ಡಾಲರ್‌ಗೆ ಪರ್ಯಾಯವಾಗಿ ರೂಪುಗೊಳ್ಳುತ್ತಾ ಬ್ರಿಕ್ಸ್‌ ಕರೆನ್ಸಿ? ಈ ಬಗ್ಗೆ ಸ್ಪಷ್ಟನೆ ನೀಡಿದ ಭಾರತ ಹೇಳಿದ್ದೇನು?

ನವದೆಹಲಿ, ಸೆ. 12: ಬ್ರಿಕ್ಸ್‌ (BRICS) ರಾಷ್ಟ್ರಗಳ ನಡುವೆ ಯೂರೋ ಮಾದರಿಯ ಸಾಮಾನ್ಯ ಕರೆನ್ಸಿ (Common Currency) ಪರಿಚಯಿಸುವ ಕುರಿತು ಸದ್ಯಕ್ಕೆ ಯಾವುದೇ ಪ್ರಸ್ತಾವನೆ ಇಲ್ಲ ಎಂದು ಭಾರತ ಸ್ಪಷ್ಟಪಡಿಸಿದೆ. ಬ್ರಿಕ್ಸ್‌ ದೇಶಗಳ ನಡುವಿನ ವ್ಯಾಪಾರವನ್ನು ಮತ್ತಷ್ಟು ಸುಗಮಗೊಳಿಸುವುದು, ವಹಿವಾಟಿನ ವೆಚ್ಚ ಕಡಿಮೆ ಮಾಡುವುದು ಹಾಗೂ ಸ್ಥಳೀಯ ಕರೆನ್ಸಿಗಳಲ್ಲೇ ವ್ಯಾಪಾರ ಮತ್ತು ಪಾವತಿಗಳನ್ನು ಉತ್ತೇಜಿಸುವುದರತ್ತ ಗಮನ ಹರಿಸಲಾಗುತ್ತಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ತಿಳಿಸಿದೆ.

ದೆಹಲಿಯಲ್ಲಿ ನಡೆಯುತ್ತಿರುವ ಬ್ರಿಕ್ಸ್‌ ಶೃಂಗಸಭೆಯ ಹಿನ್ನೆಲೆಯಲ್ಲಿ ಬ್ರಿಕ್ಸ್‌ ಸಾಮಾನ್ಯ ಕರೆನ್ಸಿ ಕುರಿತು ಚರ್ಚೆಗಳು ನಡೆಯುತ್ತಿವೆ ಎಂಬ ವರದಿಗಳ ನಡುವೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಆರ್ಥಿಕ ಸಂಬಂಧಗಳ ಕಾರ್ಯದರ್ಶಿ ಸುಧಾಕರ್‌ ದಲೇಲಾ ಸ್ಪಷ್ಟನೆ ನೀಡಿದ್ದಾರೆ. “ಸದ್ಯಕ್ಕೆ ಬ್ರಿಕ್ಸ್‌ ಕರೆನ್ಸಿಗೆ ಯಾವುದೇ ಪ್ರಸ್ತಾವನೆ ಇಲ್ಲ” ಎಂದು ಅವರು ತಿಳಿಸಿದ್ದಾರೆ.

ಬ್ರಿಕ್ಸ್‌ ಕರೆನ್ಸಿ ಬಗ್ಗೆ ಭಾರತದ ನಿಲುವು:

ಸ್ಥಳೀಯ ಕರೆನ್ಸಿಯಲ್ಲಿ ವ್ಯಾಪಾರಕ್ಕೆ ಆದ್ಯತೆ

ಬ್ರಿಕ್ಸ್‌ ಸದಸ್ಯ ರಾಷ್ಟ್ರಗಳ ನಡುವಿನ ದ್ವಿಪಕ್ಷೀಯ ವ್ಯಾಪಾರವನ್ನು ಆಯಾ ದೇಶಗಳ ಸ್ಥಳೀಯ ಕರೆನ್ಸಿಗಳಲ್ಲಿ ನಡೆಸುವ ಸಾಧ್ಯತೆಗಳನ್ನು ಮುಂದುವರಿಸಿ ಪರಿಶೀಲಿಸಲಾಗುತ್ತಿದೆ. ಇದರ ಪ್ರಮುಖ ಉದ್ದೇಶ ವಹಿವಾಟಿನ ವೆಚ್ಚವನ್ನು ಕಡಿಮೆ ಮಾಡುವುದು ಹಾಗೂ ಗಡಿ ದಾಟಿದ ಹಣಕಾಸು ವ್ಯವಹಾರಗಳನ್ನು ವೇಗವಾಗಿ ಮತ್ತು ಸುಲಭವಾಗಿ ನಡೆಸುವುದಾಗಿದೆ ಎಂದು ದಲೇಲಾ ಹೇಳಿದ್ದಾರೆ.

