Vishweshwar Bhat Column: ‘ನೆದರ್ಲ್ಯಾಂಡ್ಸ್’ - ‘ಹಾಲ್ಯಾಂಡ್’

ಸಂಪಾದಕೀಯ ಸದ್ಯಶೋಧನೆ

ಕೆಲವರು ‘ನೆದರ್ಲ್ಯಾಂಡ್ಸ್’ ಮತ್ತು ‘ಹಾಲ್ಯಾಂಡ್’ ಈ ಎರಡೂ ಒಂದೇ ದೇಶ ಎಂಬರ್ಥದಲ್ಲಿ ಬಳಸುವುದನ್ನು ಗಮನಿಸಿರಬಹುದು. ಆದರೆ ಭೌಗೋಳಿಕ ಹಾಗೂ ಸಾಂವಿಧಾನಿಕ ದೃಷ್ಟಿಯಿಂದ ಇವೆರಡರ ನಡುವೆ ಸ್ಪಷ್ಟವಾದ ವ್ಯತ್ಯಾಸವಿದೆ. ‘ನೆದರ್ಲ್ಯಾಂಡ್ ’ ಎಂಬುದು ಯುರೋಪ್ ಖಂಡ ದಲ್ಲಿರುವ ಸಂಪೂರ್ಣ ದೇಶದ ಅಧಿಕೃತ ಹೆಸರಾಗಿದ್ದರೆ, ‘ಹಾಲ್ಯಾಂಡ್’ ಎಂಬುದು ಆ ದೇಶದೊಳ ಗಿನ ಕೇವಲ ಒಂದು ನಿರ್ದಿಷ್ಟ ಪ್ರಾಂತ್ಯ ಅಥವಾ ಪ್ರದೇಶವಾಗಿದೆ.

ಇಡೀ ದೇಶವು ಒಟ್ಟು 12 ಪ್ರಾಂತ್ಯಗಳನ್ನು ( Provinces) ಒಳಗೊಂಡಿದ್ದು, ಹಾಲ್ಯಾಂಡ್ ಎಂಬುದು ಅದರಲ್ಲಿನ ಎರಡು ಪ್ರಮುಖ ಪ್ರಾಂತ್ಯಗಳ ಭಾಗವಾಗಿದೆ. ಹೀಗಾಗಿ, ಇಡೀ ದೇಶವನ್ನು ಹಾಲ್ಯಾಂಡ್ ಎಂದು ಕರೆಯುವುದು ತಾಂತ್ರಿಕವಾಗಿ ಸರಿಯಲ್ಲ. ನೆದರ್ಲ್ಯಾಂಡ್ ದೇಶವು ವಾಯುವ್ಯ ಯುರೋಪ್ ನಲ್ಲಿ ನೆಲೆಗೊಂಡಿದ್ದು, ಅದರ ಭೂಖಂಡದ ಭಾಗವು ಉತ್ತರ ಸಮುದ್ರ, ಬೆಲ್ಜಿಯಂ ಮತ್ತು ಜರ್ಮನಿ ದೇಶಗಳೊಂದಿಗೆ ಗಡಿಯನ್ನು ಹಂಚಿಕೊಂಡಿದೆ. ‌

ಈ ದೇಶದಲ್ಲಿ ಒಟ್ಟು 12 ಪ್ರಾಂತ್ಯಗಳಿವೆ- ಗ್ರೋನಿಂಗನ್, ಫ್ರೈಸ್‌ಲ್ಯಾಂಡ್, ಡ್ರೆಂತೆ, ಒವೆರಿಜ್ಸೆಲ್, ಫ್ಲೆವೊಲ್ಯಾಂಡ್, ಗೆಲ್ಡರ್‌ಲ್ಯಾಂಡ್, ಯುಟ್ರೆಕ್ಟ್, ಉತ್ತರ ಹಾಲ್ಯಾಂಡ್, ದಕ್ಷಿಣ ಹಾಲ್ಯಾಂಡ್, ಝೀಲ್ಯಾಂಡ್, ಉತ್ತರ ಬ್ರಾಬಂಟ್ ಮತ್ತು ಲಿಂಬರ್ಗ್. ಇದರ ಜತೆಗೆ ಕೆರಿಬಿಯನ್ ಸಮುದ್ರದಲ್ಲಿರುವ ಕೆಲವು ದ್ವೀಪಗಳು ಸಹ ನೆದರ್ಲ್ಯಾಂಡ್ಸ್ ಸಾಮ್ರಾಜ್ಯದ ಭಾಗವಾಗಿವೆ. ದೇಶದ ಅಧಿಕೃತ ರಾಜಧಾನಿ ಆಮ್‌ಸ್ಟರ್‌ಡ್ಯಾಮ್ ಆಗಿದ್ದು, ಸರಕಾರ ಮತ್ತು ಪಾರ್ಲಿಮೆಂಟ್ ಹೇಗ್ ನಗರದಲ್ಲಿದೆ. ಆದರೆ ‘ಹಾಲ್ಯಾಂಡ್’ ಎಂದರೆ ಏನು ಎಂಬ ಪ್ರಶ್ನೆಗೆ ಉತ್ತರ ಕಂಡುಕೊಳ್ಳಬೇಕಾದರೆ, ನಾವು ನೆದರ್ಲ್ಯಾಂಡ್ಸ್‌ ನ ಪ್ರಾಂತ್ಯಗಳ ವಿಭಾಗವನ್ನು ಗಮನಿಸಬೇಕು.

