ಮಧುಮೇಹದ ರೆಟಿನೋಪತಿ: ಇದು ಕೇವಲ ಕಣ್ಣಿನ ಕಾಯಿಲೆಯಲ್ಲ, ಆರೋಗ್ಯ ವ್ಯವಸ್ಥೆಯ ಮುಂದಿರುವ ಸವಾಲು

ಡಾ. ಚೈತ್ರಾ ಜಯದೇವ್, ಹಿರಿಯ ಸಮಾಲೋಚಕರು, ವಿಟಿಯೋ-ರೆಟಿನಾ ವಿಭಾಗ, ನಾರಾಯಣ ನೇತ್ರಾಲಯ, ಬೆಂಗಳೂರು

ದೀರ್ಘಕಾಲದ ಮತ್ತು ಅನಿಯಂತ್ರಿತ ಮಧುಮೇಹ ಹೊಂದಿರುವವರಲ್ಲಿ ಕಂಡುಬರುವ 'ಡಯಾಬಿಟಿಕ್ ರೆಟಿನೋಪತಿ' ಇಂದು ಭಾರತದಲ್ಲಿ ತಡೆಗಟ್ಟಬಹುದಾದ ಅಂಧತ್ವಕ್ಕೆ ಪ್ರಮುಖ ಕಾರಣವಾಗಿದೆ. ಈ ಸ್ಥಿತಿಯು ಕಣ್ಣಿನ ರೆಟಿನಾದಲ್ಲಿರುವ ಸಣ್ಣ ರಕ್ತನಾಳಗಳಿಗೆ ಹಾನಿ ಮಾಡುತ್ತದೆ ಮತ್ತು ಸೂಕ್ತ ಚಿಕಿತ್ಸೆ ನೀಡದಿದ್ದರೆ ಶಾಶ್ವತ ದೃಷ್ಟಿಹೀನತೆಗೆ ಕಾರಣವಾಗಬಹುದು. ಭಾರತದಲ್ಲಿ ಮಧುಮೇಹ ನಿರ್ವಹಣೆಯ ಬಗ್ಗೆ ಜಾಗೃತಿ ಹೆಚ್ಚುತ್ತಿದ್ದರೂ, ಡಯಾಬಿಟಿಕ್ ರೆಟಿನೋಪತಿಯಿಂದ ಉಂಟಾಗುವ ದೃಷ್ಟಿಹೀನತೆ ಮಾತ್ರ ಹೆಚ್ಚುತ್ತಲೇ ಇದೆ. ಇದು ನಮ್ಮ ಕಣ್ಣಿನ ಆರೋಗ್ಯ ರಕ್ಷಣಾ ವ್ಯವಸ್ಥೆಯಲ್ಲಿರುವ ಗಂಭೀರ ನ್ಯೂನತೆಯನ್ನು ಎತ್ತಿ ತೋರಿಸುತ್ತದೆ. ದೇಶದಲ್ಲಿ 101 ದಶಲಕ್ಷಕ್ಕೂ ಹೆಚ್ಚು ಮಧುಮೇಹಿಗಳಿದ್ದು, ಅವರಲ್ಲಿ ಪ್ರತಿ ಐವರಲ್ಲಿ ಒಬ್ಬರು ಈ ಅಪಾಯಕ್ಕೆ ಒಳಗಾಗುವ ಸಾಧ್ಯತೆಯಿದೆ. ಆದರೂ, ಇದರ ಮುನ್ನೆಚ್ಚರಿಕೆ ಮತ್ತು ಆರಂಭಿಕ ಪತ್ತೆಯ ಬಗ್ಗೆ ಅರಿವು ಇಂದಿಗೂ ಕಡಿಮೆಯಿದೆ.

ಡಯಾಬಿಟಿಕ್ ರೆಟಿನೋಪತಿ ಪತ್ತೆಯಾಗದಿರಲು ಕಾರಣವೇನು?

