Vishweshwar Bhat Column: ದೌರ್ಬಲ್ಯವನ್ನೇ ಶಕ್ತಿಯಾಗಿಸಿಕೊಳ್ಳುವುದು

ಸಂಪಾದಕರ ಸದ್ಯಶೋಧನೆ

ಇತ್ತೀಚೆಗೆ ನಾನು ಜಾನ್ ಕಿಮ್ ಬರೆದ I Used to Be a Miserable F*ck ಎಂಬ ಕೃತಿಯನ್ನು ಓದಿದೆ. ಇದು ಸಾಂಪ್ರದಾಯಿಕ ಸ್ವಯಂ- ಸಹಾಯ ಪುಸ್ತಕಗಳಿಗಿಂತ ಭಿನ್ನವಾದುದು. ಇದು ಬದುಕಿನ ಕಟು ಸತ್ಯಗಳನ್ನು ನೇರವಾಗಿ, ಸ್ವಲ್ಪ ಒರಟಾಗಿ ಮತ್ತು ಅಷ್ಟೇ ಪ್ರಾಮಾಣಿಕವಾಗಿ ತೆರೆದಿಡುವ ಕೃತಿ.

ಕಿಮ್ ಹೇಳುವ ಮುಖ್ಯ ಸಂಗತಿಯೆಂದರೆ, ನಮ್ಮ ಜೀವನದ ದುಃಖಕ್ಕೆ ಬೇರೆಯವರನ್ನು ದೂಷಿಸುವುದನ್ನು ನಿಲ್ಲಿಸುವುದು. ನೀವು ‘ಮಿಸರಬಲ್’ ಆಗಿರಲು ಕಾರಣ ನಿಮ್ಮ ಬಾಸ್, ನಿಮ್ಮ ಮಾಜಿ ಸಂಗಾತಿ ಅಥವಾ ನಿಮ್ಮ ಹಣೆಬರಹವಲ್ಲ. ಬದಲಿಗೆ ನೀವು ಅದನ್ನು ನಿಭಾಯಿಸುತ್ತಿರುವ ರೀತಿ. ನಿಮ್ಮ ಸಂತೋಷದ ಜವಾಬ್ದಾರಿ ಕೇವಲ ನಿಮ್ಮದು ಎಂಬ ಕಟು ಸತ್ಯವನ್ನು ಕಿಮ್ ಪ್ರತಿಪಾದಿಸುತ್ತಾನೆ.

ಬಹಳಷ್ಟು ಜನರು ಜೀವನದ ಅರ್ಥವೇನು ಎಂದು ಹುಡುಕುತ್ತಾ ಕಾಲ ಕಳೆಯುತ್ತಾರೆ. ಆದರೆ ಕಿಮ್ ಪ್ರಕಾರ, ಜೀವನಕ್ಕೆ ಯಾವುದೇ ಮೊದಲೇ ನಿರ್ಧರಿಸಿದ ಅರ್ಥವಿರುವುದಿಲ್ಲ. ನಾವು ಪ್ರತಿದಿನ ಮಾಡುವ ಕೆಲಸಗಳಲ್ಲಿ, ಸಂಬಂಧಗಳಲ್ಲಿ ಮತ್ತು ಅನುಭವಗಳಲ್ಲಿ ನಾವೇ ಅರ್ಥವನ್ನು ತುಂಬಬೇಕು.

ಇದನ್ನೂ ಓದಿ: Vishweshwar Bhat Column: ಅಳುವ ಕಡಲೊಳು ತೇಲಿಬಂದ ನಗೆಯ ಹಾಯಿದೋಣಿ !

’Meaning is not found; it is built’ ಎನ್ನುವುದು ಈ ಪುಸ್ತಕದ ಸೂಕ್ಷ ಒಳನೋಟ. ನಾವು ಮರೆಯಲು ಬಯಸುವ ಅಥವಾ ಬೇರೆಯವರನ್ನು ಮೆಚ್ಚಿಸಲು ಪ್ರಯತ್ನಿಸುವಾಗ ನಮ್ಮತನವನ್ನು ಕಳೆದುಕೊಳ್ಳುತ್ತೇವೆ. ಕಿಮ್ ಹೇಳುವಂತೆ, ನೀವು ಯಾರೆಂದು ಜಗತ್ತಿಗೆ ತೋರಿಸಲು ಭಯಪಡಬೇಡಿ.