ಬ್ರಿಕ್ಸ್‌ ರಾಷ್ಟ್ರಗಳ ನಡುವೆ ವ್ಯಾಪಾರ ಹೆಚ್ಚಿಸುವುದು, ಜಾಗತಿಕ ಉದ್ಯಮ ಸಮುದಾಯದೊಂದಿಗೆ ಹೆಚ್ಚಿನ ಸಂಪರ್ಕ ಸಾಧಿಸುವುದು ಮತ್ತು ವಹಿವಾಟಿನ ವೆಚ್ಚವನ್ನು ಕಡಿಮೆ ಮಾಡುವಂತಹ ವ್ಯವಸ್ಥೆಗಳನ್ನು ದ್ವಿಪಕ್ಷೀಯವಾಗಿ ಹಾಗೂ ಬ್ರಿಕ್ಸ್‌ ಮಟ್ಟದಲ್ಲಿ ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ಅವರು ವಿವರಿಸಿದ್ದಾರೆ.

ಪಾವತಿ ವ್ಯವಸ್ಥೆಗಳನ್ನು ಜೋಡಿಸಲು ಭಾರತ ಒತ್ತು

ಇದಕ್ಕೂ ಮುನ್ನ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್‌ ಗೋಯಲ್‌ ಬ್ರಿಕ್ಸ್‌ ರಾಷ್ಟ್ರಗಳು ತಮ್ಮ ಪಾವತಿ ವ್ಯವಸ್ಥೆಗಳನ್ನು ಪರಸ್ಪರ ಜೋಡಿಸುವಂತೆ ಕರೆ ನೀಡಿದ್ದರು. ಭಾರತದ ಯುಪಿಐ (UPI) ವ್ಯವಸ್ಥೆಯ ಅನುಭವವನ್ನು ಬಳಸಿಕೊಂಡು ಸದಸ್ಯ ರಾಷ್ಟ್ರಗಳ ನಡುವೆ ಡಿಜಿಟಲ್‌ ಪಾವತಿಗಳನ್ನು ಸುಲಭಗೊಳಿಸುವುದು ಮತ್ತು ಸ್ಥಳೀಯ ಕರೆನ್ಸಿಗಳಲ್ಲಿ ವ್ಯಾಪಾರ ನಡೆಸುವುದು ಅಗತ್ಯ ಎಂದು ಅವರು ಹೇಳಿದ್ದರು.

ವ್ಲಾಡಿಮಿರ್‌ ಪುಟಿನ್–ಷಿ ಜಿನ್‌ಪಿಂಗ್‌ ಜತೆ ನರೇಂದ್ರ ಮೋದಿ; ದೆಹಲಿ ಬ್ರಿಕ್ಸ್‌ ಶೃಂಗಸಭೆಯ ಒಗ್ಗಟ್ಟಿನ ಫೋಟೊ ವೈರಲ್

ಬ್ರಿಕ್ಸ್‌ ರಾಷ್ಟ್ರಗಳ ಪಾವತಿ ವ್ಯವಸ್ಥೆಗಳನ್ನು ಸಂಪರ್ಕಿಸುವುದರಿಂದ ಒಂದು ದೇಶದಿಂದ ಮತ್ತೊಂದು ದೇಶಕ್ಕೆ ಹಣ ವರ್ಗಾವಣೆ ಮತ್ತು ವ್ಯಾಪಾರ ಪಾವತಿಗಳನ್ನು ಹೆಚ್ಚು ವೇಗವಾಗಿ ಹಾಗೂ ಕಡಿಮೆ ವೆಚ್ಚದಲ್ಲಿ ನಡೆಸಲು ಸಾಧ್ಯವಾಗಬಹುದು. ಪ್ರಸ್ತುತ ಯುಪಿಐ 11 ದೇಶಗಳಲ್ಲಿ ಸ್ವೀಕರಿಸಲಾಗುತ್ತಿದೆ ಎಂದು ಗೋಯಲ್‌ ತಿಳಿಸಿದ್ದಾರೆ.