ಈ ಕಾಯಿಲೆಯು ಲಕ್ಷಣಗಳಿಲ್ಲದೆ ಹರಡುವುದು ಇದರ ಪ್ರಮುಖ ಸವಾಲು. ಆರಂಭಿಕ ಹಂತಗಳಲ್ಲಿ ನೋವು ಅಥವಾ ಮಸುಕಾದ ದೃಷ್ಟಿಯಂತಹ ಯಾವುದೇ ಲಕ್ಷಣಗಳು ಕಂಡುಬರುವುದಿಲ್ಲ. ಮಧುಮೇಹ ನಿರ್ವಹಣೆಯು ಕೇವಲ ರಕ್ತದ ಸಕ್ಕರೆಯ ಪ್ರಮಾಣವನ್ನು ನಿಯಂತ್ರಿಸುವುದಕ್ಕೆ ಸೀಮಿತವಾಗಿದೆಯೇ ಹೊರತು, ಕಣ್ಣಿನ ಆರೋಗ್ಯವನ್ನು ಹೆಚ್ಚಾಗಿ ನಿರ್ಲಕ್ಷಿಸಲಾಗುತ್ತಿದೆ. ಕಣ್ಣಿನ ತಪಾಸಣೆಯು ಕೇವಲ ಸಾಂದರ್ಭಿಕವಾಗಿದೆಯೇ ಹೊರತು ದೈನಂದಿನ ಚಿಕಿತ್ಸಾ ಕ್ರಮದ ಭಾಗ ವಾಗಿಲ್ಲ. ಸಾಮಾನ್ಯ ವೈದ್ಯರಿಂದ ನೇತ್ರ ತಜ್ಞರ ಬಳಿಗೆ ರೋಗಿಗಳನ್ನು ಕಳುಹಿಸಲು ಯಾವುದೇ ನಿರ್ದಿಷ್ಟ ಪ್ರೋಟೋಕಾಲ್‌ಗಳಿಲ್ಲ. ಇದರಿಂದಾಗಿ ದೃಷ್ಟಿ ಸಂಪೂರ್ಣ ಮಸುಕಾದ ನಂತರವಷ್ಟೇ ರೋಗಿಗಳು ತಜ್ಞರನ್ನು ಭೇಟಿ ಮಾಡುತ್ತಿದ್ದಾರೆ. ಭಾರತದಲ್ಲಿ ನಡೆದ ಅಧ್ಯಯನವೊಂದರ ಪ್ರಕಾರ, ಮಧುಮೇಹ ಇರುವವರಲ್ಲಿ ಶೇ. 84.8 ರಷ್ಟು ಜನರು ಈ ಹಿಂದೆ ಎಂದಿಗೂ ರೆಟಿನೋಪತಿ ತಪಾಸಣೆಗೆ ಒಳಗಾಗಿಲ್ಲ ಎಂಬ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.

ಇದನ್ನೂ ಓದಿ: Eye Blinking: ಸರಿಯಾಗಿ ಕಣ್ಣು ಮಿಟುಕಿಸುತ್ತೀರಾ?

ತಪಾಸಣೆಯ ಸವಾಲುಗಳು:

ಅನೇಕ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ರೆಟಿನಾ ತಪಾಸಣೆಯ ವ್ಯವಸ್ಥೆಯಿಲ್ಲ. ಅದರಲ್ಲೂ ವಿಶೇಷವಾಗಿ ಸಣ್ಣ ನಗರಗಳು ಮತ್ತು ಗ್ರಾಮೀಣ ಭಾಗಗಳಲ್ಲಿ ರೆಟಿನಾ ಇಮೇಜಿಂಗ್ ಸೌಲಭ್ಯಗಳು ಲಭ್ಯವಿಲ್ಲ. ಕೃತಕ ಬುದ್ಧಿಮತ್ತೆ ಆಧಾರಿತ ಸ್ಕ್ರೀನಿಂಗ್ ಮತ್ತು ಟೆಲಿ-ಆಪ್ತಾಲ್ಮಾಲಜಿ ಭರವಸೆ ಮೂಡಿಸುತ್ತಿದ್ದರೂ, ಅವುಗಳ ಅಳವಡಿಕೆ ಇನ್ನೂ ಮಂದಗತಿಯಲ್ಲಿದೆ. ಜಾಗತಿಕವಾಗಿ ಶೇ. 30 ಕ್ಕಿಂತ ಕಡಿಮೆ ಮಧುಮೇಹಿಗಳು ವಾರ್ಷಿಕ ಕಣ್ಣಿನ ತಪಾಸಣೆ ಮಾಡಿಸಿಕೊಳ್ಳುತ್ತಾರೆ ಮತ್ತು ಭಾರತದಲ್ಲಿ ಈ ಪ್ರಮಾಣ ಇನ್ನೂ ತೀರಾ ಕಡಿಮೆಯಿದೆ.

