Lavanya Gowda Column: ಎಐ ಯುಗದಲ್ಲಿ ರೆಕ್ಕೆ ಬಿಚ್ಚಲಿ ಗ್ರಾಮೀಣ ಪ್ರತಿಭೆ

ಉದ್ಯಮಶೀಲತೆ

ಲಾವಣ್ಯ ಗೌಡ

ಶಿಕ್ಷಣ ಎಂದರೆ ಬದಲಾಗುತ್ತಿರುವ ಜಗತ್ತಿಗೆ ತಕ್ಕಂತೆ ನಮ್ಮನ್ನು ನಾವು ನಿರಂತರವಾಗಿ ನವೀಕರಿಸಿಕೊಳ್ಳುವ ಪ್ರಕ್ರಿಯೆ. ಇಂದು ನಾವು ಕೃತಕ ಬುದ್ಧಿಮತ್ತೆ ಯುಗದಲ್ಲಿದ್ದೇವೆ. ಎಐ ಕೇವಲ ಬೆಂಗಳೂರಿನಂತಹ ಮಹಾನಗರಗಳ ದೊಡ್ಡ ಸಾಫ್ಟ್‌ʼವೇರ್ ಕಂಪನಿಗಳಿಗೆ ಸೀಮಿತ ವಾಗಿ ಉಳಿಯಬಾರದು.

ಒಬ್ಬ ಯುವತಿಯಾಗಿ, ಈ ಪ್ರೀತಿಯ ಮಣ್ಣಿನ ಮಗಳಾಗಿ ಸಮಾಜವನ್ನು ನೋಡುವಾಗ ನನಗೆ ಸವಾಲುಗಳನ್ನು ಸಗಟಾಗಿ ಗೆಲ್ಲಬಲ್ಲ ಅಪಾರವಾದ ಯುವಶಕ್ತಿ ಕಾಣಿಸುತ್ತದೆ. ರಾಜಕೀಯದ ಏಳುಬೀಳುಗಳನ್ನು, ಸಮಾಜದ ಆಳ- ಅಗಲಗಳನ್ನು ತೀರಾ ಹತ್ತಿರದಿಂದ ನೋಡಿ ಬೆಳೆದ ಹಿನ್ನೆಲೆ ನನಗಿರುವುದರಿಂದ, ವ್ಯವಸ್ಥೆಯನ್ನು ಕೇವಲ ಟೀಕಿಸುವ ಬದಲು ಅದಕ್ಕೆ ಪರಿಹಾರವಾಗುವುದು ಹೇಗೆ ಎಂಬ ಯೋಚನೆ ನನ್ನಲ್ಲಿದೆ.

ಕರ್ನಾಟಕದ ರಾಜಕಾರಣದಲ್ಲಿ ಹೊಸ ತಲೆಮಾರಿನ ಚಿಂತನೆಗಳು ಮತ್ತು ಉದ್ಯೋಗ ಸೃಷ್ಟಿಯ ಭರವಸೆಗಳು ಕೇಳಿ ಬರುತ್ತಿರುವ ಈ ಐತಿಹಾಸಿಕ ಸಂದರ್ಭದಲ್ಲಿ ನಾನು ನನ್ನ ಬದುಕಿನ ಅತ್ಯಂತ ಆಪ್ತವಾದ ಕನಸೊಂದನ್ನು ನಿಮ್ಮ ಮುಂದೆ ಇಡುತ್ತಿದ್ದೇನೆ. ಇದು ಕೇವಲ ನನ್ನ ಧ್ವನಿಯಲ್ಲ, ಬದಲಿಗೆ ಬದಲಾವಣೆಗಾಗಿ ಕಾಯುತ್ತಿರುವ ಲಕ್ಷಾಂತರ ಕನ್ನಡಿಗರ ಆಶಯ.