ನಿಮ್ಮ ಅಸಲಿ ವ್ಯಕ್ತಿತ್ವವನ್ನು (Authenticity) ಒಪ್ಪಿಕೊಂಡಾಗ ಮಾತ್ರ ನೀವು ನೆಮ್ಮದಿ ಯಿಂದ ಇರಲು ಸಾಧ್ಯ. ಸಂಬಂಧಗಳಲ್ಲಿ ನಾಟಕವಾಡುವುದಕ್ಕಿಂತ, ಸತ್ಯ ವಾಗಿರುವುದು ಹೆಚ್ಚು ಆರಾಮದಾಯಕ. ‘ಪುರುಷತ್ವ’ ಎಂದರೆ ಕೇವಲ ಸ್ನಾಯುಬಲ ಅಥವಾ ಕಠಿಣ ವಾಗಿರುವುದಲ್ಲ.

ಭಾವನೆಗಳನ್ನು ವ್ಯಕ್ತಪಡಿಸುವುದು, ತಪ್ಪುಗಳನ್ನು ಒಪ್ಪಿಕೊಳ್ಳುವುದು ಮತ್ತು ಸಹಾನು ಭೂತಿ ತೋರುವುದು ನಿಜವಾದ ಪುರುಷತ್ವದ ಲಕ್ಷಣ ಎಂದು ಕಿಮ್ ವಿವರಿಸುತ್ತಾನೆ. ಒಂದೇ ದಿನದಲ್ಲಿ ಜೀವನ ಬದಲಾಗುವುದಿಲ್ಲ. ಬದಲಿಗೆ ಪ್ರತಿದಿನದ ಸಣ್ಣ ಅಭ್ಯಾಸಗಳು- ಉದಾ ಹರಣೆಗೆ ಬೆಳಗ್ಗೆ ಎದ್ದ ಕೂಡಲೇ ಹಾಸಿಗೆ ಸರಿಪಡಿಸುವುದು ಅಥವಾ ಸ್ವಲ್ಪ ಸಮಯ ನಡೆಯುವುದು- ನಿಮ್ಮ ಮಿದುಳನ್ನು ಸಕಾರಾತ್ಮಕವಾಗಿ ರೂಪಿಸುತ್ತವೆ. ಶಿಸ್ತು ಎನ್ನುವುದು ನಿಮ್ಮನ್ನು ಬಂಧಿಸುವ ಸಂಕೋಲೆಯಲ್ಲ, ಬದಲಿಗೆ ಅದು ನಿಮಗೆ ಸ್ವಾತಂತ್ರ್ಯವನ್ನು ನೀಡುವ ಮಾರ್ಗ.

‘ಸಂತೋಷ ಎನ್ನುವುದು ಒಂದು ಗುರಿಯಲ್ಲ, ಅದು ನಾವು ಬದುಕುವ ದಾರಿ’ ಎಂದು ಕಿಮ್ ಹೇಳುತ್ತಾನೆ. ಈ ಪುಸ್ತಕವು ಮುಖ್ಯವಾಗಿ ‘ನಾನು ಹೀಗೆಯೇ ಇರುವುದು’ ಎಂಬ ಹಠವನ್ನು ಬಿಟ್ಟು, ‘ನಾನು ಇನ್ನೂ ಉತ್ತಮವಾಗಬಲ್ಲೆ’ ಎಂಬ ಆಶಾವಾದವನ್ನು ಮೂಡಿಸುತ್ತದೆ.

ನೀವು ನಿಮ್ಮ ಜೀವನದ ನಾಯಕನಾಗಿ ಬದಲಾಗಲು ಬೇಕಾದ ‘ರಫ್ ಅಂಡ್ ಟಫ್’ ಪ್ರೋತ್ಸಾಹ ಈ ಕೃತಿಯಲ್ಲಿದೆ. ಕಿಮ್ ಸ್ವತಃ ಒಬ್ಬ ‘ಆಂಗ್ರಿ ಥೆರಪಿ’ ಆಗಿ ಗುರುತಿಸಿಕೊಂಡವ. ಅವನ ಪ್ರಕಾರ, ಕೋಪವು ಹೆಚ್ಚಾಗಿ ನಮ್ಮೊಳಗಿನ ಭಯ ಅಥವಾ ದುಃಖವನ್ನು ಮುಚ್ಚಿಡಲು ನಾವು ಧರಿಸುವ ಮುಖವಾಡ. ನಾವು ಯಾವಾಗ ಕೋಪಗೊಳ್ಳುತ್ತೇವೆಯೋ, ಆಗ ನಮ್ಮನ್ನು ನಾವೇ ಪ್ರಶ್ನಿಸಿಕೊಳ್ಳಬೇಕು.

