಾರು 3 ರಿಂದ 4 ಪ್ರಮುಖ ವ್ಯಾಪಾರ ಒಪ್ಪಂದಗಳನ್ನು ಅಂತಿಮಗೊಳಿ ಸುವ ಉದ್ದೇಶವಿದೆ. ಪ್ರಸ್ತುತ ಆಸಿಯಾನ್‌ ಒಕ್ಕೂಟ, ಮೆಕ್ಸಿಕೊ, ಕೆನಡಾ ಮತ್ತು ಇಸ್ರೇಲ್‌ನಂತಹ ದೇಶಗಳೊಂದಿಗೆ ವ್ಯಾಪಾರ ಮಾತುಕತೆಗಳು ಪ್ರಗತಿಯಲ್ಲಿವೆ.

ಅಮೆರಿಕ-ಚೀನಾ ನಡುವಿನ ವ್ಯಾಪಾರ ಸಂಘರ್ಷಗಳು, ಪಶ್ಚಿಮ ಏಷ್ಯಾದ ಅಸ್ಥಿರತೆ ಮತ್ತು ತೈಲ ದರದ ಏರಿಳಿತಗಳು ಭಾರತದ ಆರ್ಥಿಕತೆಯ ಮೇಲೆ ನೇರ ಪರಿಣಾಮ ಬೀರುತ್ತವೆ. ಇಂತಹ ಸಮಯ ದಲ್ಲಿ ಈ ವ್ಯಾಪಾರ ಒಪ್ಪಂದಗಳು ಭಾರತಕ್ಕೆ ರಕ್ಷಾಕವಚದಂತೆ ಕೆಲಸ ಮಾಡುತ್ತವೆ.

ಅಮೆರಿಕ-ಚೀನಾ ವ್ಯಾಪಾರ ಸಂಘರ್ಷದ ಕಾರಣದಿಂದಾಗಿ ಜಾಗತಿಕ ಪೂರೈಕೆ ಸರಪಳಿಯಲ್ಲಿ (Global Supply Chain) ಬದಲಾವಣೆಗಳಾಗುತ್ತಿವೆ. ಭಾರತವು ಈ ಒಪ್ಪಂದಗಳ ಮೂಲಕ ಚೀನಾದ ಮೇಲೆ ಅವಲಂಬಿತವಾಗಿರುವ ಜಾಗತಿಕ ಕಂಪನಿಗಳಿಗೆ 'ನಂಬಿಕಸ್ಥ ಪರ್ಯಾಯ ಉತ್ಪಾದನಾ ಕೇಂದ್ರ'ವಾಗಿ ಹೊರಹೊಮ್ಮುತ್ತಿದೆ.

ಪಶ್ಚಿಮ ಏಷ್ಯಾದ ಸಂಘರ್ಷವು ಹಾರ್ಮುಜ್ ಜಲಸಂಧಿಯ ಮೂಲಕ ನಡೆಯುವ ತೈಲ ಪೂರೈಕೆಗೆ ಅಪಾಯವನ್ನು ತಂದೊಡ್ಡಿದೆ. ಈ ಹಿನ್ನೆಲೆಯಲ್ಲಿ ಒಮಾನ್‌ನಂತಹ ದೇಶಗಳೊಂದಿಗೆ ಮಾಡಿ ಕೊಂಡ ಒಪ್ಪಂದವು, ಜಲಸಂಧಿಯ ಹೊರಗಿನ ಪರ್ಯಾಯ ಇಂಧನ ಮತ್ತು ವ್ಯಾಪಾರ ಕಾರಿಡಾರ್‌ ಗಳನ್ನು ಬಲಪಡಿಸಿಕೊಳ್ಳಲು ಭಾರತಕ್ಕೆ ಸಹಾಯ ಮಾಡುತ್ತದೆ.

ತೈಲ ದರ ಏರಿಕೆಯಾದಾಗ ಭಾರತದ ಆಮದು ವೆಚ್ಚ ಹೆಚ್ಚಾಗಿ ಹಣದುಬ್ಬರ ಉಂಟಾಗುತ್ತದೆ. ವ್ಯಾಪಾರ ಒಪ್ಪಂದಗಳ ಮೂಲಕ ಸರಕುಗಳ ಆಮದು ಸುಂಕ ಕಡಿಮೆಯಾಗುವುದರಿಂದ ಮತ್ತು ರಫ್ತು ಹೆಚ್ಚಾಗುವುದರಿಂದ, ಭಾರತವು ತನ್ನ ವ್ಯಾಪಾರ ಕೊರತೆಯನ್ನು ಸಮತೋಲನದಲ್ಲಿಟ್ಟು ಕೊಳ್ಳಲು ಸಾಧ್ಯವಾಗುತ್ತದೆ.