ಶಿಕ್ಷಣ ಎಂದರೆ ಬದುಕಿನ ಕೌಶಲ್ಯ

ನನ್ನ ವೃತ್ತಿಜೀವನವನ್ನು ಶಿಕ್ಷಣ ಕ್ಷೇತ್ರಕ್ಕೆ ಮುಡಿಪಾಗಿಟ್ಟವಳು. ಶಿಕ್ಷಣ ಎಂದರೆ ನಾಲ್ಕು ಗೋಡೆಗಳ ಮಧ್ಯೆ ಕುಳಿತು ಅಂಕ ಗಳಿಸುವುದಲ್ಲ. ಅದು ಬದಲಾಗುತ್ತಿರುವ ಜಗತ್ತಿಗೆ ತಕ್ಕಂತೆ ನಮ್ಮನ್ನು ನಾವು ನಿರಂತರವಾಗಿ ನವೀಕರಿಸಿಕೊಳ್ಳುವ ಪ್ರಕ್ರಿಯೆ. ಇಂದು ನಾವು ಕೃತಕ ಬುದ್ಧಿಮತ್ತೆ ಯುಗದಲ್ಲಿದ್ದೇವೆ. ಎಐ ಎನ್ನುವುದು ಕೇವಲ ಬೆಂಗಳೂರಿನಂತಹ ಮಹಾನಗರಗಳ ದೊಡ್ಡ ಸಾಫ್ಟ್‌ʼವೇರ್ ಕಂಪನಿಗಳಿಗೆ ಸೀಮಿತವಾಗಿ ಉಳಿಯ ಬಾರದು.

ಇದನ್ನೂ ಓದಿ: Dr K S Chaithra Column: ವೈದ್ಯ ವಿದ್ಯಾರ್ಥಿಗಳ ಸೈಲೆಂಟ್‌ ಟೀಚರ್‌ !

ಹಾವೇರಿ, ಕೊಪ್ಪಳ, ಶಿವಮೊಗ್ಗ ಅಥವಾ ಯಾದಗಿರಿಯ ಸರಕಾರಿ ಕಾಲೇಜಿನ ವಿದ್ಯಾರ್ಥಿಗೂ ಜಾಗತಿಕ ಮಟ್ಟದ ಈ ತಂತ್ರಜ್ಞಾನದ ಪ್ರವೃತ್ತಿಗಳು ಉಚಿತವಾಗಿ ಸಿಗುವಂತಾಗಬೇಕು. ಕರ್ನಾಟಕ ಸರಕಾರವು ಕಾಲೇಜುಗಳಲ್ಲಿ ಎಐ ತರಬೇತಿ ತರಲು ಮುಂದಾಗಿರುವುದು ಸ್ವಾಗತಾರ್ಹ ನಡೆ. ಆದರೆ, ಈ ತಂತ್ರಜ್ಞಾನ ಪ್ರತಿಯೊಬ್ಬ ಸಾಮಾನ್ಯ ಯುವಕ- ಯುವತಿಯ ಕೈಸೇರಿ, ಅವರನ್ನು ಸ್ವಾವಲಂಬಿ ಉದ್ಯೋಗಸ್ಥರನ್ನಾಗಿ ಮಾಡಿದಾಗ ಮಾತ್ರ ಈ ಯೋಜನೆಗೆ ನಿಜವಾದ ಸಾರ್ಥಕತೆ ಸಿಗುತ್ತದೆ.

