Iran- israel War: ಹಾರ್ಮುಜ್ ಜಲಸಂಧಿಯಲ್ಲಿ ಡಿಜಿಟಲ್ ಬ್ಲಾಕೌಟ್, ದಿಕ್ಕು ತೋಚದೆ ನಿಂತ ನೂರಾರು ತೈಲ ನೌಕೆಗಳು!
ಜಾಗತಿಕ ತೈಲ ಪೂರೈಕೆಯ ಶೇ. 20 ರಷ್ಟು ಭಾಗವನ್ನು ನಿರ್ವಹಿಸುವ ಹಾರ್ಮುಜ್ ಜಲಸಂಧಿಯ ಈ ಜಲಮಾರ್ಗದಲ್ಲಿ ಈಗ ಹಡಗುಗಳ ಸಂಚಾರ ಸಂಪೂರ್ಣ ಹಳಿ ತಪ್ಪಿದೆ. ಇರಾನ್ ಡಿಜಿಟಲ್ ಬ್ಲಾಕೌಟ್ ತಂತ್ರವನ್ನು ಅನುಸರಿಸುತ್ತಿದ್ದು, ನೂರಾರು ತೈಲ ಟ್ಯಾಂಕರ್ಗಳು ದಿಕ್ಕು ತೋಚದೆ ನಿಂತಿವೆ. ಇದರಿಂದ ಜಾಗತಿಕ ತೈಲ ದರ ಶೀಘ್ರವಾಗಿ ಏರುವ ಆತಂಕ ಕಂಡುಬಂದಿದೆ.
ಹಾರ್ಮುಜ್ ಜಲಸಂಧಿ -
ದುಬೈ/ಮಸ್ಕತ್, ಮಾರ್ಚ್ 03: ಇರಾನ್- ಇಸ್ರೇಲ್ ಸಮರದ (Iran- israel War) ಹಿನ್ನೆಲೆಯಲ್ಲಿ ಜಗತ್ತಿನ ಅತ್ಯಂತ ಪ್ರಮುಖ ತೈಲ ಸಾಗಾಣಿಕಾ ಮಾರ್ಗವಾದ ಹಾರ್ಮುಜ್ ಜಲಸಂಧಿಯು (starit of Harmuz) ಪ್ರಸ್ತುತ ಭೀಕರ ‘ಡಿಜಿಟಲ್ ಬ್ಲಾಕೌಟ್’ಗೆ (digital balckout) ಸಾಕ್ಷಿಯಾಗಿದೆ. ಅತ್ಯಾಧುನಿಕ ಎಲೆಕ್ಟ್ರಾನಿಕ್ ಯುದ್ಧತಂತ್ರದ ಭಾಗವಾಗಿ ನಡೆಯುತ್ತಿರುವ ಜಿಪಿಎಸ್ (GPS) ಜಾಮಿಂಗ್ನಿಂದಾಗಿ ನೂರಾರು ತೈಲ ಟ್ಯಾಂಕರ್ಗಳು (oil tankers) ಸಮುದ್ರದ ಮಧ್ಯೆ ದಿಕ್ಕುತೋಚದೆ ನಿಂತಿದ್ದು, ಜಾಗತಿಕ ತೈಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗುವ ಭೀತಿ ಎದುರಾಗಿದೆ.
ಫೆಬ್ರವರಿ 28 ರಂದು ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ಮಿಲಿಟರಿ ಪಡೆಗಳು ಜಂಟಿಯಾಗಿ ನಡೆಸಿದ ‘ಆಪರೇಷನ್ ಎಪಿಕ್ ಫ್ಯೂರಿ’ ದಾಳಿಯ ನಂತರ ಈ ಪ್ರದೇಶವು ಎಲೆಕ್ಟ್ರಾನಿಕ್ ಯುದ್ಧಭೂಮಿಯಾಗಿ ಮಾರ್ಪಟ್ಟಿದೆ. ಜಾಗತಿಕ ತೈಲ ಪೂರೈಕೆಯ ಶೇ. 20 ರಷ್ಟು ಭಾಗವನ್ನು ನಿರ್ವಹಿಸುವ ಈ ಜಲಮಾರ್ಗದಲ್ಲಿ ಈಗ ಹಡಗುಗಳ ಸಂಚಾರ ಸಂಪೂರ್ಣ ಹಳಿ ತಪ್ಪಿದೆ.
ಜಾಮಿಂಗ್, ಸ್ಪೂಫಿಂಗ್ ಹೇಗೆ?
ಹಡಗುಗಳ ಸಂಚರಣಾ ವ್ಯವಸ್ಥೆಯನ್ನು (Navigation) ಹದಗೆಡಿಸಲು ಎರಡು ರೀತಿಯ ತಂತ್ರಗಳನ್ನು ಬಳಸಲಾಗುತ್ತಿದೆ.
ಜಾಮಿಂಗ್: ಉಪಗ್ರಹ ಸಂಕೇತಗಳನ್ನು ಪ್ರಬಲ ರೇಡಿಯೊ ಶಬ್ದದ ಮೂಲಕ ಅಡಚಣೆ ಮಾಡುವುದು. ಇದು ಜೋರಾದ ಸೈರನ್ ಸದ್ದಿನಲ್ಲಿ ಪಿಸುಮಾತು ಕೇಳಿಸದಂತೆ ಮಾಡುವ ತಂತ್ರದಂತಿದೆ.
