ಹೊರ್ಮುಜ್ ಜಲಸಂಧಿ ಬಿಕ್ಕಟ್ಟು: ಭಾರತೀಯ ಹಡಗುಗಳಿಗೆ ನೌಕಾಪಡೆಯೇ ಶ್ರೀರಕ್ಷೆ, ಬೆಂಗಾವಲು ಹೇಗಿದೆ ಗೊತ್ತಾ?

ನವದೆಹಲಿ, ಮಾ.17: ಇರಾನ್‌ನಿಂದ ಗಲ್ಫ್ ದೇಶಗಳ (Gulf nations) ಮೇಲೆ ನಡೆದ ದಾಳಿಗಳು ಮತ್ತು ವಿಶ್ವದ ಸುಮಾರು ಐದನೇ ಭಾಗದ ತೈಲ ಸರಬರಾಜು ಸಾಗುವ ಪ್ರಮುಖ ಸಮುದ್ರ ಮಾರ್ಗವಾದ ಹೊರ್ಮುಜ್ ಜಲಸಂಧಿಯ (Strait of Hormuz Crisis) ಮೇಲಿನ ಅದರ ಹಿಡಿತವು, ಜಾಗತಿಕ ಇಂಧನ ಸಂಕಷ್ಟದ ಬಗ್ಗೆ ಹೆಚ್ಚುತ್ತಿರುವ ಆತಂಕಗಳಿಗೆ ಕಾರಣವಾಗಿದೆ.

ಪರ್ಶಿಯನ್ ಕೊಲ್ಲಿಯನ್ನು ಓಮಾನ್ ಕೊಲ್ಲಿಯೊಂದಿಗೆ ಮತ್ತು ಅರಬ್ಬಿ ಸಮುದ್ರದೊಂದಿಗೆ ಸಂಪರ್ಕಿಸುವ ಈ ಸಮುದ್ರ ಮಾರ್ಗವು, ವಿಶ್ವದ ಸುಮಾರು 25 ಶೇಕಡಾ ತೈಲ ಸಾಗಣೆಗೆ ಪ್ರಮುಖ ದಾರಿ ಆಗಿದೆ. ಭಾರತಕ್ಕೆ ಇದು ಇನ್ನಷ್ಟು ಮಹತ್ವದ್ದಾಗಿದ್ದು, ದೇಶದ ಸುಮಾರು 80 ಶೇಕಡಾ ಇಂಧನ ಆಮದುಗಳು ಇದೇ ಮಾರ್ಗದ ಮೂಲಕ ಸಾಗುತ್ತವೆ.

ಹೆಚ್ಚುತ್ತಿರುವ ಉದ್ವಿಗ್ನತೆಯ ನಡುವೆ, ಆಪರೇಶನ್ ಸಂಕಲ್ಪ್ ಅಡಿಯಲ್ಲಿ ಗಲ್ಫ್ ಪ್ರದೇಶದಲ್ಲಿ ನಿಯೋಜಿಸಲಾದ ಭಾರತೀಯ ನೌಕಾಪಡೆಯ ಯುದ್ಧನೌಕೆಗಳು ಪ್ರಮುಖ ಸಮುದ್ರ ಮಾರ್ಗಗಳ ಮೂಲಕ ಭಾರತಕ್ಕೆ ಬರುತ್ತಿರುವ ಹಡಗುಗಳನ್ನು ರಕ್ಷಿಸುತ್ತಾ ನಿರಂತರ ನಿಗಾವಹಿಸುತ್ತಿವೆ. ಇತ್ತೀಚಿನ ನೌಕಾ ಯುದ್ಧನೌಕೆ, ಐಎನ್ಎಸ್ ಸೂರತ್ ಅನ್ನು ಓಮನ್ ಕೊಲ್ಲಿಯಲ್ಲಿ ನಿಯೋಜಿಸಲಾಗಿದೆ. ಐಎನ್ಎಸ್ ಸೂರತ್ ಆಧುನಿಕ ಕ್ಷಿಪಣಿ ವಿಧ್ವಂಸಕವಾಗಿದ್ದು, ದೀರ್ಘ-ಶ್ರೇಣಿಯ ಮೇಲ್ಮೈಯಿಂದ ಗಾಳಿಗೆ ಕ್ಷಿಪಣಿಗಳು, ಟಾರ್ಪಿಡೊಗಳು ಮತ್ತು ಸಮುದ್ರದಲ್ಲಿ ವಿವಿಧ ಕಾರ್ಯಾಚರಣೆಗಳನ್ನು ನಡೆಸಬಲ್ಲ ವಿವಿಧ ಶಸ್ತ್ರಾಸ್ತ್ರಗಳನ್ನು ಹೊಂದಿದೆ.

