ಯಾರಿಗೂ ಸಿಗದ ಸ್ಪಷ್ಟ ಬಹುಮತ, ನೆತನ್ಯಾಹು ಬಣಕ್ಕೆ ಹಿನ್ನಡೆ? ಇಸ್ರೇಲ್ ಚುನಾವಣೋತ್ತರ ಸಮೀಕ್ಷೆ ಹೇಳೋದೇನು?

ಟೆಲ್‌ ಅವೀವ್‌: ಅಕ್ಟೋಬರ್ 27, 2026 ರಂದು ನಡೆದ ಇಸ್ರೇಲ್‌ನ ಪ್ರಮುಖ ಸಂಸತ್ ಚುನಾವಣೆಯ ಚುನಾವಣೋತ್ತರ ಸಮೀಕ್ಷೆಗಳು (Israel Exit Polls) ಯಾವುದೇ ಪಕ್ಷ ಅಥವಾ ಮೈತ್ರಿಕೂಟಕ್ಕೆ ಸ್ಪಷ್ಟ ಬಹುಮತ ಸಿಗದಿರುವುದನ್ನು ತೋರಿಸಿವೆ. ಪ್ರಸ್ತುತ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಬಲಪಂಥೀಯ ಒಕ್ಕೂಟ ಮತ್ತು ಮಾಜಿ ಸೇನಾ ಮುಖ್ಯಸ್ಥ ಗಾಡಿ ಐಸೆನ್‌ಕೋಟ್ ನೇತೃತ್ವದ ವಿರೋಧ ಪಕ್ಷಗಳ ಒಕ್ಕೂಟದ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದ್ದು, ರಾಜಕೀಯ ಬಿಕ್ಕಟ್ಟು ಸೃಷ್ಟಿಯಾಗುವ ಮುನ್ಸೂಚನೆ ಸಿಕ್ಕಿದೆ.

ಮಂಗಳವಾರ ಮೂರು ಪ್ರಮುಖ ಪ್ರಸಾರಕರಾದ ಚಾನೆಲ್ 13, ಚಾನೆಲ್ 12 ಮತ್ತು ಸಾರ್ವಜನಿಕ ಪ್ರಸಾರಕ ಕಾನ್ ಬಿಡುಗಡೆ ಮಾಡಿದ ಅಂದಾಜಿನ ಪ್ರಕಾರ, 120 ಸದಸ್ಯರ ನೆಸ್ಸೆಟ್‌ನಲ್ಲಿ ನೆತನ್ಯಾಹು ಅವರ ಒಕ್ಕೂಟವು ಸುಮಾರು 50 ಸ್ಥಾನಗಳನ್ನು ಪಡೆಯಲಿದೆ, ಇದು ಸಂಸತ್ತಿನ ಬಹುಮತಕ್ಕೆ ಅಗತ್ಯವಿರುವ 61 ಸ್ಥಾನಗಳಿಗಿಂತ ಬಹಳ ಕಡಿಮೆಯಾಗಿದೆ. ವಿರೋಧ ಪಕ್ಷವು 52-53 ಸ್ಥಾನಗಳನ್ನು ಗೆಲ್ಲುವ ನಿರೀಕ್ಷೆಯಿದ್ದರೆ, ಅರಬ್ ನೇತೃತ್ವದ ಪಕ್ಷಗಳು 17-18 ಸ್ಥಾನಗಳನ್ನು ಪಡೆಯುವ ನಿರೀಕ್ಷೆಯಿದೆ.