ಬ್ರಿಕ್ಸ್‌ ಘೋಷಣೆಯಲ್ಲೂ ಸ್ಥಳೀಯ ಕರೆನ್ಸಿಗೆ ಒತ್ತು

ದೆಹಲಿಯಲ್ಲಿ ಅಂಗೀಕರಿಸಲಾದ ಬ್ರಿಕ್ಸ್‌ ಜಂಟಿ ಘೋಷಣೆಯಲ್ಲೂ ಗಡಿ ದಾಟಿದ ಪಾವತಿ ವ್ಯವಸ್ಥೆಗಳನ್ನು ಪರಸ್ಪರ ಸಂಪರ್ಕಿಸುವ ಪ್ರಯತ್ನಗಳನ್ನು ಮುಂದುವರಿಸುವುದಾಗಿ ತಿಳಿಸಲಾಗಿದೆ. ಬ್ರಿಕ್ಸ್‌ ಪೇಮೆಂಟ್‌ ಟಾಸ್ಕ್‌ ಫೋರ್ಸ್‌ ವೇಗವಾದ, ಕಡಿಮೆ ವೆಚ್ಚದ, ಸುರಕ್ಷಿತ, ಪಾರದರ್ಶಕ ಹಾಗೂ ಸುಲಭವಾಗಿ ಲಭ್ಯವಾಗುವ ಗಡಿ ದಾಟಿದ ಪಾವತಿ ವ್ಯವಸ್ಥೆಗಳಿಗೆ ಪ್ರಾಯೋಗಿಕ ಪರಿಹಾರಗಳನ್ನು ರೂಪಿಸುವ ಕುರಿತು ಕೆಲಸ ಮುಂದುವರಿಸಲಿದೆ.

ಡಾಲರ್‌ಗೆ ಪರ್ಯಾಯವೇ?

ಬ್ರಿಕ್ಸ್‌ ಸಾಮಾನ್ಯ ಕರೆನ್ಸಿ ಕುರಿತು ಚರ್ಚೆ ನಡೆಯುತ್ತಿರುವುದರಿಂದ ಇದು ಅಮೆರಿಕದ ಡಾಲರ್‌ಗೆ ಪರ್ಯಾಯ ವ್ಯವಸ್ಥೆ ರೂಪಿಸುವ ಪ್ರಯತ್ನವೇ ಎಂಬ ಪ್ರಶ್ನೆ ಮೂಡಿದೆ. ಆದರೆ ಭಾರತದ ಇತ್ತೀಚಿನ ನಿಲುವು ಹೊಸ ಸಾಮಾನ್ಯ ಕರೆನ್ಸಿ ರೂಪಿಸುವುದಕ್ಕಿಂತ ಸ್ಥಳೀಯ ಕರೆನ್ಸಿಗಳಲ್ಲಿನ ವ್ಯಾಪಾರ ಮತ್ತು ಪಾವತಿ ವ್ಯವಸ್ಥೆಗಳನ್ನು ಬಲಪಡಿಸುವುದಕ್ಕೆ ಹೆಚ್ಚು ಒತ್ತು ನೀಡುತ್ತಿದೆ ಎಂಬುದನ್ನು ಸಾರಿ ಹೇಳಿದೆ.

ಬ್ರಿಕ್ಸ್‌ ದೇಶಗಳು ಪ್ರಸ್ತುತ ತಮ್ಮದೇ ರಾಷ್ಟ್ರೀಯ ಕರೆನ್ಸಿಗಳನ್ನು ಬಳಸಿಕೊಂಡು ವ್ಯಾಪಾರ ನಡೆಸುವ ವ್ಯವಸ್ಥೆ ಹಾಗೂ ವಿವಿಧ ಪಾವತಿ ವ್ಯವಸ್ಥೆಗಳ ನಡುವಿನ ಸಂಪರ್ಕವನ್ನು ಸುಧಾರಿಸುವತ್ತ ಗಮನಹರಿಸುತ್ತಿವೆ. ಹೀಗಾಗಿ, ʼಬ್ರಿಕ್ಸ್‌ ಕರೆನ್ಸಿʼ ಕುರಿತು ಊಹಾಪೋಹಗಳಿದ್ದರೂ, ಸದ್ಯಕ್ಕೆ ಅಂತಹ ಅಧಿಕೃತ ಯೋಜನೆ ಇಲ್ಲ ಎಂಬುದು ಭಾರತದ ಸ್ಪಷ್ಟ ನಿಲುವು.