ಹೊರ್ಮುಜ್‌ ಜಲಸಂಧಿ ದಾಟಿ ಗುಜರಾತ್‌ ಕರಾವಳಿ ತಲುಪಿದ ಎಲ್‌ಪಿಜಿ ಹೊತ್ತ ಶಿವಾಲಿಕ್‌ ಹಡಗು; ಅಡುಗೆ ಅನಿಲ ಸಮಸ್ಯೆಗೆ ಇನ್ನಾದರೂ ಬೀಳುತ್ತಾ ಬ್ರೇಕ್‌?

ಅಧಿಕಾರಿಗಳ ಪ್ರಕಾರ, ಫೆಬ್ರವರಿ 28 ರಂದು ಇರಾನ್-ಇಸ್ರೇಲ್, ಯುಎಸ್ ಯುದ್ಧ ಪ್ರಾರಂಭವಾದಾಗಿನಿಂದ, ಒಟ್ಟು 611 ನಾವಿಕರನ್ನು ಹೊತ್ತ ಭಾರತಕ್ಕೆ ಬರುವ 22 ಹಡಗುಗಳು ಹೊರ್ಮುಜ್ ಜಲಸಂಧಿಯ ಪಶ್ಚಿಮ ಭಾಗದಲ್ಲಿ ಸಿಲುಕಿಕೊಂಡಿವೆ. ಇತರ ನಾಲ್ಕು ಹಡಗುಗಳು ಮಾರ್ಗದ ಪೂರ್ವ ಭಾಗದಲ್ಲಿ ಸಿಲುಕಿಕೊಂಡಿವೆ.

ಭಾರತೀಯ ನೌಕಾಪಡೆಯ ಕಡಲ್ಗಳ್ಳತನ ವಿರೋಧಿ ಕಾರ್ಯಾಚರಣೆಯು ಗಲ್ಫ್ ಆಫ್ ಏಡನ್‌ನಲ್ಲಿ ನಡೆಯುತ್ತಿದೆ. ಅಲ್ಲಿ ಒಟ್ಟು ಮೂರು ಯುದ್ಧನೌಕೆಗಳನ್ನು ನಿಯೋಜಿಸಲಾಗಿದೆ. ದರೋಡೆಕೋರರನ್ನು ತಡೆಯುವ ಉದ್ದೇಶದಿಂದ ಕಾರ್ಯಾಚರಣೆ ಮುಂದುವರಿದಿದೆ.

ಗಲ್ಫ್ ಆಫ್ ಏಡನ್ ಒಂದು ಪ್ರಮುಖ ಸಮುದ್ರ ಮಾರ್ಗವಾಗಿದ್ದು, ಇದು ಸುಯೆಝ್ ಕಾಲುವೆ ಮತ್ತು ಕೆಂಪು ಸಮುದ್ರವನ್ನು ಸಂಪರ್ಕಿಸುತ್ತದೆ. ಈ ಮಾರ್ಗದ ಮೂಲಕ ಹಡಗುಗಳು ಭಾರತಕ್ಕೆ ಸಾಗುತ್ತವೆ. ಇದರ ಜೊತೆಗೆ, ಭಾರತೀಯ ನೌಕಾಪಡೆಯ ಯುದ್ಧನೌಕೆಗಳು ಅರಬ್ಬೀ ಸಮುದ್ರ, ಬಂಗಾಳ ಕೊಲ್ಲಿ, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು, ಮಾಲ್ಡೀವ್ಸ್ ಹಾಗೂ ಸಿಶೆಲ್ಸ್ ಪ್ರದೇಶಗಳಲ್ಲಿಯೂ ನಿಯೋಜಿಸಲ್ಪಟ್ಟಿವೆ.

ಭಾರತಕ್ಕೆ ತೆರಳುವ 3 ಹಡಗುಗಳಿಗೆ ಹೊರ್ಮುಜ್ ಜಲಸಂಧಿಯ ಮೂಲಕ ಬೆಂಗಾವಲು

ಇತ್ತೀಚೆಗೆ, ಭಾರತದ ಧ್ವಜ ಹೊತ್ತ ಮೂರು ಹಡಗುಗಳು ಹೊರ್ಮುಜ್ ಜಲಸಂಧಿಯ ಮೂಲಕ ಹಾದುಹೋದವು. ಅಮೆರಿಕ ಮತ್ತು ಇಸ್ರೇಲ್ ಜೊತೆಗಿನ ಯುದ್ಧದ ಸಮಯದಲ್ಲಿ ಟೆಹರಾನ್ ಇದನ್ನು ನಿರ್ಬಂಧಿಸಿತು.