ರೆಫರಲ್ ವ್ಯವಸ್ಥೆಯ ಕೊರತೆ:

ಸಾಮಾನ್ಯ ವೈದ್ಯರು, ಡಯಾಬಿಟಾಲಜಿಸ್ಟ್‌ಗಳು ಮತ್ತು ನೇತ್ರ ತಜ್ಞರ ನಡುವೆ ಸರಿಯಾದ ಸಮನ್ವ ಯದ ಕೊರತೆಯಿದೆ. ರೋಗಿಗಳನ್ನು ನಿಯಮಿತವಾಗಿ ರೆಟಿನಾ ತಪಾಸಣೆಗೆ ಶಿಫಾರಸು ಮಾಡಲಾಗು ತ್ತಿಲ್ಲ.

ದೃಷ್ಟಿಹೀನತೆಯು ಚಿಕಿತ್ಸೆಯ ಮಿತಿಗಿಂತ ಹೆಚ್ಚಾಗಿ, ಆರೋಗ್ಯ ವ್ಯವಸ್ಥೆಯ ಈ ವೈಫಲ್ಯಗಳಿಂದಲೇ ಸಂಭವಿಸುತ್ತಿದೆ.

ಆರ್ಥಿಕ ಮತ್ತು ಸಾಮಾಜಿಕ ಪರಿಣಾಮಗಳು: ಡಯಾಬಿಟಿಕ್ ರೆಟಿನೋಪತಿಯಿಂದ ಉಂಟಾ ಗುವ ದೃಷ್ಟಿಹೀನತೆಯು ದೇಶದ ಆರ್ಥಿಕತೆಯ ಮೇಲೂ ಗಂಭೀರ ಪರಿಣಾಮ ಬೀರುತ್ತಿದೆ. ಭಾರತ ದಲ್ಲಿ ಇದರಿಂದಾಗಿ ವಾರ್ಷಿಕ ಸುಮಾರು 47,200 ಕೋಟಿ ರೂಪಾಯಿಗಳ ಉತ್ಪಾದಕತೆ ನಷ್ಟವಾಗುತ್ತಿದೆ ಎಂದು ಅಂದಾಜಿಸಲಾಗಿದೆ. ಇದು ಜನರ ಕೆಲಸದ ಸಾಮರ್ಥ್ಯವನ್ನು ಕುಂಠಿತ ಗೊಳಿಸುವುದಲ್ಲದೆ, ದೀರ್ಘಕಾಲದ ಅಂಗವೈಕಲ್ಯಕ್ಕೆ ಕಾರಣವಾಗುತ್ತಿದೆ.

ಡಯಾಬಿಟಿಕ್ ರೆಟಿನೋಪತಿ ಎಂಬುದು ಕೇವಲ ಕಣ್ಣಿನ ಸಮಸ್ಯೆಯಲ್ಲ; ಇದು ನಮ್ಮ ಆರೋಗ್ಯ ವ್ಯವಸ್ಥೆಯು ದೀರ್ಘಕಾಲದ ಕಾಯಿಲೆಗಳನ್ನು ಎಷ್ಟು ಪರಿಣಾಮಕಾರಿಯಾಗಿ ನಿರ್ವಹಿಸುತ್ತದೆ ಎಂಬುದಕ್ಕೆ ಒಂದು ಪರೀಕ್ಷೆಯಾಗಿದೆ. ಜಾಗೃತಿ ಮೂಡಿಸುವುದು, ಮಧುಮೇಹ ಚಿಕಿತ್ಸೆಯ ಜೊತೆಗೆ ನಿಯಮಿತ ರೆಟಿನಾ ತಪಾಸಣೆಯನ್ನು ಕಡ್ಡಾಯಗೊಳಿಸುವುದು ಮತ್ತು ವೈದ್ಯರ ನಡುವಿನ ಸಮನ್ವಯವನ್ನು ಬಲಪಡಿಸುವುದು ಲಕ್ಷಾಂತರ ಭಾರತೀಯರ ದೃಷ್ಟಿಯನ್ನು ಉಳಿಸಲು ಅತಿ ಮುಖ್ಯವಾದ ಹಂತಗಳಾಗಿವೆ.