ಕೇಂದ್ರ ಚುನಾವಣಾ ಸಮಿತಿಯ ಪ್ರಕಾರ, ಮತದಾನದ ಪ್ರಮಾಣವು ಶೇಕಡಾ 77.7 ಕ್ಕೆ ತಲುಪಿದ್ದು, ಇದು 2022 ರ ಚುನಾವಣೆಗಿಂತ ಶೇಕಡಾ 7.1 ರಷ್ಟು ಹೆಚ್ಚಾಗಿದೆ ಮತ್ತು 1999 ರ ನಂತರದ ಅತ್ಯುನ್ನತ ಮಟ್ಟವಾಗಿದೆ. , i24NEWS ನಡೆಸಿದ ಪ್ರತ್ಯೇಕ ನಿರ್ಗಮನ ಸಮೀಕ್ಷೆ ಪ್ರಕಾರ ನೆತನ್ಯಾಹು ಪಕ್ಷ ಹೆಚ್ಚಿನ ಸ್ಥಾನ ಗೆಲ್ಲಲಿದೆ. ಅವರ ಬಣಕ್ಕೆ 55 ಸ್ಥಾನಗಳು ಮತ್ತು ಐಸೆನ್‌ಕೋಟ್ ಅವರ ಶಿಬಿರಕ್ಕೆ 49 ಸ್ಥಾನಗಳು ಸಿಗುತ್ತವೆ ಎಂದು ಅಂದಾಜಿಸಿದೆ, ಅರಬ್ ನೇತೃತ್ವದ ಪಕ್ಷಗಳು 16 ಸ್ಥಾನಗಳನ್ನು ಗೆಲ್ಲುವ ನಿರೀಕ್ಷೆಯಿದೆ.

ಸೋಶಿಯಲ್ ಮೀಡಿಯಾದಲ್ಲಿ 21 ಲಕ್ಷ ಫಾಲೋವರ್ಸ್, ಚುನಾವಣೆಯಲ್ಲಿ ಕೇವಲ 33 ಮತ: ಇನ್‌ಫ್ಲುಯೆನ್ಸರ್‌ಗೆ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲಿ ಹೀನಾಯ ಸೋಲು

ಅರಬ್ ನೇತೃತ್ವದ ಪಕ್ಷಗಳು ಪ್ರಬಲವಾಗಿ ಕಾರ್ಯನಿರ್ವಹಿಸುವ ನಿರೀಕ್ಷೆಯಿದ್ದು, ಚುನಾವಣಾ ನಂತರದ ಮಾತುಕತೆಗಳಲ್ಲಿ ತಮ್ಮ ಪ್ರಭಾವವನ್ನು ಹೆಚ್ಚಿಸುವ ಸಾಧ್ಯತೆಯಿದೆ. ಈ ಪಕ್ಷಗಳು ನೆತನ್ಯಾಹು ಅವರನ್ನು ವಿರೋಧಿಸುತ್ತವೆಯಾದರೂ, ಅವು ಔಪಚಾರಿಕವಾಗಿ ಯಹೂದಿ ನೇತೃತ್ವದ ಪ್ರಮುಖ ವಿರೋಧ ಪಕ್ಷದ ಭಾಗವಾಗಿಲ್ಲ. ಯಾವ ಬಣಕ್ಕೂ ಸ್ಪಷ್ಟ ಬಹುಮತ ಸಿಗದ ಕಾರಣ, ಮುಂದಿನ ದಿನಗಳಲ್ಲಿ ತೀವ್ರ ರಾಜಕೀಯ ಒಪ್ಪಂದಗಳು ಮತ್ತು ಮೈತ್ರಿ ಮಾತುಕತೆಗಳು ನಡೆಯಲಿವೆ. ಒಂದು ವೇಳೆ ಯಾವುದೇ ಒಕ್ಕೂಟವು ಸರ್ಕಾರ ರಚಿಸಲು ವಿಫಲವಾದರೆ, ಇಸ್ರೇಲ್ ಮುಂಬರುವ ತಿಂಗಳುಗಳಲ್ಲಿ ಮತ್ತೊಂದು ಚುನಾವಣೆಯನ್ನು ಎದುರಿಸಬೇಕಾಗಬಹುದು. ಅಧಿಕೃತ ಮತ್ತು ಅಂತಿಮ ಫಲಿತಾಂಶಗಳು ನವೆಂಬರ್ ಮೊದಲ ವಾರದಲ್ಲಿ ಪ್ರಕಟವಾಗಲಿವೆ.