ಶಿವಾಲಿಕ್: ಭಾರತದ ಶಿವಾಲಿಕ್ ಎಂಬ ಎಲ್‌ಪಿಜಿ ವಾಹಕವು ಸುಮಾರು 40,000 ಮೆಟ್ರಿಕ್ ಟನ್ ದ್ರವೀಕೃತ ಪೆಟ್ರೋಲಿಯಂ ಅನಿಲವನ್ನು ಹೊತ್ತು ಸೋಮವಾರ (ಮಾ.16) ಗುಜರಾತ್‌ನ ಮುಂದ್ರಾ ಬಂದರನ್ನು ತಲುಪಿತು. ಇದರಲ್ಲಿ 20,000 ಮೆಟ್ರಿಕ್ ಟನ್ ಅನಿಲವನ್ನು ಮುಂದ್ರಾದಲ್ಲಿ ಇಳಿಸಲಾಗಿದ್ದು, ಉಳಿದ 26,000 ಮೆಟ್ರಿಕ್ ಟನ್ ಮಂಗಳೂರಿಗೆ ಕಳುಹಿಸಲು ನಿರ್ಧರಿಸಲಾಗಿದೆ.

ಹೊರ್ಮುಜ್ ಬಳಿಕ ಮತ್ತೂಂದು ಜಲಮಾರ್ಗವನ್ನು ಮುಚ್ಚುತ್ತಾ ಇರಾನ್?

ಜಗ್ ಲಾಡ್ಕಿ: ಸುಮಾರು 81,000 ಟನ್ ಮುರ್ಬನ್ ಕಚ್ಚಾ ತೈಲವನ್ನು ಹೊತ್ತು ಯುಎಇಯಿಂದ ಹೊರಟ ಭಾರತೀಯ ಧ್ವಜ ಹೊತ್ತ ಹಡಗು ಜಗ್ ಲಾಡ್ಕಿ ಸುರಕ್ಷಿತವಾಗಿ ಭಾರತದ ಮಾರ್ಗದಲ್ಲಿದೆ. ಫುಜೈರಾ ತೈಲ ಟರ್ಮಿನಲ್ ಮೇಲೆ ಕಚ್ಚಾ ತೈಲವನ್ನು ಲೋಡ್ ಮಾಡುವಾಗ ದಾಳಿ ನಡೆದ ನಂತರ ಅದು ಫುಜೈರಾ ಸಿಂಗಲ್ ಪಾಯಿಂಟ್ ಮೂರಿಂಗ್‌ನಿಂದ ಸುರಕ್ಷಿತವಾಗಿ ಪ್ರಯಾಣ ಬೆಳೆಸಿತ್ತು. ಈ ಹಿಂದೆ ವರದಿಯಾದಂತೆ ಈ ಹಡಗು ಮುಂದ್ರಾ ಬಂದರಿಗೆ ಬರುವ ಬದಲು ತನ್ನ ಸರಕುಗಳನ್ನು ಸಮುದ್ರದ ಮಧ್ಯದಲ್ಲಿಯೇ ಬಿಡುತ್ತದೆ.

ನಂದಾ ದೇವಿ: ಸುಮಾರು 46,000 ಮೆಟ್ರಿಕ್ ಟನ್ ದ್ರವೀಕೃತ ಪೆಟ್ರೋಲಿಯಂ ಅನಿಲವನ್ನು ಹೊತ್ತ ಮೂರನೇ ಹಡಗು ನಂದಾ ದೇವಿ ಇಂದು ಗುಜರಾತ್‌ನ ವಾಡಿನಾರ್ ಬಂದರಿಗೆ ಆಗಮಿಸಿತು. ಎಲ್‌ಪಿಜಿಯನ್ನು 'ಬಿಡಬ್ಲ್ಯೂ ಬ್ರೀಜ್' ಮತ್ತು 'ಜಗ್ ಪ್ರತಾಪ್' ಎಂಬ ಎರಡು ಪ್ರತ್ಯೇಕ ಹಡಗುಗಳಲ್ಲಿ ಬಿಡುಗಡೆ ಮಾಡಲಾಗುವುದು. ನಂತರ ಅವುಗಳನ್ನು ತಮಿಳುನಾಡಿಗೆ ಕಳುಹಿಸಲಾಗುವುದು.