‘ನಾನು ಯಾವುದಕ್ಕೆ ಹೆದರುತ್ತಿದ್ದೇನೆ?’ ಅಥವಾ ‘ನನಗೆ ಎಲ್ಲಿ ನೋವಾಗಿದೆ?’ ಈ ಆತ್ಮಾವ ಲೋಕನವು ನಮ್ಮನ್ನು ನಕಾರಾತ್ಮಕತೆಯಿಂದ ಹೊರತರುತ್ತದೆ. ನಾವು ನಮ್ಮ ಬಗ್ಗೆಯೇ ಒಂದು ಕಥೆಯನ್ನು ಕಟ್ಟಿಕೊಂಡಿರುತ್ತೇವೆ. ‘ನಾನು ಯಾವಾಗಲೂ ವಿಫಲ ವಾಗುತ್ತೇನೆ’ ಅಥವಾ ‘ನನಗೆ ಅದೃಷ್ಟವಿಲ್ಲ’ ಎಂಬ ಕಥೆಗಳು ನಮ್ಮನ್ನು ಕಟ್ಟಿಹಾಕುತ್ತವೆ.

ಕಿಮ್ ಹೇಳುವಂತೆ, ಈ ಹಳೆಯ ಸ್ಕ್ರಿ ಅನ್ನು ಹರಿದು ಹಾಕಿ ಹೊಸದನ್ನು ಬರೆಯುವ ಶಕ್ತಿ ನಮಗಿದೆ. ನಿಮ್ಮ ಭೂತಕಾಲವು ನಿಮ್ಮ ಭವಿಷ್ಯವನ್ನು ನಿರ್ಧರಿಸಬಾರದು. ನಾವು ಹೆಚ್ಚಾಗಿ ಕಳೆದ ಹೋದ ದಿನಗಳ ಬಗ್ಗೆ ಮರುಗುತ್ತಾ ಅಥವಾ ಬರಲಿರುವ ದಿನಗಳ ಬಗ್ಗೆ ಆತಂಕ ಪಡುತ್ತಾ ಬದುಕುತ್ತೇವೆ. ಈ ಪುಸ್ತಕವು ‘ಈ ಕ್ಷಣ’ದಲ್ಲಿ ಬದುಕುವುದರ ಮಹತ್ವವನ್ನು ಒತ್ತಿ ಹೇಳುತ್ತದೆ.

ನೀವು ಕಾಫಿ ಕುಡಿಯುತ್ತಿರಲಿ ಅಥವಾ ಗೆಳೆಯರೊಂದಿಗೆ ಮಾತನಾಡುತ್ತಿರಲಿ, ಆ ಕ್ಷಣದಲ್ಲಿ ಪೂರ್ಣವಾಗಿ ತೊಡಗಿಸಿಕೊಳ್ಳುವುದು ನಿಮ್ಮ ಮಿದುಳಿನ ಒತ್ತಡವನ್ನು ಕಡಿಮೆ ಮಾಡು ತ್ತದೆ. ನಾವು ಕೇವಲ ನಮ್ಮ ಬಗ್ಗೆಯೇ ಯೋಚಿಸುತ್ತಿದ್ದರೆ ದುಃಖ ಹೆಚ್ಚಾಗುತ್ತದೆ.

ಬೇರೆಯವರಿಗೆ ಸಹಾಯ ಮಾಡುವುದು ಅಥವಾ ಸಮಾಜದೊಂದಿಗೆ ಅರ್ಥಪೂರ್ಣವಾಗಿ ಬೆರೆಯುವುದು ನಮಗೆ ಒಂದು ದೊಡ್ಡ ಉದ್ದೇಶವನ್ನು ನೀಡುತ್ತದೆ. ‘ನನಗೇನು ಸಿಗುತ್ತದೆ?’ ಎಂಬ ಯೋಚನೆಗಿಂತ ‘ನಾನು ಏನು ನೀಡಬಲ್ಲೆ ?’ ಎಂಬ ಬದಲಾವಣೆ ನಿಮ್ಮ ವ್ಯಕ್ತಿತ್ವ ವನ್ನು ಶ್ರೀಮಂತಗೊಳಿಸುತ್ತದೆ. ವೈಫಲ್ಯ ಎನ್ನುವುದು ಅಂತ್ಯವಲ್ಲ, ಅದು ಒಂದು ಮಾಹಿತಿ. ನೀವು ಯಾವು ದೋ ಕೆಲಸದಲ್ಲಿ ಸೋತರೆ, ಅದರರ್ಥ ನೀವು ಆ ಕೆಲಸಕ್ಕೆ ಲಾಯಕ್ಕಲ್ಲ ಎಂದಲ್ಲ. ಬದಲಿಗೆ ಆ ದಾರಿ ನಿಮಗೆ ಸರಿ ಹೊಂದುತ್ತಿಲ್ಲ ಎಂದರ್ಥ.