ಕಲೆಯ ಮೂಲಕ ಬದುಕು

ರಾಜಕೀಯ ಹಿನ್ನೆಲೆಯಿಂದ ಬಂದವಳಾಗಿ ನನಗೆ ಚೆನ್ನಾಗಿ ಗೊತ್ತು- ಕೇವಲ ಉಚಿತ ಯೋಜನೆಗಳು ಸಮಾಜದ ಶಾಶ್ವತ ಹಸಿವನ್ನು ನೀಗಿಸಲು ಸಾಧ್ಯವಿಲ್ಲ. ನಮಗೆ ಬೇಕಿರುವುದು ಕರುಣೆಗಿಂತ ಹೆಚ್ಚಾಗಿ ‘ಕೌಶಲ್ಯದ ಸಬಲೀಕರಣ’. ಈ ಆಲೋಚನೆಯೇ ನನ್ನನ್ನು ಒಬ್ಬ ಉದ್ಯಮಿಯನ್ನಾಗಿ ರೂಪಿಸಿತು. ನಮ್ಮ ಕರ್ನಾಟಕದ 2ನೇ ಮತ್ತು 3ನೇ ಹಂತದ ನಗರಗಳಲ್ಲಿ, ಅಂದರೆ ನಮ್ಮ ಹಳ್ಳಿ ಹಾಗೂ ಗ್ರಾಮೀಣ ಭಾಗಗಳಲ್ಲಿ ಅದ್ಭುತ ಕಲೆಯಿರುವ ನೂರಾರು ಸಂಗೀತಗಾರರಿದ್ದಾರೆ. ಆದರೆ ಸೂಕ್ತ ವೇದಿಕೆ ಇಲ್ಲದೆ ಅವರ ಕಲೆ ಕತ್ತಲ ಉಳಿದುಹೋಗಿದೆ. ಅಂತಹ ಅಪ್ರತಿಮ ಪ್ರತಿಭೆಗಳನ್ನು ಹುಡುಕಿ, ಅವರಿಗೆ ಆಧುನಿಕ ತಂತ್ರಜ್ಞಾನದ ಅರಿವು ಮೂಡಿಸಿ, ಜಾಗತಿಕ ಮಟ್ಟದ ವೃತ್ತಿಪರ ವೇದಿಕೆ ಕಲ್ಪಿಸಿ ಕೊಡುವ ಒಂದು ಜವಾಬ್ದಾರಿಯನ್ನು ನಾನು ಹೆಗಲಿಗೇರಿಸಿಕೊಂಡಿದ್ದೇನೆ. ಹಳ್ಳಿಯ ಕಡು ಬಡತನದ ಹಿನ್ನೆಲೆಯ ಕಲಾವಿದನೊಬ್ಬ ವೇದಿಕೆಯ ಮೇಲೆ ನಿಂತು ಸ್ವಾಭಿಮಾನ ದಿಂದ ತನ್ನ ಜೀವನೋ ಪಾಯ ಕಂಡುಕೊಂಡಾಗ, ಒಬ್ಬ ಮಹಿಳೆಯಾಗಿ ನನ್ನ ಪ್ರಯತ್ನ ಧನ್ಯವಾಯಿತು ಎನಿಸುತ್ತದೆ.

ಮಹಿಳೆಯರಿಗೆ ನನ್ನ ಮಾತಿಷ್ಟೆ- ನಾವು ಈ ಸಮಾಜದಲ್ಲಿ ನೆಟ್ಟಗೆ ನಿಲ್ಲಬೇಕಾದರೆ ನಮಗೆ ಯಾರದ್ದೋ ಸಾಂತ್ವನದ ನುಡಿಗಳು ಬೇಕಿಲ್ಲ, ಬದಲಿಗೆ ಮೂರು ಕಂಬಗಳ ಗಟ್ಟಿ ಆಸರೆ ಬೇಕು. ಒಂದು ಆರ್ಥಿಕ ಸ್ಥಿರತೆ. ಮಹಿಳೆ ತನ್ನ ಕಾಲ ಮೇಲೆ ತಾನು ನಿಂತಾಗ ಸಿಗುವ ಸ್ವಾತಂತ್ರ್ಯವೇ ಬೇರೆ. ಎಐ ಮತ್ತು ಆಧುನಿಕ ತಂತ್ರಜ್ಞಾನ ಕಲಿತರೆ ಮಹಿಳೆಯರು ಮನೆಯ ಕುಳಿತು ಜಾಗತಿಕ ಮಟ್ಟದ ಉದ್ಯೋಗಾ ವಕಾಶಗಳನ್ನು ಪಡೆಯಬಹುದು. ನಿಮ್ಮ ಬ್ಯಾಂಕ್ ಖಾತೆಯಲ್ಲಿರುವ ಸ್ವಾವಲಂಬನೆ ಯ ಹಣ, ನಿಮಗೆ ಜಗತ್ತನ್ನು ಹೆದರದೆ ಎದುರಿಸುವ ಧೈರ್ಯ ನೀಡುತ್ತದೆ.