ಕೊನೆಯದಾಗಿ, ಪ್ರಧಾನಿ ನರೇಂದ್ರ ಮೋದಿ ಅವರ ವಿದೇಶ ಪ್ರವಾಸಗಳು ಮತ್ತು ಅವರ ರಾಜತಾಂತ್ರಿಕ ಪ್ರಯತ್ನಗಳು ಭಾರತದ ವ್ಯಾಪಾರ ನೀತಿಯಲ್ಲಿ 'ಗೇಮ್ ಚೇಂಜರ್' ಆಗಿವೆ. ಇದು ಭಾರತ ಮತ್ತು ಇತರ ದೇಶಗಳ ನಡುವಿನ ಮುಕ್ತ ವ್ಯಾಪಾರ ಒಪ್ಪಂದಗಳನ್ನು ತ್ವರಿತಗೊಳಿಸುತ್ತಿವೆ. ಪ್ರಧಾನಿ ಮೋದಿ ಅವರು ವಿವಿಧ ರಾಷ್ಟ್ರಗಳ ನಾಯಕರೊಂದಿಗೆ ವೈಯಕ್ತಿಕವಾಗಿ ಉತ್ತಮ ಸಂಬಂಧವನ್ನು ಹೊಂದಿರುವುದು ಮಾತುಕತೆಗಳನ್ನು ಸುಗಮಗೊಳಿಸುತ್ತದೆ. ಆರ್ಥಿಕ ಮತ್ತು ವಾಣಿಜ್ಯ ವಿಷಯಗಳನ್ನು ಉನ್ನತ ಮಟ್ಟದ ರಾಜತಾಂತ್ರಿಕ ಸಂಭಾಷಣೆಗಳ ಮೂಲಕ ಚರ್ಚಿಸುವು ದರಿಂದ, ದೀರ್ಘಕಾಲದಿಂದ ನೆನೆಗುದಿಗೆ ಬಿದ್ದಿದ್ದ ಒಪ್ಪಂದಗಳಿಗೆ ವೇಗ ಸಿಗುತ್ತದೆ.

ಮೋದಿಯವರ ವಿದೇಶ ಪ್ರವಾಸದ ಮುಖ್ಯ ಅಜೆಂಡಾ ಯಾವಾಗಲೂ ಭಾರತವನ್ನು ಜಾಗತಿಕ ಹೂಡಿಕೆ ತಾಣವನ್ನಾಗಿ ಪ್ರಸ್ತುತಪಡಿಸುವುದಾಗಿರುತ್ತದೆ. ಭಾರತದ ಆರ್ಥಿಕ ಸುಧಾರಣೆಗಳು, ಡಿಜಿಟಲ್ ಮೂಲಸೌಕರ್ಯ ಮತ್ತು 'ಈಸ್ ಆಫ್ ಡೂಯಿಂಗ್ ಬಿಸಿನೆಸ್' ಬಗ್ಗೆ ಅವರು ಜಾಗತಿಕ ನಾಯಕರಿಗೆ ಮತ್ತು ಉದ್ಯಮಿಗಳಿಗೆ ನೇರವಾಗಿ ಮಾಹಿತಿ ನೀಡುತ್ತಾರೆ. ಇದು ವಿದೇಶಿ ಹೂಡಿಕೆದಾರ ರಿಗೆ ಭಾರತದ ಮೇಲೆ ವಿಶ್ವಾಸ ಮೂಡಿಸುತ್ತದೆ, ಇದು ಮುಕ್ತ ವ್ಯಾಪಾರ ಒಪ್ಪಂದಗಳ ಮಾತುಕತೆಗೆ ಬುನಾದಿಯಾಗುತ್ತದೆ.

ವ್ಯಾಪಾರ ಒಪ್ಪಂದಗಳು ಸಾಮಾನ್ಯವಾಗಿ ಅಧಿಕಾರಶಾಹಿಯ ಜಟಿಲ ಪ್ರಕ್ರಿಯೆಗಳಲ್ಲಿ ಸಿಲುಕಿಕೊಳ್ಳು ತ್ತವೆ. ಆದರೆ, ಪ್ರಧಾನಿಯವರು ತಮ್ಮ ಭೇಟಿಗಳ ಸಂದರ್ಭದಲ್ಲಿ ಈ ಒಪ್ಪಂದಗಳನ್ನು 'ರಾಜಕೀಯ ಆದ್ಯತೆ' ಎಂದು ಘೋಷಿಸುವುದರಿಂದ, ಸಂಬಂಧಪಟ್ಟ ಅಧಿಕಾರಿಗಳು ಮತ್ತು ವ್ಯಾಪಾರ ಸಚಿವಾಲ ಯಗಳು ಒಪ್ಪಂದವನ್ನು ತ್ವರಿತವಾಗಿ ಅಂತಿಮಗೊಳಿಸಲು ಒತ್ತಡ ಮತ್ತು ಸ್ಪಷ್ಟ ನಿರ್ದೇಶನವನ್ನು ಪಡೆಯುತ್ತವೆ. ಮೋದಿಯವರ ವಿದೇಶ ಪ್ರವಾಸಗಳನ್ನು ಅರಿವಿದ್ದೋ, ಇಲ್ಲದೆಯೋ ಟೀಕಿಸುವವರು ಇದನ್ನು ಅರ್ಥ ಮಾಡಿಕೊಂಡರೆ ಅವರಿಗೇ ಒಳ್ಳೆಯದು.