Fenugreek Health Benefits: ಮೆಂತೆಯನ್ನು ಮಧುಮೇಹಿಗಳು ಎಷ್ಟು ತಿಂದರೆ ಸಾಕು?

ನವದೆಹಲಿ: ಭಾರತೀಯ ಅಡುಗೆ ಮನೆಗಳು ಕೆಲವೊಮ್ಮೆ ದೇಸೀ ಮದ್ದುಗಳ ಉಗ್ರಾಣದಂತೆ ಕೆಲಸ ಮಾಡುತ್ತವೆ. ಉದಾಹರಣೆಗೆ ಮೆಂತೆಯನ್ನೇ ಹೇಳುವುದಾದರೆ, ಮೆಂತೆ ಬೀಜಗಳನ್ನು ತಿನ್ನುವುದು ಮಧುಮೇಹಿಗಳ ಪಾಲಿಗೆ ಅನುಕೂಲಕರ ಎಂಬುದನ್ನು ನಾವೆಲ್ಲ ಕೇಳಿರುತ್ತೇವೆ. ಆದರೆ ಎಷ್ಟು ತಿನ್ನಬೇಕು ಅಥವಾ ಹೇಗೆ ತಿನ್ನಬೇಕು ಎಂಬ ಸ್ಪಷ್ಟತೆ ಇರಬೇಡವೇ? ಮದ್ದು ಹೋಗಿ ಮದ್ದಿನ ಮರವನ್ನೇ ತಿನ್ನಬಾರದಲ್ಲ. ಹೆಚ್ಚಿನ ಪ್ರಮಾಣದಲ್ಲಿ ಮೆಂತೆ ಬೀಜಗಳನ್ನು (Fenugreek Health Benefits) ತಿನ್ನುವುದರಿಂದ ರಕ್ತದಲ್ಲಿನ ಸಕ್ಕರೆ ಅಂಶ ಕುಸಿಯುವ ಅಪಾಯವೂ ಇದೆ. ಹಾಗಾಗಿ ಮಧುಮೇಹಿಗಳು ಮೆಂತೆ ಬೀಜಗಳನ್ನು ಎಷ್ಟು ತಿನ್ನಬೇಕು? ಇದನ್ನು ಚಿಕಿತ್ಸೆ ನೀಡುತ್ತಿರುವ ವೈದ್ಯರಲ್ಲಿ ಹೇಳಬೇಕೇ?

ತಿಂದ ಆಹಾರವನ್ನು ಶಕ್ತಿಯಾಗಿ ಪರಿವರ್ತಿಸುವಲ್ಲಿನ ಚಯಾಪಚಯ ದೋಷವೇ ಮಧುಮೇಹ ಅಮರಿಕೊಳ್ಳುವುದಕ್ಕೆ ಕಾರಣ. ಪಚನ ಕ್ರಿಯೆಯನ್ನು ಮೊದಲಿನಿಂದ ಆರಂಭಿಸುವುದಾದರೆ, ಹೊಟ್ಟೆ ಸೇರಿದ ಆಹಾರವನ್ನು ಗ್ಲೂಕೋಸ್‌ ಆಗಿ ಪರಿವರ್ತಿಸಿ, ರಕ್ತಕ್ಕೆ ಬಿಡುಗಡೆ ಮಾಡುತ್ತದೆ ನಮ್ಮ ದೇಹ. ಇದರ ಪರಿಣಾಮವಾಗಿ, ರಕ್ತದಲ್ಲಿ ಸಕ್ಕರೆಯ ಮಟ್ಟ ಏರಿಕೆಯಾಗಿ ಇನ್ಸುಲಿನ್‌ ಬಿಡುಗಡೆ ಮಾಡುವಂತೆ ಯಕೃತ್ತಿಗೆ ಸಂದೇಶ ಹೋಗುತ್ತದೆ. ಆನಂತರ ಬಿಡುಗಡೆಯಾದ ಶಕ್ತಿಯನ್ನು ದೇಶದ ಕೋಶಗಳು ಹೀರಿಕೊಂಡು, ಬೇಕಾದಂತೆ ಬಳಸಿಕೊಳ್ಳುತ್ತವೆ. ಹಾಗಾದರೆ ಈ ಇಡೀ ಪ್ರಕ್ರಿಯೆಯಲ್ಲಿ ರಕ್ತದಲ್ಲಿನ ಸಕ್ಕರೆ ಅಂಶವನ್ನು ಮೆಂತೆ ಬೀಜ ಹೇಗೆ ನಿಯಂತ್ರಿಸುತ್ತದೆ ಎಂಬುದು ಮುಂದಿನ ಕುತೂಹಲ.