ಇದನ್ನೂ ಓದಿ:‌ Vishweshwar Bhat Column: ಪ್ರತಿಭೆಗೆ ಸಾಣೆ ಹಿಡಿಯುವುದು

ಹಾಲ್ಯಾಂಡ್ ಎಂಬುದು ಒಂದು ಭೂಭಾಗವಾಗಿದ್ದು, ಅದನ್ನು ಎರಡು ಪ್ರತ್ಯೇಕ ಪ್ರಾಂತ್ಯಗಳಾಗಿ ವಿಂಗಡಿಸಲಾಗಿದೆ- ‘ಉತ್ತರ ಹಾಲ್ಯಾಂಡ್’ ಮತ್ತು ‘ದಕ್ಷಿಣ ಹಾಲ್ಯಾಂಡ್’. ಅಂದರೆ, ಹಾಲ್ಯಾಂಡ್ ಎಂಬುದು ನೆದರ್ಲ್ಯಾಂಡ್ ನ 12 ಪ್ರಾಂತ್ಯಗಳಲ್ಲಿ ಕೇವಲ ಎರಡು ಪ್ರಾಂತ್ಯಗಳನ್ನು ಮಾತ್ರ ಪ್ರತಿನಿಧಿಸುತ್ತದೆ. ದೇಶದ ಇನ್ನುಳಿದ ಹತ್ತು ಪ್ರಾಂತ್ಯಗಳು ಹಾಲ್ಯಾಂಡ್ ವ್ಯಾಪ್ತಿಗೆ ಬರುವುದಿಲ್ಲ. ಆದ್ದರಿಂದ, ಹಾಲ್ಯಾಂಡ್ ಎಂಬ ಪದವು ಇಡೀ ದೇಶಕ್ಕೆ ಅನ್ವಯಿಸುವುದಿಲ್ಲ. ಹಾಗಾದರೆ ಇಡೀ ದೇಶವನ್ನು ಹಾಲ್ಯಾಂಡ್ ಎಂದು ತಪ್ಪಾಗಿ ಕರೆಯಲು ಮುಖ್ಯ ಕಾರಣವೇನು? ಇದಕ್ಕೆ ಮೂಲ ಕಾರಣ ಈ ಎರಡು ಪ್ರಾಂತ್ಯಗಳಲ್ಲಿರುವ ಜಾಗತಿಕ ಮಟ್ಟದ ಪ್ರಸಿದ್ಧ ನಗರಗಳು. ನೆದರ್ಲ್ಯಾಂಡ್ಸ್ ದೇಶದ ರಾಜಧಾನಿಯಾದ ‘ಆಮ್ ಸ್ಟರ್‌ಡ್ಯಾಮ್’ ಉತ್ತರ ಹಾಲ್ಯಾಂಡ್‌ಗೆ ಸೇರಿದ್ದರೆ, ಪ್ರಸಿದ್ಧ ಬಂದರು ನಗರ ‘ರಾಟರ್ಡ್ಯಾಮ್’ ಮತ್ತು ಸಾಂವಿಧಾನಿಕ ಕೇಂದ್ರವಾದ ‘ದಿ ಹೇಗ್’ ದಕ್ಷಿಣ ಹಾಲ್ಯಾಂಡ್‌ಗೆ ಸೇರಿವೆ. ‌