ಎರಡನೆಯದು ಮಾನಸಿಕ ಸ್ಥಿರತೆ: ಸಮಾಜ ನಮ್ಮನ್ನು ಎಷ್ಟೇ ಕುಗ್ಗಿಸಲು ಪ್ರಯತ್ನಿಸಿದರೂ, ನಮ್ಮ ಆತ್ಮವಿಶ್ವಾಸ ಕುಗ್ಗಬಾರದು. ಸೋಲುಗಳೇ ನಾಯಕತ್ವದ ಮೊದಲ ಪಾಠಗಳು. ಮಾನಸಿಕ ವಾಗಿ ನಾವು ಗಟ್ಟಿಯಾಗಿದ್ದಾಗ ಮಾತ್ರ ಇಡೀ ಸಮಾಜವನ್ನು ಮುನ್ನಡೆಸುವ ದೊಡ್ಡ ನಿರ್ಧಾರ ಗಳನ್ನು ತೆಗೆದುಕೊಳ್ಳಲು ಸಾಧ್ಯ. ಮೂರನೆಯದು ದೈಹಿಕ ಸ್ಥಿರತೆ. ಸೌಂದರ್ಯ ಎನ್ನುವುದು ಕೇವಲ ಮುಖದ ಬಣ್ಣದಲ್ಲಲ್ಲ, ಅದು ನಮ್ಮ ದೈಹಿಕ ಸಾಮರ್ಥ್ಯ ಮತ್ತು ಒಳಗಿನ ಶಕ್ತಿಯಲ್ಲಿದೆ. ನಮ್ಮ ಆರೋಗ್ಯ ಚೆನ್ನಾಗಿದ್ದಾಗ ಮಾತ್ರ ನಾವು ಕುಟುಂಬ, ರಾಜಕಾರಣ ಮತ್ತು ಉದ್ಯಮ ಮೂರನ್ನೂ ಸಮರ್ಥವಾಗಿ ಮುನ್ನಡೆಸಬಲ್ಲೆವು. ಯಾವಾಗ ಒಬ್ಬ ಮಹಿಳೆ ಆರ್ಥಿಕವಾಗಿ ಸ್ವಾವಲಂಬಿಯಾಗಿ, ಮಾನಸಿಕವಾಗಿ ಧೀರಳಾಗಿ, ದೈಹಿಕವಾಗಿ ಸದೃಢಳಾಗುತ್ತಾಳೋ, ಆಗ ಆಕೆ ಇತಿಹಾಸ ಸೃಷ್ಟಿಸುತ್ತಾಳೆ.

ಯುವ ಮನಸ್ಸಿನ ಸಂಕಲ್ಪ

ನಾನು ಒಬ್ಬ ಯುವತಿಯಾಗಿ, ನನ್ನ ಮುಂದಿರುವ ಸವಾಲುಗಳನ್ನು ಮತ್ತು ನನ್ನ ರಾಜ್ಯದ ಯುವ ಜನತೆಯ ಕನಸುಗಳನ್ನು ಹತ್ತಿರದಿಂದ ಬ,ಕರ್ನಾಟಕ ಸರಕಾರದ ಇತ್ತೀಚಿನ ಕ್ಯಾಬಿನೆಟ್‌ʼನ ನಿರ್ಧಾರ ಗಳಲ್ಲಿ ಉದ್ಯೋಗ ಸೃಷ್ಟಿಗೆ ಹಸಿರು ನಿಶಾನೆತೋರಿಸಿರುವುದು ಆಶಾದಾಯಕವಾಗಿದೆ. ಆದರೆ ರಾಜಕೀಯ ನಾಯಕರಲ್ಲಿ ಮತ್ತು ಸಮಾಜದಲ್ಲಿ ನನ್ನ ವಿನಂತಿ ಇಷ್ಟೇ- ನಮ್ಮ ಯುವಶಕ್ತಿಗೆ ಕೇವಲ ಉದ್ಯೋಗ ನೀಡಬೇಡಿ, ಅವರನ್ನು ಜಾಗತಿಕ ಮಟ್ಟದ ಲೀಡರ್‌ಗಳನ್ನಾಗಿ ಮಾಡಲು ಬೇಕಾದ ಕೌಶಲ್ಯ ಕೊಡಿ. ನಾವು ಶಿಕ್ಷಣ, ರಾಜಕೀಯದ ಒಳನೋಟ ಮತ್ತು ಉದ್ಯಮಶೀಲತೆಯ ಅನುಭವ ದೊಂದಿಗೆ, ನಮ್ಮ ಗ್ರಾಮೀಣ ಪ್ರತಿಭೆಗಳ ಹಾಗೂ ಮಹಿಳೆಯರ ಧ್ವನಿಯಾಗಿ ನಿಲ್ಲಲು ಸಿದ್ಧ. ಕಲೆ, ಶಿಕ್ಷಣ ಮತ್ತು ತಂತ್ರಜ್ಞಾನದ ಸಂಗಮದೊಂದಿಗೆ ನಮ್ಮ ಹೆಮ್ಮೆಯ ಕರ್ನಾಟಕವನ್ನು ಜಾಗತಿಕ ಭೂಪಟದಲ್ಲಿ ಮುಂಚೂಣಿಗೆ ತರೋಣ.