ಇದನ್ನು ಓದಿ:Health Tips: ಖಾಲಿ ಹೊಟ್ಟೆಯಲ್ಲಿ ಒಂದು ಲೋಟ ಅರಿಶಿನದ ನೀರು ಕುಡಿದರೆ ಎಷ್ಟೆಲ್ಲ ಲಾಭಗಳಿವೆ ಗೊತ್ತಾ?

ಮೆಂತೆ ತಿಂದರೇನಾಗುತ್ತದೆ?: ಜರ್ನಲ್‌ ಆಫ್‌ ರಿಸರ್ಚ್‌ ಇನ್‌ ಆಯುರ್ವೇದ ಪತ್ರಿಕೆಯಲ್ಲಿ ಇರುವ ವಿವರಗಳನ್ನು ನೋಡುವುದಾದರೆ, ಮೆಂತೆಯಲ್ಲಿರುವ ಕರಗಬಲ್ಲ ನಾರುಗಳು ಸಕ್ಕರೆ ಅಂಶವನ್ನು ದೇಹ ಹೀರಿಕೊಳ್ಳುವ ಸಮಯವನ್ನು ದೀರ್ಘ ಮಾಡುತ್ತವೆ. ಇದಕ್ಕೆ ಪೂರಕವಾಗಿ ಮೆಂತೆ ಯಲ್ಲಿ ರುವ ಆಲ್ಕಲಾಯ್ಡ್‌ಗಳೂ ಕೆಲಸ ಮಾಡುತ್ತವೆ. ಇದರಿಂದ ರಕ್ತದಲ್ಲಿನ ಸಕ್ಕರೆ ಅಂಶ ಮತ್ತು ಇನ್ಸು ಲಿನ್‌ಗೆ ಪ್ರತಿರೋಧ ತೋರುವುದು ಕಡಿಮೆಯಾಗುತ್ತದೆ. ಹಾಗಾಗಿ ಫಾಸ್ಟಿಂಗ್‌ ಶುಗರ್ (ಉಪವಾಸ ದಲ್ಲಿನ ಸಕ್ಕರೆ ಮಟ್ಟ)‌ ಮತ್ತು (HbA1c) ಎಚ್‌ಬಿಎ೧ಸಿ ಅಥವಾ ಮೂರು ತಿಂಗಳಿನ ಸರಾಸರಿ ಸಕ್ಕರೆ ಮಟ್ಟದಲ್ಲಿಯೂ ಸುಧಾರಣೆ ಕಂಡುಬರುತ್ತದೆ.

ಎಷ್ಟು ತಿನ್ನಬೇಕು?: ಇದಕ್ಕೂ ರೀತಿ-ನೀತಿಯಿದೆ. ಸಾಧಾರಣವಾಗಿ ದೇಹ ತೂಕ ಹೆಚ್ಚಿರುವವರು ಮಧುಮೇಹಿಗಳಾಗಿದ್ದರೆ, ಅವರು ಮೆಂತೆ ತಿನ್ನುವುದರಿಂದ ಹೆಚ್ಚಿನ ಪ್ರಯೋಜನ ಸಾಧಿಸಬಹುದು. ಕಾರಣ, ತೂಕ ಇಳಿಕೆಗೂ ಮೆಂತೆ ಸಹಕಾರಿ. ಮೆಂತೆಯನ್ನು ಪುಡಿ ಮಾಡಿಕೊಂಡು, ಅದನ್ನು ಬಿಸಿ ನೀರಿಗೆ ಹಾಕಿ ಕುಡಿಯಬಹುದು. ಅದಲ್ಲದಿದ್ದರೆ, ರಾತ್ರಿ ನೆನೆಸಿಟ್ಟು ಬೆಳಗಿನ ಖಾಲಿ ಹೊಟ್ಟೆಯಲ್ಲಿ ಅದರ ನೀರಿನೊಂದಿಗೆ ಸೇವಿಸಬಹುದು- ಅಂದಾಜು, ಒಂದು ಟೀ ಚಮಚದಷ್ಟು ಮೆಂತೆಯನ್ನು. ಜರ್ನಲ್‌ ಆಫ್‌ ಡಯಾಬಿಟಿಸ್‌ ಎಂಡ್‌ ಮೆಟಬಾಲಿಕ್‌ ಡಿಸಾರ್ಡರ್‌ನಲ್ಲಿ ತಜ್ಞರು ಹೇಳುವುದು, ದಿನಕ್ಕೆ ಅತಿ ಹೆಚ್ಚೆಂದರೆ 10 ಗ್ರಾಂ ಮೆಂತೆ ಸೇವಿಸಬಹುದು. ಅತಿಯಾಗಿ ಮೆಂತೆ ತಿನ್ನುವುದರಿಂದ ರಕ್ತದಲ್ಲಿನ ಸಕ್ಕರೆ ಅಂಶ ಕುಸಿದು ಅಪಾಯವಾಗಬಹುದು. ಜೊತೆಗೆ, ಮೆಂತೆ ಸೇವನೆಯಿಂದ ಸಕ್ಕರೆ ಮಟ್ಟದಲ್ಲಿ ವ್ಯತ್ಯಾಸ ದಾಖಲಾಗುವುದನ್ನು ಕಾಣಲು ಕೆಲವು ವಾರಗಳು, ಕೆಲವೊಮ್ಮೆ ತಿಂಗಳೂ ಬೇಕಾಗ ಬಹುದು. ಕಾರಣ, ಕೇವಲ ಮೆಂತೆಯೊಂದನ್ನೇ ತಿನ್ನುವುದರಿಂದ ಇದನ್ನು ಸಾಧಿಸಬಹುದು ಎಂಬುದೂ ಸತ್ಯವಲ್ಲ. ಉಳಿದಂತೆ ಆಹಾರಕ್ರಮ ಸರಿಯಾಗಿರಬೇಕು ಮತ್ತು ವ್ಯಾಯಾಮವನ್ನೂ ಕಡ್ಡಾಯವಾಗಿ ಮಾಡಬೇಕು.