ವಂಚನೆ (Spoofing): ಇದು ಅತ್ಯಂತ ಅಪಾಯಕಾರಿ. ಇಲ್ಲಿ ಹಡಗಿನ ಕಂಪ್ಯೂಟರ್ಗೆ ನಕಲಿ ನಿರ್ದೇಶಾಂಕಗಳನ್ನು ಕಳುಹಿಸಲಾಗುತ್ತದೆ. ಇದರಿಂದಾಗಿ ಸಮುದ್ರದ ಮಧ್ಯೆ ಇರುವ ಬೃಹತ್ ಟ್ಯಾಂಕರ್ಗಳು ನಕ್ಷೆಯಲ್ಲಿ ವಿಮಾನ ನಿಲ್ದಾಣದ ರನ್ವೇ ಮೇಲೋ ಅಥವಾ ಒಣ ಭೂಮಿಯ ಮೇಲೋ ಇರುವಂತೆ ತೋರಿಸುತ್ತಿವೆ.
ಇರಾನ್ ಬಳಸುತ್ತಿರುವ ತಂತ್ರಜ್ಞಾನ:
ಇರಾನ್ ಪಡೆಗಳು ಪರ್ಷಿಯನ್ ಕೊಲ್ಲಿಯ ಸುತ್ತ ‘ಅದೃಶ್ಯ ಗುರಾಣಿ’ ನಿರ್ಮಿಸಲು ತಮ್ಮ ಸ್ವದೇಶಿ ತಂತ್ರಜ್ಞಾನವನ್ನು ಬಳಸುತ್ತಿವೆ:
ಕೋಬ್ರಾ V8 (Cobra V8): ಇದು 250 ಕಿ.ಮೀ ವ್ಯಾಪ್ತಿಯಲ್ಲಿ ಉಪಗ್ರಹ ಸಂಕೇತಗಳನ್ನು ಪ್ರತಿಬಂಧಿಸುವ ಸಾಮರ್ಥ್ಯ ಹೊಂದಿದೆ.
ಸಯ್ಯದ್-4 (Sayyad-4): ಇದು ಕ್ಷಿಪಣಿ ವ್ಯವಸ್ಥೆಯಾದರೂ, ಇದರ ರಾಡಾರ್ಗಳನ್ನು ವಿದೇಶಿ ಹಡಗುಗಳ ಸಂಚರಣೆಯನ್ನು ಅಸ್ತವ್ಯಸ್ತಗೊಳಿಸಲು ಬಳಸಲಾಗುತ್ತಿದೆ.
ವಿದೇಶಿ ಪಡೆಗಳ AI ಚಾಲಿತ ಮಾರ್ಗದರ್ಶನ ವ್ಯವಸ್ಥೆಯನ್ನು ಕುರುಡಾಗಿಸುವುದು ಇರಾನ್ನ ಮುಖ್ಯ ಗುರಿಯಾಗಿದೆ.
Iran- Israel War: ಅಬುಧಾಬಿಯಲ್ಲಿ ಸಿಲುಕಿದ ಕನ್ನಡಿಗರು; ನೆರವಿಗೆ ಮನವಿ ಮಾಡಿದ ಕುಟುಂಬ
ಸಮುದ್ರದಲ್ಲಿ ಹೆಚ್ಚಿದ ಅಪಾಯ: 1,100 ಟ್ಯಾಂಕರ್ಗಳ ದಿಗ್ಬಂಧನ
ಸುಮಾರು 33 ಕಿ.ಮೀ ಕಿರಿದಾದ ಈ ಜಲಸಂಧಿಯಲ್ಲಿ ಪ್ರಸ್ತುತ 1,100ಕ್ಕೂ ಹೆಚ್ಚು ನಾಗರಿಕ ಟ್ಯಾಂಕರ್ಗಳು ಸಿಲುಕಿಕೊಂಡಿವೆ. ಡಿಜಿಟಲ್ ಮಾಹಿತಿ ಇಲ್ಲದೆ ಹಡಗುಗಳು ಪರಸ್ಪರ ಡಿಕ್ಕಿಯಾಗುವ ಅಪಾಯ ಹೆಚ್ಚಿದೆ. ಮಾರ್ಚ್ 1 ರಂದು ಇದೇ ಗೊಂದಲದಿಂದಾಗಿ ‘ಟ್ಯಾಂಕರ್ ಸ್ಕೈಲೈಟ್’ ಎಂಬ ನೌಕೆ ಅಪಘಾತಕ್ಕೀಡಾಗಿದ್ದು, ಅದರಲ್ಲಿದ್ದ 15 ಭಾರತೀಯರು ಸೇರಿದಂತೆ 20 ಸಿಬ್ಬಂದಿಯನ್ನು ತುರ್ತಾಗಿ ಸ್ಥಳಾಂತರಿಸಲಾಗಿದೆ.
ಜಾಗತಿಕ ಆರ್ಥಿಕತೆಗೆ ಪೆಟ್ಟು
ಆಧುನಿಕ ಶಿಪ್ಪಿಂಗ್ ಸಂಪೂರ್ಣವಾಗಿ ಡಿಜಿಟಲ್ ಡೇಟಾವನ್ನು ಅವಲಂಬಿಸಿದೆ. ಈ ರೇಡಿಯೊ ತರಂಗಗಳ ಯುದ್ಧವು ಜಾಗತಿಕ ಆರ್ಥಿಕತೆಯನ್ನು ಒತ್ತೆಯಾಳಾಗಿ ಇರಿಸುವ ಸಾಧ್ಯತೆ ಇದೆ ಎಂದು ವಿಶ್ಲೇಷಕರು ಎಚ್ಚರಿಸಿದ್ದಾರೆ.