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರವಾಸೋದ್ಯಮ, ವ್ಯಾಪಾರ, ರಾಜಕೀಯ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳ ಕೇಂದ್ರಬಿಂದುವಾಗಿ ಈ ನಗರಗಳೇ ಹೆಚ್ಚು ಜನಪ್ರಿಯವಾಗಿರುವುದರಿಂದ, ವಿದೇಶಿ‌ ಗರು ಇಡೀ ದೇಶವನ್ನೇ ಹಾಲ್ಯಾಂಡ್ ಎಂದು ಗುರುತಿಸಲು ಪ್ರಾರಂಭಿಸಿದರು. ಈ ಗೊಂದಲಕ್ಕೆ ಐತಿಹಾಸಿಕ ಹಿನ್ನೆಲೆಯೂ ಇದೆ. ಹದಿನೇಳನೇ ಶತಮಾನದಲ್ಲಿ (ಡಚ್ ಸ್ವರ್ಣಯುಗ), ಉತ್ತರ ಮತ್ತು ದಕ್ಷಿಣ ಹಾಲ್ಯಾಂಡ್ ಪ್ರಾಂತ್ಯಗಳು ಆರ್ಥಿಕವಾಗಿ, ನೌಕಾಪಡೆಯಲ್ಲಿ ಮತ್ತು ವ್ಯಾಪಾರದಲ್ಲಿ ಅತ್ಯಂತ ಪ್ರಭಾವಶಾಲಿಯಾಗಿದ್ದವು. ಆಗಿನ ಕಾಲದಲ್ಲಿ ಪ್ರಪಂಚದಾದ್ಯಂತ ಸಂಚರಿಸುತ್ತಿದ್ದ ಹೆಚ್ಚಿನ ಸಮುದ್ರ ಯಾನಿಗಳು ಮತ್ತು ವರ್ತಕರು ಈ ಹಾಲ್ಯಾಂಡ್ ಪ್ರದೇಶದಿಂದಲೇ ಬಂದವರಾ ಗಿದ್ದರು. ಅವರು ವಿದೇಶಗಳಿಗೆ ಹೋದಾಗ ‘ನಾವು ಹಾಲ್ಯಾಂಡ್‌ನಿಂದ ಬಂದಿದ್ದೇವೆ’ ಎಂದು ಹೇಳಿಕೊಳ್ಳುತ್ತಿದ್ದರು.

ಇದರಿಂದಾಗಿ ವಿದೇಶಿ ನಾವಿಕರು ಮತ್ತು ವ್ಯಾಪಾರಿಗಳು ಇಡೀ ನೆದರ್ಲ್ಯಾಂಡ್ಸ್ ಪ್ರದೇಶವನ್ನು ‘ಹಾಲ್ಯಾಂಡ್’ ಎಂದೇ ಕರೆಯಲು ಅಭ್ಯಾಸ ಮಾಡಿಕೊಂಡರು. ಅದು ತಲೆಮಾರುಗಳಿಂದ ಮುಂದುವರಿದುಕೊಂಡು ಬಂದಿತು. ಕಾಲಕ್ರಮೇಣ ನೆದರ್ಲ್ಯಾಂಡ್ಸ್ ಬಳಸಿ ‘ಹಾಲ್ಯಾಂಡ್’ ಎಂಬ ಹೆಸರನ್ನು ಬ್ರ್ಯಾಂಡಿಂಗ್‌ಗಾಗಿ ಬಳಸಿತ್ತು. ಆದರೆ ಇದು ದೇಶದ ಇತರ ಹತ್ತು ಪ್ರಾಂತ್ಯಗಳ ಸಂಸ್ಕೃತಿ ಮತ್ತು ಪ್ರಾಮುಖ್ಯವನ್ನು ಮರೆಮಾಚುತ್ತಿದೆ ಎಂಬುದನ್ನು ಅರಿತ ನೆದರ್ಲ್ಯಾಂಡ್ಸ್ ಸರಕಾರ, ಇತ್ತೀಚಿನ ವರ್ಷಗಳಲ್ಲಿ (2020ರಿಂದ) ತನ್ನ ಅಧಿಕೃತ ಬ್ರ್ಯಾಂಡಿಂಗ್‌ನಿಂದ ‘ಹಾಲ್ಯಾಂಡ್’ ಪದವನ್ನು ಕೈಬಿಟ್ಟಿದೆ. ಅಧಿಕೃತವಾಗಿ ಮತ್ತು ಜಾಗತಿಕವಾಗಿ ದೇಶವನ್ನು ‘ನೆದರ್ಲ್ಯಾಂಡ್ಸ್’ ಎಂದೇ ಪ್ರಚಾರ ಮಾಡಲು ನಿರ್ಧರಿಸಿದೆ. ಈಗ ಕ್ರೀಡಾಕೂಟಗಳು, ರಾಯಭಾರ ಕಚೇರಿಗಳು ಮತ್ತು ಸರಕಾರದ ಅಧಿಕೃತ ವ್ಯವಹಾರಗಳಲ್ಲಿ ಕೇವಲ ‘ನೆದರ್ಲ್ಯಾಂಡ್ಸ್’ ಎಂಬ ಹೆಸರನ್ನಷ್ಟೇ ಬಳಸಲಾಗುತ್ತಿದೆ.