ಇದನ್ನೂ ಓದಿ: Benefit of Fenugreek Tea: ನುಗ್ಗೆಸೊಪ್ಪಿನ ಚಹಾದಿಂದ ಸಿಗುವ ಆರೋಗ್ಯ ಲಾಭವೇನು?

ವೈದ್ಯರಲ್ಲಿ ಹೇಳಬೇಕೆ?: ಮೆಂತೆಯೆಂಬುದು ಮನೆಮದ್ದು ತಾನೇ? ಇದನ್ನೂ ವೈದ್ಯರಲ್ಲಿ ಹೇಳಬೇಕೆ? ಹೌದು, ಹೇಳಲೇಬೇಕು. ಮಧುಮೇಹಕ್ಕೆ ಔಷಧಿ ತೆಗೆದುಕೊಳ್ಳುವವರು ಮೆಂತೆ ಬೀಜ ಅಥವಾ ಇನ್ನಾವುದೇ ರೀತಿಯ ಮನೆಮದ್ದು ತಿನ್ನುವುದನ್ನು ತಮ್ಮ ವೈದ್ಯರಿಗೆ ಕಡ್ಡಾಯವಾಗಿ ಹೇಳಬೇಕಾಗುತ್ತದೆ. ಯಾವುದೇ ಔಷದವನ್ನು ನಿಯಮಿತವಾಗಿ ತೆಗೆದು ಕೊಳ್ಳುವವರು ತಮ್ಮನ್ನು ಆಗಾಗ ತಪಾಸಣೆಗೆ ಒಳಪಡಿಸಿಕೊಳ್ಳುವುದು ಅಗತ್ಯ. ಇದರಲ್ಲೂ ಹಾಗೆಯೇ. ಸಕ್ಕರೆ ಮಟ್ಟವನ್ನು ಆಗಾಗ ತಪಾಸಣೆ ಮಾಡಿಸಿಕೊಂಡು, ವೈದ್ಯರೊಂದಿಗೆ ಚರ್ಚಿಸುವುದು ಅಗತ್ಯ. ಅತಿಯಾಗಿ ಮೆಂತೆ ತಿನ್ನುವುದರಿಂದ ರಕ್ತದಲ್ಲಿನ ಸಕ್ಕರೆ ಅಂಶ ಕುಸಿದು ಅಪಾಯವಾಗಬಹುದು. ಸಕ್ಕರೆ ಪ್ರಮಾಣ ಹೆಚ್ಚಾದರೆ ಹೇಗೆ ಅಪಾಯವೋ, ಕಡಿಮೆಯಾದರೂ ಅಷ್ಟೇ ಅಪಾಯ. ಹಾಗಾಗಿ ಮಧುಮೇಹಿಯ ಆಹಾರ ಮತ್ತು ಆರೋಗ್ಯಕ್ಕೆ ಸರಿಯಾಗಿ ಔಷಧವನ್ನೂ ವೈದ್ಯರು ನಿಗದಿ ಮಾಡುತ್ತಾರೆ. ಹಾಗಾಗಿ ಮೆಂತೆ ಸೇವನೆಯ ಬಗ್ಗೆ ಮತ್ತು ಪ್ರಮಾಣದ ಬಗ್ಗೆ ವೈದ್ಯರಲ್ಲಿ ಸಮಾಲೋಚನೆ ನಡೆಸುವುದು ಅತಿ ಮುಖ್ಯ.